XANNAꞌIYO HUUPHE YOHUWA 43
MAZAMURE 90 Issoy Issuwaa Minttettite
Siriyogaa Waata Aggana Danddayay?
“Ubbabaakka paaccite.”—1 TAS. 5:21.
TAMAARANABAA
Neeni Yihoowawu minnada haggaazennaadan diggana danddayiya siriya waata aggana danddayiyakko beꞌana.
1-2. (a) Yihoowa ashkkarati siriyo amaridabay aybee? (b) Nuuni ha huuphe yohuwan ay beꞌanee?
YELAGA gidin woy cima gidin ubba asay issi issitoo sirees.a Leemisuwawu, aassiya issi yelagay ‘Yihooway tabaa tumuppe akeekiishsha?’ giidi qoppana danddayees. Hegaappe denddidaagan, I haattan muukettana koshshiyakkonne sirana danddayees. Hara ishay qassi yelagatettan daro miishshaa demmanawu baaxetiyogaa aggidi ba deꞌuwan Yihoowa haggaazuwa kaseyiis. I haꞌꞌi gastta qassi ba so asawu koshshiyabaa kunttiyo miishsha xalaalay awu deꞌees. I yelagatettan suurebaa kuuyidaakkonne sirana danddayees. Woykko daro wolqqi baynna issi cima michchiyo qoppa. A kaseegaadan oottana danddayenna gishshawu hidootaa qanxxennan aggukku. Neeni, ‘Yihooway tana wudidi xeellii? Taani Yihoowawu gaada aggidobay bessiyabee? Taani haꞌꞌikka Yihoowawu oottana danddayiyanaa?’ gaada nena oychcha eray?
2 Nuuni hegaa mala oyshatussi zaaruwa demmennan aggikko hegee nu goynuwa qohana danddayees. Ha huuphe yohuwan, (1) Yihooway nuussi qoppiyogaa, (2) nuuni kase kuuyidobay loꞌꞌo gidiyogaa, woy (3) nuuni haꞌꞌikka Yihoowawu oottana danddayiyogaa sirikko, Geeshsha Maxaafay yootiyo maarata pilggiyogee nuna waati maaddana danddayiyakko beꞌana.
SIRIYOGAA AGGANAWU NEENI WAATANA DANDDAYAY?
3. Nuuni siriyogaa agganaadan maaddiya issi ogee aybee?
3 Nuuni siriyogaa aggana danddayiyo issi ogee nu oyshatussi zaaruwa demmanawu Xoossaa Qaalaa pilggiyogaa. Nuuni yaatikko, Yihoowa ammaniyo ammanoynne aara dabbotido dabbotay minnana; qassi ‘ammanuwan minni’ deꞌana danddayoos.—1 Qor. 16:13.
4. ‘Ubbabaakka paaccanawu’ nuuni waatana danddayiyoo? (1 Tasalonqqe 5:21)
4 Koyro Tasalonqqe 5:21 nabbaba. Geeshsha Maxaafay nuuni ‘ubbabaakka paaccanaadan’ zoriyogaa akeeka. Nuuni hegaadan waati oottana danddayiyoo? Nuuni ammaniyobay tumakkonne shaakki eranawu, hegaa Geeshsha Maxaafay yootiyobaara geeddarssana danddayoos. Yihooway awu qoppiyogaa sirida yelagaa hanotaa qoppa. I he qofaa tuma giidi ammanana koshshii? Koshshenna; ayssi giikko, I he allaalliyara gayttidaagan Yihoowa qofaa eranawu ‘ubbabaakka paaccana’ koshshees.
5. Nu oyshatussi Yihoowappe zaaruwa demmanawu waatana danddayiyoo?
5 Nuuni Geeshsha Maxaafaa nabbabiyo wode Yihooway yootiyobaa “siyoos” giyogaa mala. Shin nu oyshatussi Yihoowappe zaaruwa demmanawu koyikko Geeshsha Maxaafaa nabbabiyogaappe aarobaa oottana koshshees. Nu oyshatuyyo zaaruwa demmanaadan maaddiya xiqiseta koyidi hegeeta xannaꞌana koshshees. Nuuni xannaꞌanawu Yihoowa dirijjitee giigissido xuufeta goꞌettana danddayoos. (Lee. 2:3-6) Pilggiyo wode Yihooway nuna kaalettanaadaaninne nu oyshawu zaaruwa demmana mala maaddanaadan A woossana danddayoos. Yaatidi nu hanotawu maaddiya Geeshsha Maxaafaa maaratanne qofata koyana danddayoos. Geeshsha Maxaafan etabay odettido nuugaa mala hanotay gakkido asatu taarikiya xannaꞌiyogeekka nuna maaddana danddayees.
