Madirakiyaa pootuwaanne appe bollaara deꞌiya xaafettidabaa bessiyaabaa
1922 Xeetu Layttaappe Kase
“NU GODAA Yesuus Kiristtoosa baggaara nuna xoonissiya Xoossaa.” (1 Qor. 15:57) Hagee 1922 layttaa xiqisiyaa; Geeshsha Maxaafaa tamaareti ammanettiyo gishshawu, Yihooway eta anjjanaagaa ha xiqisee eta hassayissiis. He laytti minnidi sabbakidaageeta Yihooway anjjiis. Bantta maxaafaa attamissiyoogaanne giigissiyoogaa doommido wodenne Kawotettaa tumaa daro asay siyanaadan eraadooniyaa goꞌettido wode Yihooway eta anjjiis. He wode, 1922n Yihooway ba asaa anjjidoogee loytti qoncciis. Geeshsha Maxaafaa tamaareti Amarkkan, Ohayon, Seedar Poyntten keehi dumma gidida gita shiiquwaa shiiqidosona. He gita shiiquwan hanidabay he wodeppe doommidi hanno gakkanawu Yihoowa dirijjitiyan oosettiya oosuwawu keehi maaddiis.
“KEEHI UFAYSSIYAA QOFA”
Sabbakiyo oosoy aakki aakki biido wode, xuufiyaa koyiyaageetu qooday gujjiis. Birukiliine Beeteelen deꞌiya ishantti maxeeteta giigissikkonne, mino koohoy deꞌiyo bantta maxaafata, attamiya dirijjitetukko efiidi attamissoosona. He wode daro aginawu sabbakiyo oosuwawu goꞌettiyo maxaafata, attamiya dirijjitee gidiyaagaa keenaa attamana danddayibeenna. Yaatiyo gishshawu, Ishaa Razerfordi attamiyo maashiniyan aawatettay deꞌiyo Robert Martina eti bantta maxaafaa banttawu attamana danddayoos giidi qoppiyaakkonne oychchiis.
Niyoorkken, Birukiliinen, Konkkord Isttiret giyoosan deꞌiya paabirkkaa
Ishaa Martini hagaadan giis: “Keehi ufayssiya qofa; ayssi giikko, hegee maxaafaa attamana danddayiya maashiniyan oosuwaa doommana giyoogaa.” Ishantti Birukiliinen 18 Konkkord Isttiret giyoosan keraa ekkidosona, qassi koshshiya miishshata demmidosona.
Ishantti bantta maxaafaa attamanawu halchchidoogan ufayttidaageeti ubbata gidokkona. Attamiyo maashiniyaa pirezddanttee, nu maxaafaa attamiyo ooratta sohuwaa xomoosiis. I hagaadan yaagiis: “Maxaafaa attamanawu inttessi keehi loꞌꞌo miishshati deꞌoosona, shin hegaa waati goꞌettiyaakko intteppe ooninne erenna. Usuppun aginan intte intte miishshaa ubbaa moorana.”
Ishaa Martini hagaadan giis: “Hegee tuma milatees. SHin Yihooway maaddanaagaa eroos; I ba oosuwaa oottana.” Ishaa Martini giidobay likke. Sohuwaara, ooratta maashinee galla galla 2,000 maxaafaa attamees.
Attamiyaageeti paabirkkan deꞌiya bantta attamiyo maashiniyaa matan eqqidosona
ERAADOONIYAN DARO SHAꞌU ASAWU GAKKANAADAN OOTTIYOOGAA
Yihoowa asay bantta maxaafaa attamiyoogaa bolli, Kawotettaa mishiraachoy daro asaa gakkanaadan ooratta hiillaa, hegeekka eraadooniyaa goꞌettiyoogaa doommiis. Usuppune 26, 1922, Woggaa galla saateppe guyyiyan, Ishaa Razerfordi koyro wodiyawu eraadooniyan haasayiis. I Amarkkan, Kaliforniyan, Los Anjjelese kataman KOG giyo eraadoone xaabiyan, “Haꞌꞌi Deꞌiya Miilooniyan Qoodettiya Asay Mule Hayqqenna” giya huuphe yohuwan haasayaa haasayiis.
