Neeyyo Deꞌiya Wodiyan Keehi Loꞌꞌobaa Ootta

1. Nuuni Yihoowaara haasayanawu waatana danddayiyoo?

NUUNI siiqiyo asatuura wodiyaa aattiyoogaa dosoos. Azinaynne machchiyaa wodiyaa issippe aattiyoogan keehi ufayttoosona. Yelagati bantta mata laggetuura zuppetiyoogaa dosoosona. Nu ishanttuuranne michchonttuura wodiyaa aattiyoogee nuna ubbaa keehi ufayssees. SHin, nuuni nu Xoossaara haasayiyoogaa aybippenne aaruwan dosoos. Nuuni Yihoowa woossiyoogan, A Qaalaa nabbabiyoogan, A halchchuwaanne ufayssiya A eeshshata wotti dentti qoppiyoogan aara haasayana danddayoos. Nuuni Yihoowaara haasayiyo wodee nuussi keehi alꞌꞌo!—Maz. 139:17.

2. Nuna metana danddayiyaabay aybee?

² Nuuni woossiyoogaanne Geeshsha Maxaafaa nabbabiyoogaa dosikkonne, hegee metennaba gidenna. Deꞌoy nuna bichchaarissiyoogee, Yihoowawu goynniyo wodiyaa demmanawu metootanaadan oottana danddayees. Nu oosoy, nu soo asaabaynne nuuni oottana koshshiya harabay daro wodiyaa wurssiyo gishshawu, woossanawu, xannaꞌanawu, woy wotti dentti qoppanawu nuussi wodee baawa giidi qoppana danddayoos.

3. Nu wodiyaa wurssana danddayiya harabay aybee?

³ Nu wodiyaa wurssana danddayiya harabaykka deꞌees. Nuuni naagettennaba gidikko, bala ooso gidana xayikkonne, Yihoowaara dabbotaa minttanawu wode xayssiyaabaa oottana danddayoos. Leemisuwawu, nuuni allaxxanawu wodiyaa bazzana koshshees. Gidoppe attin, nuuni loꞌꞌoban allaxxikkonne, an daro wodiyaa wurssikko, Yihoowawu goynnana danddayiyo wodee darenna. Allaxxiyoogee nuussi keehi koshshiyaaba gidennaagaa hassayana bessees.—Lee. 25:27; 1 Xim. 4:⁠8.

4. Nuuni haꞌꞌi ay tamaaranee?

⁴ Nuuni nu deꞌuwan keehi koshshiyaabaa ayssi kuuyana bessiyaakko, ha huuphe yohuwan xannaꞌana. Hegaa bollikka, Yihoowaara haasayiyo wodiyan keehi loꞌꞌobaa waati oottanaakkonne hegee nuna waati goꞌꞌiyaakkokka tamaarana.

LOꞌꞌOBAA DOORA; KEEHI KOSHSHIYAABAA KUUYA

5. Issi yelagay Efisoona 5:15-17n deꞌiya zoriyaa qoppiyoogee deꞌuwan loꞌꞌobaa dooranaadan waati maaddii?

⁵ Loꞌꞌo deꞌuwaa doora. Darotoo yelagati bantta deꞌuwan waati loꞌꞌobaa oottanaakko qoppoosona. Issi ginan, asttamaaretinne Yihoowa Markka gidenna so asay eti xoqqa timirttiyaa tamaaridi loꞌꞌo oosuwaa oyqqanaadaaninne duretanaadan zorana danddayoosona. He timirttiyaa tamaaranawu etawu daro wodee koshshana danddayees. SHin, yelagatu aawati, aayetinne gubaaꞌiyan deꞌiya eta laggeti eti bantta deꞌuwan Yihoowawu haggaazanaadan zorana danddayoosona. Yihoowa siiqiya yelagay loꞌꞌobaa kuuyanaadan aybi maaddanee? Efisoona 5:15-17 nabbabidi hegaa loytti qoppiyoogee A maaddana danddayees. (Nabbaba.) Issi yelagay ha xiqiseta nabbabidi bana hagaadan oychchana danddayees: ‘Yihooway “koyiyoobai” aybee? Taani ay kuuyiyaakko Yihooway ufayttanee? Ta wodiyan keehi loꞌꞌobaa oottanawu taani ay kuuyiyoogee maaddanee?’ “Wodee iita” gidiyoogaanne Seexaanay haariyo alamee mati xayanaagaa hassaya. Nuuni nu deꞌuwan Yihoowa ufayssiyaabaa oottiyoogee keehi loꞌꞌo.

