Xinaateti Tumawu Exatanaadan Maadda

1-2. (a) Issi issi xinaateti tumawu exatanawu mammottiyoy aybissee? (b) Nuuni ha huuphe yohuwan ay beꞌanee?

NEENI Yihoowa Markka gidanawu mammottanaadan oottidabi deꞌii? Geella neeni nenaara oottiyageeti, ne laggeti woy intte soo asay nena eqettana gaada yayyennan aggakka. Woy qassi Xoossay kessido maaraadan deꞌanawu mule danddayennabadan qoppennan waaya aggana. Yaanikko, tumawu exatanawu mammottiya Geeshsha Maxaafaa xinaatetu hanotaa akeekana danddayaasa.

² Hegaadan yayyiyogee ayyaanaaban diccennaadan diggana danddayiyogaa Yesuusi akeekiis. (Mat. 13:20-22) Shin I bana kaallanawu mammottidaageetun hidootaa qanxxibeenna. Hegaa mala asati (1) ayyaanaaban diccennaadan xubbiyabata shaakki eranaadan, (2) kaseegaappe aaruwan Yihoowa siiqanaadan, (3) bantta deꞌuwan Yihoowa kaseyanaadan, qassi (4) paaciya eqettanaadan nuuni waati maaddana danddayiyakko I ba oottidoban bessiis. Xinaatee tumawu exatanaadan maaddanawu Merinawu Ufayttada Deꞌa! giya maxaafaa goꞌettiyo wode Yesuusi tamaarissido ogiya nuuni waati kaallana danddayiyoo?

NE XINAATEE AYYAANAABAN DICCENNAADAN XUBBIYABATA SHAAKKI ERANAADAN MAADDA

3. Niqoodimoosi Yesuusa kaalliyagaa gidennaadan diggidabay ayba gidana danddayii?

³ Ayhudata kaalettiya erettida asa gidida Niqoodimoosi Yesuusa kaallennaadan xube gididabi deꞌees. Yesuusi ba haggaazuwa doommin, usuppun agina heerappe simmin Niqoodimoosi Yesuusi Xoossay kiittin yiidoogaa eriis. (Yoh. 3:1, 2) Shin Niqoodimoosi “Ayhudatuyyo yayyiyo gishshawu” qosan Yesuusaara gayttanawu dooriis. (Yoh. 7:13; 12:42) I Yesuusa kaalliyagaa gidikko, darobay appe haliyabadan qoppennan aggenna.a

4. Niqoodimoosi Xoossay baappe koyiyobaa akeekanaadan Yesuusi waati maaddidee?

⁴ Niqoodimoosi Muuse Higgiya eriyaba gidikkonne, Yihooway appe koyiyobaa akeekanawu awu maadoy koshshiis. Yaatin Yesuusi A waati maaddidee? Yesuusi Niqoodimoosaara wodiya aattanawu, haray atto qamman aara haasayanawukka eeno giis. Qassi Yesuusi Niqoodimoosi A kaalliyagaa gidanawu ba nagaran zilꞌꞌettidi laamettana, haattan muukettananne Xoossaa Naꞌan ammanana koshshiyogaa qoncciyan yootiis.—Yoh. 3:5, 14-21.

5. Issi xinaatee ayyaanaaban diccennaadan diggiyabaa shaakki eranaadan nuuni waati maaddana danddayiyoo?

⁵ Issi xinaatee Geeshsha Maxaafaa loytti erikkokka, ayyaanaaban I diccennaadan diggiyabaa shaakki eranawu maadoy koshshana danddayees. Oosoy woy so asay eqettiyogee I ayyaanaabaa halchchota polennaadan diggana danddayees. Ne xinaatiya maaddanawu Yesuusaagaadan wodiya bazza. A tukkiya shoobbana woy aara laꞌatettan haasayanawu injjetiyasaa ekka baana danddayaasa. Hegaa mala wodiyan I ba deꞌuwabaa neeyyo yootana danddayees, qassi neeni A metiyabata akeekana danddayaasa. Ne xinaatee nena ufayssanawu gidennan, Yihoowa siiqiyogaa bessanawu giigissana koshshiyabata giigissanaadan minttetta.

