XANNAꞌIYO HUUPHE YOHUWA 26
MAZAMURE 123 Xoossaa Maarawu Ammanettidi Haarettiyoogaa
Neeni Erennabay Deꞌiyogaa Nena Ziqqi Oottada Ammana
“Xoossaa gita anjjuwawu, A hayyuwawunne A erawu hoola! I maaciyobaa ooni erana danddayii! A ogiya ooni akeekana danddayii!”—ROO. 11:33.
TAMAARANABAA
Nuuni sinttappe gakkana ubbabaa erana xayikkonne, nuuni eriyobaa qoppiyo wodenne Yihoowan ammanettiyo wode paaceta waani genccanaakko beꞌana.
1. Yihooway nuussi deꞌanaadan oottidobati awugeetee, qassi aybissi?
YIHOOWAY nuuni qoppanaadan, eranaadan, akeekanaadaaninne hayyottanaadan oottidi medhdhiis. I nuna hegaadan medhdhidoy aybissee? Nuuni ‘Xoossaa loytti eranaadaaninne’ kumetta qofan ayyo goynnanaadan I koyees.—Lee. 2:1-5; Roo. 12:1.
2. (a) Nuuni nubaa xeelliyagan akeekana koshshiyabay aybee? (Roome 11:33, 34) (Misiliyakka xeella.) (b) Nuuni erennabay deꞌiyogaa nuna ziqqi oottidi ammaniyogee waati goꞌꞌii?
2 Yihooway nuuni darobaa eranaadan oottidi medhdhikkonne, nuuni erenna unddennabati deꞌoosona. (Roome 11:33, 34 nabbaba.) Iyyooba hanotaa beꞌa. Iyyoobi erenna darobay deꞌiyogaa akeekanaadan maaddanawu Yihooway A daro oyshata oychchiis. Hegee I bana ziqqi oottanaadaaninne ba qofaa giigissanaadan maaddiis. (Iyy. 42:3-6) Nuuni ubbabaa wurssi erennaagaa nuna ziqqi oottidi akeekiyo wode nuunikka goꞌettoos. Hegaadan nuna ziqqi oottiyogee nuuni loꞌꞌobaa kuuyanawu tumuppe erana koshshiyabaa Yihooway qonccissanaagaa ammanettanaadan denttettees.—Lee. 2:6.
Iyyoobaagaadan, nuuni erennabay deꞌiyogaa akeekiyogee nuna goꞌꞌana danddayees (Mentto 2 xeella)
3. Ha huuphe yohuwan nuuni ay beꞌanee?
3 Ha huuphe yohuwan, nuuni erenna amaridabatanne hegeeta erennaagee issi issitoo nuuni metootanaadan oottana danddayiyoy aybissakko beꞌana. Nuuni amaridabata erennaagee nuussi loꞌꞌo gidiyoy aybissakkokka pilggana. Hageeta pilggiyogee “a erai polo gidido Xoossai” Yihooway nuuni erana bessiya ubbabaa yootiyogaa ammanettanaadan oottees.—Iyy. 37:16.
WURSSETTAY AWUDE YAANAAKKO NUUNI EROKKO
4. Maatiyosa 24:36y yootiyogaadan, nuuni erenna issibay aybee?
4 Maatiyosa 24:36 nabbaba. Ha alamee awude xayanaakko nuuni erokko. Yesuusikka saꞌan deꞌiyo wode, “he gallassaanne he saatiya” eribeenna.a Guyyeppe, Yesuusi issi issibati awude hananaakko kuuyiyo maatay Yihoowawu deꞌiyogaa ba kiittidoogeetussi yootiis. (Oos. 1:6, 7) Yihooway ha alamee xayana wodiya kuuyi uttiis; shin nuuni hegee awude hananaakko erana danddayokko.