6. Mayraama ay dooradee, qassi A dooridobay loꞌꞌo gidiyoy aybissee?

⁶ Keehi koshshiyaabaa kuuya. Nuuni nuussi deꞌiya wodiyan keehi loꞌꞌobaa oottanawu, bala gidenna naaꞌꞌubaappe issuwaa dooriyoogee koshshana danddayees. Yesuusi Mayraamonne Martto oychchanawu biido wode hanidabaappe hegaa akeekana danddayoos. Martta Yesuusa imatuwaa mokkiyoogan keehi ufayttido gishshawu, daro qumaa kattaasu. SHin, Mayraama Yesuusa matan uttada I yootiyoobaa siyaasu. Martta oottidobay bala gidana xayikkonne, Yesuusi Mayraama “lo77obaa dooraasu” yaagiis. (Luq. 10:38-42) Mayraama he wode miidobaa guyyeppe dogennan waaya aggana, shin Yesuusi tamaarissidobaa A mule dogabeennaagaa ammanettoos. Yesuusaara aattido he wodee Mayraamissi keehi gitaba gidiyoogaadan, Yihoowaara haasayiyo wodee nuussikka keehi gitaba. Nuuni he wodiyan keehi loꞌꞌobaa oottanawu waatana danddayiyoo?

YIHOOWAARA HAASAYIYO WODIYAN KEEHI LOꞌꞌOBAA OOTTA

7. Woossiyoogee, xannaꞌiyoogeenne wotti dentti qoppiyoogee keehi koshshiyoy aybissee?

⁷ Woossiyoogee, xannaꞌiyoogeenne wotti dentti qoppiyoogee nu goynuwaa shaaho gidiyoogaa akeeka. Nuuni woossiyo wode, nuna wozanappe siiqiya, saluwan deꞌiya Aawaara haasayoos. (Maz. 5:7) Nuuni Geeshsha Maxaafaa xannaꞌiyo wode, ubbaappe aadhdhida eranchcha ‘Xoossaappe eraa’ demmoos. (Lee. 2:1-5) Nuuni Yihoowa xeelliyaagan tamaaridobaa loytti qoppiyo wode, ufayssiya A eeshshatubaa akeekoos, qassi I nuussinne asa ubbawu halchchido maalaaliyaabaa hassayoos. Nuussi deꞌiya wodiyan oottana danddayiyo keehi loꞌꞌobay hegaa. SHin hegawu nuna maaddana danddayiyaabay aybee?

8. Yesuusi bazzuwan takkido wode oottidobaappe ay tamaarana danddayiyoo?

⁸ Danddayettikko, cenggurssi siyettenna sohuwaa doora. Yesuusi oottidobaa qoppa. Yesuusi saꞌan ba haggaazuwaa doommanaappe kase, bazzuwan 40 gallassa takkiis. (Luq. 4:1, 2) I cenggurssi siyettenna he sohuwan, Yihoowa woossananne I oottanaadan A Aaway koyiyoobaa wotti dentti qoppana danddayees. Hegee, Yesuusi bana gakkana haniya paaciyawu giigettanaadan maaddiis. Yesuusi oottidoban goꞌettanawu waatana danddayay? Intte son daro asay deꞌikko, son cenggurssi siyettenna sohuwaa demmanaagee metana danddayees. Hegaa mala hanotan, injjetiyaasaa karen koyana danddayaasa. Juuli giyo michchiyaa Yihoowa woossanawu koyiyo wode hegaadan oottawusu. A Paransaayen ba azinaara issi kifiliyan deꞌiyo gishshawu, kelttiyaa geliyay baynnasaa demmanaagee meto. Juula hagaadan gaasu: “Yaatiyo gishshawu taani ataakiltte sohuwan ubba galla hemettays. Yan asi baynnasan, ta qofay wora beennan ta wozanaabaa Yihoowawu yootana danddayays.”

