Yihoowi Neeyyo Atto Giyogaa Ammana

1-2. Yihoowi nu nagaraa atto giyogaa akeekiyogee nuuni waananaadan oottii? (Misiliya xeella.)

KAWUWA Daawiti iitabata oottido wode keehi azzaniis. (Maz. 40:12; 51:3; huuphessa qofaa) Gidikkokka, I wozanappe zilꞌꞌettidi laamettin Yihoowi awu atto giis. (2 Sam. 12:13) Hegaa gishshawu, Daawiti Yihoowi awu atto giidoogaa akeekido wode ufayttiis.—Maz. 32:1.

² Daawitaagaadan, nuunikka Yihoowa maarotaa demmiyogan ufayttana danddayoos. Nuuni wozanappe zilꞌꞌettidi laamettikko, nu nagaraa paaxikko, qassi hegaa zaarettidi oottennan agganawu murttikko, nuuni oottido nagaraa, haray atto gita nagaraakka Yihoowi atto gaanawu koyiyogaa eriyogee keehi minttettiyaba! (Lee. 28:13; Oos. 26:20; 1 Yoh. 1:9) Qassi Yihoowi nuuyyo atto gi simmidi, I nuna hegaa gaasuwan zaarettidi oychchennaagee woy qaxxayennaagee keehi ufayssiyaba!—Hiz. 33:16.

3-4. Issi michchiya haattan muuketta simminkka iyyo aybi siyettidee, qassi ha huuphe yohuwan nuuni ay beꞌanee?

³ Shin Yihoowi nuuyyo tumuppe atto giyogaa nuuni issi issitoo sirana danddayoos. Tumaa keettan diccida Jenifeeri hanotaa beꞌa. A yelagatettan deꞌiyo wode iitabaa oottiyogaanne naaꞌꞌu qommo deꞌuwa deꞌiyogaa doommaasu. Shin amarida layttaappe simmin A ba deꞌuwan laamettada, bana Yihoowawu sheedhdhada haattan muukettaasu. A hagaadan gaasu: “Kase taani darotoo pokkiya tuna nagaraa oottays, mattottays, keehi hanqqettaysinne miishshaa xoqqu ootta xeellays. Kiristtoosa wozuwa yarshshuwappe denddidaagan, Yihoowi nu nagaraa atto gaanaagaa Geeshsha Maxaafay yootiyogaa erays. Gidikkokka, I taayyo atto giidoogaa ta wozanaa ammanttana danddayabeykke.”

⁴ Neeni kase oottido nagarawu Yihoowi neeyyo atto giidoogaa ne wozanaa ammanttanawu issi issitoo metootay? Yihoowi nuunikka Daawitaagaadan A maarotan ammanettanaadan koyees. Ha huuphe yohuwan, Yihoowi nuuyyo atto giyogaa nuuni ammanana koshshiyoy aybissakko, qassi yaatanaadan nuna aybi maaddana danddayiyakko beꞌana.

YIHOOWI NUUYYO ATTO GIYOGAA NUUNI AMMANIYOGEE KEEHI KOSHSHIYOY AYBISSEE?

5. Nuuni ay ammananaadan Seexaanay koyii? Leemisuwa yoota.

⁵ Yihoowi nuuyyo atto giyogaa ammaniyogan Seexaanaa piriyan gelennaadan naagettana danddayoos. Nuuni Yihoowawu haggaaziyogaa aggana mala Seexaanay baassi danddayettida ubbabaa oottanaagaa hassaya. Seexaanay ba halchchuwa polanawu nu nagaray atto geetettenna giidi nuuni ammananaadan oottanawu baaxetana danddayees. Pokkiya tuna nagaraa oottido gaasuwan Qoronttoosa galchchaappe kiyida bitaniya hanotaa beꞌa. (1 Qor. 5:1, 5, 13) I guyyeppe zilꞌꞌettidi laamettiis, shin Seexaanay he galchchan deꞌiyageeti he bitaniyawu atto geennaadaaninne A mokki ekkennaadan koyiis. Qassi zilꞌꞌettidi laamettida he bitanee ba nagaray atto geetettibeennabadan qoppidi, ‘keehippe azzanidinne hidootaa qanxxidi’ Yihoowawu haggaaziyogaa aggana mala Seexaanay koyiis. Seexaanay ba halchchuwa woy ba hiillata laammibeenna. Shin “nuuni A hiillata loytti eroos.”—2 Qor. 2:5-11.

