Nu Aaway Yihooway Nuna Keehi Siiqees

1. Issi uri Parsse kawuwaa haasayissanawu koyikko ay oottana koshshii?

NEENI 2,500 gidiya layttappe kase Parsse biittan deꞌiyaabadan qoppa. Neeni issi allaalliyaabaa kawuwaa haasayissanawu koyada I deꞌiyo Suusa katamaa baassa. SHin kawuwaa haasayissanaappe kase, I neeyyo paqqadana koshshees. Paqqadettennan A haasayissanawu malikko, neeni hayqqana danddayaasa!—Ast. 4:11.

2. Nuuni Yihoowa haasayissiyoogaa xeelliyaagan nuussi aybi siyettanaadan I koyii?

² Yihooway he Parsse kawuwaa mala gidenna gishshawu nuuni keehi galatoos! Yihooway deriyaa haariya ooppenne keehi aadhdhikkokka, nuuni awudenne A haasayissana danddayoos. I nuuni aara laꞌatettan haasayanaadan koyees. Leemisuwawu, Yihooway Medhdhidaagaa, Ubbaa Danddayiyaagaa, Ubbaa Haariyaagaa geetettiya bonchcho sunttatun xeegettikkokka, meeze gidida “Aawau” giyo siiqo qaalan A xeeganaadan nuna shoobbiis. (Maa. 6:9) Yihoowakko keehi shiiqidabadan nuussi siyettanaadan I koyiyoogee nuuni ufayttanaadan oottees!

3. Nuuni Yihoowa ‘Aawaa’ giidi xeegana danddayiyoy aybissee, qassi ha huuphe yohuwan nuuni tamaaranabay aybee?

³ Nu deꞌuwawu Pulttoy Yihoowa gidiyo gishshawu nuuni A nu ‘Aawaa’ giidi xeegiyoogee bessiyaaba. (Maz. 36:9) I nu Aawaa gidiyo gishshawu, nuuni awu azazettanawu bessees. I nuna oychchiyoobaa nuuni oottiyo wode, daro anjjota demmana. (Ibr. 12:9) Saluwan gidin woy saꞌan demmiyo merinaa deꞌoy he anjjotuppe issuwaa. Nuuni haꞌꞌikka goꞌettiiddi deꞌoos. Ha huuphe yohoy Yihooway siiqiya Aawaa gidiyoogaa haꞌꞌi waati bessiyaakko, qassi I sinttappe nuna mule aggennaagaa ammanettana danddayiyoy aybissakko qonccissana. SHin koyruwan, saluwan deꞌiya nu Aaway nuna keehi siiqiyoogaanne nuussi qoppiyoogaa ayssi ammanettana danddayiyaakko ane beꞌoos.

YIHOOWAY SIIQIYAANNE QOPPIYA AAWAA

4. Issoti issoti Yihoowa bantta ‘Aawaadan’ xeellanawu metootiyoy aybissee?

⁴ Xoossaa ne aawaadan xeellanawu neeni metootay? Issoti issoti Yihoowaara banttana geeddarissidi pattennabadan qoppoosona. Eti Ubbaa Danddayiya Xoossay etayyo qoppiyoogaa siroosona. SHin siiqiya nu aaway nuussi hegaadan siyettanaadan koyenna. I nuuyyo deꞌuwaa immiis; qassi aara nuuni dabbotanaadan koyees. Kiitettida PHawuloosi ha tumaa yooti simmidi, Yihooway “nuuppe ooyyoonne haaho” gidennaagaa, Ateenan I yootiyoobaa siyiyaageetuyyo qonccissiis. (Oos. 17:24-29) Issi naꞌi siiqiyaanne qoppiya aawaara haasayiyoogaadan, Xoossay nuuni ubbay aara haasayanaadan koyees.

5. Issi michchee leemisuwaappe ay tamaariyoo?

⁵ Harati qassi eta aaway darin woy mule siiqennanne kehenna gishshawu, Yihoowa bantta Aawaadan xeellanawu metootoosona. Issi michchiyaa yootidobaa beꞌa. A hagaadan gaasu: “Ta aaway tana guutti cayees. Taani Geeshsha Maxaafaa xannaꞌiyoogaa doommido wode, saluwan deꞌiya Aawaakko shiiqidabadan qoppiyoogee tawu keehi metiyaaba. SHin, taani Yihoowa era simmin ubbabay laamettiis.” Neeyyo hegaadan siyettii? Yaatikko, Yihooway ooppenne aadhdhiya Aawa gidiyoogaa neenikka erana danddayiyoogaa ammanetta.

