Ixuwaa Xoonana Danddayaasa!

Harati nena ixxana xayikkonne, ixoy deꞌiyoogaa neeni hara ogiyan akeekana danddayaasa. Hara biittaa asa gididaageeta, zariyan dummatiyaageeta woy hara haymaanootiyaa kaalliyaageeta asay ixxiyoogaa nuuni darotoo siyoos. Yaatiyo gishshawu, daro kawotettati harata ixxiyaageeti qaxxayettana bessiyoogaa yootiya higgiyaa kessoosona.

Ixoy gakkido asay darotoo harata ixxees. Ixoy hara ixuwaa kaalettees; ayssi giikko ixoy gakkido asati harata ixxoosonanne eta bolli iitabaa oottoosona.

Harati nena coo ixxennan, qilliiccennan, cayennaaninne yashshissennan waayi aggana. Gidikkonne, ixoy darotoo hara iitabaa kaalettees. Hegee hanqquwan suullanaadan, harata addettanaadaaninne qohanaadan oottees; qassi wolqqan mattumaa gayttiyoogaa, harata woriyoogaa woy zariyan dummatiyaageeta buttiyoogaa mala iitabaa oottanaadankka denttettees.

Ha maxeetee kaallidi deꞌiya oyshata zaarees:

• Ixoy keehi daridoy aybissee?

• Ixuwaa waata xoonana danddayay?

• Ixoy merinawu muleera xayiyo wodee yaanee?