PHawuloosanne Ximootiyoosa

Ximootiyoosi Lisxxira galchchan deꞌiya yelaga isha. A aaway Giriike asa; qassi a aayyiyaa Ayhuda asa. A aayyiyaa Ewuniiqanne a aayee aayyiyaa Loyda Ximootiyoosa naatettaappe doommidi Yihoowabaa tamaarissidosona.

PHawuloosi sabbakanawu biyo naaꞌꞌantto buussan Lisxxira galchchaa xomoosiyo wode, i Ximootiyoosi ishantta wozanappe siiqiyoogaanne eta maaddanawu yeemottiyoogaa akeekiis. PHawuloosi Ximootiyoosi banaara baanaadan shoobbiis. Heedeppe doommidi, mishiraachuwaa loyttidi sabbakanaadaaninne tamaarissanaadan PHawuloosi Ximootiyoosa loohissiis.

PHawuloosinne Ximootiyoosi biyoosa ubban geeshsha ayyaanay eta kaalettiis. Issi galla qammi, ajjuutan, PHawuloosi Maqidooniyaa biidi eta maaddanaadan issi bitanee ayyo yootiis. Hegaa gishshawu, PHawuloosi, Sillaasinne Luqaasi sabbakanawunne galchchata essanawu yaa biidosona.

Tasalonqqen, Maqidooniyaa kataman deꞌiya daro attuma asaynne macca asay Kiristtaane gidiis. SHin Ayhudatuppe amaridaageeti PHawuloosanne a laggeta qanaatidosona. Cora asay eta bolli denddidi, ishantta katamaa halaqatukko goochidi, ‘Hageeti Rooma haaruwaa morkketa!’ yaagidi waassidosona. PHawuloosinne Ximootiyoosi bantta shemppuwawu hirggido gishshawu, he galla qammi eti Beeriyaa baqatidosona.

Beeriyan deꞌiya asay mishiraachuwaa siyanawu keehi koyiyo gishshawu, Giriiketikka Ayhudatikka ammanidosona. SHin issi issi Ayhudati Tasalonqqeppe yiidi ooshshaa denttin, PHawuloosi Ateena biis. Ximootiyoosinne Sillaasi ishantta minttettanawu Beeriyan takkidosona. Guyyeppe, Ximootiyoosi Tasalonqqen wolqqaama yedetay gakkiyo ishantta maaddanaadan PHawuloosi a guyye yaa yeddiis. Takkidi, hara daro galchchata xomoosanaadaaninne ishantta minttettanaadan PHawuloosi Ximootiyoosa kiittiis.

PHawuloosi Ximootiyoosa, ‘Yihoowawu haggaazanawu koyiyaageeti yedetettana’ yaagiis. Ximootiyoosi ba ammanuwaa gaasuwan yedetettiisinne qashettiis. I hegan Yihoowawu ammanettiyoogaa bessido gishshawu ufayttiis.

PHawuloosi Piliphisiyuusa Kiristtaanetussi hagaadan giis: ‘Taani Ximootiyoosa inttekko yeddana. Tuman hemettiyoogaa giyoogee aybakko i inttena tamaarissana; qassi haggaazuwan i inttena loohissana.’ PHawuloosi Ximootiyoosan ammanettana danddayiyoogaa erees. Eti lagge gididi daro layttawu issippe oottidosona.