6. Maatiyoosa 11:27y yootiyoogaadan, nuuni Yihoowa nuna siiqiya Aawaa oottidi xeellanaadan I nuna maaddido issi ogee aybee?

⁶ Nuuni Yihoowa nuna siiqiya Aawaa oottidi xeellanaadan I nuna maaddido issi ogee Yesuusi haasayidobatinne oottidobati Geeshsha Maxaafan xaafettanaadan oottidoogaa. (Maatiyoosa 11:27 nabbaba.) Yesuusi wottiyoobi baynna ogiyan ba Aawaa milatido gishshawu, “Tana be7ida urai Aawaakka be7iis” gaana danddayiis. (Yoh. 14:9) Yesuusi Yihooway Aawa gidiyoogaa darotoo yootiis. Oyddu Wonggeletu xallan, Yesuusi Yihoowa qonccissanawu ‘Aawaa’ giyo qaalaa 165 gidiya sohuwan goꞌettiis. Yesuusi Yihoowabaa darotoo haasayidoy aybissee? Issi gaasoy Yihooway siiqiya Aawa gidiyoogaa asay ammananaadan oottanaassa.—Yoh. 17:25, 26.

7. Yihooway ba Naꞌaa oyqqido ogiyaappe abaa ay tamaariyoo?

⁷ Yihooway ba Naꞌaa Yesuusa oyqqido ogiyaappe nuuni abaa ay tamaariyaakko qoppa. Yihooway Yesuusa woosaa ubbatoo siyees. I Yesuusa woosaa siyiyoogaa xalla gidennan zaarees. (Yoh. 11:41, 42) Yesuusa gakkida paacee ayba gidikkokka, I bana ba Aaway siiqiyoogaanne maaddiyoogaa yootiis.—Luq. 22:42, 43.

8. Yihooway Yesuusawu koshshiyaabaa immido ogeti aybee?

⁸ Yesuusi ‘Aawaa gaasuwan deꞌiyoogaa’ yootiyoogan, ba Aaway ba deꞌuwaa Pulttonne deꞌuwawu koshshiyaabaa Immiyaagaa gidiyoogaa qonccissiis. (Yoh. 6:57) Yesuusi ba Aawan muleera ammanettiis; qassi Yihooway asatettan awu koshshiyaabaa immiis. Ubbaappe aaruwan, Yihooway Yesuusi ayyo ammanettidi deꞌanaadan maaddiis.—Maa. 4:4.

9. Yihooway Yesuusa siiqiyaanne awu qoppiya Aawa gidiyoogaa waati bessidee?

⁹ Yihooway siiqiya Aawa gidiyo gishshawu, I maaddanaagaa Yesuusi ammanettanaadan oottiis. (Maa. 26:53; Yoh. 8:16) Yihooway Yesuusa qoho ubbaappe naagana xayikkokka, I genccanaadan maaddiis. Ay qohoynne guutta wode xallaassa gidiyoogaa Yesuusi eriis. (Ibr. 12:2) Yihooway Yesuusi yootiyoobaa siyiyoogan, koshshiyaabaa awu kunttiyoogan, A loohissiyoogaaninne maaddiyoogan awu qoppiyoogaa bessiis. (Yoh. 5:20; 8:28) Saluwan deꞌiya nu Aaway nuussikka hegaadan waati qoppiyaakko ane beꞌoos.

SIIQIYA NU AAWAY NUUSSI WAATI QOPPII?

10. Mazamure 66:19, 20y yootiyoogaadan, Yihooway nuna siiqiyoogaa waati bessii?

¹⁰ Yihooway nu woosaa siyees. (Mazamure 66:19, 20 nabbaba.) I nuuni woossiyoobawu zawa wottanaadan koyenna; ubba wode woossanaadan I nuna minttettees. (1 Tas. 5:17) Nuuni awan deꞌikkokka, awudenne Xoossaa woossana danddayoos. Nu woosaa siyanawu I awudenne wode xayenna; I ubbatoo nu woosaa siyees. Yihooway nu woosaa siyiyoogaa nuuni nashshiyo wode, akko shiiqoos. Mazamuraawee, “I ta cenggurssaa . . . siyido gishshau, taani GODAA siiqais” yaagiis.—Maz. 116:1.

