Ixoy Merinawu Xayanay Awudee?
Nuuni ixuwaa nu wozanaappe xayssiyaaba gidikkonne harati ixxennaadan oottana danddayokko. Aybanne mooribeennaageetakka ha wodiyan harati ixxoosona. Yaatin, ixuwaa merinawu xayssana danddayiyay oonee?
Ixuwaa merinawu xayssana danddayiyay Xoossaa Yihoowa xalaala. I hegaadan oottanawu qaalaa gelidoogaa Geeshsha Maxaafay yootees.—Leemiso 20:22.
IXUWAWU GAASO GIDIDABATA XOOSSAY MULEERA XAYSSANA
1. SEEXAANAA DABLOOSA. Ha wodiyan deꞌiya ixuwawu gaasoy Seexaanaa. Yaatiyo gishshawu, Seexaanaanne aagaadan harata ixxiyaageeta Xoossay xayssana.—Mazamure 37:38; Roome 16:20.
2. SEEXAANAA IITA ALAMIYAA. Balibakkiya polotikaanne worddo haymaanootiyaa kaalettiyaageeta gujjin, ixuwaa denttettiya ubbaa Xoossay muleera xayssana. Qassi, yaaretiyaanne balibakkiya zalꞌꞌanchchatakka Xoossay xayssana.—2 PHeexiroosa 3:13.
3. ASAY NAGARANCHCHA GIDIYOOGAA. Nuuni ubbaykka nagaranchcha gidiyoogaa Geeshsha Maxaafay yootees. (Roome 5:12) Yaatiyo gishshawu, nuuni darotoo iitabaa qoppoosinne oottoos; qassi harata ixxoos. He iitabata agganaadan Xoossay nuna maaddana; qassi I, ixuwaa merinawu xayssana.—Isiyaasa 54:13.
IXOY BAYNNA ALAMEE SINTTAPPE YAANAAGAA GEESHSHA MAXAAFAY YOOTEES
1. HE ALAMIYAN NAAQOY DEꞌENNA. Xoossaa Kawotettaa Kawoy saluwan uttidi kumetta saꞌaa haarana; qassi suure pirdday merinawu deꞌanaadan oottana. (Daaneela 2:44) He wode, asaa coo ixxiyoogee deꞌenna. Xoossay ha wodiyan asaa gakkiya naaqo ubbaa muleera xayssana.—Luqaasa 18:7.
2. ASA UBBAY SAROTETTAN DEꞌANA. Makkalaanne olaa gaasuwan ooninne waayettenna. (Mazamure 46:9) He wode saꞌan deꞌiya asa ubbay sarotettaa dosiyo gishshawu, saꞌan asay hirggi baynnan deꞌana.—Mazamure 72:7.
3. ASA UBBAY WOTTIYOOBI BAYNNAAGAA GIDIDI MERINAWU DEꞌANA. Asay issoy issuwaa wozanappe siiqana. (Maatiyoosa 22:39) Iitabaa qoppiyoogaa woy hassayiyoogaa gaasuwan ooninne unꞌꞌettenna. (Isiyaasa 65:17 ) Ixoy muleera xayiyo wode, asa ubbay “sarotettaaninne duretettaani ufaittidi daana.”—Mazamure 37:11.
He wodiyan deꞌanawu koyay? Ha wodiyankka, daro asay Geeshsha Maxaafay yootiyo maaraa oosuwan peeshshiyoogan, ixuwaa xayssiyoogaa tamaariiddi deꞌees. (Mazamure 37:8) Kumetta alamiyan deꞌiya Yihoowa Markkati hegaadan oottiiddi deꞌoosona. Eti dumma dumma wogan diccidaageeta gidikkonne, sarotettan deꞌoosona; qassi issoy issuwaa wozanappe siiqoosona.—Isiyaasa 2:2-4.
Naaquwaanne asaa zaggiyoogaa waati genccanaakko Yihoowa Markkati tamaaridoogaa haratuyyo yootiyoogan ufayttoosona. Nuuni ixxiyoogaa agganaadaaninne siiqiyoogaa doommanaadan neeni tamaaridobay maaddana danddayees. Galatennaageeta woy ixxiyaageeta waata siiqanaakko tamaarana danddayaasa. Hegaappe denddidaagan neeni ha wodiyan keehi ufayttana; qassi haratuura deꞌiya ne dabbotay keehi minnana. Ubbaappe aaruwan, Xoossaa Kawotettaa haaruwan ixoy merinawu muleera xayiyo wode deꞌanawu ne ay oottana danddayiyaakko tamaarana.—Mazamure 37:29.