Ha Alamee Bashshawu Biiddi Deꞌii?
Geeshsha Maxaafay alamiyaa wurssettaabaa yootiyoogaa neeni erennan aggakka. (1 Yohaannisa 2:17) Geeshsha Maxaafay hegaa giyo wode saꞌan ay asinne attenna giyoogee? Saꞌan ayba deꞌoykka deꞌennee, woy qassi saꞌay muleera xayanee?
GEESHSHA MAXAAFAY HA OYSHATA CHII GIIDI ZAAREES!
Sinttappe Aybi Xayennee?
ASAA
Geeshsha Maxaafay yootiyoobaa: Xoossay “asi de7anaadaanappe attin, biittaa coo medhdhibeenna.”—ISIYAASA 45:18.
SAꞌAA
Geeshsha Maxaafay yootiyoobaa: “Issi yeletai aadhdhiyo wode, hara yeletai sohuwaa oiqqees. SHin ha biittai merinaukka laamettennan de7ees.”—ERANCHCHAA 1:4.
HEGEE WOYGIYOOGEE?: Geeshsha Maxaafay yootiyoogaadan, saꞌay merinawu deꞌana; qassi muletoo deꞌana. Yaatin, alamiyaa wurssettaa giyoogee woygiyoogee?
HAGAA QOPPA: Geeshsha Maxaafay sinttappe yaana ha alamiyaa wurssettaa Nohe wode hanidabaara geeddarssees. He wode, saꞌay ‘makkalan kumiis.’ (Doomettaabaa 6:13) SHin, Nohee xillo asa. Yaatiyo gishshawu, Xoossay Nohanne A soo asaa ashshidi, nagaranchcha asaa bashshaa haattan xayssiis. He wode hanidabaa Geeshsha Maxaafay hagaadan gees: “He wode de7iya sa7ai he haattan meetetti xayiis.” (2 PHeexiroosa 3:6) Hegee he wode deꞌiya alamiyawu wurssetta. SHin, he wode xayiday aybee? Saꞌaa gidennan, saꞌan deꞌiya iita asay xayiis. Hegaa gishshawu, Geeshsha Maxaafay alamiyaa wurssettaabaa yootiyo wode, saꞌay xayana giidi yootiiddi deꞌenna. Saꞌan deꞌiya iita asatinne iitatettay issippe xayanaagaa yootees.
Sinttappe Aybi Xayanee?
METUWAANNE IITATETTAA
Geeshsha Maxaafay yootiyoobaa: “Iitaa oottiyaageeti guutta wodiyaappe guyyiyan de7okkona; neeni eta koyiyaakkokka eti beettokkona. SHin ashkketi biittaa laattana; eti sarotettaaninne duretettaani ufaittidi daana.”—MAZAMURE 37:10, 11.
HEGEE WOYGIYOOGEE: Nohe wode bashshaa haattan iitatettay muleera qucetti xayibeenna. Bashshaa haattaappe simmin, zaarettidi iita asati deꞌoy azzanttiyaagaa gidanaadan oottidosona. Sinttappe mata wodiyan Xoossay iitatettaa xayssana. Mazamuraawee hagaadan giis: “Iitaa oottiyaageeti . . . . de7okkona.” Xoossay ba Kawotettaa baggaara iitatettaa xayssana; qassi Xoossawu azazettiya asata saluwaa kawotettay haarana.
HAGAA QOPPA: Alamiyaa haariyaageeti Xoossaa Kawotettawu ufayssan azazettanee? Eti hegaadan oottennaagaa Geeshsha Maxaafay yootees. Eeyyatettan, eti Xoossaa Kawotettaa eqettana. (Mazamure 2:2) Hegee eta bolli ay kaalettanee? Xoossaa Kawotettay asaa haaro ubbaa xayssana; qassi “i merinau eqqidi daana.” (Daaneela 2:44) SHin asaa haaroy xayana koshshiyoy aybissee?
NUUSSI AYBI KOSHSHII, QASSI AYBISSI?—Asaa Haaroy Xayana Koshshees
Geeshsha Maxaafay yootiyoobaa: “[Asi] . . . ba hemetaa suurissanaagee aawu shene gidennaagaa taani erais.”—ERMMAASA 10:23.
HEGEE WOYGIYOOGEE: Asay bana barkka haaranawu merettibeenna. Asaa haariyaageeti asaa metuwaa pagalanawu eti oottana danddayiyoobi guutta.
HAGAA QOPPA: Britaanika Akadamik giyo maxaafay issi kawotetta xallay “hiyyeesatettaa, namisaa, harggiyaa, meretay gattiyo daafaa, qassi olaa woy hara danobaa” mala metota xayssanawu danddayiyaaba milatenna giidi qonccissiis. He maxaafay gujjidi hagaadan gees: “Amaridaageeti . . . he metota xayssana danddayiyay alamiyaa kawotetta xalla giidi ammanoosona.” SHin, nagaranchcha gidida asaa haaroy qommoora odettida metota xayssana danddayennaagaa asa kawotettati ubbay maayettoosona. Alamiyan deꞌiya meto ubbaa xayssanawu wolqqay deꞌiyoy Xoossaa Kawotettaa haaro xallaassa.
Yaatiyo gishshawu, Geeshsha Maxaafay yootiyoogaadan, alamiyaa wurssettay loꞌꞌo asati yayyanaadan oottiyaaba gidenna. Xoossay ha ceega alamiyaa xayssidi, ufayssiya ooratta alamiyaa ehiyo gishshawu hegee yeemuwan naagiyooba!
He ubbabay hananay awudee? Hagaappe kaalliya huuphe yohoy Geeshsha Maxaafaa zaaruwaa qonccissana.