XANNAꞌIYO HUUPHE YOHUWA 7
MAZAMURE 15 Yihoowa Bayra Naꞌaa Sabbite!
Yihooway Neessi Atto Giidoogan Neeni Waana Goꞌettay?
‘Neeni [“tumuppe,” NW] atto yaagaasa.’—MAZ. 130:4.
TAMAARANABAA
Yihooway nuussi dumma ogiyan atto giyogaa qonccissiya Geeshsha Maxaafan odettida leemisota beꞌana. Ha huuphe yohoy Yihooway nuussi atto giyogaa nuuni kaseegaappe aaruwan nashshanaadan maaddana.
1. Asay atto giyogee darobaa qonccissana danddayiyoy aybissee?
“TAANI neeyyo atto gaas.” Neeni haasayidoban woy oottidoban qohido issi uri neeyyo hegaadan giyo wode neeni keehi woppu gaasa! Shin, “Ta neeyyo atto gaas” giyogee tumuppe woygiyogee? Neeni qohido uri hegaadan giikko, neeni aara zaarettada laggetana danddayaasa giyogee? Woy hegaa giyogee I he allaalliyabaa haasayanawu mule koyenna giyogee? Asay atto giyogee darobaa qonccissiyaba gidana danddayees.
2. Yihooway atto giyogee Geeshsha Maxaafan ayba ogetun qonccidee? (Tohossa qofaakka xeella.)
2 Yihooway nagaranchcha gidida nuuyyo atto giyo ogee nuuni issoy issuwawu atto giyo ogiyappe keehi dummatees. Yihoowagaadan ooninne atto gaana danddayenna. Mazamuraawee Yihoowabaa hagaadan giis: “Nuuni nena bonchchidi azazettana mala, nuuyyo [‘tumuppe,’ NW] atto yaagaasa.”a (Maz. 130:4) Ee, Yihooway ‘tumuppe atto gees.’ Tumuppe atto giyogan Yihoowara laggetiyabi baawa. Geeshsha Maxaafaa xaafidaageeti issi issi sohotun atto giyogaa qonccissanawu goꞌettido Ibraawetto qaalay asay issoy issuwawu atto giyogaa mule qonccissenna.
3. Yihooway atto giyo ogee nuugaappe waani dummatii? (Isiyaasa 55:6, 7)
3 Yihooway issi urawu atto giyo wode he ura nagaraa muleera quccees. He uri Yihoowara zaarettidi dabbotana danddayees. Yihooway atto giyo wode ubbatoo muleera atto gees.—Isiyaasa 55:6, 7 nabbaba.
4. Tumuppe atto giyogee woygiyogaakko nuuni akeekanaadan Yihooway nuna waati maaddii?
4 Yihooway atto giyo ogee nuugaappe dummatikko, tumuppe atto giyogee woygiyogaakko nagaranchcha asa gidida nuuni waati akeekana danddayiyoo? Yihooway nuussi waati atto giyakko nuuni akeekanaadan loꞌꞌo leemisota yootiis. Ha huuphe yohuwan hegeetuppe amaridaageeta pilggana. Nuuni zilꞌꞌettidi laamettiyo wode Yihooway nu nagaraa xayssiyogaanne nuuni aara zaarettidi dabbotanaadan oottiyogaa he leemisoti qonccissoosona. Ha leemisota pilggiyogee atto giyogaa daro ogetun qonccissida, kehanne maariya nu Aawaa nuuni kaseegaappe aaruwan siiqanaadaaninne nashshanaadan oottees.
YIHOOWAY NU NAGARAA XAYSSEES
5. Yihooway nu nagaraa atto giyo wode aybi hanii?
5 Geeshsha Maxaafay darotoo nagaraa gita toohuwan leemisees. Kawuwa Daawiti ba nagaraa hagaadan qonccissiis: “Ta iitatettai di7uwaadan tana muukkiis; denddenna gita toohuwaadan taayyo deexxees.” (Maz. 38:4) Shin balabaa oottidi zilꞌꞌettidi laamettida asatu nagaraa Yihooway atto gees. (Maz. 25:18; 32:5) “Atto ga” geetettidi birshshettida Ibraawetto qaalay “dentta” woy “tookka” giyogaa qonccissees. Hegaa gishshawu Yihooway nu nagaraa atto giyo wode I nu gita toohuwa diggees. Hegaa giyogee nuuni nu hashiyan tookkido gita toohuwa nuuppe wottees giyogaa mala.
