Ne Hidootaa Mintta Naaga

1. Yihooway nuussi immido hidootay aybee?

YIHOOWAY maalaalissiya merinaa deꞌuwaa hidootaa nuussi immiis. Amaridaageeti hayqqenna ayyaana mereta gididi saluwan deꞌanawu hidootoosona. (1 Qor. 15:50, 53) SHin daroti sahoy xayin ufayttiiddi saꞌan merinawu deꞌanawu hidootoosona. (Ajj. 21:3, 4) Nuuni merinawu deꞌanawu hidootiyoy saluwan gidin saꞌan, nu hidootay nuussi keehi alꞌꞌo.

2. Nu hidootawu denddo gidiyaabay aybee, qassi nuuni hegaadan gaana danddayiyoy aybissee?

² Geeshsha Maxaafan “hidootaa” giyo qaalay “loꞌꞌobay hanana giidi naagiyoogaa” geetetti birshshettana danddayees. Nuuyyo hidootay deꞌanaadan oottiday Yihoowa gidiyo gishshawu hegee polettanaagaa ammanettana danddayoos. (Roo. 15:13) I qaalaa gelidoogaanne ba gelido qaalaa ubbatoo naagiyoogaa eroos. (Qoo. 23:19) Yihooway ba gelido qaalaa ubbaa polanawu awu koshshaykka wolqqaykka deꞌiyoogaa nuuni ammanoos. Yaatiyo gishshawu, nu hidootay aymo woy coo amottiyooba xalla gidennan, ammanttiyaagaanne tuma.

3. Nuuni ha huuphe yohuwan beꞌanabay aybee? (Mazamure 27:14)

³ Saluwan deꞌiya nu Aaway nuna siiqees, qassi nuuni an ammanettanaadan koyees. (Mazamure 27:14 nabbaba.b) Nuuni nu hidootaa Yihoowan wottiyo wode, waayiyaa genccana danddayoos; qassi sinttappe nuna aybi gakkikkonne xala gidananne ufayttana danddayoos. Nu hidootay nuna waati naagiyaakko ane beꞌoos. Nu hidootay markkabiyaa oyqqiya qaaxxenna birata malanne birata qophe mala gidiyoy ayba ogiyaanakko koyro beꞌana. Kaallidi, nuuni nu hidootaa waati minttana danddayiyaakko beꞌana.

NU HIDOOTAY MARKKABIYAA OYQQIYA QAAXXENNA BIRATA MALA

4. Nu hidootay markkabiyaa oyqqiya qaaxxenna birata mala gidiyoy ayba ogiyaanee? (Ibraawe 6:19)

⁴ Kiitettida PHawuloosi Ibraawe Kiristtaanetussi xaafido dabddaabbiyan nu hidootaa markkabiyaa oyqqiya qaaxxenna biratan leemisiis. (Ibraawe 6:19 nabbaba.) PHawuloosi darotoo abbaa bollaara biido gishshawu markkabiyaa oyqqiya biratay markkabee qaaxxennaadan maaddiyoogaa erees. Issi wode I markkabiyan biishin wolqqaama gotee denddiis. He wode, markkabee shuchchaara domꞌꞌettenna mala, markkabiyaa giddon oottiyaageeti markkabee qaaxxennaadan oyqqiya birataa haattaa giddo yeggishin I beꞌiis. (Oos. 27:29, 39-41) Markkabiyaa oyqqiya biratay markkabee qaaxxennaadan oottiyoogaadan, nu hidootay nuna metoy gakkiyo wode Yihoowappe haakkennaadan maaddees. Nuuni sinttappe saꞌay kehanaagaa ammaniyo gishshawu, nu hidootay metoy gakkiyo wode nuuni woppu gaanaadan maaddees. Nuna yedetay gakkanaagaa Yesuusi yootidoogaa hassaya. (Yoh. 15:20) Yaatiyo gishshawu, Yihooway nuussi immanawu qaalaa gelidobaa wotti dentti qoppiyoogee nuuni aggennan awu haggaazanaadan maaddees.