6. Shiiqoti nuuni siriyogaa agganaadan waati maaddiyonaa?
6 Nuuni shiiqotunkka Yihooway nuussi yootiyobaa “siyoos.” Nuuni ubbatoo shiiqota shiiqiyaba gidikko, haasayaappe woy asay yootiyo qofaappe nu oyshaa zaaruwa siyana danddayoos. (Lee. 27:17) Nuuni siriyo amaridabata agganaadan maaddiyabaa ane beꞌoos.
YIHOOWAY NEESSI QOPPIYOGAA NEENI SIRIYO WODE
7. Amaridaageeti woygi oychchana danddayiyonaa?
7 ‘Yihooway tana wudidi xeellii?’ gaada nena oychcha eray? Neeni nena pattenna asadan xeellikko saluwanne saꞌaa medhdhida Xoossaara dabbotiyogee danddayettennabadan qoppana danddayaasa. Kawuwa Daawitikka hegaadan qoppennan aggenna. I Yihooway asawu qoppiyogan maalaalettidi hagaadan oychchiis: “Abeet GODAU, neeni ayyo qoppiyoogee asi aibee? Neeni saaphoyiyoogee asa na7i aibee?” (Maz. 144:3) Ha oyshaa zaaruwa neeni awuppe demmana danddayay?
8. Koyro Sameela 16:6, 7, 10-12y yootiyogaadan, Yihooway aybaa xeellii?
8 Yihooway harati kariyo asata wudidi xeelliyogaa Geeshsha Maxaafaappe akeekoos. Leemisuwawu, Yihooway Isseya naatuppe issoy sinttappe Israaꞌeela kawo gidanaadan Sameeli tiyana mala Isseya soo A kiittiis. Isseyi ba hosppun naatuppe laappunati Sameelaara gayttanaadan xeesiis; shin etappe yelagiyab Daawita xeesibeenna. Gidikkokka, Yihooway dooridoogee Daawita. (1 Sameela 16:6, 7, 10-12 nabbaba.) Yihooway Daawiti tumuppe ay mala asakkonne akeekiis. I he yelagay A keehi siiqiyogaa eriis.
9. Yihooway neessi qoppiyogaa neeni ammanettana danddayiyoy aybissee? (Misiliyakka xeella.)
9 Yihooway nena wudidi xeelliyogaa waati bessidaakko qoppa. Ne hanotawu haniya keehi loꞌꞌo zoriya I nena zorees. (Maz. 32:8) Hegee I neessi koshshiyabaa loytti eriyogaa bessees. (Maz. 139:1) Neeni Yihoowa zoriya oosuwan peeshshiyo wodenne hegee nena maaddiyogaa akeekiyo wode Yihooway neessi qoppiyogaa ammanettaasa. (1 Odi. 28:9; Oos. 17:26, 27) Yihooway neeni awu haggaazanawunne azazettanawu oottiyo ubbabaa beꞌees. Qassi I neeyyo deꞌiya loꞌꞌo eeshshata akeekeesinne ne dabbo gidanawu koyees. (Erm. 17:10) Neenikka A dabbo gidanawu koyikko I keehi ufayttana.—1 Yoh. 4:19.
“Neeni [Yihoowa] koyikko, i neeyyo beettana.” —1 Odi. 28:9 (Mentto 9 xeella)c
NEENI KASE LOꞌꞌOBAA KUUYIDOOGAA SIRIYO WODE
10. Nuuni kase kuuyidobata qoppidi nuna woygi oychchana danddayiyoo?
10 Issoti issoti kase kuuyidobata qoppidi likkebaa kuuyidanaashsha giidi issi issitoo sirana danddayoosona. Geella eti Yihoowayyo kaseegaappe aaruwan haggaazanaayyo daro miishshaa demissiya loꞌꞌo oosuwa woy zalꞌꞌiya aggidaageeta gidana danddayoosona. Eti hegaadan kuuyoosappe unddenna layttay aadhdhennan aggenna. Shin etaagaappe dummatiyabaa kuuyidi haꞌꞌi daro miishshaa demmiyabanne ishalo deꞌuwa deꞌiyaba milatiya amarida asatubaa qoppana danddayoosona. Hegaappe denddidaagan, eti hagaadan giidi qoppana danddayoosona: ‘Taani Yihoowawu gaada aggidobay bessiyabee? Woy hegee hara injjeti taappe halanaadan oottidee?’
