Siiqoy Neeni Aggennan Sabbakanaadan Ootto!

1. Nuuni 2023 layttaa shiiquwan akeekidobay aybee?

NUUNI ammaniyobatuppe amaridaageetun kase akeekidobaappe laamettida ufayssiyabatanne haggaazuwara gayttidaagan ufayssiya amarida erissota 2023 layttaa shiiquwana siyida. Leemisuwawu, amaridaageeti Gita Baabiloona xaya simminkka Yihoowa asaara walahettana danddayiyogaa akeekida. Kawotettaabaa aassiyageeti haggaazuwan oottidobaa Hidaare 2023​ppe doommidi iripportte oottana koshshennaagaakka erida. Hegaa giyogee nu haggaazoy kaseegaadan xoqqu oottidi xeelliyoba gidenna giyogee? Mule gidenna!

2. Gallassappe gallassan nu haggaazoy keehi eesoyiyoy aybissee? (Marqqoosa 13:10)

² Nu haggaazoy gallassappe gallassan keehi eesoyees. Aybissi? Wodee wuriiddi deꞌiyo gishshataassa. Wurssetta gallassatun sabbakiyo oosuwabaa Yesuusi kasetidi woygidaakko beꞌa. (Marqqoosa 13:10 nabbaba.) Maatiyosa maxaafan Yesuusi “wurssettay” yaanaappe kase mishiraachchoy saꞌaa ubban odettanaagaa yootiis. (Mat. 24:14) Wurssettay Seexaanay haariyo ha iita alamee muleera xayiyogaa qonccissees. Yihooway hegee hanana ‘gallassaanne saatiya’ keeri wottiis. (Mat. 24:36; 25:13; Oos. 1:7) Gallassappe gallassan wurssettaakko mati mati boos. (Roo. 13:11) Wurssettay yaana gakkanaashin nuuni aggennan sabbakana koshshees.

3. Nuuni sabbakanaadan denttettiyay aybee?

³ Nuuni ubbay kaallidi deꞌiya keehi koshshiya oyshaa loytti qoppanawu koyoos: Nuuni mishiraachchuwa sabbakkiyoy aybissee? Sabbakanaadan nuna siiqoy denttettiyo gishshataassa. Nuuni sabbakiyo wode mishiraachchuwa siiqiyogaa, asaa siiqiyogaanne ubbaappe aaruwan Yihoowanne A sunttaa siiqiyogaa bessoos. Ane hageeta kayan kayan beꞌoos.

NUUNI MISHIRAACHCHUWA SIIQIYO GISHSHAWU SABBAKKOOS

4. Nuuni ufayssiyabaa siyiyo wode waatiyoo?

⁴ Keehi ufayssiyabay ne deꞌuwan hanido wode neeyyo siyettidabaa qoppa. Hegee so asaappe issi uri naꞌa yelidoogaa woy issi uri neeyyo tumuppe koshshiya oosuwa immidoogaa gidana danddayees. He ufayssiyabaa so asawunne ne laggetussi yootanawu keehi koyidoogee qoncce. Keehi ufayssiya Xoossaa Kawotettaa mishiraachchuwa neeni siyido wode hegaadan oottadii?

5. Xoossaa Qaalaappe neeni tumaa koyro tamaarido wode neeyyo siyettidabay aybee? (Misiliyakka xeella.)

⁵ Neeni Xoossaa Qaalaappe tumaa koyro tamaarido wode neeyyo siyettidabaa qoppa. Saluwan deꞌiya ne Aaway nena siiqiyogaa, neeni awu goynniya so asaa gidanaadan I koyiyogaa, waayiyanne metuwa xayssanawu qaalaa gelidoogaa, neeni siiqiyo hayqqidaageeti ooratta alamiyan denddin beꞌanawu hidootana danddayiyogaanne harabata eradasa. (Mar. 10:29, 30; Yoh. 5:28, 29; Roo. 8:38, 39; Ajj. 21:3, 4) Neeni eridobay nena keehi ufayssiis. (Luq. 24:32) Neeni tamaaridobaa dosada hegaa asa ubbawu yootanawu koyadasa!—Ermmaasa 20:9​ra gatta xeella.

