Nu Aawaa Yihoowa Nuuni Keehi Siiqoos

1-2. Yihooway nuuni A keettaa asaa yara gidanaadan hanotaa injjeyidoy aybissee, qassi waatidi injjeyidee?

YIHOOWAY awu goynniya keettaa asaa yara gidanaadan nuna shoobbiis. Hegee keehi maalaalissiya shoobe! He keettaa asaa yarati banttana Xoossawu sheedhdhidosona; qassi Yihoowa naꞌaa wozuwaa yarshshuwan ammanidosona. Nuuni ufayttiya so asa. Ha wodiyan nuuni ufayssiya deꞌuwaa deꞌoos; qassi saluwan gidin woy Gannate gidida saꞌan merinawu deꞌanawu hidootan naagiyo gishshawu, nuuni ufayttoos.

² Yihooway nuna siiqido gishshawu, keehi qohettidi A keettaa asaa yara gidanaadan nuuyyo hanotaa injjeyiis. (Yoh. 3:16) Nuuni ‘waagan shamettida.’ (1 Qor. 6:20) Yihooway wozuwaa baggaara nuuni aara dabbotanaadan oottiis. Saluwaaninne saꞌan ooppenne Aadhdhiyaagaa nuuni nu Aawaa giidi xeesoos. Qassi hagaappe kasetiya huuphe yohuwan beꞌidoogaadan, Yihooway ooppenne aadhdhiya loꞌꞌo Aawa.

3. Nuuni woygidi oychchana danddayiyoo? (“Yihooway Tana Wudidi Xeellii?” giya saaxiniyaakka xeella.)

³ Geeshsha Maxaafaa xaafidaageetuppe issuwaagaadan, “I taassi kehido kehatettaa gishshaa taani GODAASSI ai qanxxanau danddayiyaanaa?” giidi oychchana danddayoos. (Maz. 116:12) Saluwan deꞌiya nu Aawawu nuuni aynne qanxxana danddayennaagee he oyshaa zaaro. SHin I nuna siiqido gishshawu nuunikka A siiqoos. Kiitettida Yohaannisi, “Xoossai koiro nuna siiqido gishshau, nuuni a siiqoos” yaagiis. (1 Yoh. 4:19) Saluwan deꞌiya nu Aawaa siiqiyoogaa ayba ogetun bessana danddayiyoo?

YIHOOWAKKO SHIIQADA DEꞌA

4. Yaaqooba 4:8y yootiyoogaadan, nuuni Yihoowakko shiiqanawu baaxetana koshshiyoy aybissee?

⁴ Yihooway nuuni akko shiiqanaadaaninne aara haasayanaadan koyees. (Yaaqooba 4:8 nabbaba.) Nuuni ‘ubba wode woossanaadan’ I nuna minttettees; qassi ubbatoo nu woosaa siyees. (Roo. 12:12) I nu woosaa siyanawu mule wode xayenna woy I mule salettenna. Qassi, nuuni A Qaalaa, Geeshsha Maxaafaanne hegaa akeekanaadan maaddiya xuufeta nabbabiyoogan I yootiyoobaa siyoos. Gubaaꞌe shiiqotun loytti ezggiyoogankka I yootiyoobaa siyoos. Naati yelidaageetuura ubbatoo haasayiyoogee etakko shiiqidi deꞌanaadan maaddiyoogaadan, ubbatoo Yihoowaara haasayiyoogee akko shiiqidi deꞌanaadan nuna maaddees.

5. Yihooway nu woosaa siyaanaadan waatana danddayiyoo?

⁵ Neeni Yihoowakko woossiyo woosay ay malakko qoppa. Yihooway nuuni woosan nu wozanaabaa awu yootanaadan koyees. (Maz. 62:8) ‘Taani xaafettidabaa nabbabiya uraadan ubbatoo issi malabaa woossiyaanaayye wozanappe woossiyaanaa?’ giidi nuna oychchana koshshees. Neeni Yihoowa keehi siiqiyoogeenne aara dabbotaa minttada deꞌanawu koyiyoogee qoncce. Yaatanawu, neeni aara ubbatoo haasayana koshshees. Neessi siyettiyaabaa ubbaa ayyo yoota. Nena ufayssidabaanne nena azzanttidabaa ayyo yoota. I maaddanaadan oychchana danddayiyoogaa ammanetta.