He haasayaa 25,000 gidiya asay siyiis. Haasayaa gishshawu Ishaa Razerforda galatiyoogaa qonccissiya dabddaabbiyaa etappe amaridaageeti kiittidosona. He dabddaabbetuppe issuwaa kiittidaagee, Kaliforniyan, Santta Ana kataman deꞌiya, Willard Ashiforda. I “ufayssiyaanne keehi maaddiya” Ishaa Razerforda haasayawu A galatiis. I gujjidi hagaadan giis: “Sahettido gishshawu sooppe kiyana danddayenna heezzu asati son deꞌoosona. Yaatiyo gishshawu, nuussi keehi mata sohuwan neeni haasayaa haasayiyaakkokka nuuni yiidi hegaa siyana danddayokko.”
Kaalliya saaminttatun daro asay eraadooniyan haasayaa siyiis. He layttaa wurssettan baa giishin “300,000 gidiya asay eraadooniyan haasayaa siyidoogaa” Wochchiyo Keelay yootiis.
Dabddaabbiyaaninne hara ogetun harati minttettido gishshawu, Birukiliine Beeteeleppe darin haakkennan deꞌiya, Isteten Aylande goshshaa sohuwan Geeshsha Maxaafaa Tamaareti eraadoone xaabiyaa essanawu kuuyidosona. Kaalliya layttatun Geeshsha Maxaafaa Tamaareti, WBBR giyo he eraadoone xaabiyaa goꞌettidi, Kawotettaa mishiraachoy daro sohuwan deꞌiya daro asaa gakkanaadan oottidosona.
“ADV”
Tamme 15, 1922n kiyida Wochchiyo Keelay, Ohayon, Seedar Poyntten Masqqalaa 5ppe biidi 13, 1922n gita shiiqoy deꞌanaagaa yootiis. Geeshsha Maxaafaa Tamaareti Seedar Poyntte gakkido wode keehi ufayttidosona.
Ishaa Razerfordi koyro haasayan ezggiyaageetussi hagaadan giis: “Goday . . . ha shiiquwaa anjjanaagaanne ha saꞌan kaseegaappe aaro markkati gujettanaagaa taani ammanettays.” Gita shiiquwan haasayaa haasayiyaageeti, ishanttinne michchontti sabbakiyo oosuwaa minnidi oottanaadan zaari zaaridi minttettidosona.
Ohaayon, Seedar Poyntten 1922n gita shiiquwaa shiiqida daro asaa
Arbba, Masqqalaa 8n, 8,000 gidiya asay addaraashan shiiqidi Ishaa Razerforda haasayaa siyanawu yeemuwan naagees. Bantta shoobe woraqatan xaafetida “ADV” giyoogee woygiyoogaakko I qonccissana giidi eti qoppidosona. Eti bantta sohuwan uttido wode, etappe daroti madirakiyaappe bolla baggaara deꞌiya xaafettidabaa beꞌidosona. Amarkkan, Oklaahooman, Tullisa giyoosaappe yiida, Artter Kilawusi haasayata loytti siyana danddayiyo sohuwan uttiis; he wode maykraafoonee woy cenggurssaa xoqqissiya miishshi baynna gishshawu siyiyoogee keehi metiyaaba.
“Nuuni ubba haasayata loytti ezggida”
Ishaa Razerfordi haasayaa haasayiyo wode asaa qofay shaahettennaadan pooꞌissidi yiya ooninne shiiquwaa addaraashaa gelana danddayennaagaa shiiquwaa liqambbaree yootiis. Guuran 3:30 Ishaa Razerfordi, Yesuusi Maatiyoosa 4:17n, “ Saluwaa kawotettai matattiis” giidi odido qofaa yootiyoogan doommiis. Ha Kawotettaabaa asay waati siyanaakko I haasayido wode hagaadan giis: “Yesuusi I qoncciyo wode ba asaa shiishshiyo oosuwaa kaalettanay A gidiyoogaa yootiis; he wode I tumanchchanne ammanettida asaa shiishshana.”
Addaraashan loytti siyana danddayiyo sohuwan uttida Ishaa Artter Kilawusi hagaadan giis: “Nuuni ubba haasayata loytti ezggida.” SHin qoppennan, I sahettido gishshawu addaraashaappe kiyidi baana koshshiis. Artteri zaarettidi gelana danddayennaagaa eriyo gishshawu, mammottiiddi kiyiis.