6. Nuuni nuna mooranchchadan xeelliyogaa aggidi woppu gaanawu waatana danddayiyoo?

⁶ Yihoowi nuuyyo atto giyogaa ammaniyogan nuuni nuna mooranchchadan xeelliyogaa aggidi woppu gaana danddayoos. Nuuni nagaraa oottiyo wode nu oottidoban azzanoos. (Maz. 51:17) Hegee loꞌꞌoba. Nu kahay nuuni laamettanaadaaninne likkebaa oottanaadan denttettana danddayees. (2 Qor. 7:10, 11) Gidoppe attin, nuuni zilꞌꞌetti laamettidikka adussa wodiyawu nuna mooranchchadan xeellikko, hidootaa qanxxana danddayoos. Shin Yihoowi nuuyyo tumuppe atto giidoogaa nuuni ammaniyo wode, nuna mooranchchadan xeelliyogaa aggana danddayoos. Yaatikko, nuuni Yihoowi koyiyogaadan geeshsha kahaaninne tumu ufayssan awu haggaazana danddayoos. (Qol. 1:10, 11; 2 Xim. 1:3) Yaatin, Xoossay nuuyyo atto giyogaa nu wozanaa waati ammanttana danddayiyoo?

YIHOOWI NUUSSI ATTO GIYOGAA AMMANANAADAN NUNA AYBI MAADDANA DANDDAYII?

7-8. Yihoowi babaa Muuseyyo woygi qonccissidee, qassi nuuni ay ammanettana danddayiyoo? (Kessaabaa 34:6, 7)

⁷ Yihoowi babaa woygidaakko qoppa. Leemisuwawu, Yihoowi Siinaa Deriyan Muuseyyo woygidaakko beꞌa.a (Kessaabaa 34:6, 7 nabbaba.) Yihoowawu daro loꞌꞌo eeshshati deꞌikkonne, I “qaretainne maarotai kumido Xoossaa” gidiyogaa Muuseyyo dummayidi yootiis. Hegaa mala Xoossay ba nagaran tumuppe zilꞌꞌettidi laamettidi awu goynniya urawu atto geennan ixxanee? Mulekka! Yaatiyogee qareti baynnabanne iitatetta, qassi Yihoowi hegaa mala eeshshata mule bessenna.

⁸ Yihoowi babaa likke gidennabaa mule yootennaagaa nuuni ammanettana danddayoos; ayssi giikko, I tumaa Xoossaa. (Maz. 31:5) Yaatiyo gishshawu, I yootidobaa nuuni ammanana danddayoos. Neeni kase oottido nagaran nena mooranchchadan xeelliyogaa agganawu metootikko, nena hagaadan oychcha: ‘Yihoowi tumuppe maariyagaanne qarettiyagaa gidiyogaa, qassi ba nagaran zilꞌꞌettidi laamettiya ooyyonne atto giyogaa taani ammaniyanaa? Yaanikko, I taayyo atto giyogaa taani ammanana koshshennee?’

9. Yihoowi nu nagaraa atto giyo ogiya xeelliyagan Mazamure 32:5y ay yootii?

⁹ Ayyaanay denttettin Geeshsha Maxaafaa xaafidaageeti Yihoowi atto giyogaa xeelliyagan yootidobaa wotta dentta qoppa. Leemisuwawu, Geeshsha Maxaafaa xaafida Daawiti Yihoowi atto giyagaa waati qonccissidaakko beꞌa. (Mazamure 32:5 nabbaba.) Daawiti hagaadan giis: “Neeni tana deexxida nagaraa atto yaagadasa.” Ha xiqisiyan ‘atto giyogaa’ geetetti birshshettida Ibraawetto qaalay “denttiyogaa,” woy “tookkiyogaakka” qonccissees. Yihoowi Daawitawu atto giido wode A nagaraa appe denttidi diggidoogaa mala. Yaatin Daawiti bana mooranchchadan xeelliyo gita toohuwappe woppaa demmiis. (Maz. 32:2-4) Nuunikka hegaa mala woppaa demmana danddayoos. Nuuni nu nagaran tumuppe zilꞌꞌettidi laamettiyo wode Yihoowi nu nagaraa nuuppe denttidi haassiyo gishshawu nuna mooranchchadan xeelliyo gita toohuwa ubbatoo tookkana koshshenna.