6. Saluwan deꞌiya nu Aawaara dabbotidi deꞌanawu nuuni ay oottana koshshii?

⁶ Nuuni saluwan deꞌiya nu Aawaakko shiiqidi deꞌanawu, ubbatoo A galatiyaageeta gidana koshshees. Nuuni Mazamuraawiyaagaadan, “Abeet GODAU, ta Xoossau, neeni daro maalaalissiyaabaa oottadasa; nenaara likkettiyai ooninne baawa! Neeni nuuyyo qoppido lo77o qofaa ooninne qoodanau danddayenna. Hegee taani yootin, wuriyaabaa gidenna” yaagoos. (Maz. 40:5) Nuuni nu wozanan galatiyoogaa xalla gidennan, haasayiyoobaaninne oottiyooban Yihoowa galatiyoogaa bessoos. Hegee ha wodiyan deꞌiya daro asaappe nuuni dummatiyoogaa bessees. Ha wodiyan daro asati Xoossay etawu oottido ubbabaa gishshawu galatokkona. Nuuni ‘wurssetta gallassatun’ deꞌiyoogaa bessiya issibay asay galatennaagaa gidiyoogaa. (2 Xim. 3:1, 2) Nuuni hegaa mala asa gidanawu koyokko!

7. Yihooway nuuni ay oottanaadan koyii, qassi aybissi?

⁷ Yelidaageeti bantta naati lagge gidanaadaanappe attin, palamettiyaageeta gidanaadan koyokkona. Hegaadankka, Yihooway awu goynniya ubbati issoy issuwaara lagge gidanaadan koyees. Nuuni issoy issuwaara siiqettiyoogee tumu Kiristtaane gidiyoogaa bessees. (Yoh. 13:35) Nuuni mazamuraawiyaagaadan, “Ishantti issippetettan de7iyoogee aiba lo77obeenne ufaissiyaabee!” yaagoos. (Maz. 133:1) Nuuni nu ishanttanne michchontta siiqiyo wode, Yihoowa siiqiyoogaa bessoos. (1 Yoh. 4:20) ‘Issoy issuwaayyo kehiyaanne qarettiya’ ishanttunne michchonttu so asaa yara gidiyoogee ayba ufayssiyaabee!—Efi. 4:32.

AZAZETTIYOOGAN SIIQIYOOGAA BESSA

8. Koyro Yohaannisa 5:3y yootiyoogaadan, nuuni Yihoowawu azazettiyo waanna gaasoy aybee?

⁸ Naati yelidaageetussi azazettanaadan Yihooway koyees; qassi ayyo nuuni azazettanaadan I koyees. (Efi. 6:1) Yihooway nuna Medhidaagaa, nu deꞌuwawu koshshiyaabaa Immiyaagaanne yelida ay asappenne aadhdhida eranchcha gidiyo gishshawu awu azazettiyoogee bessiyaaba. SHin, nuuni Yihoowawu azazettiyo waanna gaasoy A siiqiyo gishshataassa. (1 Yohaannisa 5:3 nabbaba.) Nuuni Yihoowawu azazettana koshshiyo daro gaasoti deꞌikkokka, azazettanaadan I nuna wolqqanttenna. Koyidobaa dooriyo maataa Yihooway nuuyyo immiis; yaatiyo gishshawu nuuni A siiqidi azazettiyo wode I ufayttees.

9-10. Xoossaa higgeta eriyoogeenne hegaadan deꞌiyoogee keehi koshshiyoy aybissee?

⁹ Yelidaageeti naati qohiyaabaappe naagettidi deꞌanaadan koyoosona. Eti bantta naata naaganawu higgeta kessiyoy hegaassa. Naati he higgeta azazettiyo wode banttana yelidaageetun ammanettiyoogaanne eta bonchchiyoogaa bessoosona. Saluwan deꞌiya nu Aawaa higgeta eriyoogeenne hegaadan deꞌiyoogee hegaappe aaruwan koshshiyaaba. Nuuni yaatiyo wode, Yihoowa siiqiyoogaanne A bonchchiyoogaa bessoos; qassi goꞌettoos. (Isi. 48:17, 18) SHin Yihoowanne A maarata shenehoo giyaageeti banttana qohoosona.—Gal. 6:7, 8.

¹⁰ Nuuni Yihoowa ufayssiya ogiyan deꞌiyo wode, asatettaaninne ayyaanaaban nuna qohiyaabaappe naagettoos. Nuussi aybi loꞌꞌokko Yihooway erees. Amarkkan deꞌiya Aroora, “Nuuni Yihoowawu azazettiyo wode, nu deꞌoy awudenne keehi loꞌꞌo gidanaagaa erays” yaagaasu. Hegee ubbatoo tuma. Yihooway siiquwan immiyo kaaletuwawu azazettiyoogan goꞌettadii?

