Kase Kumetta Wode Aqinye Gididi Oottidetii?
1. Daroti ayba maataa demmidonaa, shin issoti issoti waatana koshshidee?
1 Aadhida daro layttatun, shaꞌan qoodettiyaageeti kumetta wode haggaaziyaageeta gididi mishiraachuwaa ‘tamaarissiyoonne yootiyo’ maataa demmidosona. (Oos. 5:42) SHin, issoti issoti dumma dumma gaasuwan aqinye gididi oottiyoogaa aggidosona. Intte issi wode kumetta wode aqinye gididi oottidaba gidikko, zaarettidi aqinye gidana danddayiyaakkonne haꞌꞌi intte hanotaa qoridetii?
2. Kase aqinye gididi oottidaageeti haꞌꞌi bantta hanotaa qorana koshshiyoy aybissee?
2 Hanotay Laamettees: Intte aqinye gidiyoogaa agganaadan oottida hanotay haꞌꞌi deꞌennan aggana danddayees. Leemisuwau, aginan aginan 90 saatiyaa haggaazana danddayenna gishshau aqinye gidiyoogaa aggidaba gidikko, haꞌꞌi aqinyeti haggaazanaadan koyettiyay 70 saate gidiyo gishshau, zaarettidi aqinye gidana danddayeetii? Intte aqinye gidiyoogaa aggoosappe oosuwaara woy so asaa aawatettaara gayttidabay kaseegaa mala gidennee? Payyatettaara gayttidaagan aqinye gidiyoogaa aggida, layttay 89 gidido issi michiyaa zaarettada aqinye gidaasu. A issi layttappe dariya wodiyau hosppitaaliyaa sahettada babeenna gishshau, zaarettada aqinye gidana danddayiyoobadan qoppaasu.
3. Issi uri aqinye gidanaadan maaddanau so asay ayba ogiyan hashetana danddayii?
3 Intte kase aqinye gidana xayikkonne, intte soo asaappe issi uri cima aayyiyo woy aawaa xeelliyoogaa mala so asaappe issuwaa maaddanau aqinye gidiyoogaa aggidaba gidana danddayees. (1 Xim. 5:4, 8) Hegaadaana gidikko, intte woy intte sooppe hara uri aqinye gidiyoogaa aggida ura maaddana danddayeetii? Hanotaa issippe aybissi tobbekketii? (Lee. 15:22) So asay bantta sooppe issi uri aqinye gidanaadan hashetiyo wode, ubbaykka maaddiyaaba oottidobadan qoppiyoogee bessiyaaba.
4. Intte haꞌꞌi zaarettidi aqinye gidanau danddayennaba gidikko waatana danddayeetii?
4 Haꞌꞌi intte hanotay zaarettidi aqinye gidanau danddayissennaba gidikko, hidootaa qanxxoppite. Intte hegaadan oottanau giigidaageeta gidiyoogee Yihoowa ufayssees. (2 Qor. 8:12) Intte aqinye gidiyo wode demmido eraa haꞌꞌi haggaazuwan goꞌettite. Intte amottiyoobay woossiyo keehippe koshshiyaaba gido; qassi intte hanotaa laammana danddayiyo wodiyaa akeekite. (1 Yoh. 5:14) Intte wodeppe zaarettidi kumetta wode aqinye gidiyoogan ufayttana mala, Yihooway intteyyo “oosoi kumido aaho” penggiyaa dooyana danddayees!—1 Qor. 16:9.