Nuuni Haggaazuwan Danddayancha Gidana Koshshees
1. Yihooway asaa naata danddayidoogaa waatidi bessidee?
1 Xoossay asaa naata keehi danddayiis. (Kes. 34:6; Maz. 106:41-45; 2 PHe. 3:9) I siiquwan danddayidoogaa bessiya waannabatuppe issoy, alame yuushuwan Kawotettaabaa sabbakiyo oosuwaara gayttidaagan qoncciis. Yihooway asaa naata 2,000 gidiya layttau danddayiis; qassi haꞌꞌikka suure wozanay deꞌiyoogeeta baakko ehiiddi deꞌees. (Yoh. 6:44) Yihoowagaadan danddayancha gidiyoogaa nu haggaazuwan waatidi qonccissana danddayiyoo?
2. Nu haggaazo moottan sabbakiyo wode danddayancha gidiyoogaa waati bessana danddayiyoo?
2 Sooppe Soo Haggaaziyoogaa: Asay nuuni yootiyoobaa siyanau koyenna moottan aggennan sabbakiyoogan Yihoowagaadan danddayancha gidiyoogaa bessoos. (Oos. 5:42) Asay siyanau koyenna wode, qilliicciyo wodenne nu bolli yedetaa gattiyo wodekka danddayidi nu haggaazuwan genccoos. (Mar. 13:12, 13) Koshshay deꞌiyo uraa darotoo son demmana xayikkokka, salettennan zaaretti oychanau baaxetiyoogankka danddayancha gidiyoogaa bessoos.
3. Zaareto oyshaa oychiyo wodenne Geeshsha Maxaafaa xinaateta xannaꞌissiyo wode danddayancha gidana koshshiyoy aybissee?
3 Geeshsha Maxaafaa Xinaateta: Puutiyaa tokkidi dichanau danddayancha gidana koshshees. Nuuni a loytti oyqqana danddayoos; shin a dichaa eesoyana danddayokko. (Yaaq. 5:7) Hegaara issi mala hanotan, issi uraykka ayyaanaaban loddan loddaaninne xekkan xekkan diccees. (Mar. 4:28) Nu xannaꞌissiyoogeeti worddo haymaanootiyaa timirttiyaa woykko Geeshsha Maxaafaara moggenna meeziyaa agganau metootana danddayoosona. Nu xinaateti laamettanaadan sugiyoogan eta dichaa eesoyana koshshenna. Xoossaa ayyaanay he xinaatiyaa wozanaa denttettanau gidiya keena wodee aadhanaadan danddayancha gidana koshshees.—1 Qor. 3:6, 7.
4. Ammanenna nu dabboti tumaa eranaadan nuuni danddayancha gidiyoogee waati maaddii?
4 Ammanenna Dabbota: Ammanenna nu dabboti tumaa eranaadan keehippe koyiyaaba gidikkokka, nu ammanuwaabaa etau yootanau injje wodiyaa naagiyoogan, qassi bolli bollan darobaa yootennaagan danddayancha gidiyoogaa bessoos. (Era. 3:1, 7) Hegee gakkanaashin, tumay nuuni deꞌuwan laamettanaadan maaddidoogaa eti akeekanaadan oottoos; qassi ashkketettaaninne bonchuwan nu ammanuwaabaa yootanau giigi uttoos. (1 PHe. 3:1, 15) Nuuni danddayan haggaaziyoogee kaseegaappe murutanaadaaninne saluwan deꞌiya nu Aaway ufayttanaadan oottees.