11. Yihooway nu woosaa waati zaarii?

¹¹ Nu Aaway nu woosaa siyiyoogaa xalla gidennan, nu woosaa zaarees. Kiitettida Yohaannisi, “Xoossai koyiyoogaadan, ainne nuuni a woossikko, i [siyees]” yaagiis. (1 Yoh. 5:14, 15) Nuuni naagido ogiyan Yihooway nu woosaa zaarennan aggana danddayiyoogee qoncce. I nuuyyo aybi loꞌꞌokko erees; yaatiyo gishshawu, issi issitoo zaarenna woy qassi nu naaganaadan I koyees.—2 Qor. 12:7-9.

12-13. Saluwan deꞌiya nu Aaway nuussi koshshiyaabaa kunttiyoogaa ayba ogetun bessii?

¹² Yihooway nuussi koshshiyaabaa kunttees. Aawati ubbay oottanaadan I koyiyoobaa ikka oottees. (1 Xim. 5:8) I ba naatuyyo deꞌuwaassi koshshiyaabaa immees. Nuuni miyoobawu, maayiyoobawu woy deꞌiyoosawu hirgganaadan koyenna. (Maa. 6:32, 33; 7:11) Yihooway siiqiya Aawaa gidiyo gishshawu, sinttappe nuuyyo koshshiyaabay deꞌanaadankka oottees.

¹³ Ubbaappe aaruwan, Yihooway ayyaanaaban nuussi koshshiyaabaa kunttees. I ba Qaalaa baggaara babaa tumubaa, ba halchchuwaabaa, ufayssiya deꞌuwaabaanne sinttanaabaa qonccissiis. Nuna yelidaageeti woy harati abaa nuna tamaarissanaadan goꞌettiyoogan I nuna maaddiis. Qassi siiqiya gubaaꞌe cimatu baggaaranne hara kayma ishanttunne michchonttu baggaara nuna kehatettan maaddiiddi deꞌees. Gujjidikka, ayyaanaaban nu so asa gidida nu ishanttuuranne michchonttuura issippe tamaariyo gubaaꞌe shiiqotu baggaara Yihooway nuna tamaarissees. Ha ogetuuninne hara ogetun, Yihooway nuussi ubbawu aawaadan qoppiyoogaa bessees.—Maz. 32:8.

14. Yihooway nuna loohissiyoy aybissee, qassi I hegaa waati oottii?

¹⁴ Yihooway nuna loohissees. Nuuni Yesuusa mala gidokko; nuuni nagaranchcha. Hegaa gishshawu, siiqiya Aaway nuna loohissanawu koshshiya wodiyan nuna seerees. A Qaalay, “[Yihooway] ba siiqiyo uraa qaxxayees” yaagees. (Ibr. 12:6, 7) Yihooway nuna daro ogiyan seerees. Leemisuwawu, nuuni A Qaalaappe nabbabiyoobay woy shiiqotun siyiyoobay nu qofaa suurissana danddayees. Woy nuussi koshshiya maaduwaa cimatuppe demmana danddayoos. Yihooway nuna ayba ogiyan seerikkonne, I ubbatoo nuna siiqiyo gishshawu seerees.—Erm. 30:11.

15. Yihooway ayba ogetun nuna naagii?

¹⁵ Metuwaa genccanaadan Yihooway nuna maaddees. Siiqiya aaway meto wodiyan ba naata maaddiyoogaadan, saluwan deꞌiya nu Aaway metuwaa genccanaadan nuna maaddees. Ayyaanaaban nuna qohiyaabaappe naaganawu I ba geeshsha ayyaanaa goꞌettees. (Luq. 11:13) Nuuni hirggiyo wodekka Yihooway nuna maaddees. Leemisuwawu, I nuuyyo maalaalissiya hidootaa immiis. He sinttanaa hidootay metuwan genccanaadan nuna maaddees. Hagaa qoppa: Nu bolli gakkiya iitabay ayba gidikkokka, siiqiya Aaway nuuni tuggatanaadan oottiya ay metuwaakka xayssana. Nu bolli gakkiya ay metoykka guutta wode xallaassa; shin Yihooway immiyo anjjoti merinaassa.—2 Qor. 4:16-18.

