Hidootaa Awuppe Demmana Danddayiyanaa?

Geeshsha Maxaafay yootiyobaa

Xoossay nuuyyo ‘sintta wodiyanne hidootaa’a immanawu koyiyogaa Geeshsha Maxaafay yootees. (Ermmaasa 29:11. NW) Xoossay nuuyyo ba Qaalaa immido gaasotuppe issoy, “Geeshsha Maxaafati nuna minttiyo . . . gishshawu, nuussi hidootay” deꞌanaadan oottanaassa. (Roome 15:4) Nuuni kaallidi beꞌanaagaadan, Geeshsha Maxaafay nuussi immiyo loꞌꞌo zoree, galla galla gakkiya metuwa loꞌꞌo xeelaa oyqqidi genccanaadan, qassi sinttappe ufayssiya hidootay nuuyyo deꞌanaadan maaddees.

Ha huuphe yohuwan

• Nuuyyo loꞌꞌo xeelay deꞌanaadan Geeshsha Maxaafay waati maaddii?

• Geeshsha Maxaafay asa ubbawu ayba hidootaa yootii?

• Hidootaabaa yootiya Geeshsha Maxaafaa xiqiseta

Nuuyyo loꞌꞌo xeelay deꞌanaadan Geeshsha Maxaafay waati maaddii?

Nu deꞌoy kaseegaappe giiga gidanaadan nuuni oottana danddayiyobaa yootiyogan, Geeshsha Maxaafay nuussi loꞌꞌo xeelay deꞌanaadan maaddana danddayees. Amarida leemisota beꞌa.

• Loꞌꞌo kaaletuwa demmanawu Geeshsha Maxaafaa nabbaba. Mazamure 119:105y hagaadan gees: “Ne qaalai ta gediyaassi xomppe, ta ogiyaassikka poo7o.” Pozhzhattiya xomppee naaꞌꞌubaa oottana danddayees. Nu matan deꞌiyabaanne sintta haahuwan deꞌiyabaa bessana danddayees. Hegaadankka, Geeshsha Maxaafay yootiyo goꞌꞌiya maarati galla galla gakkiya metota xoonanaadan maaddiyogan, nuuyyo loꞌꞌo xeelay deꞌanaadan oottana danddayoosona. Geeshsha Maxaafay tamaarissiyobay nu wolqqaa ooraxissees, qassi nu “wozanaa ufaissees.” (Mazamure 19:7, 8) Hegaa bollikka, Xoossay asa ubbawunne saꞌawu halchchido ufayssiyabaa Geeshsha Maxaafay yootees. He hidootay nuuni merinawu ufayttanaadan oottiyaba.

• Haratu maaduwa ekka. Nu hanotay hidooti baynnabaa milattiyo wode, nu so asaappe woy laggetuppe haakkana danddayoos. Hegaadan hanikko nuuni iitabaa oottana woy kuuyana danddayiyo gishshawu, Geeshsha Maxaafay hegee eeyyatetta gidiyogaa yootees. (Leemiso 18:1) Nuna siiqiyageeti nuuni bessiyagaadan qoppanaadan maaddana danddayoosona. Waayissiya hanotaa waati xoonanaakko loꞌꞌo qofaa immanakka danddayoosona. (Leemiso 11:14) Baa giishin, hanotati giiganaashin wolqqaa demmanaadan, eti nuna gazddissananne nawuꞌꞌasho gaana danddayoosona.—Leemiso 12:25.

• Xoossaa Woossa. Geeshsha Maxaafay hagaadan gees: “Ne toohuwaa Xoossan wotta; i nena zemppissana. Xoossai audenne xilloti shabbirettanaadan oottenna.”b (Mazamure 55:22) Yihoowi ‘hidootaa immiya Xoossaa’ geetettiis. (Roome 15:13) I intteyyo qoppiyogaa ammanettidi, ‘inttena hirggissiya ubbabawu’ A woossana danddayeeta. (1 Pheexiroosa 5:7) Qassikka, Geeshsha Maxaafay: “I intte yeeqennaadan oottana; I inttena minttana; I inttena mintti essana” yaagees.—1 Pheexiroosa 5:10.

• Metoy ne hidootaa minttanaadan eeno ga. Geeshsha Maxaafay: “Taani [Xoossay] odiyoogaa siyiyaageeti ubbai woppu giidi, saro de7ana; metuwaa hirggaappekka shemppana” giidi qaalaa geliis. (Leemiso 1:33) Awusttiraaliyan deꞌiya Margareto giyo maccaasee keettaa wolqqaama gotee qohido wode iyyo deꞌiya daro aqoy xayiis. Shin A hidootaa qanxxiyogaappe, keehi maaddiyabaa hegeekka aqoy elle xayana danddayiyogaa tamaaraasu. Hegaappe simmin, A ba so asaanne laggeta, Xoossaara medhdhido dabbotettaa, qassi Geeshsha Maxaafay yootiyo hidootaa mala, keehi koshshiyabatun xeelaa wottaasu.—Mazamure 37:34; Yaaqooba 4:8.

Geeshsha Maxaafay asa ubbawu ayba hidootaa yootii?

Geeshsha Maxaafay asa ubbawune saꞌawu keehi ufayssiya hidootaa yootees. Qassi hegee matan polettana. Ha wodiyan asa ubbaa gakkiya metoy nuuni “wurssetta gallassatun” deꞌiyogaa bessees. (2 Ximootiyosa 3:1-5) Matan, Xoossay ha saꞌaa haarana; qassi pirddaa pacaanne waayiya xayssana. Ha saꞌaa muleera haarana Xoossaa Kawotettaa baggaara I hegaa oottana. (Daaneela 2:44; Ajjuutaa 11:15) Yesuusi woosaabaa tamaarissiiddi he saluwa kawotettaabaa qoppidi hagaadan giis: “Ne Kawotettay yo. Ne shenee . . . saꞌankka hano.”—Maatiyosa 6:9, 10.

Xoossay asa ubbawu halchchidobaa Geeshsha Maxaafay qoncciyan yootees. Xoossaa Kawotettay xayssana issi issi metota akeeka:

• Koshshaa xayssana. “Biittay kattaa mokkana.”—Mazamure 67:6. NW

• Harggiya xayssana. “[Yan] de7iya ooninne, ‘Taani harggais’ yaagenna.”—Isiyaasa 33:24.

• Hayquwa xayssana. “Xoossai [asa ubbaa] aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis.”—Ajjuutaa 21:3, 4.