5. Yesuusi hayqqanaagaa erikkonne, ammanettidi deꞌanaadan hidootay A waati maaddidee?

⁵ Yesuusi keehi barchchetidi hayqqanaagaa erikkonne, I ammanettidi deꞌanaadan hidootay waati maaddidaakko qoppa. Kiitettida PHeexiroosi PHenxxaqosxxe gallassi 33 M.Ln, Yesuusi waani woppu giidaakkonne ammanettidaakko qonccissiya, Mazamure maxaafan deꞌiya hiraagaa hagaadan giidi yootiis: “Ta bollaikka lo77o de7ana giidi, ufaissan naagees. Aissi giikko, ta shemppuwaa Si7ooliyan aggakka. Qassi ne Geeshsha Na7aa ahaakka musissakka. . . . Neeni tanaara de7iyoogan taani daro ufaittais.” (Oos. 2:25-28; Maz. 16:8-11) Yesuusi hayqqanaagaa erikkonne, Xoossay A denttanaagaanne saluwan deꞌiya ba Aawaara zaaretti gayttiyoogan ufayttanaagaa hidootiis.—Ibr. 12:2, 3.

6. Issi ishay hidootaa xeelliyaagan yootidobay aybee?

⁶ Hidootay nu ishanttuppenne michchetuppe daroti metuwaa genccanaadan maaddiis. Inggilizen deꞌida ammanettida ishaa Liyonard CHina hanotaa beꞌa. I Koyro Alamiyaa Olaa wode wotaaddara gidennan ixxido gishshawu qashettiis. Naaꞌꞌu aginawu issi qasho keettan I barkka qashettiis. Hegaappe simmin, keehi deexxiya wolqqa oosuwaa oottanaadan A wolqqanttidosona. Guyyeppe, I hagaadan giis: “Tana gakkidabay genccanawu hidootay ay keena koshshiyaakko taani akeekanaadan maaddiis. Nuuyyo Yesuusa, kiitettidaageetunne hananabaa yootiyaageetu taarikee, qassi Geeshsha Maxaafay yootiyo alꞌꞌo hidootay deꞌees. Ha ubbabay sinttanaabaa nuuni hidootan naaganaadaaninne genccidi deꞌanaadan nuna maaddees.” Hidootay Liyonarddayyo markkabiyaa oyqqiya qaaxxenna birata mala gidiis; qassi nuuyyookka hegaa mala gidana danddayees.

7. Metoy nu hidootay minnanaadan waati oottii? (Roome 5:3-5; Yaaqooba 1:12)

⁷ Nuuni metuwaa gencciyo wodenne Yihooway nuna waati maaddidaakko akeekiyo wode, I nunan ufayttidoogaa eroos. Hegee nu hidootay minnanaadan oottees. (Roome 5:3-5; Yaaqooba 1:12 nabbaba.) Hegaa gishshawu, nuuni mishiraachuwaa siyido wodiyaagaappe aaruwan haꞌꞌi nu hidootay mino. Nuna gakkida metuwan nuuni hidootaa qanxxanaadan Seexaanay koyees, shin Yihooway maaddin he ubba metuwaa genccana danddayoos.

NU HIDOOTAY BIRATA QOPHIYAA MALA

8. Hidootay birata qophe mala gidiyoy ayba ogiyaanee? (1 Tasalonqqe 5:8)

⁸ Geeshsha Maxaafay nu hidootaa birata qophiyaarakka leemisees. (1 Tasalonqqe 5:8 nabbaba.) Wotaaddarati bantta huuphiyaa qohuwaappe naaganawu birata qophiyaa wottoosona. Nuuni Seexaanaara olettiyo wode, I nuna qohenna mala nu qofaa naagana koshshees. I nuna paaccanawunne nu qofaa mooranawu darobaa oottees. Birata qophee wotaaddaraa huuphiyaa qohuwaappe naagiyoogaadan, nu hidootaykka Yihoowawu ammanettidi deꞌanaadan nu qofaa naagees.

9. Hidooti baynna asaa deꞌoy ay malee?

⁹ Merinaa deꞌuwaa hidootay nuuni loꞌꞌobaa kuuyanaadan maaddana. Hara baggaara, nu hidootay minnana xayikko, qassi nuuni nu koyiyoobaa xallaa qoppikko, merinaa deꞌuwaa hidootaa dogana danddayoos. Beni Qoronttoosan deꞌida, amarida Kiristtaanetu hanotaa beꞌa. Eti Xoossay qaalaa gelido, keehi koshshiya dendduwaa hidootan ammanibookkona. (1 Qor. 15:12) Sinttanaa deꞌuwaa xeelliyaagan hidooti baynna asay haꞌꞌissawu xalla deꞌiyoogaa PHawuloosi yootiis. (1 Qor. 15:32) Ha wodiyan Xoossay qaalaa gelidobaa hidootan naagenna daroti, banttana ufayssanawu banttawu koyiyo ubbabaa oottiyoogan haꞌꞌissa xallawu deꞌoosona. SHin nuuni sinttappe Xoossay ehaanawu qaalaa gelidobatun ammaniyo gishshawu, etappe dummatoos. Birata qophiyaadan nu hidootay nu qofaa naagees, qassi nuuni Yihoowaara dabbotido dabbotaa moorana danddayiya, nubaa xallaa qoppiyoogaappe naagees.—1 Qor. 15:33, 34.

