Yihooway Neeyyo Wolqqaa Immana

1-2. Yihoowa Markkata darota gakkiya metoy aybee?

XIMOOTIYOOSI baassi danddayettida ubban sabbakiyo oosuwaa minnidi oottanaadan kiitettida PHawuloosi A minttettiis. (2 Xim 4:5) Yaatiyo gishshawu, nuuni PHawuloosa zoriya kaalloos; qassi Xoossaassi haggaaziyoogan nuussi danddayettida ubbabaa oottoos. SHin hegee issi issitoo deexxana danddayees. Nu ishanttuppenne michchonttuppe daroti sabbakanawu yayyoosona. (2 Xim 4:2) Leemisuwawu, nu oosuwaappe amaridaagee teqettido woy muleera digettido biittatun deꞌiya ishanttubaa qoppa. Eti qashettana danddayiyoogaa erikkonne sabbakoosona!

² Yihoowa asata hidootaa qanxxissana danddayiya daro metoy gakkees. Leemisuwawu daroti bantta soo asawu koshshiyaabaa kunttana xallawu daro saatiyaa oottoosona. Eti loytti haggaazanawu koyoosona; shin saaminttaa wurssettan hitti goosona. Harati caddi oyqqiya harggiyaa gaasuwan woy cimatettaa gaasuwan kaseegaadan oottana danddayokkona. Harati qassi eti Yihoowayyo aynne pattennabadan ubbatoo qoppoosona. Mayraamob giyo michchiya hagaadan gaasu: “Hidootaa qanxxiyoogee taani daafuranaadan oottiyo gishshawu, hidootaa qanxxennan agganawu minnada baaxetays. Qassi hegee ta wodiyaanne wolqqaa wurssin taani haggaazenna gishshawu zilꞌꞌettays.”

3. Ha huuphe yohuwan nuuni ay beꞌanee?

³ Nuna ayba metoy gakkikkokka, danddayettida keenan nuuni aggennan haggaazanaadan koshshiya wolqqaa nuussi Yihooway immana danddayees. Yihooway nuna maaddiyo ogeta beꞌanaappe kase, metoy deꞌishinkka PHawuloosinne Ximootiyoosi bantta haggaazuwaa polanaadan I etassi wolqqaa waati immidaakko pilggana.

AGGENNAN SABBAKANAADAN WOLQQAA NUUSSI YIHOOWAY IMMEES

4. PHawuloosa ayba metoy gakkidee?

⁴ PHawuloosa daro metoy gakkiis. A morkketi A shocido wode, qachchido wodenne ubba qassi A woranawu malido wode Yihoowa maadoy awu koshshiis. (2 Qor. 11:23-25) PHawuloosi I hidootaa qanxxanaadan oottiyaabaa issi issitoo baaxetana koshshidoogaa yootanawu yeellatibeenna. (Roo. 7:18, 19, 24) I agunttadan ‘caddi oyqqiya’ sahuwaakka gencciis; Xoossay hegaa baappe digganaadan I keehi koyiis.—2 Qor. 12:7, 8.

5. Metoy gakkishinkka PHawuloosi ay oottidee?

⁵ PHawuloosa he ubba metoy gakkikkonne, I aggennan haggaazanaadan Yihooway awu wolqqaa immiis. PHawuloosi ay oottidaakko akeeka. Leemisuwawu, I Roomen issi keettan qashettido wode, kawotettaa sunttata gujjin, darotuyyo minnidi sabbakiis. I kawo keettaa naagiya darotuyyo sabbakiis; qassi bana oychchanawu yiya ubbaassi markkattiis. (Oos. 28:17, 31; Pili. 4:21, 22) Ha wodiyan deꞌiya tumu Kiristtaaneta maaddiya dabddaabbeta geeshsha ayyaanay kaalettin PHawuloosi he wode xaafiis. Qassi, Roomen deꞌiya gubaaꞌee PHawuloosi oottidoban minettidoogee, A ishantti “Xoossaa qaalaa yashshi bainnan kaseegaappe xalidi yootanaadan” oottiis. (Pili. 1:14) PHawuloosi oottanawu koyiyoogaa keenaa oottana xayikkonne, I baassi danddayettida keenan ubbabaa oottiis; hegee ‘wonggelee aakkanaadan tumu maaddiis.’—Pili. 1:12.