9. Yesuusi oottiyoobay daro gidikkonne, Yihoowa woossiyoogee baassi keehi koshshiyaaba gidiyoogaa waati bessidee?

⁹ Yesuusi ubbatoo keehi darobaa oottees. I saꞌan haggaaziiddi biyo soho ubban daro asay A kaallees, qassi eti ubbay aara takkanawu koyoosona. Issi wode, A beꞌanawu “kataman de7iya asai ubbai he kare shiiqiis.” Gidikkokka, Yesuusi Yihoowa woossanawu wodiyaa bazziis. I wonttimaattan ba Aawaa woossanawu “asi bainnasaa” biis.—Mar. 1:32-35.

10-11. Maatiyoosa 26:40, 41 yootiyoogaadan, Yesuusi I kiittidoogeeti waatanaadan zoridee, shin hanidabay aybee?

¹⁰ Yesuusi saꞌan ba haggaazuwaa poliyo wurssetta qammi, woossanawunne wotti dentti qoppanawu asi baynna sohuwaa koyiis. Hegawu, Geetesemaane ataakiltte sohuwaa biis. (Maa. 26:36) He wode, Yesuusi woosaara gayttidaagan keehi koshshiya issibaa bana kaalliyaageetussi yootiis.

¹¹ Hanidabaa ane beꞌoos. Eti Geetesemaane ataakiltte sohuwaa gakkiyo wode, saꞌay qamma bilahe. Yesuusi ba kiittidoogeeta “naagite” giidi woossanawu biis. (Maa. 26:37-39) SHin, I woossiyo wode eti xiskkidosona. Yesuusi eti xiskkidaageeta beꞌidi, ‘naaganaadaaninne Xoossaa woossiyoogaa’ aggennaadan zaarettidikka etawu yootiis. (Maatiyoosa 26:40, 41 nabbaba.) I eti keehi unꞌꞌettidoogaanne daafuridoogaa akeekiis. Yesuusi etawu qarettidi, “ashoi daafuranchcha” yaagiis. SHin, Yesuusi woossanawu haranttuwaa naaꞌꞌutoo biidi simmiyo wode, eti woossiyoogaa aggidi xiskkidaageeta demmiis.—Maa. 26:42-45.

12. Nuuni issi issitoo keehi unꞌꞌettiyo woy daafuriyo gishshawu, woossanawu metootikko waatana danddayiyoo?

¹² Injjetiya wodiyaa doora. Nuuni issi issitoo keehi unꞌꞌettiyo woy daafuriyo gishshawu, woossanawu waayi danddayana. Nena hegaa malabay gakkikko, hara darotakka hegaa malabay gakkiyoogaa akeeka. Neeni waatana danddayay? Darotoo omarssi woossiya amaridaageeti saꞌay lankkilankkiyo, darin daafuribeenna wodiyan woossiyoogee loꞌꞌo gidiyoogaa akeekidosona. Harati qassi, uttidi woy gulbbatidi woossiyo wode eta qofay wora beennaagaa akeekidosona. SHin, neeni keehi hirggada woy azzanada woossanawu metootikko waatuutii? Neeyyo siyettiyaabaa Yihoowawu yoota. Nu keha Aaway hegaa akeekiyoogaa ammanettana danddayaasa.—Maz. 139:4.

