Sarotettay Deꞌiyo Wodiyan Akeekan Ootta

1. Yihoowawu haggaaziyoogee metana danddayiyoy awudee?

YIHOOWAYYO haggaazanawu neeni metootana danddayiyoy awudee? Metoy dariyo wodiyaaneeyye, metoy baynna wodiyaanee? Metoy nuna gakkiyo wode, Yihoowan ammanettanawu waayettokko. SHin sarotettaa wode nuuni ay oottanee? Xoossawu haggaazana koshshiyoogaa nuuni issi issitoo dogiyoo? Hegee hanana danddayiyoogaa Israaꞌeelatuyyo Yihooway minttidi yootiis.—Zaa. 6:10-12.

2. Kawuwaa Asi nuussi aybin leemiso gidii?

² Kumetta wozanan Yihoowan ammanettidi akeekan oottida Kawuwaa Asi nuussi loꞌꞌo leemiso. I meto wodiyan xalla gidennan, sarotettay deꞌiyo wodiyankka Yihoowawu haggaaziis. Asi ba deꞌido laytta ubban, “Xoossaassi wozanappe ammanettiya asa gididi de7iis.” (1 Kaw. 15:14) Asi Yihudaappe worddo goynuwaa xayssiyoogan kumetta wozanan Yihoowassi oottiyoogaa bessiis. Geeshsha Maxaafay hagaadan gees: “Asi allaga xoossatuyyo yarshshiyo sohotanne goinniyo xoqqa sohuwaa xaissiis. Goinnanau shuchchaappe oottido tuussatakka mentterettiis; Asheero giyo xoossee misiletakka qanxxeretti oliis.” (2 Odi. 14:3, 5) I ba aawaa aayyiyo Maaꞌikokka kawotettan iyyo deꞌiya bonchchuwaappe diggiis. Aybissi? A eeqaa goynuwaa aassido gishshataassa.—1 Kaw. 15:11-13.

3. Nuuni ha huuphe yohuwan ay beꞌanee?

³ Asi worddo goynuwaa xayssiyoogaappe harabaakka oottiis. I Yihudaa kawotettay Yihoowakko simmanaadan maaddiyoogan tumu goynuwaa aassiis. Yihooway Asanne Yihudaa asaa sarotettayb deꞌiyo wodiyan anjjiis. Asi kawotido tammu layttatun, “biittaikka shemppiis.” (2 Odi. 14:1, 4, 6) Ha huuphe yohuwan, Asi sarotettay deꞌiyo he wodiyaa waati goꞌettidaakko beꞌana. Yaatidi, Asaagaadan sarotettay deꞌiyo wodiyaa akeekan goꞌettida beni Kiristtaanetu leemisuwaa beꞌana. Wurssettan, nuuni ha oyshaa zaarana: Laꞌatettan goynniyo biittan neeni deꞌikko, sarotettay deꞌiyo he wodiyaa neeni waata akeekan goꞌettana danddayay?

SAROTETTAY DEꞌIYO WODIYAA ASI WAATI GOꞌETTIDEE?

4. Naaꞌꞌantto Hanidabaa Odiya 14:2, 6, 7y yootiyoogaadan, Asi sarotettay deꞌiyo wodiyaa waati goꞌettidee?

⁴ Naaꞌꞌantto Hanidabaa Odiya 14:2, 6, 7 nabbaba. Asi Yihooway “nuuyyo ubba baggaara woppaa immiis” giidi asaassi yootiis. Asi he sarotettaa wodiyaa allaxxiyo wodiyaadan qoppibeenna. Yaatiyoogaappe, I katamata, miixata, adussa gimbbetanne penggeta keexxiyoogaa doommiis. I Yihudaa asawu, “biittai ha77ikka nuussa” yaagiis. Asi woyganawu koyidee? I bantta biittan simerettiyoogaanne keexxiyoogaa diggiya morkkee baynnaagaa etawu yootanawu koyiis. I sarotettay deꞌiyo he wodiyaa asay akeekan goꞌettanaadan minttettiis.