6. Issi xinaatee xalatettan tumawu exatanaadan neeni waata maaddana danddayay? (1 Qoronttoosa 16:13)

⁶ Issi xinaatee Geeshsha Maxaafay yootiyo maaraadan deꞌanawu Yihooway maaddanaagaa ammanettiyo wode, ba eridobaa oosuwan peeshshanawu xalatettaa demmees. (1 Qoronttoosa 16:13 nabbaba.) Neeni oottiyobaa issi asttamaaree oottiyobaara geeddarssana danddayoos. Neeni tamaariyo wode keehi dosiyo asttamaaree awugee? Neeni oottana koshshiyabaa oottana danddayiyogaa eranaadan danddayan maaddida asttamaariya dosennan aggakka. Hegaadankka, Geeshsha Maxaafaa tamaarissiyogan gooba gidida uri Xoossay nuuppe koyiyobaa tamaarissiyogaa xalla gidennan, Yihooway maaddin ba xinaatee ba deꞌuwan koshshiyaban laamettana danddayiyogaa ammanettanaadankka maaddees. Nu xinaatiya maaddanawu oottana danddayiyo harabay aybee?

NE XINAATEE KASEEGAAPPE AARUWAN YIHOOWA SIIQANAADAN MAADDA

7. Yesuusi ba yootiyobaa ezggiyageeti kaseegaappe aaruwan Yihoowa siiqanaadan waati maaddidee?

⁷ Issi uri Xoossaa siiqikko, ba eridobaa oosuwan peeshshanawu koyanaagaa Yesuusi eriis. I bana kaalliyageeti saluwan deꞌiya bantta Aawaa kaseegaappe aaruwan siiqanaadan maaddiyabata darotoo tamaarissiis. Leemisuwawu, I ba naatuyyo loꞌꞌobaa immiya izaawura Yihoowa geeddarssiis. (Mat. 7:9-11) Yesuusi yootiyobaa ezggiyageetuppe amaridaageetussi hegaadan siiqiya aawi waayi deꞌana. Iitabaa oottiiddi takkidi soo simmida ba naꞌaa mokki ekkida, qarettiya aawaa Yesuusi leemisodan yootido wode etawu aybi siyettidaakko qoppa. Eti Yihooway saꞌan deꞌiya ba naatuyyo qarettiyogaa akeekidosona.—Luq. 15:20-24.

8. Issi xinaatee kaseegaappe aaruwan Yihoowa siiqanaadan waata maaddana danddayay?

⁸ Neenikka xannaꞌissiyo wode Xoossaa eeshshata loytta qonccissiyogan, xinaatee kaseegaappe aaruwan Yihoowa siiqanaadan maaddana danddayaasa. Neeni xannaꞌissiyo wode ubban, xinaatee tamaariyobay Yihooway nuna siiqiyogaa waati bessiyakko akeekanaadan maadda. Wozuwabaa tobbiyo wode hegee A waati goꞌꞌiyakko qonccissa. (Roo. 5:8; 1 Yoh. 4:10) Issi xinaatee Yihooway A siiqiyogaa wotti dentti qoppiyogee ikka Yihoowa siiqanaadan denttettana danddayees.—Gal. 2:20.

9. Mikaaꞌeeli laamettanaadan maaddidabay aybee?

⁹ Indonezhiya asa gidida Mikaaꞌeelabaa beꞌa. I tumaa keettan diccikkokka, haattan muukettibeenna. Awu layttay 18 gidido wode, gita kaamiya laaggiyagaa gidanawu hara biitti biis. Guyyeppe I Indonezhiya simmidi machchidaba gidikkokka, ba oosuwa gaasuwan ba so asaa aggidi haranttuwakka hara biittaa biis. He wode A machchiyanne A naꞌiya Geeshsha Maxaafaa xannaꞌiyogaanne ayyaanaaban dicciyogaa doommidosona. A aayyiya hayqqa simmin Mikaaꞌeeli soo simmidi koshshiyaban ba aawaa maaddanawu kuuyiisinne Geeshsha Maxaafaa xannaꞌanawu maayettiis. Merinawu Ufayttada Deꞌa! giya maxaafan timirtte 27n “Loytta Akeeka” giya shaahuwa Mikaaꞌeeli xannaꞌido wode keehi malaalettiis. Yihooway ba Naꞌay waayettiyogaa beꞌidi ay keena azzanidaakko Mikaaꞌeeli qoppido wode yeekkiyogaa doommiis. I wozuwa wozanappe nashshiis; qassi ba deꞌuwan laamettana koshshiyaban laamettidi haattan muukettiis.

