“Neeni Mino Aqinye Gidana Danddayaasa!”
1. Issi michiyaa aqinye gidida haggaaziyoogan iyyo aybi siyettidee?
1 Kaati B. Palm giyo michiyaa: “Tana hagaa keena keehi ufayssiya woykko ayyaanaaban daro anjjettanaadan oottiya hara ay oosonne demmana danddayikke” yaagaasu. A daro layttau ba goꞌꞌaa yarshshiyoogan, Tohossa Amarkkan deꞌiya CHile biittan, issi gaxaappe hara gaxaa gakkanau sabbakaydda takkaasu. Kumetta wodiyaa haggaaziyaageeti demmido ufayssiya deꞌuwaa qoppiyoogan, issi uri nena: “Neeni mino aqinye gidana danddayaasa!” gaana danddayees.
2. Ayyaanaabaa oosuwaa oottiyoogee daro ufayssaa demissiyoy aybissakko qonccissa.
2 Ufayssiya Deꞌo Ogiyaa: Nuussi Leemiso gidiya Yesuusi, ba Aawaa sheniyaa poliyoogan wozanappe ufayttiis. (Yoh. 4:34) Yaatiyo gishshau, tumu ufayssay beettiyoy Yihoowayyo goynniyoogaara gayttida oosuwaa oottiyoogaana gidiyoogaa, bana kaalliyaageetuyyo Yesuusi wozanappe tamaarissiis. Yihoowa ufayssiya oosuwaa wozanappe oottiyo wode, ufayssaa demmoos. Hegaa bollankka, harata maaddanau daro wodiyaa, wolqqaanne miishshaa goꞌettiyo wode, nu ufayssay gujjees.—Oos. 20:31, 35.
3. Daro saatiyaa haggaaziyoogan ayba ufayssaa demmana danddayiyoo?
3 Daro saatiyaa haggaazido payduwan, Geeshsha Maxaafaa xannaꞌiya hara asata demmi xannaꞌissidi ufayttiyo daro injjiyaa demmoos. Nuuni demmiyo daro asati loꞌꞌo zaaruwaa immennaageeta milatikkonne, haggaazuwan meeziyaanne hiillaa gujjiiddi biyo wode, nu haggaazo moottay kase nu qoppidoogaadan gidennan, daro ayfe demmiyoosa gidiyoogaa akeekana danddayoos. Issi layttaa gidiyaagaa aqinye gididi oottoogaappe guyyiyan, aqinyeti Aqinye Timirtte Keettan loohoosona; eti he tamaaridobaa ubbaa goꞌettana danddayoosona. (2 Xim. 2:15) Nuuni aggennan haggaaziyo wode, takkidi ayfiya, tumaa zerettaa zerana danddayoos.—Era. 11:6.
4. Timirttiyaa wurssana haniya yelagati ay qoppana koshshii?
4 Yelagata: Naaꞌꞌantto xekka timirttiyaa wurssana haniyaaba gidikko, ne sinttanaabaa akeekan qoppadii? Daro baggi ne wodiyaa timirttiyaara gayttidabaa oottanau goꞌettaydda takkadasa. Timirttee wuri simmin, timirttiyaara gayttidabaa oottanau goꞌettiyo wodiyaa aybiyyo goꞌettuutii? Hara oosuwaa oottiyoogaappe, aqinye gidanaassi halchanau aybissi woosan qoppikkii? Dumma dumma asau sabbakiyoogan, buzo xekkan xubiyaa baa xoona kiyiyoogan, ne huuphiyaa naagiyoogaa dichiyoogaaninne tamaarissiyo eraa gujjiyoogan neeni demmiyo hiillay deꞌo laytta ubban goꞌees.
5. Yelidaageetinne gubaaꞌiyan deꞌiya asay aqinyetettaa waatidi minttettana danddayiyoonaa?
5 Yelidaageetoo, intte naati kumetta wodiyaa haggaaziyoogaa dooranaadan maaddeetii? Intte haasayiyoobaynne intte loꞌꞌo leemisoy, eti Kawotettaabaa kaseyanaadan daroppe maaddana danddayees. (Maa. 6:33) Naaꞌꞌantto xekka timirttiyaa wurssi simmidi, aqinye gidida Rayi: “Aqinyetettay deꞌuwan daro ufayssaa demmiyo oge gidiyoogaa ta aayyiyaa ubbatoo qoppausu” yaagiis. Gubaaꞌiyan deꞌiya ubbati bantta haasayiyoobaaninne hara ogiyan aqinyetettaa minttettana danddayoosona. Isppeene biittan deꞌiya Hose: “Nu gubaaꞌiyan deꞌiya asay aqinyetettay yelagatuyyo ubba oosuwaappekka aadhidi loꞌꞌo gidiyoogaadan qoppees. Aqinyetettaa xeelliyaagan eti nashshiyoogee, immiyo qofaynne hara maadoy aqinyetettaa doommanau tau deexxennaadan oottiis” yaagiis.
