Medhdhidaagee Immiyo Merinaa Anjjuwaa Demmana Danddayaasa

Hananabaa yootiya Abrahaama zerettaappe issoy ‘saꞌaa kawotettaa ubbawu’ anjjuwaa ehaanaagaa Xoossay yootiis. (Doomettaabaa 22:18) He zerettay oonee?

Naaꞌꞌu shaꞌa gidiya layttappe kase, Abrahaama zare gidida Yesuusi keehi maalaalissiyaabata oottanaadan Xoossay awu wolqqaa immiis. Xoossay Abrahaamayyo qaalaa gelidobay Yesuusa baggaara asa ubbawu polettanaagaa he maalaalissiyaabati bessoosona.—Galaatiyaa 3:14.

Yesuusi oottido maalaalissiyaabati Xoossay asaa anjjanawu dooridoy A gidiyoogaa shaakki eranaadan maaddees; qassi hegee Xoossay asaa merinawu anjjanawu A waati goꞌettanakkokka bessiis. Yesuusi oottido maalaalissiyaabati ufayssiya A eeshshatuppe amaridaageeta waati qonccissiyaakko akeeka.

Asawu azzanees—Yesuusi hargganchchata pattiis.

Issi wode, inchchirichchay oyqqido issi bitanee Yesuusi A pattanaadan minttidi woossiis. Yesuusi ba kushiyaa yeddidi, A bochchidi, “Taani koyais!” yaagiis. Sohuwaarakka bitanee paxi aggiis.—Marqqoosa 1: 40-42.

Kehatettaa—Yesuusi namisettidaageeta miziis.

Yesuusi asay namisettanaadan koyenna. Darotoo, I guutta oyttaanne guutta moliyaa corayidi maalaalissiya ogiyan shaꞌan qoodettiya asaa miziis. (Maatiyoosa 14:17-21; 15:32-38) Asay ubbay miidi kalliis; kallin keehi daro qumay palahiis.

Qaretaa—Yesuusi hayqqidaageeta denttiis.

Yesuusi I mexi issi naꞌay hayqqin azzanida amꞌꞌeeyyo “qarettidi” naꞌaa hayquwaappe denttiis; O heemmiya hari ooninne baawa.—Luqaasa 7:12-15.