5. Wurssettay awude yaanaakko nuuni erenna gishshawu waanana danddayiyoo?
5 Yesuusi yootidoogaadan wurssettay yaanaashin nuuni ay keena naagana koshshiyakko erokko. Hegaa gishshawu, nuuni Yihoowa gallassaa naagiiddi takkidaba gidikko, danddayaa xayana woy hidootaa qanxxana danddayoos. Woy nu soo asay woykko harati nuna toochchikko, genccanawu metootana danddayoos. (2 Phe. 3:3, 4) Wurssettay yaana gallassaa nuuni eriyakko danddayanchcha gidananne metootennan tooshiya genccana giidi qoppana danddayoos.
6. Wurssettay awude yaanaakko nuuni erennaagee nuussi loꞌꞌo gidiyoy aybissee?
6 Wurssettay yaana gallassaa Yihooway nuussi yootibeenna gishshawu, A siiqidinne an ammanettidi awu haggaaziyogaa bessiyo injjee nuussi deꞌees. Wurssettay yaana gakkanaashin xalaala gidennan, nuuni merinawu Yihoowawu haggaazanawu koyoos. ‘Yihoowa gallassay’ awude yaanaakko gidennan, he gallassan hanana loꞌꞌobata qoppiyogee keha. Yaatiyogee, nuuni kaseegaappe aaruwan Yihoowakko shiiqanaadan, an ammanettanaadaaninne A ufayssanawu nuussi danddayettida ubbabaa oottanaadan maaddees.—2 Phe. 3:11, 12.
7. Nuuni eriyobay aybee?
7 Nuuni eriyobaa loytti qoppiyogee nuussi loꞌꞌo. Nuuni wurssettaa gallassay 1914n doommidoogaa eroos. Yihooway he layttaa qonccissiyanne he wodeppe doommidi haniyabatakka loytti qonccissiya Geeshsha Maxaafaa hiraagata yootiis. Yaatiyo gishshawu ‘Yihoowa gita gallassay matidoogaa’ nuuni mintti ammanoos. (Sof. 1:14) Nuuni oottanaadan Yihooway koyiyo oosuwakka eroos. I nuuni nuussi danddayettida keenan ‘Kawotettaa mishiraachchuwa’ daro asawu yootanaadan koyees. (Mat. 24:14) Ha mishiraachchoy 240 gidiya biittatun 1,000ppe dariya doonatun odettiiddi deꞌees. Nuuni ha keehi koshshiya oosuwa yeemottidi oottanawu “he gallassaanne he saatiya” erana koshshenna.
YIHOOWAY OOTTANABAA NUUNI EROKKO
8. ‘Xoossaa oosuwa’ giyagee ay qonccissii? (Eranchchaa 11:5)
8 ‘Xoossaa oosuwa’ nuuni ubbatoo erokko. (Eranchchaa 11:5 nabbaba.) Ha qofay Yihooway ba sheniya polanawu hananaadan oottiyobaa woy paqqadiyobaa qonccissees. Yihooway issibay hananaadan paqqadiyo gaaso ubbaa woy I nuna maaddanawu oottiyo ubbabaa nuuni erana danddayokko. (Maz. 37:5) Nuuni ‘Xoossaa oosuwa’ erennaagaa aayee uluwan naꞌi waani dicciyakko erennaagaara Geeshsha Maxaafay geeddarssees. Haray atto saynttisttetikka aayee uluwan naꞌi waani dicciyakko hanno gakkanawu wurssi akeekibookkona. Hegaadankka, nuuni Yihooway issibaa waati oottiyakko wurssi akeekana danddayokko.