10-11. Atto gaanawu giigi uttiis giya qofay Yihoowabaa ay qonccissii? (Mazamure 86:5)

¹⁰ Mazamure 86:5 nabbaba. Daawiti Yihoowi atto gaanawu giigi uttidoogaa yootiis. Hegaa giyogee nuuni moorobaa oottiyo wode Yihoowi hanqqettanawu eesotenna, qassi bantta nagaran zilꞌꞌettidi laamettiyageetussi ubbatoo atto gaanawu koyees giyogaa. I hegaadan oottiyoy aybissee? He xiqisiyan kaalliya qofay hagaadan qonccissees: “Nena xeegiya ubbaayyo aggenna ne siiqoi dariyoogaa.” Kasetiya huuphe yohuwan nuuni beꞌidoogaadan, Yihoowi bana siiqiyageetuyyo aggenna siiquwa bessanaagaanne eta mule yeggi bayennaagaa qaalaa geliis. A aggenna siiqoy denttettin bantta nagaran zilꞌꞌettidi laamettiya ubbawu I “coo atto gaana.” (Isi. 55:7) Xoossay neeyyo atto giyogaa neeni ammananawu metootikko, nena hagaadan oychchana danddayaasa: ‘Atto giya Yihoowi maarotaa demmanawu A woossiya zilꞌꞌettidi laamettiya ubbawu I atto gaanawu giigi uttidoogaa ammaniyanaa? Yaatikko, taani maarotaa demmanawu woossiyo wode I taayyo atto giyogaa ammanana koshshennee?’

¹¹ Nuuni nagaranchcha gidiyogaa Yihoowi loytti akeekiyogaa eriyogan woppu gaana danddayoos. (Maz. 139:1, 2) Daawiti hara mazamuriyan yootidobaanne hegee Yihoowi nuussi atto gaanawu koyiyogaa ammananaadan waati maaddana danddayiyakko ane beꞌoos.

YIHOOWI NUBAA AY HASSAYII?

12-13. Yihoowi nubaa ay hassayii, qassi I nuna waati oyqqii? (Mazamure 103:14)

¹² Mazamure 103:14 nabbaba. Daawiti bantta nagaran zilꞌꞌettidi laamettiyageetuyyo Yihoowi atto gaanawu giigi uttidoy aybissakko yootiis. Yihoowi “nuuni biitta gidiyoogaa” hassayiyogaa I yootiis. Hegaa giyogee nuuni nagaranchcha gidiyogaa Yihoowi ubbatoo akeekees giyogaa. Ane Daawiti giidobaa loytti pilggoos.

¹³ Yihoowi ‘nuuni aybippe merettidaakkonne loytti eriyogaa’ Daawiti yootiis. Yihoowi Addaama “biittaa baanaappe” medhdhiis. Yaatiyo gishshawu asay aybippe merettidaakko, qassi etawu aybi koshshiyakko I erees. Leemisuwawu, eti maana, xiskkananne shemppana koshshees. Wottiyobi baynna asatussikka hegeeti koshshoosona. (Doo. 2:7) Shin Addaamenne Hewana nagaraa oottido gishshawu, asay hara ogiyankka biitta. Nuuni nagaranchcha gidiyo gishshawu biitta, qassi iitabaa oottennan agganawu ubbatoo baaxetana koshshees. Nuuni laattido nagaraa gaasuwan issi issitoo baliyogaa Yihoowi erees. Nuuni balabaa oottidi zilꞌꞌetti laamettiyo wode I nuna maareesinne nuussi atto gees.—Maz. 78:38, 39.

14. (a) Yihoowi nuussi atto giyo ogiya xeelliyagan Daawiti yootido harabay aybee? (Mazamure 103:12) (b) Yihoowi Daawitawu atto giido ogiyappe nuuni ay tamaarana danddayiyoo? (“Yihoowi Atto Giyonne Dogiyo Ogiya” giya saaxiniya xeella.)

¹⁴ Yihoowi nuuyyo atto giyogaa nuuni ammanettanaadan maaddana danddayiya harabay aybee? (Mazamure 103:12 nabbaba.) Yihoowi nuuyyo atto giyo wode, “awai mokkiyoosaappe awai wulliyoosai haakkiyoogaadan” I nu nagaraa haassiyogaa Daawiti yootiis. Away mokkiyosay away wulliyosaappe keehi haakkees. Yihoowi atto giyo nagaraa xeelliyagan hegee ay qonccissii? Issi maxaafay ha xiqisiya qonccissiiddi issibay sawidi muleera xayiyogaadan Xoossay nu nagaraa nuuppe keehi haassiyogaa yootiis. Hegaa gishshawu, I hegaabaa mule zaarettidi qoppennaagaa woy nuna hassayissennaagaa ammanettana danddayoos. Issi issitoo qumaa sawoy woy harabay nuuni kase hanidabaa qoppanaadan oottana danddayees. Shin Yihoowi issi nagaraa atto gi simmin hegaa xeelliyagan zaarettidi qoppanaadan woy hegawu nuna mootanawu woy qaxxayanawu kuuyanaadan oottana danddayiyabi baawa.—Hiz. 18:21, 22; Oos. 3:19.