13. Nuuni Yihoowaara haasayiyo wode silkke mala miishshati waatidi nu qofaa wora zaarana danddayiyoonaa?

¹³ Neeni xannaꞌiyo wode harabaa qoppoppa. Nuuni Yihoowaara dabbotaa minttanaadan maaddiyay woosa xalla gidenna. Nuuni Xoossaa Qaalaa xannaꞌiyoogeenne gubaaꞌe shiiquwaa shiiqiyoogeekka Xoossaara dabbotaa minttanawu maaddees. Neeni xannaꞌiyoonne gubaaꞌe shiiquwaa shiiqiyo wodiyaa loytta goꞌettana danddayiyo ogee deꞌii? Taani, ‘Gubaaꞌe shiiquwan woy xannaꞌanawu maliyo wodiyan harabaa qoppanaadan oottiyay aybee?’ gaada nena oychcha. Ne silkkiyan woy hegaa mala haraban dawalettidabaa woy kiitettidabaa beꞌiyoogee, woy siyiyoogee? Ha miishshati ha wodiyan daro asawu deꞌoosona. Nuuni issibaa loytti qoppanawu maliyo wode silkkee matan deꞌikko, nu qofay wora baana danddayiyoogaa issi issi eranchchati yootoosona. Issi uri he wode “oottiyoobaa loytti qoppennaagaa” issi eranchchay yootiis. I izaawu “harabaa qoppees” yaagiis. Gita shiiqoti doommanappe kase, silkke mala miishshati harati maara ezggiyoogaa diggennaadan oottana mala nuussi darotoo odettees. Hegaadan, nuuni nurkka Yihoowaara haasayiyo wode, silkke mala miishshati nu qofaa wora zaarenna mala naagettiyoogee loꞌꞌo.

14. Piliphphisiyuusa 4:6, 7y yootiyoogaadan, nu qofay wora beennaadan Yihooway nuna waati maaddii?

¹⁴ Neeni loytta qoppanaadan Yihooway maaddana mala woossa. Neeni xannaꞌiyo woy gubaaꞌe shiiquwaa shiiqiyo wode harabaa qoppiyoogaa akeekikko, Yihooway maaddana mala woossa. Nena hirggissiyaabi deꞌikko, hegaa qoppiyoogaa aggada Xoossaa Qaalaa qoppanawu metootana danddayaasa, shin he wode ayyaanaabaa qoppana koshshees. Ne wozanaa xalla gidennan, ‘ne qofaakka’ naagiya sarotettaa demmanawu woossa.—Piliphphisiyuusa 4:6, 7 nabbaba.

WOOSSIYOOGEE, XANNAꞌIYOOGEENNE SHIIQUWAA SHIIQIYOOGEE NUNA GOꞌꞌEES

15. Yihoowaara haasayiyoogee goꞌꞌiyo issibay aybee?

¹⁵ Neeni takki gaada Yihoowaara haasayiyaabanne abaa qoppiyaaba gidikko, keehi goꞌettana. Waanada? Koyruwan, neeni loꞌꞌobaa kuuyana. Geeshsha Maxaafay “aadhdhida eranchcha asatuura hemettiya asi aadhdhida eranchcha” gidanaagaa yootees. (Lee. 13:20) Yaatiyo gishshawu, neeni aadhdhida eray appe pulttiyo Yihoowaara haasayiyo wode, keehi aadhdhida eranchcha gidana. Neeni A ufayssanawu, qassi A azzanttiyaabaa doorennaadan naagettanawu waatanaakko loytta akeekana.

16. Nuuni Yihoowaara haasayiyoogee loꞌꞌo asttamaare gidanawu waati maaddii?

¹⁶ Naaꞌꞌanttuwan, neeni loꞌꞌo asttamaare gidana. Nuuni issi ura Geeshsha Maxaafaa xannaꞌissiyo wode, izaawu Yihoowaara dabbotaa minttanaadan maaddiyoogee waannatiya halchchotuppe issuwaa. Nuuni saluwan deꞌiya nu Aawaara loytti haasayiyo wode, A wozanappe siiqoosinne nuuni tamaarissiyo urikka A siiqanaadan loytti maaddana danddayoos. Yesuusa hanotaa qoppa. I Yihoowabaa yootidobay A keehi siiqiyoogaa qonccissiyoogee, A kaalliyaageetikka Yihoowa siiqanaadan maaddiis.—Yoh. 17:25, 26.