“Atto yaagadasa” (Maz. 32:5)
6. Yihooway nu nagaraa nuuppe ay keena haassii?
6 Yihooway nu nagaraa nuuppe keehi haassiyogaa qonccissanawu Geeshsha Maxaafay hara leemisuwa yootees. Mazamure 103:12y hagaadan gees: “Awai mokkiyoosaappe awai wulliyoosai haakkiyoogaadan, hegaadankka GODAI nu mooruwaa nuuppe haassees.” Away mokkiyosay away wulliyosaappe keehi haakkees. He naaꞌꞌu ginati mule gayttana danddayokkona. Hegaa giyogee Yihooway nu nagaraa nuuni qoppana danddayiyogaappe aaruwan nuuppe haassees giyogaa. Ha qofay Yihooway nuussi muleera atto giyogaa nuuni ammanettanaadan oottees!
“Awai mokkiyoosaappe awai wulliyoosai haakkiyoogaadan” (Maz. 103:12)
7. Yihooway nu nagaraa waatiyogaa Geeshsha Maxaafay qonccissii? (Mikiyaasa 7:18, 19)
7 Yihooway leemiso hanotan nu nagaraa nuuppe haassi simmidikka hegaa oyqqi uttii? Chii. Kawuwa Hizqqiyasi Yihoowabaa hagaadan giis: “Neeni ta nagara ubbaa neeppe guyye zaarada oladasa.” (Isi. 38:9, 17) Hegaa giyogee zilꞌꞌettidi laamettidaageetu nagaraa Yihooway haassidi oleesinne hegaa zaarettidi beꞌenna giyogaa. Ha qofay hagaadankka geetettana danddayees: “Taani [nagaraa] mule oottabeennabadan neeni xeelladasa.” Nuuni Geeshsha Maxaafan Mikiyaasa 7:18, 19n odettida hara leemisuwankka hegaa mala qofaa demmana danddayoos. (Nabbaba.) Ha xiqisee Yihooway nu nagaraa abbaa ciimman oliyogaa yootees. Beni wode abbaa ciimman olettidabay zaarettidi beettenna.
“Neeni ta nagara ubbaa neeppe guyye zaarada oladasa” (Isi. 38:17)
“Neeni . . . nu nagaraakka abbaa ciimman olana” (Mik. 7:19)
8. Hanno gakkanawu nuuni ay tamaaridoo?
8 Yihooway nuussi atto giyo wode nu nagaraa toohuwappe nuna shemppissiyogaa he leemisotuppe akeekida. Daawiti giidobay tuma, “Eti oottido iitabay atto geetettidonne eta nagaray kamettido asati ufayttoosona; Yihooway A nagaraa mule qoodenna asi ufayttees.” (Roo. 4:7, 8) Tumuppe atto giyogee hagaa!
YIHOOWAY NU NAGARAA QUCCEES
9. Yihooway nuuyyo muleera atto giyogaa Geeshsha Maxaafay waati qonccissii?
9 Yihooway zilꞌꞌettidi laamettidaageetu nagaraa wozuwa baggaara quccees. Yihooway oottiyobaa Geeshsha Maxaafay waati qonccissiyakko beꞌa. Geeshsha Maxaafay Yihooway nagaraa meecciyogaanne geeshshiyogaa yootees. Hegee nagaranchchay geeyanaadan oottees. (Maz. 51:7; Isi. 4:4; Erm. 33:8) Yihooway hegaabaa hagaadan yootiis: “Intte nagarai baaraadan zo77ikkokka, shachchaadan booxxana; sinadan zo77ikkokka, puuttodan booxxana.” (Isi. 1:18) Baaraadan woy sinadan zoꞌidabaa maayuwappe yedissiyogee keehi metiyaba. Shin zaarettidi beettennaagaa keenaa Yihooway nu nagaraa muleera geeshshiyogaa nuuni ammanettanaadan ha leemisuwa goꞌettiis.
“Intte nagarai baaraadan zo77ikkokka, shachchaadan booxxana” (Isi. 1:18)
10. Yihooway nuuyyo kehatettan atto giidoogaa Geeshsha Maxaafay waati qonccissii?
10 Kasetiya huuphe yohuwan odettidaagaadan nagaray ‘acuwankka’ leemisettiis. (Mat. 6:12, tohossa qofaa; Luq. 11:4) Hegaa gishshawu nuuni nagaraa oottiyo wode ubban nu acoy gujji gujji bees. Nu acoy keehi daro! Shin Yihooway nuuyyo atto giyo wode nuuni qanxxana bessiya acuwa aggiigees giyogaa mala. I atto giido nagaraa acuwa qanxxanaadan nuna mule oychchenna. Acoy attido uri ufayttiyogaadan, nuunikka Yihooway nu nagaraa atto giyo wode ufayttoos!
