‘Intte Geeshsha Gidite’

1. PHeexiroosi Kiristtaaneti waananaadan yootidee, qassi he zoree nuussi azazettanawu danddayettennaba milatiyoy aybissee?

NU HIDOOTAY saluwan woy saꞌan gidin, kiitettida PHeexiroosi koyro xeetu layttan deꞌida tiyettida Kiristtaanetuyyo immido zoriyaa xannaꞌiyoogan nuuni goꞌettana danddayoos. PHeexiroosi hagaadan giis: “Inttena xeesida Xoossai geeshsha gididoogaadan, inttekka intte ooso ubban geeshsha gidite. Xoossaa maxaafan, ‘Taani geeshsha gidiyo gishshau, inttekka geeshsha gidite’ geetettidi xaafettiis.” (1 PHe. 1:15, 16) Nuuni ha xiqisiyaappe geeshshatettan ooppenne aadhdhiya leemiso gidida Yihoowa milatana danddayiyoogaa tamaaroos. Nuuni nu oosuwan geeshsha gidana bessees, qassi yaatana danddayoos. Nuuni nagaranchcha gidiyo gishshawu hegee nuussi danddayettennaba milatana danddayees. PHeexiroosi darotoo balidaba gidikkonne, A hanotay nuuni ‘geeshsha gidana’ danddayiyoogaa qonccissees.

2. Nuuni ha huuphe yohuwan beꞌana oyshati awugeetee?

² Ha huuphe yohuwan, nuuni kaallidi deꞌiya oyshata pilggana: Geeshshatettay aybee? Geeshsha Maxaafay Yihoowa geeshshatettaabaa nuna ay tamaarissii? Nuuni nu oosuwan waanidi geeshsha gidana danddayiyoo? Qassi geeshshatettaynne nuuni Yihoowaara dabbotido dabbotay waani gayttii?

GEESHSHATETTAY AYBEE?

3. Geeshshatettaa xeelliyaagan daro asay qoppiyoobay aybee, shin nuuni likkebaa awuppe erana danddayiyoo?

³ Geeshsha giyo uraabaa daro asay qoppiyo wode, eti mule noocu geenna uraa, haymaanootiyaa kaalettiyaageetu maayuwaa maayiyaanne mule pashkki geenna uraa qoppoosona. SHin hegee likke gidenna. Geeshsha gidida Yihooway ufayttiya woy ‘anjjettida Xoossaa’ geetettees. (1 Xim. 1:11) Awu goynniyaageeti “anjjettidaageeta” woy ufayttiyaageeta geetettoosona. (Maz. 144:15) Yesuusi dumma maayuwaa maayiyaageetanne asay banttana beꞌana mala asaa sinttan loꞌꞌobaa oottiyaageeta seeriis. (Maa. 6:1; Mar. 12:38) Geeshsha Maxaafay geeshshatettaabaa yootiyo gishshawu tumu Kiristtaaneti geeshshatettay aybakko eroosona. Xoossay nuna siiqiyoogaanne nuuni oottana danddayennabaa oottanaadan I nuna mule azazennaagaa eroos. Yaatiyo gishshawu Yihooway ‘intte geeshsha gidite’ giidi nuuyyo yootiyo wode, hegee danddayettiyaaba gidiyoogaa nuuni ammanettoos. Nuuni nu oosuwan geeshsha gidanaappe kasetidi geeshshatettay aybakko erana koshshees.

4. “Geeshshatettay” aybee?

⁴ Geeshshatettay aybee? Geeshsha Maxaafan “geeshshatettaa” geetettida qaalay kandduwaaninne haymaanootiyaara gayttidaban geeshsha gidiyoogaa qonccissees. Xoossawu haggaazanawu dummatiyoogaakka he qaalay qonccissana danddayees. Qassi nuuni kandduwan geeshsha gidikko, Yihoowa ufayssiya ogiyan goynnikko, qassi awu mata dabbo gididi deꞌikko nuuni geeshsha. Nuuni nagaranchcha gidikkonne, keehi geeshsha gidida Yihooway nuuni ayyo mata dabbo gidanaadan I koyiyoogan maalaalettoos.

‘YIHOOWAY GEESHSHA, GEESHSHA, GEESHSHA’

5. Ammanettida kiitanchchatuppe Yihoowabaa ay tamaarana danddayiyoo?

⁵ Yihooway ubbaban geeshsha. Yihoowa araataa matan deꞌiya suraafeelati woy kiitanchchati yootidobay hegaa qonccissees. Etappe amaridaageeti hagaadan giidosona: “Geeshshai, geeshshai, geeshshai Ubbaappe Wolqqaama GODAATTENNEE!” (Isi. 6:3) He kiitanchchatussi geeshsha gidida Xoossaara mino dabbotettay deꞌiyo gishshawu eti geeshsha. Kiitanchchati yiidi saꞌan kiitaa yootiyo sohoy geeshsha gididoy hegaassa. Buuray eexxiyaagaa matan Muusee eqqido wode hegaadan haniis.—Kes. 3:2-5; Yaas. 5:15.