17. Woossiyoogeenne xannaꞌiyoogee nu ammanoy minnanaadan maaddiyoy aybissee?

¹⁷ Heezzanttuwan, ne ammanoy minnana. Neeni Xoossay nena kaalettanaadan, minttettanaadaaninne maaddanaadan woossiyo wode haniyaabaa qoppa. Ne woosaa Yihooway zaarido payduwan, neeni A mintta ammanana. (1 Yoh. 5:15) Ne ammanoy minnanaadan maaddiya harabay aybee? Geeshsha Maxaafaa xannaꞌiyoogaa. “Asi qaalaa siyidi [ammaniyoogaa]” hassaya. (Roo. 10:17) Nu ammanuwaa minttanawu eraa demmiyoogaa xallay gidenna. Harabaa ay oottana koshshii?

18. Nuuni wotti dentti qoppana koshshiyoy aybissakko leemisuwan qonccissa.

¹⁸ Nuuni tamaariyoobaa wotti dentti qoppana koshshees. Mazamure 77 xaafidaagaa hanotaa qoppa. I babaaninne ba mala Israaꞌeelatuban Yihooway ufayttenna giidi qoppido gishshawu, unꞌꞌettiis. I hegaadan hirggido gishshawu, qammi xiskkenna. (Paydo 2-8) Yaatin waatidee? I Yihoowawu hagaadan giis: “Neeni oottidobaa ubbaa taani zaara zaarada qoppana; ne wolqqaama oosota ubbaa taani yererana.” (Paydo 12) He mazamuriyaa xaafidaagee Yihooway beni ba asawu oottidobaa loytti eriyoogee qoncce; gidoppe attin I, “Xoossai maariyoogaa dogidee? Ba qaretaakka hanqquwan laammidee?” yaagidi qoppiis. (Paydo 9) Mazamuriyaa xaafidaagee Yihooway oottidobaa, qassi beni wode Xoossay asaa maaridoogaanne etawu qaretidoogaa yuushshi qoppiis. (Paydo 11) Yaatido gishshawu waanidee? I Yihooway ba asaa aggi bayennaagaa ammaniis. (Paydo 15) Hegaadankka, neeni Yihooway ba asawunne neeyyo oottidobaa loytta qoppiyo wode, ne ammanoy minnana.

19. Yihoowaara haasayiyoogee nuna goꞌꞌiyo harabay aybee?

¹⁹ Oyddanttuwan, qassi ubbaappe aaruwan, neeni Yihoowa wozanappe siiqana. Neeni Yihoowawu azazettanaadan, A ufayssanawu nena goꞌꞌiyaabaa agga bayanaadaaninne ay paacee gakkinkka genccanaadan, siiqoy hara ay eeshshappekka aaruwan maaddana. (Maa. 22:37-39; 1 Qor. 13:4, 7; 1 Yoh. 5:3) Yihooway siiqiyo A mata dabbo gidiyoogaappe aadhdhiyaabi baa!—Maz. 63:1-8.

20. Woossanawu, xannaꞌanawunne wotta dentta qoppanawu wodiyaa demmana mala waatuutee?

²⁰ Woossiyoogee, xannaꞌiyoogeenne wotti dentti qoppiyoogee nu goynuwaa shaaho gidiyoogaa hassaya. Yesuusaagaadan, Yihoowaara haasayanawu hara cenggurssi siyettenna sohuwaa koya. Ne qofaa wora zaariyaabaa digga. Yihooway neeni awu goynniyo wode ne qofay wora beennaadan maaddana mala woossa. Neeni neeyyo deꞌiya wodiyan haꞌꞌi keehi loꞌꞌobaa oottikko, Yihooway ooratta alamiyan merinaa deꞌuwaa neessi woytana.—Mar. 4:24.