Sinttappe matan yaana keehi loꞌꞌiya alamiyan deꞌanawu haꞌꞌi giigettana danddayaasa
Ooratta Alamee Yaana Wodee Matattiis!
Xoossay saꞌaa medhdhidoy xillo asay merinawu deꞌanaassa. (Mazamure 37:29) I koyro azinanne machcho gidida Adaamanne Hewaano loꞌꞌiya ataakiltte sohuwan Edenen wottiis, qassi etinne eta zareti saꞌaa gannate oottiyoonne naagiyo aawatettaa etawu immiis.—Doomettaabaa 1:28; 2:15.
Ha wodiyan nu deꞌiyo alamee Xoossay qoppido Gannatiyaappe keehi dummatees. SHin Xoossay ba qofaa laammibeenna. I ba koyro qofaa waatidi polanee? Hagaappe kasetiya huuphe yohuwan nuuni beꞌidoogaadan, Xoossay saꞌaa xayssenna. Yaatiyoogaappe, I ammanettida asay yan deꞌanaadan oottana. Xoossay ba halchchuwaa poliyo wode, saꞌay ay mala gidanee?
Kumetta saꞌaa issi kawotettay haarana
Sinttappe mata wodiyan, saluwan deꞌiya Xoossaa kawotettay kumetta saꞌan deꞌiya asaa haarana; he wode saꞌay asa ubbay issippetettan, loꞌꞌonne ufayssiya oosuwaa oottiyoogan ufayttiyo soho gidana. Xoossay kumetta saꞌaa haaranaadan Yesuus Kiristtoosa sunttiis. Ha wodiyan deꞌiya haariyaageeti asawu tumuppe qoppokkona. SHin, Yesuusi ubbatoo asawu loꞌꞌobaa qoppiyo gishshawu etappe dumma; ayssi giikko, A haaroy siiquwan baasettidaagaa; qassi I keha, qarettiyaagaanne suure haariya Kawo.—Isiyaasa 11:4.
Kumetta saꞌan deꞌiya asay issuwaa gidana
Ooratta alamiyan deꞌiya asay, qommuwaaninne zariyan shaahettenna. Asa ubbay issuwaa gidana. (Ajjuutaa 7:9, 10) Saꞌan deꞌana asa ubbay Xoossaanne ba shooruwaa siiqiyaagaa, qassi Xoossay koyro asawu halchchidoogaadan saꞌaa naaganawu sarotettan issippe oottana.—Mazamure 115:16.
Saꞌaa carkkuwaa hanotay loꞌꞌo gidana
Xoossaa Kawotettay haariyo wode, Xoossay wottiyoobi baynna ogiyan ubbatoo carkkuwaa hanotaa giigissana. (Mazamure 24:1, 2) Yesuusi wolqqaama gotiyaa coꞌꞌu oottido wode, I Xoossaa wolqqan oottana danddayiyoobaa bessiis. (Marqqoosa 4:39, 41) Kiristtoosi haariyo wode, meretaa daafay gakkana giidi ooninne yayyenna. Xoossaa Kawotettay haariyo wode, nuuni mehiyaa doꞌaarakka sarotettan deꞌana; qassi nu deꞌiyo heeraa moorokko.—Hoose7a 2:18.
Wottiyoobi baynna payyatettaynne keehi daro kattay deꞌana
Asa ubbawu wottiyoobi baynna payyatettay deꞌana. Harggee, cimatettay, woy hayqoy deꞌenna. (Isiyaasa 35:5, 6) Koyro azinaynne machchiyaa Edene gannatiyan ufayttidoogaadan, asay keehi loꞌꞌonne geeshsha heeran ufayttidi deꞌana. Edene gannatiyaagaadan, ooratta alamiyan biitta ubban daro kattay mokkana; qassi saꞌan deꞌiya asaa ubbawu qumay gidi palahana. (Doomettaabaa 2:9) Xoossaa asa gidida beni Israaꞌeelatuugaadan, Gannatiyan daana ooninne “kallana gakkanaashin qumaa maana.”—Wogaabaa 26:4, 5.
Tumu sarotettaanne naaguwaa
Xoossay ehaana ooratta alamiyan, asa ubbay sarotettan ufayttana; qassi issoy issuwaa kehatettaaninne suure oyqqana. Eti olettokkona; wolqqaa coo wurssokkona; qassi eta ubbawu koshshiyaabay deꞌana. Geeshsha Maxaafay hagaadan gees: “Asi ubbi ba woiniyaa turaa kuwaaninne balasiyaa kuwan woppu giidi uttana; ai asinne eta yashissenna.”—Mikiyaasa 4:3, 4.
Ubba asawu loꞌꞌiya keettaynne ufayssiya oosoy deꞌana
Ubba asawu xayana giidi hirggenna keettay daana; qassi nuuni oottanabay ubbay woytuwaa demissiyaagaa gidana. Geeshsha Maxaafay yootiyoogaadan, Xoossay ehaana ooratta alamiyan deꞌiyaageeti “coo daafurokkona.”—Isiyaasa 65:21-23.
Aybippenne aadhdhiya timirttiyaa
Geeshsha Maxaafay ‘saꞌay Yihoowa eriyoogan kumana’ yaagees. (Isiyaasa 11:9) Xoossaa Kawotettaa haaruwan deꞌana asay banttana Medhdhida Yihoowappe keehi daro aadhdhida eratettaanne I medhdhidobata xeelliyaagan keehi darobaa tamaarana. Eti bantta eraa hara asaa qohiya miishshaa medhdhanawu goꞌettokkona. (Isiyaasa 2:4) Yaatiyoogaappe, eti issoy issuwaara sarotettan waani deꞌanaakkonne saꞌaa waati naaganaakko tamaarana.—Mazamure 37:11.
Merinaa deꞌuwaa
Nuuni ubba gallassi deꞌuwan ufayttanaadan, Xoossay saꞌaa naaganawu darobaa oottana. I asay saꞌan merinawu deꞌanaadan halchchiis. (Mazamure 37:29; Isiyaasa 45:18) Hegee polettanaadan, Xoossay ‘hayquwaa merinawu mittana.’ (Isiyaasa 25:8) Geeshsha Maxaafay “Hagaappe sinttanau haiqoinne kayyoi woi waasoinne sahoi de7enna,” giidi yootees. (Ajjuutaa 21:4) Xoossay asa ubbawu, hegeekka ha iita alamiyaa bashshaappe I ashshanaageetussinne sinttappe yaana ooratta alamiyan hayquwaappe I denttana qooday baynna asatussi merinaa deꞌuwaa immana.—Yohaannisa 5:28, 29; Oosuwaa 24:15.
Miilooniyan qoodettiya asay, keehi matida Xoossaa Kawotettan deꞌanawu giigettiiddi dees. Eti nagaranchchata gidikkokka, ooratta alamiyan deꞌanaadan Xoossay koyiyo asatu mala gidanawu baaxetoosona. Waanidi? Eti Xoossaa Yihoowabaanne I kiittido Yesuus Kiristtoosabaa tamaariyoogaana.—Yohaannisa 17:3.
Ha alamiyaa bashshaappe waanada attana danddayiyaakkonne keehi matida loꞌꞌiya alamiyan waanada deꞌana danddayiyaakko gujjada tamaara. Merinawu Ufayttada Deꞌa! giyo maxaafaa goꞌettada, miishsha qanxxennan issi Yihoowa Markkaara Geeshsha Maxaafaa xannaꞌa.