Asaa Siiqiyoogaa Waati Bessana Danddayiyoo?

Nuuni koyro bitaniyaa Adaama zare gidiyo gishshawu, nuuni ubbay issi so asa. So asay issoy issuwaa siiqananne bonchchana koshshikkonne, ha wodiyan hegaa mala siiquwaa demmanaagee metiyaaba. Hegee nuna siiqiya Xoossay koyiyooba gidenna.

XOOSSAA QAALAY SIIQUWAABAA YOOTIYOOBAA

“Ne shooruwaa ne huuphedan siiqa.”—WOGAABAA 19:18.

“Intte morkketa siiqite.”—MAATIYOOSA 5:44.

ASAA SIIQIYOOGAA GIYOOGEE WOYGIYOOGEE?

Xoossay ba Qaalan, 1 Qoronttoosa 13:4-7n, siiquwaabaa waati qonccissidaakko akeeka:

“Siiqoi danddayanchcha. Siiqoi kehees.”

Hagaa qoppa: Harati danddayaaninne kehatettan nena oyqqiyo wode, qassi neeni baliyo wode yiillotennan aggiyo wode, neeyyo aybi siyettii?

“Siiqoi qanaatenna.”

Hagaa qoppa: Harati nena siriyo woy qanaatiyo wode, neeyyo aybi siyettii?

Siiqoy “uuzettenna.”

Hagaa qoppa: Harati ne qofaa bonchchiyo wode, qassi ubbatoo bantta qofaa siyanaadan nena iisettennan aggiyo wode neeyyo aybi siyettii?

“Siiqoi naaqettidobaakka paidenna.”

Hagaa qoppa: Nagaraa oottidi, bantta nagaraappe simmida asata Xoossay atto gaanawu koyees. “I ubbatoo seerenna; . . . hanqqettenna.” (Mazamure 103:9) Nuna yiilloyida issi uri nuussi atto giyo wode nuuni hegaa nashshoos. Hegaa gishshawu, harati nuna yiilloyiyo wode, nuuni etawu atto gaana koshshees.—Mazamure 86:5.

Siiqoy “wordduwan ufaittenna.”

Hagaa qoppa: Nu bolli iitabay gakkiyo wode, nu waayiyan harati ufayttiyoogaa dosokko. Yaatiyo gishshawu, harati ubba qassi nuna naaqqidaageeti tuggatiyo wodekka ufayttokko.

Nuuni Xoossaa anjjuwaa demmanawu haratu layttay, zaree woy haymaanootee ayba gidikkokka nuuni eta siiqana bessees. Nuuni siiquwaa bessana danddayiyo issi ogee maadoy koshshiyoogeeta maaddiyoogaa.