6-7. (a) Kessaabaa 15:1, 11 yootiyoogaadan, Muusee Xoossaa geeshshatettaa waati qonccissidee? (b) Xoossay geeshsha gidiyoogaa Israaꞌeelati hassayanaadan oottiyaabay aybee? (Koyro sinttan deꞌiya misiliyaa xeella.)

⁶ Muusee Israaꞌeelata kaalettidi zoꞌo abbaa pintti simmidi eta Xoossay Yihooway geeshsha gidiyoogaa etawu loytti yootiis. (Kessaabaa 15:1, 11 nabbaba.) Worddo xoossatuyyo goynniya Gibxxeti geeshsha gidennaagee qoncce. Worddo xoossatussi goynniya Kanaanetikka geeshsha gidokkona. Eta goynuwan naata yarshshiyoogeenne pokkobaa oottiyoogee deꞌees. (Wog. 18:3, 4, 21-24; Zaa. 18:9, 10) SHin, Yihooway he worddo xoossatuppe dummatees. Awu goynniyaageeti geeshsha gidennabaa aybanne oottanaadan I mule yootenna. I keehi geeshsha. Qeese ubbatu halaqay huuphiyan qaciyo shaashiya bollan deꞌiya worqqaappe medhdhido alleequwan wooci xaafidobay hegaa qonccissees. Ha alleequwaa bollan “GODAASSI GEESHSHA GIDIDI DUMMATIIS” yaagiya qaalay deꞌees.—Kes. 28:36-38.

⁷ He alleequwaa bolli xaafettidabay hegaa beꞌiya ooninne Yihooway tumuppe geeshsha gidiyoogaa akeekanaadan oottees. SHin issi Israaꞌeela asi qeese ubbatu halaqaakko shiiqana danddayenna gishshawu, he alleequwaa beꞌennan aggana danddayees. Yaatin I Yihooway geeshsha gidiyoogaa erii? Ee! Attuma asaa, maccaasaanne naatu sinttan Higgee nabbabettiyo wode, Ubba Israaꞌeelati siyidosona. (Zaa. 31:9-12) Neeni he sohuwan deꞌiyaakko ha qaalata siyana: “Taani, GODAI, intte Xoossaattennee. Taani geeshsha gidiyo gishshau, . . . inttekka geeshsha gidite.” ‘Taani GODAI geeshsha gidiyo gishshawu inttekka taayyo geeshsha gidite.’—Wog. 11:44, 45; 20:7, 26.

8. Wogaabaa 19:2ninne 1 PHeexiroosa 1:14-16n deꞌiya qofaappe nuuni ay tamaariyoo?

⁸ Ubba Israaꞌeelatussi nabbabettiya Wogaabaa 19:2n deꞌiya qofa ane beꞌoos. Yihooway Muuseyyo hagaadan giis: “Israa7eela asau ubbau hagaadan yaagada yoota; ‘Taani GODAI, intte Xoossai geeshsha gidiyo gishshau, inttekka geeshsha gidite.’” PHeexiroosi Kiristtaaneti ‘geeshsha gidanaadan’ zorido wode ha xiqisiyaa qofaa ekkennan waayi aggana. (1 PHeexiroosa 1:14-16 nabbaba.) Ha wodiyan nuuni Muuse Higgiyaa azazettana koshshenna. SHin Yihooway geeshsha gidiyo gishshawu, A siiqiyaageeti geeshsha gidanawu baaxetana koshshiyoogaa xeelliyaagan, Wogaabaa 19:2ppe nuuni ay tamaariyaakko PHeexiroosi xaafidobay qonccissees. Nuuni deꞌanawu hidootiyoy saluwaana woy gannate gidida saꞌaana gidin hegee tuma.—1 PHe. 1:4; 2 PHe. 3:13.

