Tumaa Haasayana Koshshiyoy Aybissee?
1 Worddo giya qaalay hagaadan birshshettiis; “1. asa balettanau eriiddi yootiyooba woy oottiyooba . . . 2. balibakkiyoogaa woy wuttaawulliyoogaa.” Worddotiya uri tuma gidennabaa harati ammananaadan oottees. He uri worddotiyoogan, tumaa erana bessiya asata cimmees.
2 Asay Worddotiyo Gaasuwaa: Asay dumma dumma gaasuwan worddotees. Issoy issuwaara keesettiyo ha alamiyan, issoti issoti haratuppe aadhanau bantta eraa xeelliyaagan worddotana koshshiyaabadan qoppoosona. Harati worddotidi bantta mooruwaa qottanau maloosona. Harati qassi oottibeennabaa oottida giidi worddo masrajjaa shiishshoosona. Asa sunttaa mooranau, yeellaappe attanau, kase worddotidobaa tuma milatissanau woy balettidi asa miishshaa ekkanau asay worddotees.
3 SHin harati ubbatoo worddotennaba gidikkokka, bantta oottidobay qoncciyaa kiyennaadan, qixaatiyaa yayyiyoogaaninne hegaa mala harabaa yayyiyoogan worddotana danddayoosona. Hegaadan worddotiyoogee polo gidenna gishshataassa. Worddotiyoogaa aggidi ubbatoo tumaa haasayana danddayiyoy ayba ogiyaanee?
4 Tumaa Haasayana Koshshiyoy Aybissee? Tumay nuna Medhidaagee nu ubbaassi kessido maara. A Qaalay, Geeshsha Maxaafay Ibraawe 6:18n, “Xoossai worddotanau danddayenna” yaagees. A Naꞌay, Yesuus Kiristtoosikka saꞌan deꞌiyo wode he maaraa kaalliis. Bana woranau koyiya, Ayhuda haymaanootiyaa kaalettiyaageetuyyo Yesuusi hagaadan giis: “Xoossaappe siyido tumaa yootida tana intte woranau koyeeta. . . . Taani a erikke giikko, inttenadan worddanchcha gidais.” (Yoh. 8:40, 55) “Nagara i oottibeenna; ba doonankka worddo haasayibeenna” gishshau, i nuuyyo leemiso.—1 PHe. 2:21, 22.
5 Leemiso 6:16-19y yootiyoogaadan, nuna medhida Yihooway worddotiyoogaa ixxees. Ha tumancha Xoossay nuuni an nashettanau i kessido maaraadan deꞌana mala koyees. A Qaalay, “Issoi issuwau worddotoppite; aissi giikko, ceega meretaa a oosuwaara intteppe [xayssirggiite]” yaagees. (Qol. 3:9) Worddotiyoogaa agganau koyennaageeta i ixxees; qassi eti deꞌuwaa demmokkona. Mazamure 5:6y, ‘Wordduwaa haasayiyaageeta Xoossay xayssana’ yaagees. Ajjuutaa 21:8y qassi “worddotiyaageeti ubbai,” “naa77antto haiqo” hayqqanaagaa, giishin merinau xayanaagaa yootees. Hegaa gishshau, worddotiyoogaa Xoossay xeelliyo ogiyan xeelliyoogee, nuuni tumaa haasayanaadan keehi maaddees.
(w92 12/15 sinttaa 22, 23ppe ekettidaagaa)