15. Nuuni kase oottido nagaraa Yihoowi atto gibeennabadan nuuni qoppikko, waatana danddayiyoo?

¹⁵ Yihoowi neessi atto giidoogaa neeni ammananawu metootikko, Daawiti Mazamure 103n yootidobay nena waati maaddana danddayii? Yihoowawu aybi siyettiyakko qoppa. Neeni nagaranchcha gidiyogaa I hassayees. Qassi kase oottidoban azzanidanne bantta nagaran zilꞌꞌetti laamettida ubbawu Yihoowi atto gees. Neenikka hegaadan oottadasa. Yihoowi atto giichchido nagaraa zaarettidi mule qoppennan agganawu woy nena hassayissennan agganawu kuuyidoogaa hassaya. Neeni kase oottido nagaran Yihoowi xeelaa wottenna. Neenikka hegan xeelaa wottana koshshenna. (Maz. 130:3) Yihoowi nuussi tumuppe atto giidoogaa nuuni ammaniyo wode zilꞌꞌettiyogaa aggidi Yihoowawu ufayssan ubbatoo haggaazana danddayoos.

16. Yihoowi atto giido nagaraa ubbatoo qoppiyogee qohiyogaa bessiya leemisuwa yoota. (Misiliyakka xeella.)

¹⁶ Ha leemisuwa qoppa. Kaamiya laaggiya issi uri guyyeera yiyabaa beꞌanawu guyyen deꞌiyabaa bessiya heregaa xeellana danddayees. I issi issitoo hegaadan oottana danddayikkonne ubbatoo he heregaa xeelliyaba gidikko daafaban gelana danddayees. I laaggiiddi qohettennaadan ubbatoo sinttan deꞌiya ogiya xeellana koshshees. Hegaadankka nuuni kase oottido mooruwa issi issitoo qoppiyogee loꞌꞌo; hegee nuuni kase oottido mooruwa zaarettidi oottennaadan maaddana danddayees. Shin nuuni Yihoowi atto giido nagaraa ubbatoo qoppiyaba gidikko, nu ufayssaa xayananne awu haggaazanawu nuussi danddayettida ubbabaa oottennan aggana danddayoos. Shin nuuni nu sinttan deꞌiya ogiyan ubbatoo xeelaa wottana danddayoos. Nuuni iitabay ‘hassayettenna’ Xoossay ehanawu qaalaa gelido ooratta alamiya efiya ogiyan deꞌoos.—Isi. 65:17; Lee. 4:25.

UBBATOO NE WOZANAA AMMANTTA

17. Yihoowi nuna siiqiyogaanne nuuyyo atto giyogaa nuuni ubbatoo ammanettana koshshiyoy aybissee?

¹⁷ Yihoowi nuna siiqiyogaanne nuussi atto gaanawu ubbatoo giigi uttidoogaa ammanettana koshshees. (1 Yoh. 3:19) Aybissi? Nuuni nagaranchcha gidiyo gishshawu, Yihoowi nuna siiqana danddayenna woy nuussi mule atto geenna giidi qoppanaadan oottanawu Seexaanay ubbatoo baaxetiyo gishshataassa. Ha naaꞌꞌu hanotatunkka A halchchoy issuwa; hegeekka, nuuni Yihoowawu haggaaziyogaa agganaadan oottiyogaa. Seexaanay baayyo guutta wodee attidoogaa eriyo gishshawu loytti baaxetanaagaa nuuni naagana danddayoos. (Ajj. 12:12) Shin nuuni Seexaanaa eqettidi ubbatoo Yihoowawu ammanettidi haggaazana koshshees!

18. Yihoowi nena siiqiyogaanne neeyyo atto giyogaa ne wozanaa ammanttanawu waatana danddayay?

¹⁸ Yihoowi nena siiqiyogaa kaseegaappe aaruwan ammanettanawu hagaappe kasetiya huuphe yohuwan odettidabata oosuwan peeshsha. Yihoowi neeyyo atto giyogaa ne wozanaa ammanttanawu I babaa woygidaakko qoppa. Ayyaanay denttettin Geeshsha Maxaafaa xaafidaageeti Yihoowi atto giyogaa xeelliyagan yootidobaa wotta dentta qoppa. I neeni nagaranchcha gidiyogaa loytti eriyogaanne nena maaranaagaa dogoppa. Qassi I atto giyo wode muleera atto giyogaa hassaya. Yaatikko, neenikka Daawitaagaadan Yihoowa maarotan ammanettada hagaadan gaana danddayaasa, “‘Neeni tana deexxida nagaraa atto yaagido’ gishshawu Yihoowa nena galatays!”—Maz. 32:5.