“INTTE OOSO UBBAN GEESHSHA GIDITE”

9. Wogaabaa shemppo 19 pilggiyoogan nuuni waani goꞌettiyoo?

⁹ Nuuni geeshsha gidida nu Xoossaa ufayssanawu koyiyo gishshawu, waani geeshsha gidana danddayiyaakko tamaarana koyoos. Yihooway nuna zoriyo gishshawu nuuni hegaadan waati oottana danddayiyaakko eroos. Nuuni he zoriyaa Wogaabaa shemppo 19ppe demmana danddayoos. Ibraawetto doonaa eranchchay Markes Kaalishi hagaadan giis: “Ha shemppoy Wogaabaa maxaafan deꞌiya shemppotuuninne Geeshsha Maxaafan koyro ichchashu maxaafatun keehi xoqqu ootti xeelliyooba gidennan waayi aggana.” Wogaabaa 19y ‘intte geeshsha gidite’ giidi doommiyoogaa hassayite. Nuuni galla galla deꞌuwan geeshsha gidana danddayiyo dumma dumma ogiyaa nuna tamaarissiya ha shemppuwaappe amarida paydota ane haꞌꞌi beꞌoos.

10-11. Wogaabaa 19:3y nuuni waatana koshshiyoogaa yootii, qassi hegee keehi koshshiyoy aybissee?

¹⁰ Yihooway Israaꞌeelati geeshsha gidana koshshiyoogaa yooti simmidi gujjidi hagaadan giis: “Intteppe Issoinne attennan ba aawaanne ba aayyiyo bonchcho; . . . Taani, GODAI, intte Xoossaa.”—Wog. 19:2, 3.

¹¹ Nuna yelidaageeta bonchchanaadan Xoossay immido azazuwaa nuuni azazettiyoogee keehi koshshiyaaba gidiyoogee qoncce. “Taani merinaa de7uwaa demmanau loo77obaa ai oottoo?” giidi issi bitanee Yesuusa oychchido wode I woygidaakko hassayite. Yesuusi zaaridobaa giddon he bitanee ba aawaanne ba aayyiyo bonchchana koshshiyoogaa yootiyaabay deꞌees. (Maa. 19:16-19) Qassi Parisaawetinne higgiyaa tamaarissiyaageeti banttana yelidaageeta bonchchennan agganawu banttawu danddayettida ubbabaa oottido gishshawu Yesuusi eta seeriis. Yaatiyoogan eti ‘Xoossaa qaalaa xayssidosona.’ (Maa. 15:3-6) ‘Xoossaa qaalay’ Tammu Azazotuppe ichchashanttaagaanne Wogaabaa 19:3n deꞌiya qofaa xaaxi waaxees. (Kes. 20:12) “Taani GODAI, intte Xoossai geeshsha gidiyo gishshau, inttekka geeshsha gidite” yaagiya qofaappe simmin issi uri ba aawaanne ba aayyiyo bonchchanaadan yootiya azazoy Wogaabaa 19:3n deꞌiyoogaakka hassayite.

12. Wogaabaa 19:3n deꞌiya azazuwaa nuuni waatidi oosuwan peeshshana danddayiyoo?

¹² Nuuni nuna yelidaageeta bonchchanaadan Yihooway nuuyyo immido azazuwaa qoppiyo wode nuna hagaadan oychchana danddayoos: ‘Taani tana yelidaageeta bonchchiyaanaa?’ Neeni kase bessiyaagaa keenaa bonchchabeennabadan neeyyo siyettikko, hegaa giigissanawu haꞌꞌi murttana danddayaasa. Neeni kasebaa laammana danddayakka. SHin nena yelidaageetuura wodiyaa aattanawunne eta loytta maaddanawu neeyyo danddayettida ubbabaa haꞌꞌi oottana danddayaasa. Neeni etaara wodiyaa loytta aattanawu hanotaa giigissiyoogee koshshana danddayees. Woy qassi eti koshshiyaabaa shammanaadan woy Yihoowaara mata dabbo gididi deꞌanaadaaninne ayyo ubbatoo haggaazanaadan maaddanawu neeni darobaa oottana danddayaasa. Woykko neeni eta loytta minttettana danddayaasa. Neeni yaatikko Wogaabaa 19:3n deꞌiya azazuwaa azazettaasa.

13. (a) Wogaabaa 19:3n deꞌiya hara zoree aybee? (b) Luqaasa 4:16-18n odettida Yesuusa leemisuwaa nuuni ha wodiyan waati kaallana danddayiyoo?

