‘Ha Saꞌaa Ubbaa Maarotettan Pirddiyagan’ Ammanetta!

1. Yihooway Abrahaama tamaarissido minttettiya qofay aybee?

DARO layttaappe kase Xoossay Sadoomanne Gamoora katamata xayssanaagaa issi kiitanchchaa baggaara Abrahaamawu yootiis. Abrahaami Xoossan mintti ammanikkokka, hegaa akeekanawu keehi metootiis. I hagaadan oychchiis: “Tumu neeni xillota iitatuura xaissuutee? . . . Ha sa7aa ubbaa pirddiyaagee xillo pirddenneeyye?” (Doo. 18:23-33) Yihooway ba siiqo dabboy Abrahaami ha keehi koshshiya qofaa akeekanaadan danddayan maaddiis: Xoossay xillo asaa mule xayssenna. Ha timirttee ha wodiyan deꞌiya nuna ubbaa goꞌꞌeesinne minttettees.

2. Yihooway pirddiyo wode suurenne maariyagaa gidiyogaa nuuni ammanettanaadan oottiyabay aybee?

² Yihooway pirddiyo wode I ubbatoo suurenne maariyagaa gidiyogaa waani ammanettana danddayiyoo? ‘Yihooway asaa wozanaa xeelliyogaa’ nuuni eroos. (1 Sam. 16:7) I “asaa ubbaa wozanaa” eriyogee qoncce. (1 Kaw. 8:39; 1 Odi. 28:9) Hagee maalaalissiya tuma. Yihooway pirddiyobay nuuni akeekana danddayiyogaappe keehi aadhdhees. Kiitettida Phawuloosi ayyaanay denttettin Xoossaa Yihoowabaa hagaadan oychchiis: “A pirddaa yootanai oonee?”—Roo. 11:33.

3-4. Nuuni issi issitoo woygi oychchana danddayiyoo, qassi ha huuphe yohuwan ay beꞌanee? (Yohaannisa 5:28, 29)

³ Yihooway ubbatoo suurebaa oottiyogaa nuuni erikkokka, Abrahaamaagaadan oychchana danddayoos. Nuuni hagaadan qoppana danddayoos: “Yihooway xayssido Sadoomanne Gamoora asaa malay hayquwappe denddana danddayii? Etappe amaridaageeti ‘hayquwappe denddiya xillo gidenna asatuura’ denddanee?”—Oos. 24:15, NW.

⁴ Dendduwa xeelliyagan nuuni akeekidobaa ane pilggoos. ‘Deꞌuwa demmanawu denddiyageetanne pirddettanawu denddiyageeta’ xeelliyagan nuuni akeekidobay mata wode laamettiis.a (Yohaannisa 5:28, 29 nabbaba.) Nuuni ooratti akeekidobay harabaakka laammanaadan oottiis. He laamettidabata ha huuphe yohuwaninne kaalliya huuphe yohuwan beꞌana. Yihooway suure pirddiyogaara gayttidaagan, koyruwan nuuni erennabaa, qassi kaallidi nuuni eriyobaa beꞌana.

NUUNI ERENNABAA

5. Yihooway Sadoomaaninne Gamooran xayssido asata xeelliyagan kase nu xuufeti woygi qonccissidonaa?

⁵ Yihooway xillo gidekketa giidi pirddiyogeetu bolli gakkanabay kase nu xuufetun qoncciis. Yihooway xayssido Sadoomanne Gamoora asaa malay hayquwappe denddenna giidi nu xuufeti qonccissidosona. Shin ammanettida ayllee ha allaalliyabaa kaseegaappe aaruwan xannaꞌidinne woossidi hegaabaa geeshshidi erana danddayennaagaa akeekiis. Aybissi?