11. Woosay nuna waati maaddii?

¹¹ Azazettiyoogee metiyo wodiyankka, azazettanaadan woosay nuna maaddees. Nuuni ubbay nagaranchcha gidiyo gishshawu Yihoowawu azazettiyoogee issi issitoo metiyaaba gidikkokka, awu azazettanawu ubbatoo baaxetana koshshees. Mazamuraawee, “Taani neeyyo eeno gaada azazettanaadan, tana zemppissa” giidi minttidi Xoossaa woossiis. (Maz. 51:12) Ubba wode aqinye gidida Deenisa, “Taani Yihoowa azazotuppe issuwaa azazettanawu metootiyo wode, likkebaa oottanaadan wolqqaa demmanawu woossays” yaagaasu. Hegaa mala woosaa Yihooway ubbatoo zaaranaagaa ammanettana danddayoos.—Luq. 11:9-13.

HARATI NU AAWAA SIIQANAADAN MAADDA

12. Efisoona 5:1y yootiyoogaadan, nuuni ay oottana koshshii?

¹² Efisoona 5:1 nabbaba. Nuuni Yihooway ‘siiqiyo naata’ gidiyo gishshawu, A milatanawu nuussi danddayettida ubbabaa oottoos. Nuuni siiqiyoonne kehiyo wode, qassi haratussi atto giyo wode, Yihoowa milatoos. Xoossaa erennaageeti nu loꞌꞌo eeshshaa akeekiyo wode, kaseegaappe aaruwan abaa eranawu koyana danddayoosona. (1 PHe. 2:12) Yihooway nuna oyqqiyo ogiyan yelidaageeti bantta naata oyqqanawu baaxetana koshshees. Eti yaatiyo wode, naati siiqiya nu Aawaara dabbotanawu koyana danddayoosona.

13. Nuuni xala gidanawu ay oottana koshshii?

¹³ Issi guutta naꞌi ba aawan ceeqettees; qassi abaa yootanawu ufayttees. Hegaadan, saluwan deꞌiya nu Aawaa Yihoowan nuuni ceeqettoos, qassi harati A eranaadan koyoos. Nuuni ubbay nu wozanan Kawuwaa Daawitaagaadan, “Taani GODAN ceeqettais” yaagoos. (Maz. 34:2) SHin, Yihoowaabaa yootanawu keehi yayyana danddayoos. Yaatin, nuuni waanidi xalana danddayiyoo? Nuuni Yihoowaabaa yootikko I ay keena ufayttanaakko, qassi harati abaa tamaariyoogan ay keena goꞌettanaakko qoppiyo wode, nuuni xala gidoos. Yihooway nuuyyo koshshiya xalatettaa immana. I koyro xeetu layttan deꞌida ishantti xala gidanaadan maaddiis; qassi I nunakka maaddana.—1 Tas. 2:2.

14. Mishiraachchuwaa yootana koshshiyo gaasoti aybee?

¹⁴ Yihooway asa asappe shaakkenna; qassi eta hanotay ayba gidikkonne nuuni harata siiqiyoogaa beꞌiyo wode, I ufayttees. (Oos. 10:34, 35) Nuuni harata siiqiyoogaa bessana danddayiyo keehi loꞌꞌo ogee etawu mishiraachchuwaa yootiyoogaa. (Maa. 28:19, 20) Ha oosoy ay demissana danddayii? Nu yootiyoobaa siyiyaageetu deꞌoy ha wodiyan giiga gidana danddayees, qassi sinttappe eti merinaa deꞌuwaa demmana danddayoosona.—1 Xim. 4:16.

NU AAWAA SIIQA, QASSI UFAYTTA

15-16. Nuuni ufayttanaadan oottiya gaasoti aybee?

¹⁵ Yihooway siiqiya Aawaa; hegaa gishshawu ba soo asay ufayttanaadan koyees. (Isi. 65:14) Ha wodiyan daro metoy nuna gakkana danddayikkokka, nuuni ufayttanaadan oottiya daro gaasoti deꞌoosona. Leemisuwawu, saluwan deꞌiya nu Aaway nuna keehi siiqiyoogaa ammanettoos. Xoossaa Qaalaa, Geeshsha Maxaafaa eray nuussi deꞌees. (Erm. 15:16) Qassi, nuuni Yihoowa siiqiya, I kessido maarata siiqiyaanne issoy issuwaara siiqettiya dumma keettaa asaa yara.—Maz. 106:4, 5.

¹⁶ Nuuni sinttappe deꞌoy yaa giiganaagaa ammanettiyo gishshawu ufayttiiddi deꞌana danddayoos. Yihooway mata wode iitatetaa ubbaa xayssanaagaanne ba Kawotettaa baggaara saꞌaa Gannate oottanaagaa eroos. Qassi, hayqqidaageeti denddidi zaarettidi nunaara gayttiyo ufayssiya hidootay nuussi deꞌees. (Yoh. 5:28, 29) Hegee keehi ufayssiyaaba gidana! Ubbaappe aaruwan, mata wode saluwaaninne saꞌan deꞌiya ubbay nu siiqiyo Aawaa bonchchana, sabbananne ayyo goynnana; hegee awu bessiyaaba.