¹³ Geeshsha gidiyoogaabaa Wogaabaa 19:3y nuna harabaakka tamaarissees. Hegee Sambbataa bonchchiyoogaabaa yootees. Kiristtaaneti Higgiyaa azazettana koshshenna gishshawu, nuuni saaminttaa Sambbataa bonchchokko. Gidikkonne, Israaꞌeelati Sambbataa bonchchido ogiyaappenne yaatiyoogan eti goꞌettido ogiyaappe nuuni darobaa tamaarana danddayoos. Sambbatay oosuwaappe shemppiyo wodenne Xoossaayyo goynniyo wode.b Sambbata gallassan Yesuusi ba yelettido kataman deꞌiya Ayhuda woosa keetti biidoynne Xoossaa Qaalaappe nabbabidoy hegaassa. (Kes. 31:12-15; Luqaasa 4:16-18 nabbaba.) Wogaabaa 19:3n deꞌiya “ta Sambbatatakka bonchchite” yaagidi Xoossay yootido azazoy nu galla galla deꞌuwan Xoossaayyo goynnanawu nuuni wodiyaa bazzanaadan nuna denttettana koshshees. He azazuwaa naaganawu issi issibaa giigissana koshshiyaabadan neeyyo siyettii? Yihoowayyo goynnanawu neeni ubbatoo wodiyaa bazzikko, Yihoowaara neeni dabbotido dabbotay minnana; hegee qassi geeshsha gidanawu keehi koshshiyaaba.

NEENI YIHOOWAARA DABBOTIDO DABBOTAA MINTTA

14. Wogaabaa shemppo 19n zaari zaaridi odettida tumay aybee?

¹⁴ Geeshsha gididi nuuni deꞌanaadan maaddana danddayiya tuma gidida issibay Wogaabaa shemppo 19n zaari zaaridi odettiis. Paydo 4y wurssettan hagaadan gees: “Taani, GODAI, intte Xoossaa.” Hagaa mala qofay ha shemppuwan 16 sohuwan deꞌees. Hagee nuna koyro azazuwaa hassayissees. “GODAI ne Xoossai tanattennee. Taappe attin, hara xoossassi goinnoppa.” (Kes. 20:2, 3) Geeshsha gidanawu koyiya ubba Kiristtaaneti eti Xoossaara dabbotido dabbotaappe aybinne woy ooninne aadhdhennaagaa akeekana bessees. Nuuni Yihoowa Markkata gidiyo gishshawu, A geeshsha sunttaa moorana danddayiya aybanne oottennan agganawu murttana koshshees.—Wog. 19:12; Isi. 57:15.

15. Wogaabaa shemppo 19n deꞌiya yarshshuwaabaa yootiya paydoti nuuni waatanaadan denttettana koshshii?

¹⁵ Israaꞌeelati Yihoowa bantta Xoossadan ekkidoogaa A higgeta azazettiyoogan bessidosona. Wogaabaa 18:4y hagaadan gees: “Intte ta azazuwaa oottite; ta wogaakka naagite; qassi an biite. Taani, GODAI, intte Xoossaa.” SHemppo 19y Israaꞌeelatussi imettida ‘wogatuppe’ amaridaageetubaa yootees. Leemisuwawu, paydo 5-8, 21, 22y mehiyaa yarshshuwaabaa yootees. Israaꞌeelati he yarshshota ‘Yihoowassi geeshsha gididabaa tunissenna’ ogiyan yarshshana koshshees. He xiqiseta nabbabiyoogee nuuni Yihoowa ufayssanawu koyanaadaaninne Ibraawe 13:15y nuuni oottanaadan yootiyoogaadan, A ufayssiya sabaa yarshshuwaa nuuni yarshshanaadan nuna denttettana koshshees.

16. Xoossaayyo haggaaziyaageetu giddooninne haggaazennaageetu giddon deꞌiya dummatettaa Wogaabaa 19n deꞌiya maaray nuna A hassayissii?

¹⁶ Nuuni geeshsha gidanawu haratuppe dummatanawu eeno gaana bessees. Hegee metiyaaba gidana danddayees. Nunaara tamaariyaageeti, oottiyaageeti, ammanenna nu dabbotinne harati Yihooway koyiyo ogiyan ayyo goynnennaadan diggiyaabaa oottanaadan issi issitoo nuna denttettana danddayoosona. Eti hegaadan oottiyo wode, nuuni keehi koshshiyaabaa kuuyana bessees. Likkebaa kuuyanaadan nuna aybi maaddana danddayii? Wogaabaa 19:19n deꞌiya ufayssiya maaray hagaadan giyoogaa akeeka: “Naa77u qommobaappe dadettida maayo maayoppa.” He higgee Israaꞌeelati bantta yuushuwan deꞌiya deretuppe dummatanaadan maaddiis. Nuuni Muuse Higgiyaa kaallenna gishshawu, puuttuwaa, carqqiyaa woy suufiyaanne qacina malabaappe walakkidi giigissido maayuwaa issi Kiristtaanee maayiyoogee bala gidenna. SHin eti nunaara tamaariyaageeta nunaara oottiyaageeta woy nu dabbota gidikkonne, eti ammaniyoobaynne oottiyoobay Geeshsha Maxaafay tamaarissiyoobaara maayettennaba gidikko, nuuni he asata milatanawu koyokko. Nuuni nu dabbotanne hara asaa siiqoos. SHin, nuuni nu deꞌuwan kuuyiyoobay nu heeran deꞌiya asaappe nuuni dummatanaadan oottiyaaba gidikkonne, hegee nuuni Yihoowawu azazettiyoogaa bessees. Nuuni geeshsha gidanawu koyikko, Xoossawu dummatana bessiyo gishshawu hegee keehi koshshiyaaba.—2 Qor. 6:14-16; 1 PHe. 4:3, 4.