6. Haꞌꞌi aqinye gidiyo koshshay nuussi baynnaba gidikko, ay oottana danddayiyoo?
6 Xubiyaa Xooni Kiyiyoogaa: SHin neeni, ‘Taassi aqinyetettaa koshshi baawa’ giyaaba gidikkoshin? Neessi hegaadan siyettiyaaba gidikko, neeyyo siyettiyaabaa Yihoowayyo yootada, ‘Taani aqinye gidana danddayiyaakkonne erikke; shin nena ufayssiyaabaa oottanau koyays’ yaagada woossa. (Maz. 62:8; Lee. 23:26) Yaatada, a Qaalaappenne a dirijjitiyaappe kaaletuwaa koya. Daro aqinyeti kumetta wodiyaa haggaaziyaageeta gidanaadan denttettiday, kaafiya aqinye gidiyoogan aqinyetettay demissiyo ufayssaa kasetidi ‘xeelli beꞌiyoogaa.’—Maz. 34:8.
7. Aginan nuuppe koyettiya 70 saatiyaa haggaazana danddayennabadan hirggiyoogaa waanidi aggana danddayiyoo?
7 Aginan neeppe koyettiya 70 saatiyaa haggaazana danddayennabadan qoppiyaaba gidikko, ay oottana danddayay? Eta hanotay neegaara issi mala gidido aqinyetuyyo hegaa ayssi yootikkii? (Lee. 15:22) Yaatada, neeni kaallana danddayiyo amarida prograamiyaa giigissa. Darin koshshennabaa oottiyo wodiyaappe poxxin, haggaazuwaassi wodiyaa demmiyoogee danddayettiyaaba gidiyoogaa akeekana danddayaasa.—Efi. 5:15, 16.
8. Nu hanotaa wodiyaappe wodiyan qorana koshshiyoy aybissee?
8 Ne Hanotaa Zaarettada Qora: Nu hanotay darotoo laamettees. Wodiyaappe wodiyan ne hanotaa qoriyoogee loꞌꞌo. Leemisuwau, xurataa kiyanau matadii? Ba layttay gakkennan xurataa kiyida Randi: “Ha kuushshay taaninne ta keettayiyaa aqinyetettaa doommanaadan oottiis; qassi aassiyaageeti keehippe koshshiyo heeri biidi haggaazanaadan injjiyaa medhiis. Ha kuushshaappe denddidaagan zawi baynna anjjuwaa demmaas; shin ubbaappe aadhiya anjjoy, loꞌꞌo zoriya wozanaa demmidoogaa” yaagiis.
9. Aqo laggeti ay qoppana koshshii?
9 Issi issi aqo laggeti bantta hanotaa loytti qoridi, hara oosuwaa kumetta wodiyau naaꞌꞌay oottana koshshennaagaa akeekidosona. Hegaadan oottanau, so asaa deꞌuwaa hanotaa sima oottiyoogaa koshshana danddayees; shin he oosuwau yarshsho oottiyoogee bessiyaaba. Haggaazuwan daro wodiyaa aattanau kumetta wodiyaa oottiyo oosuwaa mata wode aggida michee azinay, Jooni: “Ooso saatiyan ta keettayiyaa ayyaanaabaa oosuwaa oottiyoogaa eriyoogan ufayttiyoogaappe aadhiya harabay baawa” yaagiis.
10. Kiristtaaneti aqinye gidanau qoppanaadan denttettiyay aybee?
10 Siiquwaanne Ammanuwaa Qonccissiyoogaa: Sabbakiyo oosoy nuuni oottana danddayiyo ay oosuwaappenne aadhiyaagaa gidanaadan Yihooway oottiis. Ha galꞌꞌa siraatay mata wode xayin, Yihoowa sunttaa xeesiyaageetu xallay attana. (Roo. 10:13) A wozanappe siiqiyoogeenne i nuuyyo oottidobau galatiyoogee, nuuni mishettidi sabbakanaadan a Naꞌay yootidoogaa azazettanaadan denttettees. (Maa. 28:19, 20; 1 Yoh. 5:3) Hegaa bollikka, nuuni tumuppe wurssetta gallassatun deꞌiyoogaa ammaniyoogee, attida wodiyan alamiyaa kumetta hanotan goꞌettiyoogaappe nuuyyo danddayetta keena ubban haggaazanaadan denttettees.—1 Qor. 7:29-31.
11. Nuuni mino aqinye gidana danddayiyoogaa issi uri yootiyaaba gidikko, hegaa waati xeellana koshshii?
11 Aqinyetettay asay daro saatiyaa sabbakiyoogan aattanaadan koyettido gishshau azazettidi oottiyoogaappe aadhiyaaba; aqinyetettay Xoossau aqidoogaa qonccissiyo oge. Yaatiyo gishshau, neeni mino aqinye gidana danddayiyoogaa issi uri yootikko, hegaa neeyyo loꞌꞌobaa amottidi yootidobadan qoppa. Ha ufayssiya oosuwaa oottiyaageetuugaadan neenikka oottanau qoppa; qassi Xoossaakko woosa.
[Sinttaa 4n deꞌiya qonccissuwaa]
Yelidaageetoo, intte naati kumetta wodiyaa haggaaziyoogaa dooranaadan maaddeetii?
[Sinttaa 5n deꞌiya qonccissuwaa]
Sabbakiyo oosoy nuuni oottana danddayiyo ay oosuwaappenne aadhiyaagaa gidanaadan Yihooway oottiis.