5. Asi ba olanchchatu wolqqaa minttidoy aybissee?

⁵ Asi he sarotettaa wodiyaa ba olanchchatu wolqqaa minttanawukka goꞌettiis. (2 Odi. 14:8) Hegee I Yihoowan ammanettenna giyoogee? CHii. Sinttappe gakkana danddayiya metuwawu asay giigettanaadan oottiyoogee kawuwaa aawatettaa gidiyoogaa Asi erees. Asi he sarotettaa wodee ubbatoo deꞌennaagaa eriis; qassi hegee tuma gidiyoogee qoncciis.

BENI KIRISTTAANETI SAROTETTAA WODIYAA WAATI GOꞌETTIDONAA?

6. Beni Kiristtaaneti sarotettay deꞌiyo wodiyaa waati goꞌettidonaa?

⁶ Beni Kiristtaaneta darotoo yedetay gakkikkokka, eti sarotettan deꞌidosona. Eti he wodetun ay oottidonaa? He ammanettida asati aggennan mishiraachchuwaa sabbakidosona. Oosuwaa maxaafay eti, ‘Yihoowassi yayyiyoogaa’ yootees. Eti aggennan mishiraachchuwaa sabbakido gishshawu, “qoodankka dari dari biidosona.” Sarotettay deꞌiyo wodiyan mishiraachchuwaa eti minnidi sabbakin, Yihooway eta anjjidoogee qoncce.—Oos. 9:26-31.

7-8. PHawuloosinne harati demmido injje ubban ay oottidonaa? Qonccissa.

⁷ Beni Kiristtaaneti danddayiyo wode ubban mishiraachchuwaa sabbakidosona. Leemisuwawu, PHawuloosi Efisoonan deꞌiya darotuyyo sabbakana danddayiyoogaa akeekido wode, I he kataman sabbakiiddi takkiis.—1 Qor. 16:8, 9.

⁸ Qassi kiitettidaageetinne cimati Yerusalaamen qaxxaraa xeelliyaagan kuuyido wode PHawuloosinne hara Kiristtaaneti 49 M.Ln. daro asawu sabbakidosona. (Oos. 15:23-29) PHawuloosinne harati he kuuyettidaba gubaaꞌetussi yooti simmin, eti ‘Godaa qaalaa mishiraachchuwaa’ minnidi sabbakidosona. (Oos. 15:30-35) Yaatin, ayba ayfee beettidee? Geeshsha Maxaafay, “[Gubaaꞌeti] ammanuwan minnidi, qoodankka gallassappe gallassan dari dari biidosona” yaagees.—Oos. 16:4, 5.

SAROTETTAY DEꞌIYO WODIYAA AKEEKAN GOꞌETTIYOOGAA

9. Ha wodiyan daro biittatun deꞌiya hanotay ay malee, qassi nuna woygidi oychchana danddayiyoo?

⁹ Daro biittatun, nuuni laꞌatettan sabbakana danddayoos. Neeni deꞌiyoy hegaa mala biittaanee? Yaatikko, ‘Taani ha laꞌatettaa waata goꞌettaydda deꞌiyaanaa?’ gaada nena oychcha. Ha ufayssiya wurssettaa gallassan, Yihoowa dirijjitee awudeegaappenne aaruwan sabbakiyoonne tamaarissiyo oosuwaa minnidi oottiiddi deꞌees. (Mar. 13:10) Ha oosuwan nuuni oottana danddayiyo darobay deꞌees!

10. Naaꞌꞌantto Ximootiyoosa 4:2y, nu ay oottanaadan minttettii?

¹⁰ Sarotettay deꞌiyo wodiyaa akeekan waata goꞌettana danddayay? (2 Ximootiyoosa 4:2 nabbaba.) Neeni woy ne so asay kaseegaappe aaruwan haggaazanawu, ubba qassi aqinye gidanawu hanotaa giigissana danddayiyaakkonne qoppa. Ha wodiyan nuuni duretanawu baaxetana koshshenna; ayssi giikko, nuuyyo deꞌiyaabay nunaara gita waayiyaa pinnenna.—Lee. 11:4; Maa. 6:31-33; 1 Yoh. 2:15-17.