10. Hidootay nuna bala qofaappe waati naagana danddayii?

¹⁰ Nu hidootay nuuni Yihoowa mule ufayssana danddayokko giidi qoppiyoogaappe naagettanaadankka maaddees. Leemisuwawu, issoti issoti hagaadan gaana danddayoosona: ‘Merinaa deꞌoy tawu bessenna. Taani loꞌꞌo asa gidikke. Taappe Xoossay koyiyoobaa taani mule oottana danddayikke.’ Iyyooba minttettiyaaba milatiya worddo laggee Elifaazi hegaara issi malabaa yootidoogaa hassaya. Elifaazi hagaadan giis: “Asi Xoossaa sinttan geeshsha gidanau danddayii?” I gujjidi Xoossaa xeelliyaagan hagaadan giis: “Be7a, Xoossai ba kiitanchchatunkka ammanettenna; harai atto salotikka a sinttan geeshsha gidokkona.” (Iyy. 15:14, 15) Hegee bulla worddo! Neeni hegaadan qoppanaadan koyiyay Seexaanaa gidiyoogaa hassaya. Neeni ubbatoo hegaadan qoppikko ne hidootay xayanaagaa I erees. Yaatiyo gishshawu, he wordduwaa eqettada Yihooway gelido qaalan xeelaa wotta. Neeni merinaa deꞌuwaa demmanaadan Yihooway koyiyoogaanne, hegaa demmanaadan I nena maaddanaagaa mule siroppa.—1 Xim. 2:3, 4.

NE HIDOOTAA MINTTA NAAGA

11. Nu hidootay polettanaashin naagiyo wode, nuuni danddayanchcha gidana koshshiyoy aybissee?

¹¹ Nu hidootaa mintti naagiyoogee ubbatoo metennaba gidenna. Nuuni Xoossay gelido qaalay polettin beꞌanawu naagiyo wode, danddayanchcha gidennan aggana danddayoos. Yihooway merinawu deꞌiyaagaa gidiyo gishshawu, nuuyyo daro wode milatiyaagee ayyo keehi guutta. (2 PHe. 3:8, 9) I ba gelido qaalaa ubbaappe loꞌꞌo ogiyan polana, shin I hegaa oottiyoy nuuni qoppido wodiyan gidennan aggana danddayees. Xoossay ba gelido qaalaa polanaashin danddayan naagiyo wode, nu hidootaa mintti naaganaadan aybi maaddana danddayii?—Yaaq. 5:7, 8.

12. Ibraawe 11:1, 6y yootiyoogaadan hidootay ammanuwaara waani gayttii?

¹² Nu hidootay polettanaadan oottiyay Yihoowa gidiyo gishshawu, nuuni aara dabbotidi deꞌikko nu hidootay minnana. Nuussi hidootay deꞌanaadan, Yihooway deꞌiyoogaanne I “bana koyiyaageetuyyo woituwaa immiyoogaa” nuuni ammanana koshshees. (Ibraawe 11:1, 6 nabbaba.) Yihooway deꞌiyoogaa nuuni wozanappe ammanikko, I gelido qaalaa ubbaa polanaagaa loytti ammanettana danddayoos. Nuuni Yihoowaara dabbotido dabbotaanne nu hidootaa minttanawu maaddiya amarida ogeta ane beꞌoos.

13. Nuuni kaseegaappe aaruwan Xoossaakko waani shiiqana danddayiyoo?

¹³ Yihoowa woossa, qassi A Qaalaa nabbaba. Nuuni Yihoowa beꞌana danddayennaba gidikkonne, kaseegaappe aaruwan akko shiiqana danddayoos. I nu woosaa siyanaagaa ammanettidi, woosan A haasayissana danddayoos. (Erm. 29:11, 12) Nuuni A Qaalaa nabbabiyoogaaninne hegaa wotti dentti qoppiyoogan I yootiyoobaa siyana danddayoos. Yihooway kase bawu ammanettida asaa waati maaddidaakko nabbabiyo wode, nu hidootay kaseegaappe aaruwan minni minni bees. “Xoossaa maxaafai nuuyyo immiyo genccaaninne minttettuwan nuuni demmana giidi ufaissan naagi uttidoogee de7ana mala, Xoossaa maxaafan xaafettida ubbabai nuna tamaarissanau xaafettiis.”—Roo. 15:4.

