Intte Naata Tamaarissanau Nu Weyb Sayttiyaa Goꞌettite
1. Nu Weyb sayttiyan deꞌiya, “Naata” giya huuphe yohoy giigido halchoy aybee?
1 Nu Weyb sayttee, jw.org, naatuwaa cimaa ubbaa ufayssiya ogiyan giigiis. Nu Weyb sayttiyan (Amaarattuwan) “Geeshsha Maxaafaa Timirttiyaa” giyaagaa giddon “Naata” giya huuphe yohoy naatinne yelidaageeti issoy issuwaara siiqettanaadaaninne Yihoowakko shiiqanaadan maaddees. (Zaa. 6:6, 7) Intte naata tamaarissanau he huuphe yohuwaa waatidi goꞌettana danddayeetii?
2. Intte naatu layttaa hanotaadan etaara xannaꞌiyoobaa waatidi doorana danddayeetii?
2 Hanotaadan Oottite: Ubbaa naatu hanotay dumma dumma. (1 Qor. 13:11) Yaatin, intte naatu layttaa hanotaadan etaara xannaꞌiyoobaa waatidi doorana danddayeetii? Kaallidi deꞌiyaagaadan inttena oychite: ‘Nu naata ufayssiyaabay aybee? Eti ay keenaa akeekiyoonaa? Eti salettennan ay keena wodiyau xannaꞌana danddayiyoonaa?’ Heezzu laytta woy hegaappe guuxxiya naatuura, “Geeshsha Maxaafaappe Taani Tamaariyoobaa” giyaagaa kessidi hegan deꞌiya taarikiyaa tobbana danddayeeta. Hara keettaa asay qassi “Intte Naata Tamaarissite” giyaagan deꞌiya taarikiyaa xannaꞌana danddayees. Hagaappe kaallidi deꞌiya hara qofaakka beꞌite.
3. Yelidaageeti “So Asaa Goynuwaa Projekttiyaa” giyaagaa giddon deꞌiya taarikiyaanne oottiyoobata waatidi loytti goꞌettana danddayiyoonaa?
3 So Asaa Goynuwaa Projekttiyaa: Ha projekttee so asau huuphe gididaageeti bantta naata xannaꞌissanaadan maaddanau giigidabata. Ubba projekttetun deꞌiya taarikiyaa woy oottiyoobaa waatidi goꞌettana danddayiyaakko eranau dawunlode oottiyo shololla zoꞌo malaataa kilke oottidi, “Yelidaageetuyyo Kaaletuwaa” giyaagaa nabbabite. Qalamiyaa tiyiyoogaa mala, misiletuura gayttidabaa intte naata tamaarissanau goꞌettite. Yelagati qassi xannaꞌiyoobata xannaꞌidi wurssanaadan maaddite. Issi projekttiyan oottiyo ubbabay Geeshsha Maxaafan deꞌiya issi taarikiyaara woy qofaara gayttidaba gidiyo gishshau, naatu layttay dumma dumma gidikkokka, so asaa goynuwan issi projekttiyaara gayttidabaa oottoosona.
4. “Yihoowa Dabbo Gida” giyaagaa garssan aybi deꞌii?
4 Yihoowa Dabbo Gida: Nu Weyb sayttiyan ha huuphe yohuwaa garssan deꞌiya biidoy, mazamureenne hara oottiyoobay yelidaageeti bantta guutta naata Xoossaa Qaalaa loyttidi tamaarissanau maaddees. (Zaa. 31:12) Amarida daqiiqa giddon beꞌi wurssiyo biidotun naati keehi koshshiyaabaa tamaaroosona. Qassi koyada demma giyaagaa malabatikka he koshshiyaabaa tamaaranaadan maaddoosona. Naati darotoo mazamuriyaa dosiyo gishshau, qassi mazamuree naati tamaaridobaa hassayanaadan maaddiyo gishshau, Kawotettaa mazamuretinne naata xeelliyaagan xaafido mazamureti wodiyaappe wodiyan Weyb sayttiyan kiyoosona.
5. Yelidaageeti bantta naata tumaa tamaarissanau Yihooway maaddanaadan a oychana koshshiyoy aybissee?
5 Yelidaageetoo, Yihooway intte loꞌꞌo aayonne aawa gidana mala koyees. Hegaa gishshau, intte intte naata tumaa tamaarissanaadan maaddana mala akko woossite. (Daan. 13:8) Intte Yihoowa maaduwan intte naati ‘Kiristtoos Yesuusa ammanidi atotettay beettiyo aadhida eratettay’ deꞌiyoogeeta gidana mala tamaarissana danddayeeta.—2 Xim. 3:15; Lee. 4:1-4.