6. Naaꞌꞌantto Qoronttoosa 12:9, 10 maaran, PHawuloosi ba haggaazuwaa polanaadan A aybi maaddidee?

⁶ PHawuloosi Yihoowa haggaazuwan oottido ubbabaa ba minotettan gidennan, Xoossay wolqqaa immin oottidoogaa akeekiis. I “daafuriyo wode” Xoossaa wolqqay bana minttiyoogaa yootiis. (2 Qoronttoosa 12:9, 10 nabbaba.) PHawuloosa yedetay, qashoynne hara metoti gakkishinkka I ba haggaazuwaa loytti polanaadan Yihooway Ba geeshsha ayyaanaa baggaara wolqqaa immiis.

7. Ximootiyoosi ba haggaazuwaa polanawu xoonana koshshido metoti aybee?

⁷ PHawuloosa lagge gidida yelaga Ximootiyoosikka ba haggaazuwaa polanawu Xoossaa wolqqay koshshiyoogaa ammanettiis. Ximootiyoosi PHawuloosaara misoonaawe oosuwawu haahosaa biis. Qassi, Ximootiyoosi gubaaꞌeta xomoosanaadaaninne minttettanaadan PHawuloosi haranttuwaa A kiittiis. (1 Qor. 4:17) Ximootiyoosi taani danddayikke giidi qoppennan waayi aggana. PHawuloosi kaallidi deꞌiyaagaadan yootidoy hegaassa gidana danddayees: “Neeni yelaga gidiyo gishshau, nena ooninne karoppo.” (1 Xim. 4:12) Qassi, he wode, Ximootiyoosa agunttadan caddi oyqqiya sahoy ‘ubba wode sakkees.’ (1 Xim. 5:23) SHin, Ximootiyoosi mishiraachchuwaa sabbakanawunne ba ishanttuyyo oottanawu koshshiya minotettaa baassi Yihoowa geeshsha ayyaanay immanaagaa erees.—2 Xim. 1:7

NUNA METIYAABAY DEꞌISHINKKA AMMANETTIDI DEꞌANAADAN YIHOOWAY NUUSSI WOLQQAA IMMEES

8. Yihooway ha wodiyan ba asawu wolqqaa waati immii?

⁸ Ha wodiyan, baassi ammanettidi aggennan haggaazana mala ‘ubbaappe aadhdhiya wolqqaa’ Yihooway ba asawu immees. (2 Qor. 4:7) Yihooway nuna minttanawunne nuuni assi ammanettidi deꞌanaadan maaddanawu giigissido oyddubata ane beꞌoos: woosaa, Geeshsha Maxaafaa, Kiristtaane shiiquwaanne nu haggaazuwaa.

9. Woosay nuna waati maaddana danddayii?

⁹ Woossiyoogee minttettees. PHawuloosi nuuni Xoossaa “ubba wode” woossanaadan Efisoona 6:18n yootiis. Nuna maaddiyoogan Xoossay nu woosaa zaarana. Boliviyan deꞌiya Jaani, A amarida metoy gakkido wode, Yihooway waati maaddidaakko hassayees. A machchiyaanne A yelidaageeti issippe keehi sahettidosona. Etassi koshshiya ubbabaa kunttanawu Jaani keehi metootiis. A aayyiyaa hayqqaasu, qassi A machchiyaanne A aaway paxennan daro wodiyaa takkidosona. Jaani he deexo wodiyaabaa hagaadan giis, “Taani keehi hirggiyo wode, Yihoowa woossiyoogeenne tawu siyettiyaabaa ayyo yootiyoogee tana ubbatoo maaddiis.” Metuwaa genccanawu koshshiya wolqqaa Yihooway Jaanassi immiis. Boliviyan deꞌiya Ronaldda giyo cimay ba aayyiyo kanssere oyqqidoogaa eriis. Aginappe guyyiyan A hayqqaasu. He metiya wodiyan A aybi maaddidee? I hagaadan giis: “Taani woossiyo wode, tawu siyettiya ubbabaa Yihoowawu yootays. I ooppenne aaruwan, ubba qassi taappekka aaruwan tabaa akeekiyoogaa erays.” Issi issitoo, nu metuwaa genccana danddayennabadan nuussi siyettana danddayees; qassi woygidi woossanaakko erennan aggana danddayoos. SHin nuuyyo siyettiyaabaa yootanawu nu metootiyo wodekka baakko woossanaadan Yihooway nuna shoobbees.—Roo. 8:26, 27.

10. Ibraawe 4:12n qonccidaagaadan, Geeshsha Maxaafaa nabbabiyoogeenne hegaa wotti denttidi qoppiyoogee keehi koshshiyoy aybissee?

