Sinttappe Ne Deꞌoy Ufayssiyaagaa Gidanaadan Aybi Maaddanee?
Daro asay, sinttappe banttana gakkanabay qaadan gakkees giidi ammanees. Eti hegaa ammaniyo gishshawu, bantta deꞌoy giiga gidanaadan maaddees giidi qoppiyo meezeta kaalloosona.
DAROTI WOYGIDI AMMANIYOONAA?
XOOLINTTIYAA PAYDIYOOGAA: Issi uri yelettiyo wode xoolintteti beettiyo hanotay, A deꞌoy giiga gidanaadan woy gidennaadan oottana danddayees giidi amaridaageeti ammanoosona. Eti sinttanaabaa eranawunne issibaa kuuyanawu maaddana mala xoolinttiyaa paydoosona.
SHAREECHCHUWAA OYCHCHIYOOGAA: Harati qassi, ufayssaa demmanawu shareechchuwaa oychchiyoogee keehi koshshiyaaba giidi ammanoosona. Eti yaatiyoogee banttawu ubbabay ushachchanaadan maaddees giidi qoppoosona. Qassi eti shareechchoti banttawu yootidoogaadan oottoosona.
MAYZZATUSSI GOYNNIYOOGAA: Harati banttana iitabaappe naaganawunne anjjuwaa demmanawu, mayzzatussi woy eeqa xoossatussi goynnana bessees giidi ammanoosona. Veetinaamen deꞌiya Vanoa giyo maccaasiyaa hagaadan gaasu: “Ta mayzzatuyyo goynniyoogee, taaninne ta naati ha wodiyaankka sinttappekka ufayssiya deꞌuwaa deꞌanaadan maaddana gaada ammanays.”
ZAARETTI YELETTIYOOGAA: Issi uri hayqqiyo wode zaarettidi yelettees; qassi hegee zaari zaari haniyaaba giidi daroti ammanoosona. Eti haꞌꞌi banttana gakkiya loꞌꞌobay woy iitabay kase eti oottidobaa gaasuwaana giidi ammanoosona.
SHin daroti hegaa bala ammanodan qoppoosona. Eti hegaa ammanennaagaa yootiyaaba gidikkonne qaadaa odiyoogaa mala iita ayyaanaa oosota oottoosona. Hegaa mala oosoti sinttanaabaa eranaadan maaddana danddayoosona giidi eti qoppoosona.
HEGAA MALA AMMANOTI TUMUPPE ASAA MAADDIYOONAA?
Hegaa malabatun ammaniyaageeti ufayssiya deꞌuwaa demmidonaa?
Veetinaamen deꞌiya Hawa giyo bitaniyaa hanotaa qoppa. I bana maaddanaadan xoolinttiyaa paydiyoogaa, shuchchaa qoriyoogaanne mayzzatussi goynniyoogaa mala oosota oottiis. Yaatin I ufayssaa demmidee? I hagaadan giis: “Taani daro miishshaa xayaas, acuwan gelaas, ta son sarotettay xayiisinne keehi unꞌꞌettaas.”
Taywaanen deꞌiya Kayaminga giyo bitaneekka xoolinttiyaa paydiyoogaa, zaarettidi yelettiyoogaa, qaadaa odiyoogaa, shuchchaa qoriyoogaanne mayzzatussi goynniyoogaa malabatun kase ammanees. He ammanotubaa I loytti akeeki simmidi hagaadan giis: “He timirttetinne wogati issoy issuwaara maayettennaagaanne muttumurettidaageeta gidiyoogaa, qassi xoolinttiya paydidi yootiyoobay darotoo bala gidiyoogaa akeekaas. Qassi zaarettidi yelettiyoogeekka bala gidiyoogaa akeekaas; ayssi giikko issi asi kase ba deꞌuwaabaa hassayana xayikko, ba deꞌuwan waani laamettananne ufayttana danddayii?”
“He timirttetinne wogati issoy issuwaara maayettennaagaanne muttumurettidaageeta gidiyoogaa akeekaas.”—KAYAMINGA, TAYWAANE
Qommoora etabaa denttido asatinne hara daroti xoolinttiyaa paydiyoogaa, zaarettidi yelettiyoogaa, qaadaa odiyoogaa, shuchchaa qoriyoogaanne mayzzatussi goynniyoogaa malabati sinttappe ufayssiya deꞌuwaa demmanawu maaddennaagaa akeekidosona. Hegaa giyoogee nuuni sinttappe ufayssiya deꞌuwaa demmana danddayokko giyoogee?
Daroti, xoqqa timirttiyaa tamaariyoogeenne duretiyoogee ufayssiya deꞌuwaa deꞌanaadan maaddees giidi qoppoosona. Hegaadan kuuyidoogee amaridaageetu bolli ay kaalettidee?
a Ha huuphe yohuwaninne kaalliyaagan issi issi asatu sunttay laamettiis.
b He qofay Geeshsha Maxaafan Galatiya 6:7n deꞌees. He qofaa Arshsho baggan meeze gidida haasayay hagaadan giidi qonccissees; meelooniyaa tokkikko, meeloonee ayfees; lokkomaa zerikko, lokkomay mokkees.