6. Xillo gidenna asatu bolli Yihooway pirddidoogaa yootiya taariketi awugeetee, qassi nuuni erennabay aybee?

⁶ Geeshsha Maxaafan odettida taariketa beꞌa. Xillo gidenna asatu bolli Yihooway pirddidoogaa yootiya daro taariketi Geeshsha Maxaafan deꞌoosona. Leemisuwawu, Yihooway Nohanne A soo asaa ashshidi, Bashshaa Haattan ubba asaa xayssiis. I Hidootaa Biittan deꞌiya laappun kawotettata Israaꞌeelati xayssanaadankka oottiis. Qassi issi qamman 185,000 Asoore wotaaddarata issi kiitanchchay woranaadan oottiis. (Doo. 7:23; Zaa. 7:1-3; Isi. 37:36, 37) Yaatin, he asati merinawu hayqqidi xayanaagaanne eti mule denddennaagaa Yihooway kuuyiis giidi Geeshsha Maxaafay geeshshidi yootii? Chii, yootenna. Nuuni hegaadan giyoy aybissee?

7. Bashshaa Haattaa wode woy Israaꞌeelati Kanaane biittaa oyqqido wode xayida asaa xeelliyagan nuuni erennabay aybee? (misiliya xeella.)

⁷ He taariketun, Yihooway issuwa isssuwa bolli waati pirddidaakko, woy qassi Yihooway xayssido asati abaa tamaariyonne bantta nagaran zilꞌꞌettidi laamettiyo injjiya demmidaakko nuuni erokko. Geeshsha Maxaafay Bashshaa Haattaa wode hanidaba qonccissiiddi, Nohee ‘xillotettaabaa yootidoogaa’ odees. (2 PHe. 2:5) Shin I gita markkabiya keexxiiddi saꞌan deꞌiya ubba asawu sabbakanawu malidoogaa Geeshsha Maxaafay yootenna. Hegaadankka, Kanaane biittan deꞌida iita asa ubbay Yihoowabaa tamaariyonne bantta eeshshaa laammiyo injjiya demmidaakkonne nuuni erokko.

8. Sadoomanne Gamoora asaa xeelliyagan nuuni erennabay aybee?

⁸ Sadoomanne Gamoora asay shin? Xillo bitanee Looxee Sadooman deꞌiya asatuppe issuwa. Shin Looxee yan deꞌiya ubbawu sabbakidoogaa nuuni eriyoo? Erokko. Eti iita asa gidiyogee qoncce; shin eti likkebaanne likke gidennabaa shaakki eridonaa? He kataman deꞌiya attuma asa ubbay Looxe imattatuura wolqqan zinꞌꞌanawu koyidoogaa hassaya. Eta giddon guutta attuma naatikka deꞌiyogaa Geeshsha Maxaafay yootees. (Doo. 19:4; 2 PHe. 2:7) Maariya Xoossaa Yihooway he asatuppe ooninne hayquwappe denddenna giidi kuuyidoogaa nuuni erana danddayiyoo? Chii, erana danddayokko. He kataman tammu xillotikka baynnaagaa Yihooway Abrahaamawu yootiis. (Doo. 18:32) Yaatiyo gishshawu, eti xillo gidokkona; qassi eta oosuwa gishshawu Yihooway eta xayssiyogan suurebaa oottiis. Shin nuuni etappe ooninne ‘xillo gidenna asatuura denddenna’ giidi ammanettidi yootana danddayiyoo? Chii, ammanettidi yootana danddayokko!