6. Ernesttannne Roozi hanotaappe neeni ay tamaaray?

⁶ Issi hanotaa beꞌa. Ernesttab giyo ishawu aaway hayqqiyo wode awu layttay tammaa heera. Ernestti hagaadan giis: “‘I saluwa biidee? Woy merinawu xayidee?’ gaada qoppaas. Aaway deꞌiyo hara naatun taani qanaataas.” Ernestti ubbatoo makkaanaakko biidi ba aawaa duufuwa matan gulbbatidi hagaadan woossees: “Hayyanaa ta Xoossawu ta aaway deꞌiyo sohuwa eranawu koyays.” Ernestti ba aaway hayqqin 17 gidiya layttaappe simmin, Geeshsha Maxaafaa xannaꞌanaadan shoobbin maayettiis. Hayqqidaageeti xiskkuwan kayrida uradan aybanne erennaagaanne sinttappe hayquwappe denddanaagaa Geeshsha Maxaafay yootiyogaa eridi ufayttiis. (Era. 9:5, 10; Oos. 24:15) Daro layttawu A qofissida oyshatussi wurssettan zaaruwa demmiis! Ernestti I tamaarido Geeshsha Maxaafaa tuman keehi ufayttiis. A machchiya Rooza xannaꞌiyogaa doommada tamaaridobaa akka dosaasu. Eti 1978 haattan muukettidosona. Eti tamaarido alꞌꞌo tumaa bantta dabbotussi, bantta laggetussinne haratussi minnidi sabbakidosona. Hegaappe denddidaagan, Ernesttinne Rooza 70​ppe dariya asay Yihoowa eridi haattan muukettanaadan maaddidosona.

7. Nuuni Geeshsha Maxaafaappe tamaarido tumaa dosiyo wode waatiyoo? (Luqaasa 6:45)

⁷ Nuuni Geeshsha Maxaafaappe tamaaridobaa dosiyo wode, hegaa ubba asawu yootoos. (Luqaasa 6:45 nabbaba.) Nuuni Yesuusa kaalliyageetudan gaana danddayoos: “Nuuni be7idobaanne siyidobaa yootennan agganau danddayokko.” (Oos. 4:20) Nuuni tumaa keehi dosiyo gishshawu nuuyyo danddayettida keenan hegaa daro asawu yootanawu koyoos.

NUUNI ASAA SIIQIYO GISHSHAWU SABBAKOOS

8. Nuuni mishiraachchuwa haratuyyo yootana koyiyoy aybissee? (“Asaa Siiqite—Erissiyo Ashkkara Oottite” giya saaxiniya xeella.) (Misiliyakka xeella.)

⁸ Yihoowagaadaaninne A Naꞌaagaadan nuuni asaa siiqoos. (Lee. 8:31; Yoh. 3:16) Nuuni ‘Xoossi baynnanne hidooti baynna’ asatussi keehi qarettoos. (Efi. 2:12) Metuwappe denddidaagan eti ciimma ollan deꞌiyabadan qoppana danddayoosona. Shin hegaappe goochchi kessiyo wodoroy nuussi deꞌees; hegeekka Xoossaa Kawotettaa mishiraachchuwa. Nuuni eta siiqiyonne etawu qarettiyo gishshawu mishiraachchuwa yootanawu nuuyyo danddayettida ubbabaa oottanawu koyoos. Eti hegaabaa eriyogee etawu hidootay deꞌanaadan oottees; ha wodiyankka ufayttanaadan maaddees, qassi Xoossay ehiyo ooratta alamiyan “tumu de7uwaa,” hegeekka merinaa deꞌuwa demmanaadan maaddees.—1 Xim. 6:19.

