Ne Oosuwaa Minnada Ootta!

SIIQIYO laggee neeyyo minttettiya dabddaabbiyaa kiittiyo wode neessi aybi siyettii? Kiristtaane erissiyo ashkkaray Ximootiyoosi kiitettida PHawuloosappe hegaa mala dabddaabbiyaa ekkiis. He dabddaabbee ha wodiyan Geeshsha Maxaafaa shaaho gidida 2 Ximootiyoosa. Ximootiyoosi I keehi dosiyo laggee ayyo odanawu koyidobaa nabbabanawu woppu giida sohuwa koyidoogee sirissenna. Ximootiyoosi geella hagaadan qoppennan aggenna: ‘PHawuloosi waani deꞌiishshaa? Ta oosuwawu maaddiyaabaa I tana zoriyoobi deꞌaneeshshaa? Kaseegaappe aaruwan sabbakanawu, tamaarissanawunne harata maaddanawu A zoree tana goꞌꞌaneeshshaa?’ Nuuni kaallidi beꞌanaagaadan, Ximootiyoosi ha maaddiya dabddaabbiyaappe he oyshatu zaaruwaanne hara darobaa demmiis. SHin haꞌꞌi, ha dabddaabbiyan deꞌiya maaddiya zoriyaappe amarida ayfe yohota ane beꞌoos.

“TAANI UBBABAN” GENCCAAS

Ximootiyoosi he dabddaabbiyawu doometta heeraa nabbabiyo wode PHawuloosi ayyo qoppiyoogaa sohuwaara akeekana danddayees. PHawuloosi A, “ta siiqo na7aa” giidi xeesiis. (2 Xim. 1:2) Ximootiyoosi 65 M.L. heeran ha dabddaabbiyaa ekkiyo wode ayyo layttay 30⁠ppe darennan waayi aggana; qassi I meezee deꞌiyo Kiristtaane gubaaꞌe cima. I PHawuloosaara issippe 10⁠ppe dariya layttawu oottiis, qassi appe darobaa tamaariis.

PHawuloosi ammanettidi metuwaa gencciiddi deꞌiyoogaa eriyoogee Ximootiyoosa keehi minttettennan aggenna. PHawuloosi Roomen qasho keettan deꞌees, qassi I mata wode hayqqana. (2 Xim. 1:15, 16; 4:6-8) PHawuloosi “Taani ubbaban” genccaas giido gishshawu Ximootiyoosi A xalatettaa akeekana danddayees. (2 Xim. 2:8-13) Ximootiyoosaagaadan, PHawuloosa genccay nuna minttettana danddayees.

NE IMOTAA TAMAADAN PEREGGA

Ximootiyoosi baassi Xoossaa haggaazuwan imettida oosuwaa alꞌꞌobadan xeellanaadan PHawuloosi zoriis. Ximootiyoosi “Xoossay immido imotaa tamaadan pereggana mala” PHawuloosi koyiis. (2 Xim. 1:6, NW) PHawuloosi “imuwaa” giyo qaalawu kharisma giyo Giriiketto qaalaa goꞌettiis. He Giriiketto qaalay issi uraassi bessennabaa coo immiyoogaa qonccissees. Ximootiyoosi gubaaꞌiyan dumma hanotan haggaazanaadan doorettido wode hegaa mala imotaa ekkiis.—1 Xim. 4:14.

Ximootiyoosi he imotan ay oottanaadan PHawuloosi minttettidee? I ‘tamaadan peregga,’ giya qonccissuwaa nabbabiyo wode, sooni issitoo issitoo coo boojiya xiifa xalaala gidida tamaa hassayennan aggenna. He xiifay lacottanaadaaninne keehi eexxanaadan pereggana koshshees. Issi qaalaa kochchay ha sohuwan PHawuloosi goꞌettido (anazopyreꞌo) giyo Giriiketto peeshoy “zaaretti denttettiyoogaa, ooraxissiyoogaa, lacuwawu laammiyoogaa” giyoogaa gidiyo gishshawu, “issi oosuwawu wozanappe denddiyoogaanne mishettiyoogaa bessees” yaagees. Hegaa gishshawu, PHawuloosi Ximootiyoosa, ‘Ne oosuwaa minnada ootta’ giidi zoriis giyoogaa mala. Ha wodiyan nuunikka, hegaadan nu oosuwaa minnidi oottana koshshees.

