1921 Xeetu Layttaappe Kase

“ICHCHASHE 1, 1921 Wochchiyo Keelay, Geeshsha Maxaafaa Tamaareta hagaadan oychchiis: ‘Ha laytti nuuni yeemuwan naagana danddayiyo oosoy aybee?’” Yaatidi etassi mishiraachchuwaa sabbakiyo oosoy imettidoogaa yootiya Isiyaasa 61:1, 2 eta hassayissiis. “Lo77o mishiraachchuwaa yootana mala, GODAI tana tiyiis. . . , GODAI doorido laittaanne nu Xoossai haluwaa kessiyo gallassaa awaajjana [mala] . . . , tana kiittiis.”

SABBAKIYOOGAN XALA GIDIDAAGEETA

Sabbakanaadan imettida oosuwaa polanawu, Geeshsha Maxaafaa Tamaareti xala gidana koshshees. Eti ashkketussi “mishiraachchuwaa” yootananne Xoossay iita asatussi “haluwaa kessiyo gallassaa” yootana koshshees.

Kanaadan deꞌiya ishaa Jon Heneri Haskeni, asay eqettishinkka xalatettan markkattiis. I sabbakiya hara citaara 1921 doomettan gayttiis. Ishaa Haskeni hagaadan giidi etaara haasayiyoogaa doommiis: “Nuuni Geeshsha Maxaafaabaa ufayssan haasayana koshshees. Nuuni issiban maayettana xayikkonne, nuuni haasayiyooban ooyettennan shaahettananne saruwan deꞌana danddayoos.” SHin hanotay hegaadan hanibeenna. Ishaa Haskeni hagaadan giis: “Nuuni guutta daqiiqa xalla haasayin he [sabaakee] penggiyaa wolqqappe shocin penggiyaa heregay meqerettidi wuygen laalettiis gaada qoppaas.”

“Intte Kiristtaane gidenna asatukko biidi etawu ayssi yootekketii?” giidi he sabaakee keehi cenggurssaa xoqqu oottiis. Ishaa Haskeni aybanne zaaribeenna; shin I ba wozanan, ‘taani hegeetuppe issuwaara haasayays giidi qoppiiddi’ aggidi biis.

He sabaakee kaalliya gallassi bantta woosa keettan tamaarissiiddi Ishaa Haskena xeelliyaagan worddobaa yootiis. Ishaa Haskeni kasebaa hassayidi hagaadan giis: “He sabaakee tana kase ha katamaa yiida ooppenne aadhdhiya worddanchchanne hayqqana bessiya ura giidi asawu tabaa yootiis.” SHin hegee I sabbakiyoogaa agganaadan oottibeenna; qassi I ubbatoo sabbakiisinne daro asawu yootiis. I hagaadan giis: “Taani yan sabbakido gishshawu keehi ufayttaas. Ubba issi issi asay hagaadan giis: ‘Neeni Xoossaa oosuwaa oottiyoogaa taani erays,’ qassi eti tawu koshshiyaabaa immidosona.”

BUZO XINAATIYAANNE SO ASAA XINAATIYAA

Asay Geeshsha Maxaafaa loytti akeekanaadan maaddanawu, Geeshsha Maxaafaa Tamaareti Geeshsha Maxaafaappe oychchiyo oyshatanne zaarota haꞌꞌi nuuni Beegottite! giyo maxeetiyan attamidi ubbatoo kessoosona. Yelidaageeti bantta naatuura tobbana danddayiyo Geeshsha Maxaafaa oyshati hegan deꞌoosona. Yelidaageeti he oyshata bantta naata oychchidi eti Geeshsha Maxaafaappe zaaruwaa demmanaadan eta maaddoosona. Geeshsha Maxaafaa metenna ogiyan tamaarissanawu “Geeshsha Maxaafan woysu maxaafati deꞌiyoonaa?” giyaagaa mala amarida oyshati deꞌoosona. Haray qassi yelagati sabbakiyoogan xala gidanaadan maaddanawu, “Tumu Kiristtaaneti ubbay banttana yedetay gakkana giidi naagana koshshii?” giyaagaa mala oysha.