¹⁰ Geeshsha Maxaafaa nabbabiyoogan minettoos. PHawuloosi wolqqaanne minttettuwaa demmanawu Geeshsha Maxaafaa nabbabiis; qassi nuunikka hegaadan oottana koshshees. (Roo. 15:4) Nuuni Xoossaa Qaalaa nabbabidi hegaa wotti dentti qoppiyo wode, Geeshsha Maxaafay waatidi nuna maaddana danddayiyaakko akeekanaadan Yihooway nuna maaddees. (Ibraawe 4:12 nabbaba.) Qommoora abaa denttido Ronalddoy hagaadan giis: “Taani ubba galla qammi qammi Geeshsha Maxaafaa nabbabanawu baaxetidoogan keehi ufayttays. Taani Yihoowa eeshshatanne I ba asawu ay keena qoppiyaakko darotoo wotta denttada qoppays. Hegee taani wolqqaa demmanaadan maaddiis.”

11. Kayyottida michchiyo Geeshsha Maxaafay waati minttettidee?

¹¹ Nuuni Xoossaa Qaalaa wotti denttidi qoppiyoogee, nuna gakkiya metuwaa xeelliyaagan suurebaa qoppanaadan nuna maaddees. Kayyottida amꞌꞌiyo Geeshshaa Maxaafay waati maaddidaakko qoppa. Iyyooba maxaafaa nabbabiyaakko maaddiyaabaa tamaarana danddayiyoogaa issi cimay iyyo yootiis. A nabbabaydda, koyro heeran Iyyoobi balabaa qoppido gishshawu A boraasu. A ba qofan Iyyoobayyo hagaadan gaasu: “Iyyoobaa! Ne meto xallaa qoppoppa!” SHin I eeshshaykka Iyyoobaagaa mala gidiyoogaa A guyyeppe akeekaasu. Hegee A ba xeelaa laammanaadaaninne ba keettaaway hayqqidoogaa gaasuwan kayyottiyoogaappe minettanaadan O maaddiis.

12. Nuna minttettanawu Yihooway nu ishanttanne nu michchontta waati goꞌettii?

¹² Kiristtaane shiiqotun minettoos. Yihooway Kiristtaaneta eta mala Kiristtaanetu baggaarakka minttettees. PHawuloosi ba mala Kiristtaanetuura ‘minettanawu’ laamotiyoogaa yootiis. (Roo. 1:11, 12) Qommoora ibaa denttido Mayraama, ba ishanttuuranne michchonttuura shiiqiyoogaa dosawusu. A hagaadan gaasu: “Yihooway ta metuwaabaa erenna ishanttanne michchonttakka goꞌettees. Eti minttettiyaabaa yootoosona; woy masttooshaa xaafidi taayyo kiittoosona; qassi hegee taassi koshshiyaaba. Taagaa mala metoy gakkido michchonttuura haasayiyoogeenne eti oottidobaappe tamaariyoogeekka maaddees. Qassi cimati gubaaꞌiyan deꞌiya ishanttinne michchontti tana siiqiyoogaa taani akeekanaadan ubbatoo tana maaddoosona.”

13. Gubaaꞌe shiiqotun nuuni issoy issuwaa waati minttettana danddayiyoo?

¹³ Gubaaꞌe shiiqoti nuuni issoy issuwaa minttettanawu aybippenne aadhdhiya loꞌꞌo soho. Neeni shiiquwaa biyo wode, harata siiqiyoogaa yootiyoogaaninne eti oottido loꞌꞌobaa gishshawu galatiyoogan eta minttettanawu baaxetana danddayaasa. Leemisuwawu, Pitera giyo cimay ammanenna azinay deꞌiyo michcheessi issi shiiquwaa doommanaappe kase hagaadan giis: “Nena hagan beꞌiyoogee keehi minttettees. Neeni ubba gallassi ne usuppun naata mayzza gixissadanne zaariyo qofaa giigettanaadan maddada ehaasa.” A keehi galatada hagaadan gaasu: “Taassi hegee hachchi keehi koshshiis.”

14. Sabbakiyoogee nuna waati maaddii?

¹⁴ Haggaazuwan minettoos. Nuuni haratussi sabbakiyo wode asay siyinkka siyana xayinkka ufayttoos. (Lee. 11:25) Istaaso giyo michchiya haggaazoy minttettana danddayiyoogaa akeekaasu. I soo asaappe issoy bohettido wode A keehi azzanaasu; qassi A bana hagaadan oychchaasu, ‘Ta soo asaa maaddanawu taani ay oottana danddayiyaanaa?’ Istaasa he metuwaabaa qoppiyoogaa agganawu keehi metootaasu. A loꞌꞌobaa qoppanaadan O aybi maaddidee? Haggaazoy maaddiis! A haggaaziyo wode, moottan deꞌiya I maadoy koshshiyo asaabaa qoppiyoogaa doommawusu. A hagaadan gaasu: “He wode, tamaariyoobaa sohuwaara oosuwan peeshshiya Geeshsha Maxaafaa xinaatiyo Yihooway taayyo immiis. Taani hegan keehi minettaas. Sabbakiyoogee tana keehi maaddiis.”