17-18. Wogaabaa 19:23-25n deꞌiya qofaappe nuuni tamaarana danddayiyo keehi koshshiyaabay aybee?

¹⁷ “Taani GODAI intte Xoossaa” giya qofay Israaꞌeelati Yihoowaara dabbotido dabbotaa eti bantta deꞌuwan aybippenne kaseyana koshshiyoogaa eta hassayissiis. Eti hegaa waati oottana danddayiyoonaa? Wogaabaa 19:23-25y hegaadan oottiyo issi ogiyaa bessees. (Nabbaba.) Israaꞌeelati Hidootaa Biittaa geli simmin ha qaalati eta waati maaddanaakko qoppa. Ayfiyaa miyo mittaa issi uri tokkikko, heezzu layttay wuranaashin he mittaa ayfiyaa meenna. Oyddantta laytti he mittaa ayfee geeshsha sohuwan Xoossaassi yarshshanawu dummatees. He mittaa goday A ayfiyaa maana danddayiyo ichchashantta laytta xallaana. Ha higgee Israaꞌeelati banttassi koshshiyaabaa kaseyana bessennaagaa akeekanaadan maaddiis. Yihooway etassi koshshiyaabaa kunttanaagaa eti ammanettanaadaaninne bantta deꞌuwan eti A goynuwaa kaseyanaadan I koyees. Etassi maanawu gidiyaabay deꞌanaadan I oottana. Qassi Xoossay eti ayyo goynniyo sohuwan kehatettan immanaadan eta minttettees.

¹⁸ Wogaabaa shemppo 19:23-25n deꞌiya higgee Yesuusi Maatiyoosa shemppo 5-7 tamaarissidobaa nuna hassayissees. I hagaadan giis: “Intte paxa de7anau maanabaassinne uyanabaassi, woi intte bollau maayanabaassi hirggoppite.” Yesuusi gujjidi hagaadan giis: “He ubbai inttena koshshiyoogaa saluwan de7iya intte Aawai erees.” Xoossay kafotussi koshshiyaabaa kunttiyoogaadan, nuuyyookka koshshiyaabaa kunttana. (Maa. 6:25, 26, 32) Nuuni Yihooway nuussi koshshiyaabaa kunttanaagaa ammanettoos. Metootidaageeta maaddanawu nuuni ‘immiyoobaa’ geeman immoos. Gubaaꞌiyaa miishshan maaddanawu nu danddayiyoobaa immiyoogankka ufayttoos. Yihooway nuuni A goynuwaa kaafanawu kehatettan immiyo wode beꞌees; qassi I nuuyyo kushiyaa zaarana. (Maa. 6:2-4) Nuuni kehatettan immikko, Wogaabaa 19:23-25n deꞌiya qofaa akeekidoogaa bessoos.

19. Wogaaban nuuni xannaꞌido amaridabaappe ne waana goꞌettadii?

¹⁹ Nuuni Wogaabaa shemppo 19ppe amarida paydo xallaa pilggida, qassi geeshsha gidida nu Xoossaa nuuni waani milatana danddayiyaakko akeekanaadan he paydoti nuna maaddidosona. Nuuni A milatiyo wode ‘nu ooso ubban geeshsha gidanawu’ baaxetiyoogaa bessoos. (1 PHe. 1:15) Yihoowayyo goynnenna daroti he loꞌꞌo oosuwaa akeekoosona. Hegee amaridaageeti Yihoowa galatanaadan denttettiis. (1 PHe. 2:12) SHin, Wogaabaa shemppo 19ppe nuuni tamaarana danddayiyo hara darobay deꞌees. Kaalliya huuphe yohuwan ha shemppuwan hara paydota beꞌana; PHeexiroosi yootidoogaadan, nuuni ‘geeshsha gidana’ danddayiyo hara ogeta akeekanaadan hegee nuna maaddana.