Hananabaa Yootiyaageetuppe Nuuni Xoossaabaa Tamaaroos
Kase wodetun, Xoossay hananabaa yootiyaageeti asaayyo keehi koshshiyaabaa yootanaadan oottiis. He kiitati nuuni Xoossaa anjjuwaa waati demmanaakko bessana danddayiyoonaa? Ee, danddayoosona. Hananabaa yootiya ammanettida heezzu asatuppe ay tamaaranaakko ane beꞌoos.
ABRAHAAMA
Xoossay asaa asaappe shaakkenna, qassi asa ubbaa anjjanawu koyees.
Xoossay hananabaa yootiya Abrahaamayyo, “Ha sa7aa bollan de7iya asai ubbai ne baggaara anjjettana” giidi qaalaa geliis.—Doomettaabaa 12:3.
Nuuni ay tamaariyoo? Xoossay nuna keehi siiqees; qassi attuma gidin, macca gidin, naata gidin Xoossawu azazettiya so asa ubbaa I anjjanawu koyees.
MUUSA
Xoossay keha; qassi A eranawu baaxetiyaageeta anjjees.
Ubbaa Danddayiyaagee Muusee keehi maalaalissiyaabaa oottanaadan awu wolqqaa immiis. Gidikkonne, “Taani nena erana malanne sinttanaukka nenan nashettada daana mala, ne ogiyaa tana tamaarissa” giidi Muusee woossiis. (Kessaabaa 33:13) Xoossay Muuse woosan ufayttiis; qassi ba ogiyaabaanne ba eeshshaabaa I kaseegaappe aaruwan akeekanaadan oottiyoogan A anjjiis. Leemisuwawu, Medhdhidaagee ‘maariyaanne qarettiya’ Xoossaa gidiyoogaa Muusee akeekiis.—Kessaabaa 34:6, 7.
Nuuni ay tamaariyoo? Nuuni attuma gidin, macca gidin, naata gidin Xoossaa loytti eranawu baaxetikko, I nuna ubbaa anjjanawu koyees. Nuuni ayyo waati goynnanaakko, qassi I nuna nashshanawunne anjjanawu koyiyoogaa Xoossay ba Qaalan qonccissiis.
YESUUSA
Yesuusi qarettidi hargge ubbaappe asaa pattiis
Nuuni Yesuusabaa, I oottidobaanne tamaarissidobaa tamaarikko, Xoossay immiyo merinaa anjjuwaa demmana.
Yesuusa deꞌuwaabaanne I tamaarissido darobaa Xoossaa Qaalaappe tamaarana danddayoos. Qooqeta, tulletanne wobbeta pattiyoogaa mala maalaalissiya darobaa oottiyo wolqqaa Xoossay Yesuusawu immiis. I ubba hayqqidaageeta denttiis. Yaatiyoogan, Xoossay sinttappe asa ubbawu ehaana anjjuwaa Yesuusi bessiis. Nuuni ubbay he anjjota demmanawu oottanabaa I hagaadan giis: “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7o.”—Yohaannisa 17:3.
Yesuusi qarettiyaagaanne keha. Yesuusi attumaageetanne maccaageeta, naatanne cimata siiquwan hagaadan giidi shoobbin eti akko shiiqidosona: “Taani ashkkenne wozanappe kauyyiyaagaa gidido gishshau, . . . taappe tamaarite.” (Maatiyoosa 11:29) He wode macca asaa naaqqiya asatuppe Yesuusi dumma; I eta kehatettaaninne bonchchuwan oyqqiis.
Nuuni ay tamaariyoo? Yesuusi asaa keehi siiqiyoogaa bessiis; qassi nuuni issoy issuwaa waati oyqqana bessiyaakko nuussi loꞌꞌo leemiso gidiis.
YESUUSI XOOSSAA GIDENNA
Xoossaa Qaalay “issi Xoossay nuussi deꞌiyoogaanne’ Yesuus Kiristtoosi ba huuphiyaa ziqqi oottidi Xoossaa kiitaa gattiyaagaa gidiyoogaa yootees. (1 Qoronttoosa 8:6) Yesuusi Xoossay baappe aadhdhiyoogaanne Xoossay kiittin I saꞌaa yiidoogaa geeshshidi yootiis.—Yohaannisa 11:41, 42; 14:28.a