9. Yihooway nuna maaddanawu waatanaakko nuuni erenna gishshawu waanana danddayiyoo?
9 Yihooway nuna waati maaddanaakko nuuni erenna wode issi issibaa kuuyanawu mammottana danddayoos. Leemisuwawu, nu deꞌuwa sima oottiyogan woy Kawotettaa mishiraachchuwa aassiyageeti keehi koshshiyosaa biyogan nu goꞌꞌaa aggi bayidi nu haggaazuwa aassanawu mammottana danddayoos. Woy nuuni kessido ayyaanaabaa halchchota polennan xayikko, haggaazuwan minni oottidobawu loꞌꞌo ayfiya demmana xayikko, woy Yihoowa dirijjitee ootissiyobaa oottennaadan nuna xubbiyabay deꞌikko Xoossay nunan ufayttiyakkonne sirana danddayoos.
10. Yihooway oottanabaa nuuni erenna gishshawu, nuussi deꞌana koshshiya eeshshati awugeetee?
10 Yihooway oottanabaa nuuni erenna gishshawu, nuna ziqqi oottiyogaanne ashkketettaa mala keehi koshshiya eeshshati nuussi deꞌiyogee nuna maaddana. Yihoowa qofaynne A ogee nuugaappe xoqqiyogaa nuuni akeekoos. (Isi. 55:8, 9) Qassi, Yihooway ubbabaa keehi loꞌꞌo ogiyan giigissanaagaa wozanappe ammanettoos. Nuuni haggaazuwan woy Yihoowa dirijjitiyan oottiyoban loꞌꞌo ayfiya demmikko, Yihooway sabettanaadan oottoos. (Maz. 127:1; 1 Qor. 3:7) Qassi hanotati nu qoppidoogaadan hanana xayikko, Yihooway ubbabaa eriyogaa nuuni hassayana koshshees. (Isi. 26:12) Nuuni danddayiyobaa oottoosinne Yihooway nuna ubbatoo maaddanaagaa ammanettoos. Yihooway beni oottidoogaadan malaalissiya ogiyan gidana xayikkokka, nuussi koshshiya kaaletuwa immanaagaa ammanettoos.—Oos. 16:6-10.
11. Nuuni eriyobati awugeetee?
11 Yihooway awudekka siiqiyogaa, suure pirddiyogaanne hayyottiyogaa nuuni eroos. I nuuni ayyonne nu mala Kiristtaanetuyyo oottiyobaa keehi xoqqu ootti xeelliyogaa eroos. Qassi Yihooway baayyo ammanettiyageeta ubbatoo woytiyogaakka eroos.—Ibr. 11:6.
WONTTO AYBI HANANAAKKO NUUNI EROKKO
12. Yaaqooba 4:13, 14y yootiyogaadan, nuuni erennabay aybee?
12 Yaaqooba 4:13, 14 nabbaba. Wontto nu bolli gakkanabaa nuuni erokko. Ha alamiyan ‘qoppennan gakkiya iita wodee’ nuna gakkees. (Era. 9:12) Hegaappe denddidaagan, nu halchchoy polettanaakko woy hegee polettishin nuuni paxa deꞌidi beꞌanaakko erana danddayokko.
13. Sinttappe hanana ubbabaa nuuni erenna gishshawu issi issitoo waanana danddayiyoo?
13 Sinttappe hananabaa nuuni erenna gishshawu, genccanawu metootana danddayoos. Waanidi? Aybi hananeeshsha giidi nuuni keehi hirggikko nu ufayssaa xayana danddayoos. Nuuni qoppibeenna ogiyan nu deꞌoy laamettana woy nuuni qoppennan keehi iitabay nu bolli gakkana danddayees; qassi hegee nuuni kayyottanaadaaninne unꞌꞌettanaadan oottana danddayees. Woy nuuni koyidobay polettennan aggikko, azzanananne hidootaa qanxxana danddayoos.—Lee. 13:12.
