“Intte Goinnanaagaa . . . Doorite”

1. Nuuni tumuppe ufayttanawu ay oottana koshshii, qassi aybissi? (Isiyaasa 48:17, 18)

SALUWAN deꞌiya nu Aaway nuna keehi siiqees; nuuni ha wodiyankka qassi sinttappekka ufayssiya deꞌuwa deꞌanaadan koyees. (Era. 3:12, 13) Yihooway nuussi dumma eray deꞌanaadan oottidi medhdhiis. Gidikkonne, nuuni nuna nurkka haariyo woy likkenne likke gidennabaa nuuyyo kuuyiyo maataa I nuussi immibeenna. (Era. 8:9; Erm. 10:23) Nuuni tumuppe ufayttanawu awu haggaazananne azazettana koshshiyogaa I erees.—Isiyaasa 48:17, 18 nabbaba.

2. Nuuni ay ammananaadan Seexaanay koyii, qassi Yihooway oottidobay aybee?

² Nuuni Yihoowawu haggaazana xayikkokka, ufayttananne nuna nurkka loytti haarana danddayoos giidi qoppanaadan Seexaanay koyees. (Doo. 3:4, 5) Seexaanaa worddoy qonccanaadan amarida wodiyawu asay bana barkka haaranaadan Yihooway paqqadiis. Asay bawu maaraa kessiyogeenne bana barkka haariyogee azzanttiyabaa kaalettidoogaa nuuni metootennan akeekana danddayoos. Shin Yihoowawu haggaazidoogan keehi ufayttida attuma asatubaanne macca asatubaa Geeshsha Maxaafay yootees. Eta ubbaappe aaruwan keehi ufayttiday Yesuus Kiristtoosa. Ane koyruwan, Yesuusi Yihoowawu haggaazanawu doorido gaasota beꞌoos. Yaatidi, nuuni nu Aawaa Yihoowawu goynnana koshshiyo gaasota pilggana. Wurssettan, nuuni Yihoowawu haggaazanawu dooriyo amarida gaasota beꞌana.

YESUUSI YIHOOWAWU HAGGAAZANAWU DOORIDO GAASOTA

3. Seexaanay Yesuusa shoobbidobay aybee, qassi Yesuusi dooridobay aybee?

³ Yesuusi saꞌan deꞌiyo wode oossi haggaazanaakko doorana koshshiis. Yesuusi haattan muukettidi darin takkennan Seexaanay Yesuusi issitoo awu goynnikko saꞌaa kawotetta ubbaa immanaagaa yootiis. Yaatin Yesuusi A, “Laa Seexaanawu, haakka! Ayssi giikko, ‘Neeni Yihoowayyo, ne Xoossaayyo goynnana bessees; neeni A xalaalawu oottana bessees’ geetettidi xaafettiis” yaagiis. (Mat. 4:8-10) Yesuusi hegaa dooridoy aybissee? Amarida gaasota beꞌa.

4-5. Yesuusi Yihoowawu haggaazanawu doorido amarida gaasoti awugeetee?

⁴ Yesuusi Yihoowawu haggaazanawu doorido waanna gaasoy I ba Aawaa keehi siiqiyonne dosiyo gishshataassa. (Yoh. 14:31) Hegaa bollikka, Yesuusi Yihoowawu haggaazidoogee I oottana bessiyaba. (Yoh. 8:28, 29; Ajj. 4:11) Yihooway deꞌuwa Pultto, ammanettiyagaanne keha gidiyogaa I erees. (Maz. 33:4; 36:9; Yaaq. 1:17) Yihooway ubbatoo Yesuusawu tumubaa yootiis, qassi Yesuusawu deꞌiya ubbabaa I immiis. (Yoh. 1:14) Shin Seexaanay asay hayqqanaadan oottiis. I yaaretiyanne ba xallaa siiqiya worddanchchaa. (Yoh. 8:44) Yesuusi he ubbabaa eriyo gishshawu Yihoowa bolli makkaliyogan Seexaanaa milatanawu mule koyibeenna.—Pili. 2:5-8.

⁵ Yesuusi Yihoowawu haggaazanawu doorido hara gaasoy hegee daro loꞌꞌobati hananaadan oottiyo gishshataassa. (Ibr. 12:2) I ammanettidi deꞌikko ba Aawaa sunttay geeyanaadan, qassi nagaraynne hayqoy xayanaadan oottiyogaa eriis.

NUUNI YIHOOWAWU GOYNNANA KOSHSHIYO GAASOTA

6-7. (a) Ha wodiyan daroti Yihoowawu haggaazennay aybissee? (b) Nuuni A xalaalawu goynnana koshshiyoy aybissee?