9. Solomona xeelliyagan nuuni erennabay aybee?

⁹ Xillo asay guyyeppe xillo gidennan aggidoogaa yootiya Geeshsha Maxaafaa taariketikka deꞌoosona. Hegeetuppe issoy Kawuwa Solomona. I Yihooway oonakko, qassi Awu waati goynnana koshshiyakko erees; qassi Yihooway A keehi anjjiis. Shin Solomoni guyyeppe eeqa xoossatussi goynniis. Hegee Yihoowa keehi hanqqetissiis; qassi Solomoni nagaraa oottido gishshawu Israaꞌeela asa ubbay daro xeetu layttawu tuggatiis. Solomoni hayqqido wode, ammanettida asa gidida Kawuwa Daawitaagaadan, ‘ba mayzzan gayttidoogaa’ Geeshsha Maxaafay yootees. (1 Kaw. 11:5-9, 43; 2 Kaw. 23:13) Shin Geeshsha Maxaafay Solomoni moogettido hanotaa yootiyo gishshawu Yihooway A hayquwappe denttana giyogee? Chii, Geeshsha Maxaafay hegaabaa yootenna. Geeshsha Maxaafay ‘issi uray hayqqiyo wode nagaraa wolqqay A haarennaagaa’ yootiyo gishshawu Solomoni denddana giidi amaridaageeti qoppana danddayoosona. (Roo. 6:7) Shin, hegaa giyogee hayqqida ubba asay denddana giyogaa gidenna. Qassi issi uri hayqqido gishshawu, I hayquwappe denddiyo maatay awu deꞌees giyogaa gidenna. Denddoy nu siiqo Xoossaa imota. Yihooway bawu merinawu haggaazanaadan koyiyogeeta hayquwappe denttana. (Iyy. 14:13, 14; Yoh. 6:44) Solomonayyo he imotay imettanee? Yihooway erees; nuuni erokko. Shin Yihooway suurebaa oottanaagaa nuuni eroos.

NUUNI ERIYOBAA

10. Asaa xayssiyogaa xeelliyagan Yihoowa qofay aybee? (Hizqqeela 33:11) (Misiliyakka xeella.)

¹⁰ Hizqqeela 33:11 nabbaba. Asaa bolli pirddiyogaa xeelliyagan Yihooway ba qofaa nuussi yootees. Hizqqeeli xaafidobaara issi mala qofaa kiitettida Pheexiroosi hagaadan giidi yootiis: “Godai . . . ooninne xayana mala koyenna.” (2 PHe. 3:9) Ha qofay nuna minttettees. Yihooway ammanttiya gaasoy baynnan issi uraa merinawu xayssennaagaa nuuni eroos. A maarotay daro; qassi I danddayettida wode ubban maarees.

11. Hayquwappe denddennaageeti oonee, qassi nuuni hegaa waati eriyoo?

¹¹ Hayquwappe denddenna asatubaa nuuni eriyobay aybee? Geeshsha Maxaafay amarida taariketu xalla yootees.b Asqqorootu Yihuday hayquwappe denddennaagaa Yesuusi yootiis. (Mar. 14:21; Yoh. 17:12c) Yihuday eriiddi oottidoban Yihoowanne A Naꞌaa eqettiis. (Mar. 3:29d) Hegaadankka, Yesuusi haymaanootiya kaalettiya A eqettiya amaridaageeti hayquwappe denddennaagaa yootiis. (Mat. 23:33; Yoh. 19:11) Qassi bantta nagaran zilꞌꞌettidi laamettibeenna kaddidaageeti hayquwappe denddennaagaa kiitettida Phawuloosi yootiis.—Ibr. 6:4-8; 10:29.

12. Nuuni Yihoowa maarotaabaa eriyobay aybee? Leemisuwa yoota.

¹² Shin nuuni Yihoowa maarotaabaa eriyobay aybee? I ‘ooninne xayana mala koyennaagaa’ waati bessidee? Gita nagaraa oottida amaridaageetussi I maarotaa waati bessidaakko akeeka. Kawuwa Daawiti wodiraa laammiyogaanne shemppo woriyogaa gujjin, gita nagaraa oottiis. Shin Daawiti ba nagaran zilꞌꞌettidi laamettido gishshawu, Yihooway awu atto giis. (2 Sam. 12:1-13) Kawuwa Minaasee ba deꞌo layttan darotoo keehi iitabaa oottiis. Shin I keehi iitabaa oottikkokka, ba nagaran zilꞌꞌettidi laamettido gishshawu Yihooway A maariisinne awu atto giis. (2 Odi. 33:9-16) Yihooway atto gaanaadan oottiya gaasoy deꞌiyogaa akeekiyo wode ubban maarotaa bessiyogaa ha taariketi nuna hassayissoosona. He asati gita nagaraa oottidoogaa akeekidi zilꞌꞌetti laamettido gishshawu I eta hayquwappe denttana.

13. (a) Yihooway Nanawe asatuyyo atto giidoy aybissee? (b) Nanawe asatubaa Yesuusi guyyeppe woygidee?