14. Nuuni tumu ufayssaa demmanawu oottananne erana koshshiyabay aybee? (Misiliyakka xeella.)
14 Nu deꞌuwan nuna aybi gakkikkokka, nuuni Yihoowa siiqiyo gishshawu awu haggaaziyogaa bessana danddayoos. Meto ubbaappe Yihooway nuna naagana giidi qoppana koshshennaagaanne nu deꞌuwan nuna gakkanabata Yihooway kasetidi kuuyibeennaagaa Geeshsha Maxaafaa taariketi bessoosona. Nuuni nuna gakkana danddayiya ubbabaa erana xayikkokka, ufayttana danddayiyogaa I erees. Nuuni nu deꞌuwan ubbatoo A kaaletuwa koyikko, qassi awu azazettikko ufayttana. (Erm. 10:23) Nuuni issibaa kuuyiyo wode kaaletuwa A oychchiyogee, “Yihoowa shene gidikko, nuuni deꞌananne hagaa woy hegaa oottana” giyogaa mala.—Yaaq. 4:15.
Nuuni Yihoowa kaaletuwa koyiyo wodenne awu azazettiyo wode I nuna maaddanaagaanne anjjanaagaa ammanettoos (Mentto 14-15 xeella)b
15. Sinttanaabaa xeelliyagan nuuni eriyobay aybee?
15 Ubba galla nuna gakkanabaa nuuni erennaba gidikkokka, saluwan gidin woy saꞌan Yihooway nuussi merinaa deꞌuwa immanawu qaalaa gelidoogaa eroos. Yihooway worddotennaagaanne ba gelido qaalaa ubbaa polennaadan A aybinne diggana danddayennaagaa nuuni eroos. (Tii. 1:2) ‘Wurssettan hananabaa, qassi biron hanibeenna yohota beni wodiyappe doommidi awaajjana’ danddayiyay A xalaala. Beni wode I giidobay polettiis, qassi sinttappekka polettana. (Isi. 46:10) Yihooway nuna siiqennaadan aybinne diggana danddayennaagaa nuuni geeshshidi eroos. (Roo. 8:35-39) Nuna gakkiya ubbabaa genccanaadan I nuuyyo hayyuwa, minttettuwanne wolqqaa immana. Yihooway nuna maaddanaagaanne anjjanaagaa ammanettoos.—Erm. 17:7, 8.
YIHOOWAY NUNA AY KEENA ERIYAKKO WURSSI AKEEKANA DANDDAYOKKO
16. Mazamure 139:1-6y yootiyogaadan, nuuni wurssi akeekana danddayenna Yihooway eriyobay aybee?
16 Mazamure 139:1-6 nabbaba. Nuna Medhdhidaagee nubaa ubbabaa erees. I nuuni qoppiyobawunne nuussi siyettiyabawu gaasuwa erees. Nuuni haasayiyobaanne nu wozanan deꞌiyabaakka I erees. Nuuni oottiyo ubbabaanne hegaa ayssi oottiyakkokka I erees. Kawuwa Daawiti Yihooway nuna maaddanawu ubbatoo giigi uttidoogaanne nuna maaddana danddayiyogaa yootiis. Ubbaappe Xoqqiyanne mulebaa medhdhida, Ubbaa Danddayiya Xoossay neessi keehi qoppiyogaa eriyogee neeyyo aybi siyettanaadan oottii? Daawiti hagaadan giis: “Ne eratettai tana keehippe maalaalissiyaabaa; taani akeekanau danddayiyoosaappe xoqqa.”—Maz. 139:6.
17. Yihooway nuna loytti eriyogaa nuuni ammananawu metootiyoy aybissa gidana danddayii?
17 Geella nuuni diccido hanotaappe, nu wogaappe, woykko nu kase ammanuwappe denddidaagan, nuuni Yihoowa nuussi qoppiya, siiqiya Aawadan xeellanawu metootana danddayoos. Woy nuuni kase oottido balay keehi iita gidiyo gishshawu, Yihooway nubaa eranawu mule koyennabadaaninne I nuuppe haakkidabadan qoppana danddayoos. Qassi Daawitawukka issi issitoo hegaadan siyettiis. (Maz. 38:18, 21) Woy laamettanawunne Xoossaa ufayssiya ogiyan deꞌanawu minni baaxetiya issi uri hagaadan qoppana danddayees, ‘Xoossay tabaa ubbabaa akeekiyaba gidikko, taani meezetidoogaa mala deꞌuwa deꞌennaadan I koyiyoy aybissee?’