9. Sinttanaabaa xeelliyagan nuuni yootiyobay aybee, qassi aybissi? (Hizqqeela 33:7, 8)

⁹ Nuuni asaa siiqiyogee ha iita alamiya wurssettay matidoogaa etawu yootanaadankka denttettees. (Hizqqeela 33:7, 8 nabbaba.) Yihoowawu haggaazenna nu dabbota gujjin, nuuni asa ubbawu qarettoos. Daro asati mata wode hananabaa, hegeekka ‘saꞌaa doomettaappe hanno gakkanawu denddibeennanne sinttappekka denddenna gita waayiya’ erennan deꞌoosona. (Mat. 24:21) Pirddaa gallassi hananabaa eti eranaadan nuuni koyoos. Koyruwan, worddo haymaanootee xayana; kaallidi, Armmageedoona olan ha iita alamee muleera xayana. (Ajj. 16:14, 16; 17:16, 17; 19:11, 19, 20) Danddayettida keenan daroti nuuni yootiyobaa siyanaadaaninne ha wodiyan nunaara geeshsha goynuwa goynnanaadan woossoos. Shin nuuni siiqiyo nu so asaa gujjin, ha wodiyan nuuni yootiyobaa siyennaageeti waananee?

10. Mata wode hananabaa nuuni asawu aggennan yootana koshshiyoy aybissee?

¹⁰ Gita Baabilooni xayuwa beꞌidi Yihoowa ammaniyogaa doommida asata I koyikko ashshana danddayiyogaa kasetiya huuphe yohuwan beꞌida. Yaatikko, hegaabaa ha wodiyan etawu aggennan yootiyogee keehi koshshiyaba. Hagaa qoppa: Nuuni haꞌꞌi yootiyobaa eti he wode hassayana danddayoosona. (Hizqqeela 33:33​ra gatta xeella.) Geella eti nuuppe siyidobaa hassayidi wodee wuriichchennan deꞌishin nunaara Yihoowawu goynnana danddayoosona. Piliphphisiyusan qasho keettaa naagiyagee biittay daro qaaxxi simmin Yihoowa ammanidoogaadan, Gita Baabilooni xayuwan alamee qaaxxi simmin, ha wodiyan siyennan ixxida amaridaageeti he wode Yihoowa ammanana danddayoosona.—Oos. 16:25-34.

NUUNI YIHOOWANNE A SUNTTAA SIIQIYO GISHSHAWU SABBAKOOS

11. Yihoowawu bonchchuwaa, sabaanne wolqqaa waati immana danddayiyoo? (Ajjuutaa 4:11) (Misiliyakka xeella.)

¹¹ Nuuni mishiraachchuwa sabbakiyo waanna gaasoy Yihoowanne A sunttaa siiqiyo gishshataassa. Nuuni siiqiyo Xoossaa sabbiyo ogedan haggaazuwa xeelloos. (Ajjuutaa 4:11 nabbaba.) Nu Xoossay Yihooway, ammanettidi bawu goynniyageetuppe bonchchuwaa, sabaanne wolqqaa ekkanawu bessiyogaa nuuni kumetta wozanan maayettoos. Nuuni I ‘ubbabaa medhdhidoogaanne’ nuussi deꞌuwa immidoogaa bessiya ammanttiya naqaashaa haratussi yootiyo wode A bonchchoosinne sabboos. Nu wodiya, nu abbiyanne nuussi deꞌiya ubbabaa goꞌettidi nuussi danddayettida keenan sabbakiyo wode nu wolqqaa Yihoowawu immoos. (Mat. 6:33; Luq. 13:24; Qol. 3:23) Nuuni siiqiyo Xoossaabaa haratuyyo yootiyogaa dosoos. Qassi A sunttaabaanne I ay mala Xoossakko haratuyyo yootanawu keehi koyoos. Aybissi?