11. Mazamure 73 xaafidaagee qoppido iitabay aybee?
11 Neenikka nena hegaa mala oyshata oychchikko, Mazamure 73 xaafidaagawu siyettidabaa qoppa. Yihoowawu haggaazennaba gidikkokka payya, durenne unꞌꞌettennaba milatiya asata I beꞌiis. (Maz. 73:3-5, 12) Eta deꞌuwan ubbabay injjetidaba milatiyogaa beꞌidi Yihoowawu haggaazanawu baaxetiyogee maaddennabadan qoppiis. I ha iita qofan ‘gallassa kumettaa’ metootiis. (Maz. 73:13, 14) I iitabaa qoppiyogaa agganawu waatidee?
12. Mazamure 73:16-18n odettidaagaadan, iitabaa qoppiyogaa agganaadan mazamuraawiya maaddidabay aybee?
12 Mazamure 73:16-18 nabbaba. Mazamuraawee Yihoowa geeshsha sohuwakko biis. I yan Yihoowa asaara shiiqido gishshawu suurebaa qoppiis. Issoti issoti ishalo deꞌuwa deꞌiyaba gidikkokka, etawu hidooti baynnaagaa I akeekiis. Hegaappe denddidaagan, I unꞌꞌettiyogaa aggiisinne Yihoowawu haggaazanawu kuuyidoogee keehi loꞌꞌo kuushsha gidiyogaa ammanettiis. Qassi ubbatoo Yihoowawu haggaazanawu murttiis.—Maz. 73:23-28.
13. Neeni kase kuuyidobatun zilꞌꞌettikko waatana danddayay? (Misiliyakka xeella.)
13 Neenikka Mazamuraawiyagaadan oottiyogan iitabaa qoppiyogaa aggana danddayaasa. Waatada? Yihoowa anjjota gujjin, neeni demmido loꞌꞌobata hassaya. Qassi Yihoowawu goynnennaageetuyyo hegeeti baynnaagaakka qoppa. Yihoowayyo goynnenna daroti sinttappe demmanawu hidootiyobi baynna gishshawu ishalo deꞌuwa deꞌanawu bichchaaroosona; shin neeni Yihoowappe haꞌꞌi demmido anjjotu xalaala gidennan, sinttappekka maalaalissiya darobaa neeyyo immanawu I qaalaa geliis. (Maz. 145:16) Hagaakka qoppa: Neeni harabaa kuuyikko ne deꞌoy waananaakko tumuppe erana danddayay? Shin hagaa ammanettana danddayaasa: Neeni Xoossaanne harata siiqada kuuyikko, ne deꞌuwan ufayttanaadan oottiyabati neeyyo ubbatoo deꞌana.
Yihooway ehaanawu qaalaa gelido anjjota qoppa (Mentto 13 xeella)d
NEENI HAꞌꞌIKKA YIHOOWAWU HAGGAAZANA DANDDAYIYOGAA SIRIYO WODE
14. Amaridaageeti ay mala hanotan deꞌiyonaa, qassi woygi oychchana danddayiyonaa?
14 Yihoowa asaappe amaridaageeti cimatettaa, sahuwa woy bollaa pacaa gaasuwan koyiyogaa keena oottana danddayokkona. Hegaappe denddidaagan, eti Yihooway eta xoqqu ootti xeelliyogaa sirana danddayoosona. Eti hagaadan oychchana danddayoosona, ‘Taani haꞌꞌikka Yihoowawu haggaazana danddayiyanaa?’
15. Mazamure 71 xaafidaagee ay ammanettidee?
15 Mazamure 71 xaafidaagawukka hegaadan siyettiis. Hagaadan giidi woossiis: “Ta wolqqai ixxido wodiyan tana aggoppa.” (Maz. 71:9, 18) Gidikkokka, Xoossawu ammanettidi haggaazikko Yihooway A kaalettanaagaanne maaddanaagaa ha mazamuraawee ammanettiis. Yihoowawu haggaazennaadan diggiyabati deꞌishinkka Awu haggaazanaayyo banttawu danddayettida ubbabaa oottiyageetun Yihooway ufayttiyogaa mazamuraawee akeekiis.—Maz. 37:23-25.