NU AAWAY NUNA MULE AGGENNA

16. Siiqiya Aawawu Addaamee azazettennan ixxido wode aybi hanidee?

¹⁶ Yihooway baayyo Addaamee azazettennan ixxin oottidobaa nuuni qoppiyo wode, I nuna siiqiyoogaa akeekoos. Addaamee saluwan deꞌiya ba Aawawu azazettennan ixxido wode, ikka A zerettaykka Yihoowa so asaa yara gididi deꞌana danddayibookkona. (Roo. 5:12; 7:14) SHin, Yihooway Addaame zerettata maaddanawu issibaa oottiis.

17. Addaamee makkali simmin Yihooway sohuwaara ay oottidee?

¹⁷ Yihooway Addaama qaxxayiis; shin A zerettata maaddanawu qaalaa geliis. Azazettiya asay simmidi A so asaa yara gidanaagaa I sohuwaara qaalaa geliis. (Doo. 3:15; Roo. 8:20, 21) Yihooway ba siiqiyo Naꞌaa Yesuusa wozuwaa yarshshuwaa baggaara hegee polettanaadan oottiis. Ba Naꞌaa nu gishshawu immiyoogan Yihooway nuna keehi siiqiyoogaa bessiis.—Yoh. 3:16.

18. Nuuni Yihoowappe haakkikkokka, Yihooway nuuni A naata gidanaadan koyiyoogaa ammanettana danddayiyoy aybissee?

¹⁸ Nuuni nagaranchcha gidikkokka, Yihooway nuuni A so asaa gidanaadan koyees; qassi I nuna mule toohodan xeellenna. Nuuni A yiilloyana woy appe haakkana danddayoos; shin Yihooway nunan hidootaa qanxxenna. Yihooway ba naata ay keenaa siiqiyaakko Yesuusi bayida naꞌaa taarikiyan qonccissiis. (Luq. 15:11-32) He leemisuwan qonccida aaway ba naꞌay simmidi yaanaagaa hidootan naagiyoogaa mule aggibeenna. Naꞌay soo simmiyo wode, aaway ufayttidi mokki ekkiis. Nuuni Yihoowappe haakkikkonne nu nagaraappe simmiyo wode, siiqiya nu Aaway nuna mokki ekkanawu giigi uttidoogaa ammanettana danddayoos.

19. Addaame gaasuwan yiida qohuwaa Yihooway waati xayssanee?

¹⁹ Addaame gaasuwan yiida qohuwaa ubbaa nu Aaway xayssana. Addaamee makkali simmin, asaa giddoppe Yihooway ba Naꞌaara saluwan kawonne qeese gididi haarana 144,000 asata dooriis. Yesuusinne aara haariyaageeti azazettiya asay ooratta alamiyan wottiyoobi baynnaageeta gidanaadan maaddana. Eti azazettiyoogan wurssettaa paaciyaa aadhdhi simmin, Xoossay etawu merinaa deꞌuwaa immana. Hegaappe simmin, nu Aaway nagari baynna attumanne macca naatun saꞌay kummidoogaa beꞌidi ufayttana. Hegee keehi ufayssiya wode gidana!

20. Yihooway nuna keehi siiqiyoogaa ayba ogetun bessidee, qassi kaalliya huuphe yohuwan ay beꞌanee?

²⁰ Yihooway nuna keehi siiqiyoogaa bessiis. I ooppenne aadhdhiya loꞌꞌo Aawa. I nu woosaa siyees; qassi asatettaaninne ayyaanaaban nuussi koshshiyaabaa kunttees. I nuna loohisseesinne maaddees. Qassi I sinttappe nuussi daro anjjota immana. Nu Aaway nuna siiqiyoogaanne nuussi qoppiyoogaa eriyoogee nuna keehi ufayssees! Nuuni Yihoowa naata gidiyo gishshawu, A siiquwawu galatiyoogaa bessana danddayiyo ogeta kaalliya huuphe yohoy qonccissana.