NE XINAATEE BA DEꞌUWAN YIHOOWA KASEYANAADAN MAADDA

10. Yesuusi bana kaalliyageeti Yihoowawu loytti haggaazanawu issi issibaa laamanaadan waati maaddidee? (Luqaasa 5:5-11) (Misiliyakka xeella.)

¹⁰ Beni Yesuusa kaalliyageeti yaana geetettida Masee Yesuusa gidiyogaa sohuwara akeekikkonne, bantta deꞌuwan haggaazuwa kaseyanawu etawu maadoy koshshiis. Pheexiroosinne Inddiraasi ubba wode A kaallanaadan Yesuusi shoobbiyo wode, eti kasekka A kaalliiddi takkidaageeta. (Mat. 4:18, 19) Eti Yaaqoobaaranne Yohaannisaara issippe moliya oyqqoosona; qassi hegee etawu keehi injjetiya ooso. (Mar. 1:16-20) Pheexiroosinne Inddiraasi ‘bantta gitiya yeggi bayiyo’ wode, eti Yesuusa kaalliiddi bantta soo asawu koshshiyabaa waati kunttanaakko halchchennan aggokkona. Eti bantta oosuwa agganawu eeno giidoy aybissee? Etassi koshshiyabaa Yihooway kunttana danddayiyogaa eti loytti ammanettanaadan maaddiya malaalissiyabaa Yesuusi oottidoogaa Luqaasan odettida taarikee qonccissees.—Luqaasa 5:5-11 nabbaba.

11. Nu xinaatiya ammanuwa minttanawu ay yootana danddayiyoo?

¹¹ Nuuni Yesuusaagaadan malaalissiyabaa oottana danddayennaba gidikkokka, bantta deꞌuwan Yihoowa kaseyiyageeta I waati maaddiyakko yootana danddayoos. Leemisuwawu, neeni shiiqota shiiqiyogaa doommido wode Yihooway nena waati maaddidaakko hassayay? Geella neeni shiiqota shiiqanawu oosuwappe kasetada kiyana koshshido gaasuwa ne halaqaara gayttada awu yootiyogee koshshennan aggenna. Ne deꞌuwan hanidabata ne xinaatiyawu yootiyo wode, neeni Yihoowa goynuwa ne deꞌuwan kaseyanawu kuuyin Yihooway nena maaddiyogaa beꞌidoogan ne ammanoy waani minnidaakko awu qonccissa.

12. (a) Nunaara xannaꞌissanaadan dumma dumma aassiyageeta shoobbana koshshiyoy aybissee? (b) Ne xinaatiya loytta tamaarissanawu biidota waata goꞌettana danddayay? Leemisuwa yoota.

¹² Hara ishanttinne michchontti bantta deꞌuwan Yihoowa kaseyanawu waani laamettidaakko yootiyogeekka ne xinaatiya goꞌꞌana danddayees. Yaatiyo gishshawu, nenaara xannaꞌissanaadan dumma dumma hanotaa kanttida ishanttanne michchontta shoobba. Eti tumaa waani siyidaakko, qassi bantta deꞌuwan Yihoowa haggaazuwa kaseyanawu ay oottidaakko yootanaadan oychcha. Hegaa bollikka, Merinawu Ufayttada Deꞌa! giya maxaafan “Loytta Akeeka” giya shaahuwan deꞌiya biidota woy “Pilgga” giya shaahuwan deꞌiya biidotuppe neeni dooridoogaa ne xinaatiyara beꞌanawu wodiya bazza. Leemisuwawu, timirtte 37 tobbiyo wode, Yihooway Nuussi Koshshiyabaa Kunttees giya biiduwan odettida maarata qonccissana danddayaasa.