Geeshsha Maxaafaabaa loytti eriyaageetussikka Geeshsha Maxaafaappe oychchiyo oyshatinne zaaroti hegan deꞌoosona. He oyshatu zaaroy Isttedis in zi Iskkiripchers giyo maxaafatuppe koyroogan deꞌees. Nabbabiya daroti he oyshatuppe darobaa tamaaridosona; shin guyyeppe he oyshati attamettidi kiyiyoogee attidoogee erissuwan odettiis. Aybissi attidee?

OORATTA MAXAAFAA!

*Zi Harp of God* giyo maxaafaa

Nabbabiyo qofay xaafettido karddiyaa

Oyshata xaafettido karddiyaa

Asay Geeshsha Maxaafaabaa issi huuphe yohuwaa issitoo tamaarana koshshiyoogaa aawatettay deꞌiyo ishantti akeekidosona. Yaatiyo gishshawu, eti Zi Harp of God giyo maxaafaa Hidaare 1921n attamissidosona. Xannaꞌanawu koyidi he maxaafaa ekkidaageeti xinaatiyaa banttarkka xannaꞌoosona. Hegaadan xannaꞌiyoogee “Xoossay asawu merinaa deꞌuwaa immanawu qaalaa gelidoogaa” asay eranaadan maaddiis. Waati xannaꞌidonaa?

Issi uri he maxaafaa ekkiyo wode, I he maxaafaappe nabbabana sinttaa yootiya guutta karddee awu imettees. Yaatidi kaalliya saaminttan, I nabbabidobaa xeelliyaagan amarida oyshati xaafettido hara karddee he urawu kiitettees. He karddiyan wurssettan deꞌiya qofay kaalliya wode nabbabiyoobaa yootees.

Issi issi saaminttan 12 saaminttaa karddiyaa matan deꞌiya gubaaꞌee xannaꞌiyaagawu posttan kiittees. Darotoo he karddiyaa gubaaꞌiyan deꞌiya cimidaageeti woy sooppe soo baana danddayennaageeti kiittoosona. Leemisuwawu, Amarkkan deꞌiya Ana K. Gardinera hagaadan gaasu: “Zi Harp of God giyo maxaafay kiyido wode, hemettanawu metootiya Tal giyo ta michcheessi imettiis; A saaminttawu saaminttawu giigiya oyshati deꞌiyo karddiyaa kiittiyoogan minnada oottaasu.” Issi uri he xinaatiyaa wurssiyo wode, Geeshsha Maxaafaabaa loytti eranaadan maaddanawu gubaaꞌiyaappe issi asi biidi he uraa oychchees.

SINTTAPPE DARO OOSOY NAAGEES

Layttaa wurssettan, Ishaa Josef Frankliin Razerfordi gubaaꞌe ubbawu dabddaabbiyaa kiittees. I, “ha laytti Kawotettaabaa kaseegaappe aaruwan loytti markkattidoogaanne kaseppe aaruwan daro asaa maaddidoogaa” yootiis. Hegaappe simmin, gujjidi hagaadan giis: “Oosettana bessiya daro oosoy deꞌees. Ha maalaaliya oosuwan haratikka hashetanaadan minttettite.” Geeshsha Maxaafaa Tamaareti I yootidobaa oottidoogee qoncce. Eti 1922n Kawotettaabaa kaseegaappe aaruwan xalatettan sabbakidosona.

Xala Laggeta

Geeshsha Maxaafaa Tamaareti issoy issuwaa maaddiyoogan siiqettiyoogaa bessidosona. Hagaappe kaallidi deꞌiya taarikee bessiyoogaadan eti ‘metuwaa wode maaddanaassi yelettida’ xala lagge.—Lee. 17:17.

“Masqqaynno, Uddufune 31, 1921, Tulsa giyo kataman (Amarkkan Oklahoma) deꞌiya karetta bitanee boottaa maccaasiyo keehi qohidoogaa gaasuwan A mootin I qashettiis. Hegaappe simmin, 1,000ppe dariya boottati qoodan guutta gidida karettatuura ooyettidosona. He ooshshay karettati deꞌiyo Griinwuudi giyo katamaa heeri eesuwan gakkiis. He wode 1,400ppe daro keettatanne suuqeta asay bonqqiisinne xuuggiis. Irpporttiyan 36 asay hayqqiis giidi odettidaba gidikkonne, hayqqidaageetu qooday xeetan qoodettiyaagaa gidana danddayees. Hegee Tulsa kataman zariyaa busakkidoogaa geetettiis.”