Amarida daqiiqaappe simmin awu kehiis. I guyye simmidi Addaraashaa biyo wode, asay kushiyaa baqqiyoogaa siyidoogaa yootiis. Hegee A keehi ufayssiis! I he ufayssiya haasayaa siyanawu kaaraa bolli shibbidi kiyana koshshikkonne, yaatanawu kuuyiis. He wode awu layttay 23 gidido yelaga Ishaa Artter Kilawusi pooqiyaa bolli shibbanawu injjetiyaasaa demmiis. Pooqiyaa maskkootee dooya deꞌees, qassi I maskkootiyaakko shiiqido wode “haasayaa loytti siyana danddayiyoogaa” akeekiis.
Artteri barkka deꞌenna. A laggetuppe amaridaageetikka kaaraa bolli deꞌoosona. Etappe issoy Frank Jonseni A bochchidi, “Neeyyo mashsha mala qarabay deꞌii?” yaagidi oychchiis.
Artteri, “Ee deꞌees” yaagiis.
Frankki hagaadan giis: “Neeni nu woosaa zaaro. Ha xaaxettida gitabaa beꞌay? Hagee malaataa, qassi ha misimaaretun kaqetti uttiis. Daannaya yootiyoobaa loytta siya. I, ‘erissite, erissite’ giyo wode, ha oyddu sohuwan deꞌiya wodorota qanxxana.”
Yaatiyo gishshawu, Artteri mashshaa oyqqidi, malaatay odettanaagaa ba laggetuura issippe naagees. Daro takkennan, Ishaa Razerfordi ba haasayawu waannatiya sohuwaa gakkiis. Ishaa Razerfordi keehi ufayttidi, qassi wozanappe ba cenggurssaa xoqqu oottidi gidennan aggenna hagaadan giis: “Godaayyo ammanettiyaanne tumanchcha markkata gidite. Worddo haymaanootee muleera xayana gakkanaashin olettiyoogaa aggoppite. Kawotettaa mishiraachchuwaa ubbasan sabbakite. Yihooway tumu Xoossaa gidiyoogaa, qassi Yesuus Kiristtoosi kawotu Kawonne godatu Goda gidiyoogaa asay erana bessees. Hagee gallassatu ubbaappe aadhdhiya dumma gallassa. Kawoy haariyoogaa doommidoogaa markkattite! Hagaa asa ubbawu yootiyo aawatettay intteyyo deꞌees. Yaatiyo gishshawu, Kawuwaanne A Kawotettaa erissite, erissite, erissite!”
Artterinne hara ishantti qashettida wodoruwaa qanxxidi, xaaxetti uttidabaa loddan birshshidoogaa Artteri yootiis. “ADV” (erissite geetettidi birshshettida Inggilizetto qaalawu doometta pitaleta) giya pitaletuura maayettiya hanotan xaafettidabay hagaadan gees: “Kawuwaanne Kawotettaa Erissite.”
MAADDIYA OOSUWAA
Seedar Poyntten shiiqido gita shiiqoy ishantti keehi koshshiya Kawotettaa mishiraachchuwaa minnidi sabbakanaadan maaddiis; qassi bantta dosan eeno giidaageeti ufayssan sabbakidosona. Amarkkan Oklahaaman deꞌiya issi kolpportteree (ha wodiyan aqinye geetettees) hagaadan giis: “Daro asay kasaliyaa kessiyo oosuwaa oottiyoonne keehi hiyyeesa gidido heeran nuuni sabbakida.” Asay Golden Eej giyo maxeetiyan deꞌiyaabaa darotoo siyiyo wode “yeekkiyoogaa doommees” giidi I yootiis. I, “Nuuni eta minttettana danddayido gishshawu keehi ufayttida” yaagiis.
Geeshsha Maxaafaa Tamaareti Yesuusi Luqaasa 10:2n, “Kattai daro; shin cakkiyaageeti guutta” giidi yootidobay keehi eesoyiyaaba gidiyoogaa akeekidosona. He layttaa wurssettan, eti kaseegaappe aaruwan Kawotettaa mishiraachchuwaa ubbasan erissanawu murttidosona.
a Ishaa Razerfordi Amarkkan, Mizuuren daanna gididi oottido gishshawu, “Daannaa” geetettidikka issi issitoo xeegettees.