16. Yihooway cimidaageeta ayba ogetun goꞌettana danddayii? (Mazamure 92:12-15)
16 Cimidaageetoo, Yihooway xeelliyogaadan inttena xeellite. Inttessi wolqqay ixxikkokka, intte ayyo ammanettidi haggaazanaadan inttena maaddana danddayees. (Mazamure 92:12-15 nabbaba.) Intte oottana danddayennaban xeelaa wottiyogaappe intte oottana danddayiyobaa qoppite. Leemisuwawu, intte ammanettidi oottidobaynne haratuyyo qarettiyogee eta minttettana danddayees. Daro layttawu Yihooway inttena maaddido ogetanne sinttappe polettin beꞌanawu intte yeemuwan naagiyo Geeshsha Maxaafaa hiraagata haratuyyo yootana danddayeeta. Qassi haratuyyo intte woossiyo woosay eta keehi maaddiyogaa dogoppite. (1 PHe. 3:12) Nu hanotay ayba gidikkokka, nuuni ubbay Yihoowawunne haratussi oottana danddayiyobay deꞌees.
17. Nuna haratuura geeddarssana koshshennay aybissee?
17 Neeni Yihoowawu loytta oottana danddayenna gishshawu unꞌꞌettikko, neeni oottana danddayiyobaa I xoqqu ootti xeelliyogaa ammanettana danddayaasa. Neeni oottiyobaa harati oottiyobaara geeddarssanawu paacettana danddayaasa. Shin hegaadan mule geeddarssoppa! Aybissi? Yihooway hegaadan geeddarssenna. (Gal. 6:4) Leemisuwawu, Mayraama Yesuusawu keehi alꞌꞌo shittuwa ehaasu. (Yoh. 12:3-5) Hegaappe dumma hanotan, hiyyeesa amꞌꞌe maccaasiya keehi guutta naaꞌꞌu santtimeta Xoossaa garuwawu immaasu. (Luq. 21:1-4) Shin Yesuusi he naaꞌꞌu maccaasata geeddarssibeenna. I Mayraamanne hiyyeesa amꞌꞌiya ammanuwan oottidobaa beꞌiis. A Aaway Yihooway neeni an ammaniyo gishshawunne A siiqiyo gishshawu oottiyo ubbabaa xoqqu ootti xeellees; neeni hegaa guuttabadan xeellikkokka, I hegaa nashshees.
18. Nuuni siriyogaa agganaadan maaddiyabay aybee? (“Yihoowa Qaalay Neeni Siriyogaa Agganaadan Maaddana Danddayees” giya saaxiniyakka xeella.)
18 Nuuni ubbaykka issi issitoo siroos. Shin nuuni qommoora beꞌidoogaadan, siriyogaa agganaadan Geeshsha Maxaafay nuna maaddana danddayees. Yaaniyo gishshawu nena sirissiyabatuyyo zaaruwa demmanawu baaxeta; yaatikko hirggiyogaa aggada woppu gaasa. Yihooway nena loytti erees. Neeni ne deꞌuwan A kaseyanawu oottidobata nashshees; qassi I nena woytana. Yihooway ammanettidi awu haggaaziya ubbaa siiqiyogaanne etawu qoppiyogaa siroppa.
MAZAMURE 111 Nu Ufayttanaadan Oottiyaabaa
a QONCCISSIDO QAALAA: Ha huuphe yohoy nuna Yihooway xoqqu ootti xeelliyogaa woy nuuni kase kuuyidobay loꞌꞌo gidiyogaa ammanettennaadan oottiya siriya qonccissees. He siree nuuni Yihoowaninne I qaalaa gelidobatun ammanennaagaa bessiyaba gidenna.
b Yihooway Daawita dooriyo wode awu layttay woysakko Geeshsha Maxaafay yootana xayikkokka, I yelaga naꞌa gidennan aggenna.—Asawu immiyo Wochchiyo Keelaa Paydo 4 2016n, sinttaa 9 xeella.
c MISILIYA QONCCISSUWA: Yihoowa Markka gidida issi yelagiya zoriya demmanawu Geeshsha Maxaafaa pilggiyogan Yihoowa koyawusu.
d MISILIYA QONCCISSUWA: Issi ishay ba soo asawu koshshiyabaa kunttanawu miishshaa demmanaassi maskkootiya geeshshiiddi Gannatiyan deꞌiyabadan qoppees.