12. Haggaazuwan Yihoowa sunttaa waati geeshsha ootti xeellana danddayiyoo?

¹² Nuuni Yihoowa siiqiyogee A sunttaa geeshsha oottidi xeellanaadan denttettees. (Mat. 6:9) Hegaa giyogee Seexaanay Yihoowa xeelliyagan yootido iitabay tuma gidennaagaa haratussi yootanawu koyoos giyogaa. (Doo. 3:1-5; Iyy. 2:4; Yoh. 8:44) Nuuni sabbakiyo wode nu yootiyobaa siyiya ubbawu Yihoowabaanne I ay mala Xoossakko odanawu wozanappe koyoos. A waanna eeshshay siiqo gidiyogaa, I haariyo ogee xillonne suure gidiyogaa, qassi A kawotettay mata wode waaye ubbaa xayssidi sarotettaanne ufayssaa ehaanaagaa asa ubbay eranaadan koyoos. (Maz. 37:10, 11, 29; 1 Yoh. 4:8) Nuuni Yihoowa xeelliyagan hageeta asawu yootiyo wode A sunttaa geeshsha ootti xeelloos. Qassi nuuni nu sunttaadan deꞌiyogaa eriyogan ufayttoos. Nuuni hegaadan giyoy aybissee?

13. Nuuni Yihoowa Markkata geetetti xeegettiyogaa nashshiyoy aybissee? (Isiyaasa 43:10-12)

¹³ Yihooway nuuni A “markkata” gidanaadan dooriis. (Isiyaasa 43:10-12 nabbaba.) Oosuwa Kaalettiya Citay amarida layttaappe kase issi dabddaabbiyan hagaadan giis: “Nuussi deꞌana danddayiya ay bonchchuwappekka aadhdhiyagee Yihoowa Markkata geetetti xeegettiyogaa.” Aybissi? Issi leemisuwa beꞌa. Balabaa oottadasa giidi issi uri nena mootidabadan qoppa. He mootoy worddo gidiyogaanne hegaa malabaa neeni mule oottabeenna loꞌꞌo asa gidiyogaa haratussi yootiya issi uri neeyyo koshshiis. Neeni oona dooruutee? Neeni eriyonne ammanettiyo, qassi harati A ammananaadan oottiya loꞌꞌo sunttay deꞌiyo ura dooriyogee qoncce. Yihooway tumu Xoossay A xalaala gidiyogaa nuuni haratussi yootana mala A markkata gidanaadan nuna dooriyogan I nuna loytti eriyogaanne ammanettiyogaa bessiis. Nuuni A markkata gidiyogaa keehi nashshiyo gishshawu demmido injje ubban A sunttaa haratussi erissoosinne A xeelliyagan odettida iitabay ubbay worddo gidiyogaa bessoos. Yaatiyogan, Yihoowa Markkata geetettiyo nu bonchcho sunttaadan deꞌoos!—Maz. 83:18; Roo. 10:13-15.

WURSSETTAY GAKKANAASHIN AGGENNAN SABBAKOOS

14. Sinttappe hanana danddayiya nuna ufayssiyabay aybee?

¹⁴ Sinttanaa hidootan nuuni keehi ufayttoos! Yihooway maaddin daro asay gita waayiyappe kase awu goynnana giidi hidootoos. Qassi, awudeegaappenne aaruwan keehi waayissiya gita waayiya wodekka daro asay Seexaanaa alamiyappe kiyidi nunaara Yihoowawu goynniyogaa nuuni beꞌidi ufayttana!—Oos. 13:48.

15-16. Nuuni aggennan oottiyobay aybee, qassi awude gakkanawu oottiyoo?

¹⁵ He wodee gakkanaashin nuuni oottiyo keehi koshshiya oosoy deꞌees; he oosuwa mule zaarettidi oottokko. Kumetta saꞌan Xoossaa Kawotettaa mishiraachchuwa sabbakiyo gita maatay nuussi deꞌees. Qassi mata wode hananabaa asawu aggennan yootana koshshees. Ha iita alamee xayanawu keehi matidoogaa asay ubbay erana koshshees. Pirddaa gallassay gakkiyo wode nuuni sabbakidobay Xoossaa Yihoowappe yiidoogaa eti erana.—Hiz. 38:23.

¹⁶ Yaatikko nuuni ay oottanawu murttidoo? Siiqoy, hegeekka mishiraachchuwa siiqiyogee, asaa siiqiyogee, qassi ubbaappe aaruwan Xoossaa Yihoowanne A sunttaa siiqiyogee Yihooway, “Oosoy gidana” gaana gakkanaashin yeemuwan, eesuwaninne minnidi aggennan sabbakanaadan oottees.