14. Yihooway haratussi oottidobaa nuuni wotti dentti qoppana koshshiyoy aybissee?

¹⁴ Yihooway ba gelido qaalaa waati polidaakko wotta dentta qoppa. Xoossay Abrahaamayyoonne Saariyyo oottidobaa qoppa. Eti keehi cimido gishshawu, naꞌa yelana danddayokkona. Gidikkonne, eti naꞌa yelanaagaa Xoossay etawu qaalaa geliis. (Doo. 18:10) Abrahaami waatidee? ‘Abrahaami daro zaretuyyo aawa gidanaagaa ammanidoogaa’ Geeshsha Maxaafay yootees. (Roo. 4:18) Abrahaami Yihooway ba gelido qaalaa waati polanaakko erenna; shin Yihooway hegaa polanaagaa I ammanettiis. He ammanettida bitanee hidootaa qanxxibeenna. (Roo. 4:19-21) Nu xeelan hanennaba milatikkonne, Yihooway ba gelido qaalaa ubbatoo polanaagaa nuuni ubbatoo ammanettana danddayiyoogaa ha taariketuppe tamaaroos.

15. Xoossay nuuyyo oottidobaa nuuni wotti dentti qoppana koshshiyoy aybissee?

¹⁵ Yihooway neeyyo oottidobaa qoppa. Geeshsha Maxaafan Xoossay qaalaa gelidobati polettidoogan neeni ay keena goꞌettidaakko qoppa. Leemisuwawu, Yesuusi ba Aaway neessi deꞌuwawu koshshiyaabaa kunttanaagaa yootiis. (Maa. 6:32, 33) Qassi I, neeni geeshsha ayyaanaa demmanawu woossikko Yihooway neessi immanaagaakka yootiis. (Luq. 11:13) Yihooway ba gelido qaalaa ubbatoo naagees. I neeyyo gelido qaalaa polido hara hanotata qoppana danddayaasa. Leemisuwawu, I neeyyo atto gaanawu, nena minttettanawunne ayyaanaaban neessi koshshiyaabaa kunttanawu qaalaa geliis. (Maa. 6:14; 24:45; 2 Qor. 1:3) Xoossay neeyyo oottidobaa wotta dentta qoppiyo wode, I neessi sinttappe oottanaban ne hidootay minnana.

HIDOOTAN UFAYTTA

16. Hidootay keehi alꞌꞌo imota gididoy aybissee?

¹⁶ Merinaa deꞌuwaa hidootay Xoossay nuuyyo immido alꞌꞌo imota. Nuuni ufayssiya sinttanaa hidootaa yeemuwan naagoos; qassi hegee polettanaagaa ammanettana danddayoos. Nu hidootay markkabiyaa oyqqiya qaaxxenna birataadan nuuni metuwaanne yedetaa genccanaadan, ubba qassi hayquwaa yayyennaadan maaddees. Nu hidootay birata qophiyaadan, nuuni iitabaa ixxidi loꞌꞌobaa dosanaadan nu qofaa naagees. Geeshsha Maxaafay yootiyo hidootay nuuni kaseegaappe aaruwan Xoossaakko shiiqanaadaaninne I nuna ay keena siiqiyaakko eranaadan maaddees. Nuuni nu hidootaa mintti naagikko, loytti goꞌettana.

17. Hidootay nuuni ufayttanaadan waati oottii?

¹⁷ Kiitettida PHawuloosi Roomen deꞌiya Kiristtaanetussi xaafido dabddaabbiyan, “Xoossai intteyyo immana giidoogan ufaittite” yaagidi minttettiis. (Roo. 12:12) PHauloosi ammanettidi deꞌikko, saluwan merinawu deꞌanaagaa eriyo gishshawu ufayttana danddayees. Yihooway ba gelido qaalaa polanaagaa ammanettiyo gishshawu, nuunikka hidootan ufayttana danddayoos. Mazamuraawee hagaadan giis: “GODAA ba Xoossaa baayyo ufaissa oottiya urai anjjettidaagaa. Xoossai . . . merinaukka ammanettiyaagaa.”—Maz. 146:5, 6.