18. Nuuni nuna eriyogaappe aaruwan Yihooway nuna eriyogaa ammaniyogan waani goꞌettiyoo? (Misiliyakka xeella.)
18 Nuuni nuna eriyogaappe aaruwan Yihooway nuna eriyogaanne nuuni beꞌana danddayenna nunan deꞌiya loꞌꞌobaa I beꞌiyogaa ammanana danddayoos. I nu balaa akeekikkokka, nu ay mala asa gidanawu koyiyakko ereesinne nuna siiqees. (Roo. 7:15) Nuuni ay mala asa gidana danddayiyakko Yihooway ubbatoo beꞌiyogaa nuuni akeekiyo wode, ayyo ammanettidi ufayssan haggaazanawu wolqqaa demmoos.
Yihooway nuuni ooratta alamiyan demmana ufayssiya deꞌuwa mintti ammananaadan maaddiyogan, ha alamiyan qoppennan gakkiya metota nuuni genccanaadan maaddees (Mentto 18-19 xeella)c
19. Nuuni Yihoowa xeelliyagan loytti eriyobay aybee?
19 Yihooway siiqo gidiyogaa nuuni eroos. Hegee mule sirissenna. (1 Yoh. 4:8) I nuna siiqiyogaanne nuussi keehi loꞌꞌobaa ubbatoo amottiyogaa I kessido xillotettaa maaratuppe akeekoos. Nuuni merinaa deꞌuwa demmanaadan Yihooway koyiyogaa eroos. I hegawu wozuwa qanxxiis. Wozuwa imotay nuuni nagaranchcha gidikkokka, Yihoowa ufayssiya ogiyan awu haggaazana danddayiyogaa nuuni ammanettanaadan oottees. (Roo. 7:24, 25) Qassi ‘Xoossay nu wozanaappe aadhdhiyogaanne ubbabaa eriyogaa’ nuuni eroos. (1 Yoh. 3:19, 20) Yihooway nubaa ubbabaa beꞌeesinne A sheniya nuuni loytti polana danddayiyogaa ammanettees.
20. Nuuni darin hirggennaadan nuna aybi maaddanee?
20 Yihooway nuuni tumuppe erana koshshiya ubbabaa nuussi yootees. Hegaa gishshawu nuuni erennabaa xeelliyagan hirggiyogaappe nuussi tumuppe koshshiyaban xeelaa wottana koshshees. Nuuni yaatiyogan nuna ziqqi oottiyogaanne “kumetta erai de7iyo” Yihoowan wozanappe ammanettiyogaa bessoos. (Iyy. 36:4) Ha wodiyan nuuni akeekenna issi issibati deꞌikkokka, nu Gita Asttamaariyabaanne I nuna tamaarissiyo oorattabaa tamaariiddi merinawu deꞌiyo wodiya yeemuwan naagoos.—Era. 3:11.
MAZAMURE 104 Xoossay Immiyo Geeshsha Ayyaanaa
a Iita gidida Seexaanaa alamiya xayssiyo olan Yesuusi sintta xeera gididi olettiyo gishshawu, Armmageedoona olaa gallassaanne I ‘xoonana’ wodiya haꞌꞌi erees giidi qoppiyogee bessiyaba.—Ajj. 6:2; 19:11-16.
b MISILIYA QONCCISSUWA: Issi aawaynne A naꞌay daafabay merettiyo wode efaana borssan issi issibata yeggido gishshawu so asay giigettiis.
c MISILIYA QONCCISSUWA: Metoy gakkido issi ishay ooratta alamiyan demmana ufayssiya deꞌuwa qoppees.