“HADARAA IMMIDO LO77OBAA NAAGA”

PHawuloosi ba dabddaabbiyan Ximootiyoosi ba haggaazuwaa loytti polanawu maaddiya harabaa yootiis. PHawuloosi, “Nu giddon de7iya [g]eeshsha [a]yyaanaa baggaara neeyyo hadaraa immido lo77obaa naaga” yaagiis. (2 Xim. 1:14) He hadaray aybee? Ximootiyoosayyo imettida alꞌꞌobay aybee? Hagaappe kasetiya payduwan, PHawuloosi “tumu qaalaa,” hegeekka Geeshsha Maxaafan deꞌiya tumaabaa qonccissiis. (2 Xim. 1:13) Ximootiyoosi Kiristtaane gidiyo gishshawu, gubaaꞌiyan deꞌiya ishanttanne michchontta, qassi ba haggaazo moottan deꞌiya asaa tumaa tamaarissana koshshees. (2 Xim. 4: 1-5) Qassi, Ximootiyoosi Xoossaa dorssaa wudiyaa heemmanawu sunttettida cima. (1 PHe. 5:2) Ximootiyoosi Yihoowa geeshsha ayyaanaaninne A Qaalan ammanettidi bawu imettida alꞌꞌobaa, hegeekka I tamaarissana bessiyo tumaa naagana danddayees.—2 Xim. 3:14-17.

Ha wodiyan nuussikka, harata tumaa tamaarissiyo hadaray imettiis. (Maa. 28:19, 20) Ha nuuni tamaarissiyo tumay keehi alꞌꞌoba gidiyoogaa mule dogana bessenna; hegaa gishshawu, nuuni woosan genccananne Xoossaa Qaalaa ubbatoo xannaꞌana koshshees. (Roo. 12:11, 12; 1 Xim. 4:13, 15, 16) Hegaa bollikka, gubaaꞌe cima woy ubba wode haggaaziyaagaa gididi oottiyo gujo aawatettay nuussi deꞌana danddayees. Hegaa mala alꞌꞌo aawatettay nuna ziqqi oottiyaageetanne maaduwawu Xoossan ammanettiyaageeta gidanaadan oottana koshshees. Yaaniyo gishshawu, nuuni nu hadaraa nashshiyoogaaninne hegaa naaganawu Yihoowa maaduwan ammanettiyoogan nu hadaraa naagana danddayoos.

HA YOHOTA “AMMANETTIDA ASATUYYO HADARAA IMMA”

Ximootiyoosayyo imettida oosuwaappe issoy I oottiiddi deꞌiyo oosuwaa haratikka oottanaadan loohissiyoogaa. PHawuloosi, “Taappe neeni siyido yohota haraata tamaarissanawu danddayiya ammanettida asatuyyo hadaraa imma” giidi Ximootiyoosa zoridoy hegaassa. (2 Xim. 2:2) Ximootiyoosi tamaaridobaa ubbaa hara ishantta tamaarissanaadan PHawuloosi hassayissiis. Ha wodiyan Kiristtaane gubaaꞌiyan aawatettay deꞌiyo ubbay hegaadan oottanawu baaxetiyoogee keehi koshshiyaaba. Aawatettay deꞌiyo loꞌꞌo uri issi oosuwaa xeelliyaagan bawu deꞌiya eraa qosenna. I haratikka he oosuwaa oottanaadan tamaarissees. I eti baappe aaruwaa eroosona woykko he oosuwaa baagaappe loyttidi oottoosona giidi yayyenna. Hegaa gishshawu, aawatettay deꞌiyo issi uri issibaa oottiyo amarida ogiyaa xalaalaa tamaarissenna. I loohissiyoogeeti kayma Kiristtaane gididi yuushshi qoppiyaageetanne akeekanchchata gidanaadan maaddanawu koyees. Hegaa mala hanotan, I tamaarissido “ammanettida asati” gubaaꞌiyan aagaappekka aaruwaa maaddana danddayoosona.

PHawuloosappe ekkido minttettiya dabddaabbiyaa Ximootiyoosi nashshidoogee qoncce. Nuuni I he maaddiya zoriya zaari zaaridi nabbabidoogaanne ba oosuwaara gayttidaagan he zoriya waati oosuwan peeshshanaakko qoppidoogaa akeekana danddayoos.

Nuunikka ha zoriya oosuwan peeshshanawu koyoos. Waatidi? Nuuni nu imotaa tamaadan peregganawu, nu hadaraa naaganawunne nu eriyo ubbabaa harata tamaarissanawu baaxetana danddayoos. Yaatiyoogan, PHawuloosi Ximootiyoosa akeekissidoogaadan nu “oottiyo ooso ubbaa” polana danddayoos.—2 Xim. 4:5.