Eta Mokkite!
1. Nuuni loyttidi markkattana danddayiyo wodee awugee, qassi aybissi?
1 Layttan layttan bonchiyo Godaa Kahuwaa baalaa wodiyaadan haratussi markkattiyo loꞌꞌo wodee baawa. Godaa Kahuwaa bonchanau, qassi wozuwaa baggaara Yihoowaynne Yesuusi nuna siiqido gita siiquwaabaa siyanau, ha laytti tammu miilooneppe dariya ooratta asay nunaara shiiqana giidi qoppoos. (Yoh. 3:16; 15:13) Eti Yihooway immido imotaa gaasuwan etau giigida anjjuwaabaa tamaarana. (Isi. 65:21-23) Gidoppe attin, he baalan haratuyyo markkattiyay haasayaa shiishshiya ishaa xalla gidenna. Imattata wozanappe mokkiyoogan shiiquwan deꞌiya ubbati loyttidi markkattana danddayoosona.—Roo. 15:7.
2. Imattata nuuni pashkki giidi mokki ekkana danddayiyoy ayba ogiyaanee?
2 Uttiyo sohuwaa koyidi, prograamee doommanaashin coꞌꞌu giidi utti bayiyoogaappe, intte matan uttidaageetuura aybissi erettekketii? SHoobettidi yiida asay yayyananne prograamiyaabaa erennan aggana danddayees. Nuuni pashkki giidi sarotiyoogee eti boorasennaadan maaddana danddayees. Issi uri shoobiyaa woraqatay imettin yiidaakkonne eranau, i hegaappe kase nu shiiquwaa yi eriyaakkonne, woy qassi gubaaꞌiyaa asaappe i eriyo uri deꞌiyaakkonne oychana danddayeeta. Woykko he uri intte matan uttanaadan shoobbidi, xiqisiyaanne mazamuriyaa bessana danddayeeta. SHiiqiyoy Kawotettaa Addaraashaana gidikko, yuushshidi issi issibaa bessana danddayeeta. SHiiquwaappe simmin, i oychiyoobaa zaarite. He sohuwaa hara gubaaꞌee goꞌettanaadan intte gubaaꞌee sohuwaara kiyiyaaba gidikko, “Ha shiiquwaa xeelliyaagan ne qofaa eranau koyays. Haroode gayttana danddayiyoo?” giidi oychana danddayeeta. Yaatidi, hara gallassi aara gayttanau keerite. SHiiquwaa yiida, aassiyoogaa aggidaageeta minttettanau cimati akeekancha gidana koshshees.
3. Godaa Kahuwaa bonchanau yiya imattata mokki ekkiyoogee keehippe koshshiyoy aybisee?
3 SHoobettidi yaana daroti Yihoowa asay ayyaana gannatiyan ufayssan, sarotettaaninne issippetettan deꞌiyoogaa koyro beꞌanay he gallassi gidana danddayees. (Maz. 29:11; Isi. 11:6-9; 65:13, 14) Baalaappe simmin eti hassayanabay aybee? Hegee daro baggi nuuni eta maaddanau oottiyoobaara gayttidaba.