15. Mayraama yootidobaappe ay tamaarana danddayay?

¹⁵ Issoti issoti bantta hanotaa gaasuwan, loytti haggaazana danddayennabadan qoppennan waayi aggana. Neeyyo hegaadan siyettikko, danddayettida keenan neeni oottiyooban Yihooway ufayttiyoogaa hassaya. Mayraamibaa ane zaarettada qoppa. Asay hara doonaa haasayiyo heeri A biido wode, A keehi maaddennabadan qoppaasu. A hagaadan gaasu, “Amarida wodiyawu, taani oottana danddayiyoobay guuttabaa haasayiyoogaa, woy issi Geeshsha Maxaafaa xiqisiyaa nabbabiyoogaa, woy issi trakttiyaa immiyoogaa xalla.” A he doonaa loytti haasayiya asaara bana geeddarissada danddayikke gaada qoppaasu. SHin, A ba xeelaa laammaasu. A he doonaa loyttada haasayana xayikkonne Yihooway O goꞌettana danddayees. A hagaadan gaasu, “Geeshsha Maxaafay yootiyoobay metennaba; qassi asaa deꞌuwaa laammees.”

16. Sooppe kiyana danddayennaba gidikkonne, sabbakanawu koyiyaageeta aybi maaddana danddayii?

¹⁶ Nuuppe amaridaageeti sabbakanawu koyikkonne, sooppe kiyanawu danddayennaagaa Yihooway erees. Yaatiyo gishshawu, nuna maaddanawu yiyaageetussi woy dottoretussinne narssetussi sabbakanaadan I nuna maaddana danddayees. Nuuni haꞌꞌi oottiyoobaa kase oottidobaara geeddarissikko, hidootaa qanxxana danddayoos. SHin, Yihooway nuna maaddiyoogaa nuuni akeekikko, nuna gakkiya meto ubbaa ufayssan genccanawu nuussi minotettaa koshshees.

17. Ooninne siyana xayikkonne, nuuni Eranchchaa 11:6y yootiyoogaadan aggennan haggaazana koshshiyoy aybissee?

¹⁷ Nuuni zeriyo tumaa zerettaappe mokkananne diccana danddayiyaagee awugaakko erokko. (Eranchchaa 11:6 nabbaba.) Leemisuwawu, iyyo layttay 80ppe dariyo Barbaro giyo michchiya silkkiyaa dawaliyoogaaninne dabddaabbiya xaafiyoogan ubbatoo markkattawusu. Ba dabddaabbetuppe issuwaa giddon, “Xoossay Neeyyo Ay Oottidee?” giya huuphe yohoy deꞌiyo Laappune 1, 2014 Wochchiyo Keelaa kiittaasu. A erennan, he dabddaabbiyaa bohettida azinaassinne machcheessi kiittaasu. Eti he maxeetiyaa zaari zaaridi nabbabidosona. Azinay Yihooway banttana haasayissiyaabadan qoppiis. He azinaynne machchiya shiiqota shiiqiyoogaa doommidosona; qassi wurssettan 27 layttappe dariya wodiyaappe simmin zaarettidi Yihoowa Markka gididosona. Barbara A xaafido he dabddaabbiya gaasuwan beettida he loꞌꞌo ayfiyaa akeekada keehi minettaasu!

18. Xoossay nuna minttettanaadan nuuni ay oottana koshshii?

¹⁸ Yihooway nuuni keehi gita wolqqaa baappe demmanaadan darobaa nuussi giigissiis. Woosaa, Geeshsha Maxaafaa, Kiristtaane shiiquwaanne haggaazuwaa mala I giigissidobata nuuni goꞌettiyo wode, I nuna maaddana danddayiyoogaanne hegaadan oottanawu koyiyoogaa nu ammanettiyoogaa bessoos. Yaatiyo gishshawu, ‘ba kumetta wozanaappe Yihoowan ammanettiya asa minttettiyoogan’ ufayttiya saluwan deꞌiya nu Aawan nuuni ammanettana koshshees.—2 Odi. 16:9.