11. Issoti issoti danddayettida keenan daro asay mishiraachchuwaa siyanaadan ay oottidonaa?

¹¹ Asaa Yihoowaabaa tamaaranawu aassiya daroti ooratta qaalaa tamaaridosona. Eta maaddanawu Xoossaa dirijjitee Geeshsha Maxaafaa qofay deꞌiyo xuufeta daro qaalatun giigissees. Leemisuwawu, 2010n, nu xuufeti 500 gidiya qaalatun giigoosona. He qooday gujjidi ha wodiyan 1,000⁠ppe dariya qaalatun giigees!

12. Asay bantta qaalan Kawotettaa mishiraachchuwaa siyiyoogan waani goꞌettii? Leemisuwaa yoota.

¹² Asay bantta qaalan Yihoowabaa tamaariyo wode etawu aybi siyettii? Amarkkan deꞌiya issi michchiyaa Afirkkan amarida sohowan haasayettiya, Kiniruwanda giyo ba qaalan giigida gita shiiquwaa shiiqaasu. He shiiquwaappe simmin A, “Taani Amarkka biido 17 gidiya layttaasappe hagaadan shiiqotun ayyaanaabaa akeeka erikke” yaagaasu. He michchiyaa ba qaalan giigida he shiiquwaa shiiqido wode A keehi ufayttidoogee qoncce. Ne hanotay injjetikko, ne moottan deꞌiya amarida asata maaddanawu hara qaalaa tamaarana danddayay? Ne moottan deꞌiya issi uri neeni A qaalan haasayissiyaaba gidikko, ne yootiyoobaa ufayttidi siyanawu eeno gaanee? Neeni minnada oottiyoogan daro ufayttana.

13. Ruusiyan deꞌiya nu ishantti sarotettaa wodiyaa waati goꞌettidonaa?

¹³ Laꞌatettan sabbakiyaageeti nu ishantta ubbaa gidokkona. Issi issi biittatun, kawotettati sabbakiyo oosuwaa diggido gishshawu, nu ishantti laꞌatettan sabbakana danddayokkona. Leemisuwawu, Ruusiyan deꞌiya nu ishanttu hanotaa qoppa. Daro layttawu eta yedetay gakki simmin, Laappune 1991n kawotettay goynuwaa laꞌatettaa etawu immiis. He wode, Ruusiyan deꞌiya Yihoowa Markkati 16,000 heera. Laatamu layttaappe simmin, aassiyaageetu qooday gujjidi 160,000⁠ppe dariis! Laꞌatettan sabbakana danddayiyo wodiyaa nu ishantti akeekan goꞌettidoogee qoncce. He sarotettaa wodee daro takkibeenna. He biittan hanotay laamettikkokka, eti Yihoowassi minnidi oottiyoogaa aggibookkona. Eti awu haggaazanawu banttawu danddayettida ubbabaa oottoosona.

SAROTETTAA WODEE DARO TAKKENNA

14-15. Yihooway Asa maaddanawu ba wolqqaa waati goꞌettidee?

¹⁴ Asa wode deꞌiya sarotettay guyyeppe xayiis. Issi miilooneppe dariya olanchchati Toophphiyaappe yiidosona. Zeraaha giyo olanchchatu gadaawaynne A olanchchati Yihudaa xoonanaagaa ammanettidosona. SHin Asi asaa qoodan gidennan, Yihoowan ammanettiis. Asi hagaadan woossiis: “Abeet GODAU, nu Xoossau, nuuni nenan ammanettidi, ha cora olanchchatuura ne sunttan olettanau yiido gishshau, neeni nuna maadda.”—2 Odi. 14:11.

¹⁵ Toophphiyaa olanchchati Asa olanchchatuppe dakkuwaa gidiyaagaa daroosona; shin Asi Yihooway wolqqaama gidiyoogaanne I ba asaa maaddana danddayiyoogaa erees. Qassi Yihooway ba asaa maaddiis. Toophphiyaa olanchchati xoonettidosona.—2 Odi. 14:8-13.