“Nu acuwa atto ga” (Mat. 6:12, tohossa qofaa)
11. Geeshsha Maxaafay nu nagaray ‘qucettees’ giyogee woyganaassee? (Oosuwa 3:19)
11 Yihooway nu acuwa woy nagaraa atto giyogaa xalla gidennan, hegaa quccees. (Oosuwa 3:19 nabbaba.) Leemisuwawu, ne acoy attidoogaa bessiya malaatay acuwa mazggaban xaafettidabadan qoppana danddayaasa. Gidikkokka, he malaataappe garssaara xaafettida ne acuwa ooninne beꞌana danddayees. Shin qucciyogee hegaappe dummatees. Ha leemisuwa akeekanawu, beni wode deꞌiya asay goꞌettiyo qalamee haattan meecciyo wode sohuwara yeddiyaba gidiyogaa nuuni hassayana koshshees. Issi uri he qalamiyan xaafettidabaa irxxa ispponjjiyan quccana danddayees. Yaatiyo gishshawu, acoy ‘qucettiyo’ wode hegee muleera xayees. Qucettiichchidabaa asay beꞌana danddayenna. Hegee acoy mule xaafettibeennaagaa mala. Yihooway nu nagaraa atto giyogaa xalla gidennan, hegaa muleera qucciyogaa eriyogee nuna keehi minttettees!—Maz. 51:9.
“Hegaa gishshawu, Xoossay intte nagaraa quccana” (Oos. 3:19)
12. Ciggaaraabaa yootiya leemisuwappe nuuni ay tamaariyoo?
12 Yihooway nu nagaraa waati qucciyakko qonccissiya hegaa mala hara leemisuwakka yootiis. I hagaadan giis: “Taani ne mooruwaa shaaraadan, ne nagaraakka ciggaaraadan quccaas.” (Isi. 44:22) Yihooway nagaraa atto giyo wode hegee zaarettidi beettenna mala hegaa ciggaaran genttees giyogaa mala.
“Taani ne mooruwaa shaaraadan, . . . quccaas” (Isi. 44:22)
13. Yihooway nu nagaraa atto giyo wode nuuyyo aybi siyettii?
13 Ha leemisuwappe nuuni ay tamaariyoo? Yihooway nu nagaraa atto giyo wode he nagaraa gaasuwan gakkidabaa nu deꞌo laytta ubban tookkidi deꞌiyabadan nuuni qoppana koshshenna. Yesuus Kiristtoosa suuttan nu acoy muleera qucettiis. Yihooway nu nagaraa atto giyo wode hegaa nuuni mule oottibookko giyogaa mala. Hagee nuuni nu nagaran zilꞌꞌettidi laamettiyo wode Yihooway nuuyyo ay keena atto giyakko bessees.
YIHOOWAY NUUNI AARA ZAARETTI DABBOTANAADAN SHOOBBEES
Saluwan deꞌiya nu Aaway nuussi atto giyogee nuuni aara loytti dabbotanaadan oottees (Mentto 14 xeella)
14. Yihooway nuuyyo atto giyogaa nuuni ammanettana danddayiyoy aybissee? (Misiliyakka xeella.)
14 Yihooway nuuyyo atto giyo wode nuuni aara zaarettidi dabbotanaagaa ammanettana danddayoos. Yihooway nuuyyo muleera atto giyo gishshawu nuna mooranchchadan xeelliyogaa nuuni aggana koshshees. Yihooway nu bolli lancciya oyqqeesinne nuna qaxxayanawu ogiya koyees giidi nuuni hirggana koshshenna. I hegaadan mule oottenna. Yihooway nuuyyo atto giyogaa nuuni ammanettana danddayoos. Yihooway ba erissidobaa yootiya Ermmaasawu hagaadan giis: “Taani eta naaquwaa atto gaana; eta nagaraakka naa77antto hassayikke.” (Erm. 31:34) Kiitettida Phawuloosi he qofaa zaarettidi yootiis. (Ibr. 8:12) Shin hegee woygiyogee?
“Taani . . . eta nagaraakka naa77antto hassayikke” (Erm. 31:34)
15. Yihooway nu nagaraa naaꞌꞌantto hassayenna giyogee woygiyogee?
15 Geeshsha Maxaafan “hassaya” giya qaalay issi uri kasebaa qoppiyogaa ubbatoo qonccissenna. Hegee issi uri oottiyobaakka qonccissana danddayees. Yesuusa matan kaqettida danobaa oottida bitanee hagaadan oychchiis: “Yesuusaa, neeni kawotiyo wode tana hassaya.” (Luq. 23:42, 43) He bitanee Yesuusi he wode awu issibaa oottanaadan koyiis. Yaatin Yesuusi A hayquwappe denttanaagaa awu yootiis. Hegaa gishshawu Yihooway nu nagaraa naaꞌꞌantto hassayikke giido wode, I nuuyyo atto giidoogaanne nu nagaraa gaasuwan sinttappe nuna qaxxayennaagaa yootiis giyogaa.
