Wolqqaama Markkatettaa
1. Yesuusa Hayquwaa Hassayiyo Baalaa wode, oorattati haasayaappe harabaa ay nashshana danddayiyoonaa? Qonccissa.
1 Hegee hananay awude? Yesuusa Hayquwaa Hassayiyo Baalaa bonchiyo omarssi. Asay nunaara bonchanaadan shoobbanau darobay oosettiis. Oorattati nashshana danddayiyoobay eti siyiyooba xalla gidenna. Issi maccaasiyaa Yesuusa Hayquwaa Hassayiyo Baalan beetta simmada, a beꞌidobaa, giishin issoy issuwaara siiqettiyoogaa, qassi bantta dosan oottiyaageeti keexxidonne loytti oyqqido loꞌꞌiya, geeshsha addaraashaa nashshiyoogaa yootaasu. Yaatiyo gishshau, layttaa giddon aybippenne xoqqu ootti xeelliyo he wodiyan, haasayaa shiishshiyaagaa xalla gidennan nuuni ubbay markkattiyoobaa oottoos.—Efi. 4:16.
2. Nuuni ubbay oorattatuyyo markkattana danddayiyoy ayba ogiyaanee?
2 Oorattata Loytti Sarotite: Nuuni oorattata pashkki giidi ufayssan sarotiyoogee markkattiyo issi oge. (Yoh. 13:35) Intte ubba asaa haasayissana danddayennaba gidikkokka, intte matan uttidaageeta pashkki gi sarotidi, etaara erettana danddayeeta. (Ibr. 13:1, 2) Oonanne erennaba milatiya, oorattata akeekite. Asaa shoobbiyo wode, eti shoobiyaa woraqataa ekkidaageeta gidana danddayoosona. “Neeni hagaappe kase ya eray?” yaagidi oychana danddayeeta. Inttenaara uttanaadan shoobbite; eti oychiyo ayba oyshinne deꞌikko zaarite. He sohuwaa hara gubaaꞌee goꞌettanaadan intte gubaaꞌee sohuwaara kiyiyaaba gidikko, “Ha shiiquwaa xeelliyaagan ne qofaa eranau koyays. Haroode gayttana danddayiyoo?” giidi oychana danddayeeta.
3. Aassiyoogaa aggidaageeta waatidi mokki ekkana danddayiyoo?
3 Aassiyoogaa Aggidaageeta Mokkite: Gubaaꞌiyaa darotoo yeennaageeta gujjin, aassiyoogaa aggidaageeti Yesuusa Hayquwaa Hassayiyo Baalan layttan layttan shiiqiyoogee erettidaagaa. Eta mokki ekkite; qassi eti yiidoogan wozanappe ufayttiyoogaa yootite. (Roo. 15:7) Gubaaꞌiyaa cimati, eti gubaaꞌiyaa shiiquwaa yaanaadan minttettanau eta soo takkennan baana danddayoosona. Baalan beettida daroti bantta siyidobaa xalla gidennan, ‘nu loꞌꞌo oosuwaa akeekidi, Xoossaa galatana mala’ woossoos.—1 PHe. 2:12.