16. Sarotettan deꞌiyo wodee takkennaagaa nuuni waati eriyoo?

¹⁶ Nuna ubbaa sinttappe aybi gakkanaakko nuuni wurssi erokko, shin ha wodiyan Yihoowa ashkkaratussi deꞌiya sarotettaa wodee takkennaagaa eroos. Wurssetta gallassatun, Yesuusi ba erissiyo ashkkaratuyyo “dere ubbai inttena ixxana” giidi kasetidi yootidoogaa hassaya. (Maa. 24:9) Hegaadankka, kiitettida PHawuloosi, “Kiristtoos Yesuusan Xoossaa milatidi de7anau dosiya ubbai yedetettana” giis. (2 Xim. 3:12) Seexaanay keehi ‘hanqqettiis,’ qassi A hanqqoy gattiyo qohuwaappe nuuni mule attana danddayokko.—Ajj. 12:12.

17. Nu ammanoy ayba ogetun paacettana danddayii?

¹⁷ Mata wode, nu ubbaa ammanoy paacettana. Qassi, “sa7ai merettoosappe hachchi gakkanaashin de7ibeennabainne qassi hagaappe sinttaukka mule de7enna iita waayee he wode de7ana.” (Maa. 24:21) He wode, nu so asay nu bolli denddananne nu oosoy muleera teqettana danddayees. (Maa. 10:35, 36) Nuuni ubbaykka Asaagaadan, maaduwaanne naaguwaa demmanawu Yihoowan ammanettanee?

18. Ibraawe 10:38, 39y yootiyoogaadan, sarotettay xayiyo wodiyawu giigettanaadan nuna aybi maaddanee?

¹⁸ Nu ammanoy minnanaadan Yihooway ha wodiyan nuna loohissees. Nuuni ubbay minnidi deꞌanaadan Yihooway ‘ammanettida wozannaama ashkkaraa’ baggaara “qumaa koshshiyo wodiyan” nuussi immees. (Maa. 24:45) SHin, nuussi Yihoowan mino ammanoy deꞌanaadan nuuni ubbay nuuyyo danddayettida ubbaa oottana koshshees.—Ibraawe 10:38, 39 nabbaba.

19-20. Nuuni 1 Hanidabaa Odiya 28:9, nabbabi simmidi nuna oychchana bessiya oyshati awugeetee, qassi aybissi?

¹⁹ Kawuwaa Asaagaadan, nuunikka ‘Yihoowa koyana’ bessees. (2 Odi. 14:4; 15:1, 2) Nuuni Yihoowabaa tamaariyo wodenne xammaqettiyo wode A koyiyoogaa doommoos. Yihoowa mintti siiqanawu nuussi danddayettida ubbabaa oottoos. Hegaa gishshawu, ‘Gubaaꞌe shiiqota ubbatoo shiiqiyaanaa?’ giidi nuuni nuna oychchana danddayoos. SHiiqotun, nuuni Yihoowayyo ubbatoo haggaazanawu minotettaa demmoos, qassi nu ishanttuppenne michchonttuppe minttettuwaa demmoos. (Maa. 11:28) Nuna hagaadankka oychchana danddayoos: ‘Taani Geeshsha Maxaafaa ubbatoo xannaꞌiyaanaa?’ Neeni so asaara issippe deꞌikko, saaminttan saaminttan so asaa goynuwaa oottay? Woy neeni nerkka deꞌikko, neeni so asaara issippe deꞌiyoogaadan xannaꞌanawu wodiyaa bazzay? Qassi sabbakanawunne tamaarissanawu neeyyo danddayettida ubbabaa oottay?

²⁰ Nuuni he oyshata oychchana koshshiyoy aybissee? Nu qofaaninne nu wozanan deꞌiyaabaa Yihooway qoriyoogaa Geeshsha Maxaafay yootees; nuunikka hegaadan oottana koshshees. (1 Hanidabaa Odiya 28:9 nabbaba.) Nu halchchuwan, eeshshan woy qofan laamettana koshshiyoogaa nuuni akeekikko, hegan nuna Yihooway maaddanaadan oychchana bessees. Sinttappe yaana paaciyawu nuuni giigettiyo wodee haꞌꞌa. Yaatiyo gishshawu, sarotettay deꞌiyo wodiyaa akeekan goꞌettiyoogaa nena aybinne digganaadan oottoppa!