Giirnwuude kataman deꞌiya Geeshsha Maxaafaa Tamaare gidida karetta Ishay Richard J. Hiil, hanidabaa hagaadan giis: “Asay ooshshaa denttido qammi, nuuni kaseegaadan gubaaꞌe shiiquwan deꞌoos. Nuuni shiiquwaa wurssiyo wode, Tulsa katamawu gidduwan zayyiya xuussiyoogaa siyida. Hegaadan xuuqqiiddi qamma bilahe gakkanaashin takkiis.” Oruwaa galla maallado Tamme 1, hanotay yaa keehi iitiis. “Amarida asay yiidi nuuni qohuwaappe attanawu koyikko, kataman deꞌiya Addaraashaa baana koshshiyoogaa yootiis.” Yaatiyo gishshawu, Ishaa Hiil ba keettaayeeranne ba ichchashu naatuura baqatidi Tulsa kataman deꞌiya Addaraashaa biis. Kawotettay he ooshshaa teqqanaadan kiittido wotaaddarati yan deꞌiya 3,000 gidiya karetta attumaageetanne maccaageeta qohuwaappe naagidosona.

Ishaa Arter Klawusi Zi Harp of God giyo maxaafaa goꞌettidi 14 naati Geeshsha Maxaafaabaa loytti eranaadan maaddiis

Arter Klawus giyo bootta ishay he wode xala gidiyoogaa bessiyaabaa kuuyiis. “Griinwuuden asay bonqqiyoogaanne keettaa taman xuuggiyoogaa taani siyido wode, ta siiqo Ishay Hiil waani deꞌiyaakko beꞌanawu yaa baanawu kuuyaas.”

Ishaa Hiila soo I gakkiyo wode, Hiila shooron deꞌiya issi bootta bitanee zayyiya oyqqidaagaa beꞌiis. Ishaa Hiilayyo lagge gidida he shooroy Artera ooshshaa denttiya asatuppe issuwaa giidi qoppiis. “Neeni hagawu aybissi yaadii?” giidi I waassiis.

Arteri hagaadan giis: “Taani hegawu yiido gaasuwaa awu yootin I maayettibeennaba gidiyaakko, I ta bolli tokkosees. Taani Ishaa Hiilawu lagge gidiyoogaanne A soo darotoo yiidoogaa assi loytta yootaas.” Arterinne he shooroy bonqqiyaageetuppe Hiila aquwaa naagidosona.

Ishaa Hiilinne A soo asay he katamaa Addaraashan deꞌiyoogaa Arteri sohuwaara eriis. Wotaaddaratu halaqay General Baariti paramennan karetta asati kiyana danddayennaagee Arterawu odettiis. Arteri hagaadan giis: “Generaliyaa demmidi haasayissanaagee keehi metiyaaba. Ta qoppidobaa yootido wode, I hagaadan oychchiis: ‘Neeni ha soo asaa naagananne etawu koshshiyaabaa kunttana koyay?’ Taani koyiyoogaa ufayssan yootaas.”

Kessanaadan azazido woraqataa kushiyan oyqqidi Arteri he Addaraashaa eesuwan biis. I he woraqataa halaqaa bessin halaqay hagaadan giis: “Hagee generalee paramidoba! Hagaappe asa kessiyoogan neeni koyro asa gidiyoogaa eray?” Arterinne halaqay Ishaa Hiilanne A soo asaa sohuwaara demmidosona. Eti ubbay Artera kaamiyan gelidi Ishaa Hiila soo biidosona.

Ishaa Hiilinne A soo asay qohettibeennaagaa Ishaa Klawus eriis. Ishaa Klawusa xalatettaanne siiquwaa beꞌido wode harati garamettidosona. Arteri hagaadan giis: “Hiila aqoy qohettennaadan teqqida shooroy Yihoowa Markkata kaseegaappe aaruwan bonchchiis. Daroti Xoossaa asay issoy issuwaa meran shaakkennaagaanne Xoossaa asa gidida issi uri haraappe aadhdhays giidi qoppennaagaa eti akeekido gishshawu tumaa siyanawu koyidosona.”