¹³ Qassi Yihooway Nanawe asatussi atto giidoogaa eroos. Xoossay Yoonaasayyo hagaadan giis: ‘Asaa iitatettay ta sintti gakkiis.’ Shin eti bantta nagaran zilꞌꞌettidi laamettido wode Yihooway etawu kehatettan atto giis. I Yoonaasaagaappe aaruwan maarotaa bessiis. Yoonaasi hanqqettiis; qassi Xoossay Nanawe asati “ushachchaanne haddirssaa shaakkidi [eribeennaagaa]” A hassayissiis. (Yona. 1:1, 2; 3:10; 4:9-11) Guyyeppe, Yesuusi he taarikiya goꞌettidi Yihoowa pirddaabaanne maarotaabaa tamaarissiis. Yesuusi bantta nagaran zilꞌꞌettidi laamettida Nanawe asati ‘pirddaa wode denddanaagaa’ yootiis.—Mat. 12:41.

14. Nanawe asati ‘pirddettanawu denddana’ giyogee woygiyogee?

¹⁴ Nanawe asati ‘pirddaa wode denddana’ giyogee woygiyogee? ‘Pirddettanawu denddanaageeti’ deꞌiyogaa Yesuusi tamaarissiis. (Yoh. 5:29) I ‘xillotikka xillo gidennaageetikka’ hayquwappe denddiyo ba Shaꞌu Layttaa Haaruwa wodiyabaa yootiis. (Oos. 24:15, NW) ‘Xillo gidennaageeti’ pirddettanawu denddana. Hegaa giyogee eti hayquwappe denddi simmidi tamaaridobaa oosuwan peeshshiyakkonne Yihoowaynne Yesuusi kaalloosona giyogaa. Hayquwappe denddida issi Nanawe asi Yihoowawu goynnennan ixxikko, Yihooway I deꞌuwan deꞌanaadan paqqadenna. (Isi. 65:20) Shin Yihoowayyo ammanettidi goynnanawu dooriya ubbay merinawu deꞌiyo injjiya demmana!—Dane. 12:2.

15. (a) Nuuni Sadoomaaninne Gamooran xayida asatuppe ooninne hayquwappe denddenna gaana koshshennay aybissee? (b) Yihudaa 7n odettida qofaa nuuni waati akeekana danddayiyoo? (“Yihuday Woyganawu Koyidee?” giya saaxiniya xeella.)

¹⁵ Yesuusi anne A timirttiya ixxida asay “Pirddaa Gallassi” Sadoomappenne Gamoorappe aaruwan qaxxayettanaagaa yootiis. (Mat. 10:14, 15; 11:23, 24; Luq. 10:12) Hegee woygiyogee? Yesuusi A wodiyan deꞌiya asay Sadoomanne Gamoora asaappe keehi iita gidiyogaa leemiso hanotan yootiiddi deꞌii? Yesuusi Nanawe asati ‘pirddaa wode denddana’ giidi qoncciyan yootidoogaa hassaya. Shin Yesuusi Sadoomanne Gamoora asatubaa yootidaba milatees. I hagan yootido ‘Pirddaa Gallassay’ Nanawe asatuura gayttidaagan yootido qofaara issi mala gidiyogee qoncce. Nanawe asatuugaadan, Sadoomanne Gamoora asatikka iitabaa oottidosona. Shin Nanawe asati bantta nagaran zilꞌꞌettidi laamettanawu injjiya demmidosona. Qassi Yesuusi ‘pirddettanawu denddanaageetubaa’ yootidoogaa haasaya. ‘Iitabaa oottidaageetikka’ pirddettanawu denddana. (Yoh. 5:29) Hegaa gishshawu, Sadoomanne Gamoora asatuyyo hidootay deꞌiyaba milatees. Etappe amaridaageeti hayquwappe denddennan aggokkona, qassi nuuni Yihoowabaanne Yesuus Kiristtoosabaa eta tamaarissana danddayoos.