⁶ Ha wodiyan deꞌiya daroti ufayssiya Yihoowa eeshshata erenna gishshawunne I etawu oottido darobata akeekenna gishshawu awu haggaazokkona. Kiitettida Phawuloosi Ateenan sabbakido asatikka hegeetu mala.—Oos. 17:19, 20, 30, 34.

⁷ Tumu Xoossay ‘asawu ubbawu deꞌuwa, shemppiyo shemppuwanne ubbabaa immidoogaa’ Phawuloosi Ateena asatussi qonccissiis. I gujjidi hagaadan giis: “Nuussi deꞌuwa immiday A, qassi nuuni qaaxxiyoynne hagan deꞌiyoy aana.” ‘Kumetta saꞌan deꞌana mala asaa ubbaa issi asappe medhdhidaagee’ Xoossaa gidiyo gishshawu nuuni A xalaalawu goynnana bessees.—Oos. 17:25, 26, 28.

8. Yihooway mule oottennabay aybee? Qonccissa.

⁸ Yihooway Medhdhidaagaanne Ubbaa Haariyagaa gidiyo gishshawu, asay awu haggaazanaadan wolqqanttana danddayees. Shin Yihooway hegaadan mule oottenna. I deꞌiyogaanne nuna ubbaa keehi siiqiyogaa bessiya darobata Yihooway nuussi immees. Danddayettida keenan daro asay merinawu A dabbo gidanaadan I koyees. (1 Xim. 2:3, 4) Hegaa gishshawu, Yihooway asawu oottana loꞌꞌobatanne I hegeeta waati oottanaakko harata tamaarissanaadan I nuna loohissees. (Mat. 10:11-13; 28:19, 20) Qassi nuuni awu goynnana danddayiyo galchchaanne siiqiya cimatuppe maaduwa demmiyo hanotaa nuussi giigissiis.—Oos. 20:28.

9. Yihooway asa ubbaa siiqiyogaa ayba ogetun bessidee?

⁹ Yihooway I deꞌiyogaa ammanennaageetussikka ba siiquwa bessees. Ane hagaa qoppa: Asi deꞌido wode ubban biilooniyan qodettiyageeti likkebaanne likke gidennabaa xeelliyagan banttawu kessido maaraadan deꞌanawu kuuyidosona. Gidikkokka, deꞌuwan deꞌanawunne ufayttanawu koshshiyabaa Yihooway etawu kehatettan immiis. (Mat. 5:44, 45; Oos. 14:16, 17) Siiqiya so asaynne laggeti etawu deꞌanaadan, eti naata yelanaadan, oosuwa oottanaadaaninne hegan ufayttanaadan oottiis. (Maz. 127:3; Era. 2:24) Hageeti saluwan deꞌiya nu Aaway asa ubbaa siiqiyogaa qoncciyan bessoosona. (Kes. 34:6) Nuuni Yihoowawu haggaazanawu doorido amarida gaasotanne awu haggaazanawu dooridaageeta I waati anjjiyakko ane beꞌoos.

NUUNI YIHOOWAWU HAGGAAZANAWU DOORIDO GAASUWA

10. (a) Nuuni Yihoowawu haggaaziyo waanna gaasoy aybee? (Maatiyosa 22:37) (b) Yihooway neessi atto giidoogan waana goꞌettadii? (Mazamure 103:13, 14)

¹⁰ Yesuusaagaadan nuuni Yihoowawu haggaaziyo waanna gaasoy A wozanappe siiqiyo gishshataassa. (Maatiyosa 22:37 nabbaba.) Nuuni Yihoowa eeshshatubaa eriyo wode akko shiiqoos. Leemisuwawu, I nuussi atto gaanawu eeno gees. Israaꞌeelati darotoo awu azazettennan ixxikkokka I eta, “Intte ubbaikka intte iita ogiyaappe simmite” giidi woossiis. (Erm. 18:11) Nu darotoo balabaa oottikkokka, nuuni biitta gidiyogaa eriyo gishshawu Yihooway nuussi atto gees. (Mazamure 103:13, 14 nabbaba.) Yihooway neessi atto giido wodeta qoppiyogee neeni ayyo merinawu haggaazanawu koyanaadan oottennee?

11. Saluwan deꞌiya nu Aawawu nuuni haggaazanawu doorido hara gaasoti awugeetee?

¹¹ Yihoowawu haggaaziyogee bessiyaba gidiyo gishshawu nuuni hegaadan oottoos. (Mat. 4:10) Qassi nuuni Yihoowawu ammanettidi deꞌikko hegee daro loꞌꞌobay hananaadan oottana. Nuuni Yihoowawu ammanettidi haggaaziyo wode Yihoowa sunttay geeyanaadan, Dabloosi worddanchcha gidiyogee qonccanaadaaninne nu Aaway keehi ufayttanaadan oottoos. Qassi nuuni ha wodiyan Yihoowawu haggaazanawu doorikko merinawu awu haggaaziyo hidootay nuussi deꞌees!—Yoh. 17:3.