16. Yihooway nuuyyo atto giyo wode nu demmiyo laꞌatettaa Geeshsha Maxaafay waati qonccissii?
16 Yihooway nuuyyo atto giyo wode nuuni demmiyo laꞌatettaa akeekanaadan maaddanawu Geeshsha Maxaafay hara leemisuwa yootees. Nuuni laattido nagaraa gaasuwan “nagarawu aylle” gidiyogaa Geeshsha Maxaafay yootees. Shin Yihooway nuuyyo atto giido gishshawu nuuni ‘nagaraa aylletettaappe kiyida’ ashkkaratu mala gidida. (Roo. 6:17, 18; Ajj. 1:5) Yihooway nuuyyo atto giidoogaa nuuni eriyo wode laꞌa kiyida aylledan ufayttana danddayoos.
“Intte nagaraa aylletettaappe [kiyideta]” (Roo. 6:18)
17. Yihooway nuuyyo atto giyogan waani goꞌettiyoo? (Isiyaasa 53:5)
17 Isiyaasa 53:5 nabbaba. Nuuni woriya harggiyan oyqettida asatu mala gidiyogaa bessiya wurssetta leemisuwa beꞌa. Yihooway ba Naꞌaa baggaara wozuwa yarshshuwa qanxxido gishshawu, nuuni leemiso hanotan paxida gaana danddayettees. (1 PHe. 2:24) Nuuni nagaraa oottiyo wode, Yihoowara dabbotido nu dabbotay moorettees. Shin wozuwa yarshshuwappe denddidaagan I nuuyyo atto gees, qassi nuuni aara zaarettidi dabbotana danddayoos. Wolqqaama harggiyappe paxida asi keehi ufayttiyogaadan, nuunikka Yihoowara zaarettidi dabbotido gishshawunne an sabettido gishshawu keehi ufayttoos.
“A masunttan nuuni paxida” (Isi. 53:5)
YIHOOWAY NUUYYO ATTO GIYOGEE NUNA WAATI MAADDII?
18. Yihooway nuuyyo atto giyogaabaa qonccissiya leemisotuppe nuuni ay tamaaridoo? (“Yihooway Nuuyyo Atto Giyo Ogiya” giya saaxiniyakka xeella.)
18 Yihooway nuuyyo atto giyogaabaa qonccissiya leemisotuppe nuuni ay tamaaridoo? Yihooway nuuyyo atto giyo wode nuuyyo muleera atto geesinne hegaa gaasuwan nuna qaxxayenna. Yaaniyo gishshawu, saluwan deꞌiya nu Aawaara nuuni loytti dabbotana danddayoos. Shin Yihooway nuussi atto giyogee nuuyyo imota mala gidiyogaa eroos. Hegee nuuyyo bessiyo gishshawu gidennan, I nuna siiqiyonne nuussi kehiyo gishshawu oottiyoba.—Roo. 3:24.
19. (a) Nuuni aybawu galatana koshshii? (Roome 4:8) (b) Kaalliya huuphe yohuwan nuuni ay beꞌanee?
19 Roome 4:8 nabbaba. Yihooway nuuyyo atto giyo gishshawu nuuni A keehi galatoos! (Maz. 130:4) Shin Yihooway nuuyyo atto gaanaadan koyikko nuuni issibaa oottana koshshees. Yesuusi giidobaa akeeka: “Inttena naaqqidaageetuyyo intte atto gaana xayikko, intte Aawaykka intte nagaraa atto geenna.” (Mat. 6:14, 15) Yaaniyo gishshawu, nuuni Yihoowa leemisuwa kaallidi haratuyyo atto gaana koshshees. Shin nuuni hegaadan waati oottana danddayiyoo? Kaalliya huuphe yohuwan hegaabaa beꞌana.
MAZAMURE 46 Yihoowa, Nena Galatoos
a Koyro Ibraawettuwan xaafettidaagan atto giyogaa qonccissanawu ha sohuwan goꞌettido qaalay tumuppe atto giyogaa xalaala qonccissees. Hegaadan atto giyagee Yihoowa; qassi I atto giyo ogee asay issoy issuwawu atto giyo ogiyappe keehi dummatees. Shin daro Geeshsha Maxaafaa birshshettati Mazamure 130:4n deꞌiya ha keehi koshshiya qofaa maara yootokkona.