Haggaazuwan jw.org Sayttiyaa Goꞌetta

Nu Weyb sayttee nuuni ‘saꞌaa gaxaa gakkanaashin’ deꞌiya asawu Kawotettaa mishiraachuwaa yootanawu keehi maaddiya miishsha. (Oos. 1:8) Daro asay jw.org sayttiyaa dooyi erenna. SHin issi aassiyaagee eta bessiyaaba gidikko dooyana danddayoosona.

Woradaa xomoosiya issi ishay Geeshsha Maxaafaa Xannaꞌana Koshshiyoy Aybissee? giyo biiduwaa ba moobayliyan duuqqidi demmido injje ubban asaa bessees. Leemisuwawu, i sooppe so biidi haggaaziyo wode hagaadan gees: “Taani heezzu gita oyshatu zaaruwaa demmana mala maaddiyaaba asawu yootaydda deꞌays; he oyshati, ‘Alamiyan metoy daridoy aybissee? Xoossay hegaa waati giigissanee? I he metuwaa qaaranaashin nuuni waani genccanee?’ yaagiyaageeta. Ha qantta biidoy ha oyshatu zaaruwaa eranawu maaddiyaabaa yootees.” Yaatidi he ishay, he biiduwaa dooyees; dooyidi keettaawaa hanotaa loytti kaallees. He biidoy keehi loꞌꞌo gidiyo gishshawu, daro asay wurana gakkanaashin ayfiyaa shoddennan xeellees. Hegaappe simmidi woradaa xomoosiya ishay, “Neeni Geeshsha Maxaafaa xannaꞌana koyikko, sayttiyan deꞌiya qitsiyaa kunttada oychana danddayiyoogaa haꞌꞌi siyadasa. Haꞌꞌi taani hagan deꞌiyo gishshawu, neeni Geeshsha Maxaafaa waata xannaꞌanaakko qanttan bessana danddayays” yaagees. Keettaaway eeno giikko, i Mishiraachuwaa giyo broshuriyaa goꞌettidi xinaatiyaa doomissees. Keettaawaayyo wodee baynnabaa gidikko, i hara wode xannaꞌissanawu wodiyaa keerees. I shemppi ekkanawu shaye keetti biyo wodekka, ba matan uttida uraa pashkki giidi haasayissi simmidi qommoogaadan gees. Neenikka haggaazuwan jw.org sayttiyaa goꞌettay?