12-13. Jaaninne Pami hanotaappe ay tamaariyoo?

¹² Nuuni naatettan deꞌiyo wodekka Yihoowa keehi siiqiyogaa doommana danddayoos; qassi he siiqoy nuuni gastta gidiyo wode yaa minnees. Jaanonne Pamo giyo michchonttu hanotaa beꞌa.a Jaaniyyo layttay 11 gidido wode, qassi Pamiyyo layttay 10 gidido wode eti Geeshsha Maxaafaa xannaꞌiyogaa doommidosona. Jaanonne Pamo yelidaageeti eti xannaꞌiyogan ufayttana xayikkokka, so asaara woosa keettaa biyogaa aggennan, Yihoowa Markkatuura Geeshsha Maxaafaa xannaꞌanaadan etawu paqqadidosona. Jaana hagaadan gaasu: “Yihoowa Markkati tana Geeshsha Maxaafaappe tamaarissidobay tanaara tamaariya daro yelagatudan jallissiyabaa goꞌettennaadan woy pokkiya tuna nagaraa oottennaadan tana maaddiis.”

¹³ Amarida layttaappe simmin eti naaꞌꞌaykka aassiyageeta gididosona. Guyyeppe eti cimida bantta aawaassinne aayeessi koshshiyabaa kunttiiddi aqinye gididi haggaaziyogaa doommidosona. Jaana Yihooway etawu oottido ubbabaa xeelliyagan iyyo siyettidabaa hagaadan qonccissaasu: “Yihooway ba dabbotussi koshshiyabaa ubbatoo kunttiyogaa, qassi 2 Ximootiyosa 2:19y yootiyogaadan, ‘Yihooway baageeta eriyogaa’ taani akeekaas.” Yihooway A siiqanawunne awu haggaazanawu dooridaageetussi koshshiyabaa ubbatoo kunttiyogee qoncce!

14. Nuuni haasayiyobaaninne oottiyoban Yihoowa sunttay geeyanaadan waati oottana danddayiyoo? (Misiliyakka xeella.)

¹⁴ Asay Yihoowabaa tumaa eranaadan nuuni koyoos. Leemisuwawu, kehanne atto giya ne mata laggiyabaa qoppa. Issi uri ne laggiya meqetta iitanne worddanchcha giidi issi gallassi mootiis. Ne ay oottanee? Ayyo exataasa. Hegaadan Seexaanaynne aara hashetiyageeti Yihoowabaa worddobaa yootiyogan A sunttaa mooranawu baaxetiyo wode nuuni Yihoowabaa tumaa yootiyogan A sunttawu loytti exatoos. (Maz. 34:1; Isi. 43:10) Nuuni haasayiyobaaninne oottiyoban kumetta shemppuwan Yihoowawu haggaazanawu koyiyogaa bessoos.

15. Phawuloosi gitaban laamettidoogan ayba goꞌꞌaa demmidee? (Piliphphisiyusa 3:7, 8)

¹⁵ Nuuni Yihoowa ufayssanawu woy kaseegaappe aaruwan awu haggaazanawu nu deꞌuwan issi issibaa laammanawu eeno goos. Leemisuwawu, kiitettida Phawuloosawu Ayhuda haymaanootiyan gita sohoy deꞌikkokka, I Kiristtoosa kaallanawunne Yihoowawu haggaazanawu he haymaanootiya aggiis. (Gal. 1:14) Hegaappe denddidaagan, I ufayssiya deꞌuwa deꞌiisinne Kiristtoosaara saluwan haariyo maataa demmiis. Yihoowawu haggaazanawu kuuyidoogan I mule zilꞌꞌettibeenna; qassi nuunikka mule zilꞌꞌettokko.—Piliphphisiyusa 3:7, 8 nabbaba.

