Haggaazuwan jw.org Sayttiyaa Goꞌetta—“Yihoowa Dabbo Gida”

Inggilizetto jw.org sayttiyan “Geeshsha Maxaafaa Timirttiyaa” giyaagaa garssan naatuyyo giigida “Yihoowa Dabbo Gida” yaagiya huuphe yohoy deꞌees; a garssan qassi mazamureti, biidotinne oottiyoobati deꞌoosona. Haggaazuwan hegaa goꞌetta eray? Naati deꞌiyo aawaa woy aayyiyo Geeshsha Maxaafaa xannaꞌissikko, hegaa a woy o ayssi bessikkii? Hegee a woy o nu Weyb sayttiyan deꞌiya harabaa eranawu koyanaadan denttettana danddayees.

Kawotettaa Oduwaa Paydo 38 asawu immiyo wode, issi ishay issi maccaaseeyyo he trakttiyaa immin a sohuwaara nabbabiyoogaa doommaasu. He trakttiyaabaa eranawu keehi koyiyay daro guutta naati iyyo deꞌoosona. He ishay he trakttiyaabaa qanttan yootiis; qassi zokko baggan deꞌiya nu Weyb sayttiyaa adrashaa bessiis. He maccaasiyaa siyanawu koyido gishshawu, ba moobayliyan Kaaleeba biiduwaappe issuwaa onne i naata bessiis.

Issi michiyaa guutta naati deꞌiyo banaara oottiyaarissi nu Weyb sayttiyaabaanne hegan so asawu maaddiya qofay deꞌiyoogaa yootaasu. He maccaasiyaa ba naatuura jw.org sayttiyaa beꞌaasu. Guyyeppe, maccaasiyaa “Yihoowa Dabbo Gida” giyaagaappe ekettida mazamuriyaappe issuwaa “Qaalaa Yoota” giyaagaa naati so giddon yaa haa giiddi yexxiyoogaa micheessi yootaasu.

Neeni jw.org sayttiyan deꞌiya huuphe yohota eriyoogeenne biidotuppe, mazamuretuppe woy oottiyoobatuppe ne moobayliyan duuqqiyoogee loꞌꞌo. Yaatikko, jw.org sayttiyan deꞌiyaabaa haggaazuwan goꞌettana danddayaasa. Hegee nuuni Godayyo haggaazanawu keehi maaddiya miishsha!—Oos. 20:19.