16. Yihooway hayquwappe oona denttanaakko kuuyiyogaara gayttidaagan nuuni eriyobay aybee? (Ermmaasa 17:10)

¹⁶ Ermmaasa 17:10 nabbaba. Yihooway pirddiyo ogiya xeelliyagan nuuni eriyobaa ha xiqisee yootees: Yihooway ubbatoo ‘wozanaa qoreesinne kahaa paaccees.’ Hayquwappe ooni denddanaakko I kuuyiyo wode, ‘asaa ubbawu A ogiyadan’ zaarana. Koshshenna wode Yihooway ba qofaa laammennaba gidikkonne, danddayettiyo wode ubban maarees. Hegaa gishshawu, Geeshsha Maxaafay issi uri hayquwappe denddenna giidi yootiyogaa nuuni erana xayikko, he uri hayquwappe denddenna giidi qoppana koshshenna!

‘HA SAꞌAA UBBAA PIRDDIYAGEE XILLO PIRDDANA’

17. Hayqqidaageeti sinttappe waananee?

¹⁷ Addaamenne Hewana Seexaanaara hashetiyogan Xoossaa Yihoowa bolli makkalido wodiyappe doommidi daro miiloone asay hayqqiis. Hayqoy suutta morkke! (1 Qor. 15:26) He ubba asay waananee? Etappe amaridaageeti, Kiristtoosa ammanettidi kaallida 144,000ti saluwan hayqqenna deꞌuwa deꞌanawu denddana. (Ajj. 14:1) Yihoowa siiqiya ammanettida daro attuma asaynne macca asay ‘xillotuura hayquwappe denddana;’ qassi eti Kiristtoosa Shaꞌu Layttaa Haaruwaninne wurssetta paaciyan xillo gididi deꞌikko saꞌan merinawu deꞌana. (Dane. 12:13; Ibr. 12:1) Qassi Yihoowawu mule haggaazi erenna woy ‘iitabaa oottida’ ‘xillo gidenna asati’ Shaꞌu Layttaa Haaruwan bantta eeshshaa laammanawunne ammanettida Yihoowa ashkkara gidanawu injjiya demmana. (Luq. 23:42, 43) Shin keehi iitabaa oottida amaridaageeti Yihoowa keehi eqettido gishshawu eti hayquwappe denddennaadan I kuuyana.—Luq. 12:4, 5.

18-19. (a) Hayqqidaageetu bolli Yihooway pirddiyo pirddan nuuni ammanettana koshshiyoy aybissee? (Isiyaasa 55:8, 9) (b) Kaalliya huuphe yohuwan nuuni ay beꞌanee?

¹⁸ Yihooway asaa bolli pirddiyo wode ubbatoo suurebaa oottanaagaa ammanettana danddayiyoo? Ee! Abrahaami loytti akeekidoogaadan, Yihooway wottiyobi baynnaagaa, aadhdhida eranchchanne ‘ha saꞌaa ubbaa maarotettan pirddiyagaa.’ Yihooway ba Naꞌaa loohissiisinne asa ubbaa bolli pirddanaadan aawatettaa immiis. (Yoh. 5:22) Yihoowaynne Yesuusi asa ubbaa wozanan deꞌiyabaa eroosona. (Mat. 9:4) Hegaa gishshawu eti issuwa issuwa bolli pirddiyo wode ‘xillo pirddana!’

¹⁹ Yihoowaninne I kuuyiyo ubbaban ammanettanawu murttidaageeta gidoos. Pirddanawu nuussi maati baawa; shin Yihoowawu pirddiyo maatay deꞌiyogaa eroos! (Isiyaasa 55:8, 9 nabbaba.) Yihoowaynne A Naꞌay pirddiyo ubbaban nuuni ammanettiyoy hegaassa. Qassi nu Kawoy Yesuusi ba Aawaagaadan suure pirddanaagaanne maaranaagaa eroos. (Isi. 11:3, 4) Shin Yihoowaynne Yesuusi gita waayiya wode asaa bolli pirddiyogaara gayttidaagan nuuni woygana danddayiyoo? Nuuni erennabay aybee? Qassi nu eriyobay aybee? Ha oyshatu zaaruwa kaalliya huuphe yohuwan beꞌana.