16. Juliyippe ay tamaariyoo? (Misiliyakka xeella.)

¹⁶ Nuuni nu deꞌuwan Yihoowawu haggaaziyogaa kaseyikko ha wodiyankka sinttappekka I nuna anjjana. Juliyo giyo michchee hanotaa beꞌa. Juliya tumaa tamaaranaappe kase, naatettaappe doommada woosa keettan yexxiyaro. A loytta yexxiyaro gidiyo gishshawu, operaa yettanchcha gidanawu loohiyogaa doommaasu. Sohuwarakka Juliya hayttataasu; qassi erettida sohotun yexxiyogaa doommaasu. A erettida muuziqaa timirtte keettan tamaariyo wode iira tamaariyagee Xoossaabaa iyyo yootiyogaa doommiis; yaatidi Xoossaa sunttay Yihoowa gidiyogaa qonccissiis. Hegaappe simmin darin takkennan Juliya Geeshsha Maxaafaa saaminttan naaꞌꞌutoo xannaꞌiyogaa doommaasu. Operaa yettanchcha gidanawu baaxetiyogaa aggada, Yihoowawu haggaaziyogaa ba deꞌuwan kaseyanawu kuuyaasu. Hegaadan kuuyiyogee metiyaba. A hagaadan gaasu: “Daroti taani ta imotaa wora olidabadan yootikkokka taani ta deꞌuwan Yihoowawu loytta haggaazanawu koyaas.” A 30​ppe dariya layttaappe kase hegaadan kuuyidoogan iyyo haꞌꞌi aybi siyettii? “Taani Yihoowawu haggaazanawu dooridoogan keehi ufayttays, qassi sinttappe I ta wozanaa amo ubbaa alanaagaa erays” yaagaasu.—Maz. 145:16.

UBBATOO YIHOOWAWU HAGGAAZA

17. (a) Yihoowawu haggaaziyogaa doommibeennaageeti waatana koshshii, qassi aybissi? (b) Xoossawu haggaazanawu dooridaageeti eriyobay aybee?

¹⁷ Nuuni keehi eesoyiya wodiyan deꞌoos. Kiitettida Phawuloosi hagaadan giis: “Aissi giikko, . . . ‘Amarida wodee attiis. Yiyaagee yaana; gam77enna.’” (Ibr. 10:37) Hagee nuna ay akeekissii? Asay Yihoowawu haggaazanawu dooranaayyo daro wodee baawa. (1 Qor. 7:29) Nuuni Xoossawu haggaazanawu dooridaba gidikko, metuwa genccana koshshikkokka hegee ‘amarida wode’ xalaalaassa gidiyogaa eroos.

18. Yesuusinne Yihooway nuuni ay oottanaadan koyiyonaa?

¹⁸ Yesuusi asay A kaalliyogaa doommanaadan xalaala gidennan, aggennan kaallanaadankka minttettiis. (Mat. 16:24) Yaatiyo gishshawu nuuni daro layttawu Yihoowawu haggaazidaageeta gidikko awu aggennan haggaazanawu murttana koshshees. Nuuni awu haggaazanawu kuuyidoogaadan deꞌanawu minni baaxetana koshshees. Hegee metiyaba gidikkokka, nuuni awu haggaaziyogan ufayssaanne daro anjjuwa ha wodiyankka demmana danddayoos!—Maz. 35:27.

19. Nuuni Jeenappe ay tamaariyoo?

¹⁹ Issoti issoti Yihoowawu haggaazikko bantta deꞌuwan ufayttana danddayennabadan qoppoosona. Neeni yelaga gidikko Yihoowawu haggaaziyogee neeppe issibay halanaadan oottiyabadan qoppay? Jeena giyo yelaga ishay hagaadan giis: “Yihoowa Markka gidiyogee laꞌatettaa diggiyabadan qoppaas. Taani shiiqotuninne haggaazuwan ta wodiya aattishin, tanaara diccida daro naati mi uyidi duriyogaa, aqo oyqqanawu qoppidi wodiya issippe aattiyogaa woy makkalabaa bessiya biiduwa kaassaa kaaꞌiyogaa malabatun eti ufayttiyaba tawu milatiis.” Hegaadan qoppidoogee Jeeni waananaadan oottidee? I hagaadan giis “Hara yelagatuugaadan taanikka iitabata oottiyogaa doommada amarida wodiyawu ufayttaas. Shin taani tumuppe ufayttabeykke. Geeshsha Maxaafay yootiyobaa azazettiyogee demissiyo goꞌꞌaa loytta qoppiyogaa doommada kumetta wozanan Yihoowawu haggaazanawu kuuyaas. He wodeppe doommidi Yihooway ta woosa ubbaa zaaridabadan qoppays.”

20. Nuuni waatanawu murttana koshshii?

²⁰ Mazamurawee Yihoowawu hagaadan giidi yexxiis: “Neeni dooridonne ne shilootan uttanau mataa shiishshiyo asi anjjettidaagaa” woy ufayttiyagaa. (Maz. 65:4) Hegaa gishshawu, ubbatoo Yihoowawu haggaazanawu murttidaageeta gidoos. Yaasuugaadan nuunikka, “Tananne ta keettaa asaa gidikko, nuuni [Yihoowayyo] goinnana” yaagoos.—Yaa. 24:15.