Wozanappe “Qarettiyaageeta” Gidite
1. Ha wodiyan asau keehippe koshshiyaabay aybee?
1 Ha wodiyaagaa keena, qaretan maaddana koshshiyo keehi daro asay deꞌi erenna. Iiti iiti biya alamiyaa hanotay, asay ufayttennaagaa, unꞌꞌettiyaagaanne hidooti baynnaagaa gidanaadan oottiis. Miilooniyan qoodettiyaageetuyyo maaduwaa koshshees; nuuni Kiristtaane gidiyoogaadan nu shoorotuyyo wozanappe qoppana bessees. (Maa. 22:39; Gal. 6:10) Hegaadan qoppiyoogaa waati bessana danddayiyoo?
2. Nuuni qaretaa bessana danddayiyo keehi loꞌꞌo ogee awugee?
2 Qareta Oosuwaa: Wurssetti baynna tumu minttettuwau pulttoy Xoossaa xalla. (2 Qor. 1:3, 4) Yihooway nuuni haratuyyo ‘wozanappe qarettiyoogan’ ba leemisuwaa kaallanaadan zorees; qassi Kawotettaa mishiraachuwaa nu shoorotuyyo yootiyo oosuwaa nuussi immiis. (1 PHe. 3:8) Tuggatiya asaa naatu tumu hidootay Xoossaa Kawotettaa xalla gidiyo gishshau, ha oosuwan nuuni danddayiyo ubbabaa oottiyoogee, ‘wozanay meqqidoogeeta’ minttettanau keehi loꞌꞌo oge. (Isi. 61:1) Yihooway ba asau qarettiyoogaappe denddidaagan, mata wode iitatetta ubbaa xayssidi xilloti deꞌana ooratta alamiyaa ehaana.—2 PHe. 3:13.
3. Asaa waatidi Yesuusaagaadan xeellana danddayiyoo?
3 Asaa Yesuusaagaadan Xeellite: Yesuusi cora asau sabbakiyo wodekka, he asaa citan xeelliyoogaappe aadhiyaabaa oottiis. Eti ubbay Xoossaara loꞌꞌo dabbotaa medhanau maadoy koshshiyoogeeta gidiyoogaa qoppiis. Eti heemmiya uri baynna dorssa mala. Yesuusi beꞌidoban keehi qarettido gishshau, hegee i eta danddayan tamaarissanaadan denttettiis. (Mar. 6:34) Nuuni asaa Yesuusi xeellido ogiyan xeelliyoogee, etau huuphe xekkan wozanappe qarettanaadan denttettees. Hegee nu haasayaaninne nu somꞌꞌuwan qonccees. Sabbakiyo oosoy nuuni nu deꞌuwan kaseyiyooba gidees; qassi ubba asaa huuphiyan huuphiyan qofissiyaabaa denttidi etaara haasayanau baaxetoos.—1 Qor. 9:19-23.
4. Nuuni qaretaa maayana koshshiyoy aybissee?
4 Ubba biittan deꞌiya daro asay Kawotettaa kiitaunne etau qoppidi minttettiyaabaa yootidoogau loꞌꞌo zaaruwaa immiiddi deꞌees. Nuuni ubbatoo qaretaa maayiyo wode, qarettiya nu Xoossaa Yihoowa bonchissoosinne ufayssoos.—Qol. 3:12.