NE XINAATEE PAACIYA EQETTANAADAN MAADDA

13. Yesuusi bana kaalliyageeti naaquwawu giigettanaadan waati maaddidee?

¹³ Yesuusi bana kaalliyageeta harati, ubba qassi dabbotikka eqettanaagaa zaari zaari yootiis. (Mat. 5:11; 10:22, 36) Yesuusi ba haggaazuwa wurssetta heeran bana kaalliyageeti Yihoowawu goynniyo gishshawu harati eta worana danddayiyogaakka yootiis. (Mat. 24:9; Yoh. 15:20; 16:2) I eti bantta haggaazuwan cincca gidanaadan yootiis. Eti aggennan sabbakanawu eqettiyageetuura palamettennaadaaninne akeekanchcha gidanaadan I zoriis.

14. Issi xinaatee naaquwawu giigettanaadan waati maaddana danddayiyoo? (2 Ximootiyosa 3:12)

¹⁴ Nu xinaatiya banaara oottiyageeti, laggetinne dabboti woygana danddayiyakko nuuni awu qonccissiyogan I naaquwawu giigettanaadan maaddana danddayoos. (2 Ximootiyosa 3:12 nabbaba.) I Geeshsha Maxaafay yootiyo maaraadan deꞌanawu haꞌꞌi baaxetiyo gishshawu, aara oottiyageetuppe amaridaageeti A bolli qilliiccana danddayoosona. Harati, ubba mata dabboti I Geeshsha Maxaafaappe tamaaridobaa borana danddayoosona. Nu xinaateti banttana gakkana naaquwawu giigettanaadan nuuni sohuwara maaddikko, naaqoy gakkiyo wode eti genccana danddayoosona.

15. Issi xinaatee so asay eqettiyogaa genccanaadan aybi maaddana danddayii?

¹⁵ So asay ne xinaatiya eqettikko, eti hanqqettanaadan oottida gaasuwa I qoppanaadan minttetta. Eti I cimettidabadan qoppana danddayoosona; woy qassi Yihoowa Markkata coo ixxiyageeta gidana danddayoosona. Yesuusi siiqiyogeetikka I oottiyoban ufayttibookkona. (Mar. 3:21; Yoh. 7:5) Ne xinaatee so asaaranne haratuura gayttidaagan danddayanchchanne akeekanchcha gidanaadan tamaarissa.

16. Issi xinaatee ba ammanuwabaa hiillan qonccissanaadan waatidi maaddana danddayiyoo?

¹⁶ Issi xinaatiyawu dabboti tumaa eranawu koyikkokka, I issi kutti ubbabaa yootennan aggiyogee loꞌꞌo. Hankkoode I siiqiyogeeti unꞌꞌettana danddayoosona; qassi hegaa gaasuwan haroode aara haasayanawu koyennan aggana danddayoosona. Hegaa gishshawu, ne xinaatee akeekanawu metenna ogiyan ba ammanuwabaa qonccissanaadan minttetta. Yaatikko A dabboti haroode Geeshsha Maxaafaabaa gujjidi tobbanawu koyana danddayoosona. (Qol. 4:6) Geella I ba dabboti jw.org saytiya xomoosanaadan shoobbana danddayees. Hegee eti bantta koyido wodiyan Yihoowa Markkatubaa gujjidi eranaadan oottees.

17. Issi xinaatee Yihoowa Markkata xeelliyagan asay oychchana danddayiyo oyshata zaaranaadan waata loohissana danddayay? (Misiliyakka xeella.)

¹⁷ Ne xinaatee ba dabboti woy banaara oottiyageeti oychchana danddayiyo oyshatussi akeekanawu metenna zaaruwa yootanawu giigettanaadan maaddanaayyo jw.org saytiyan “Yihoowa Markkata Xeelliyagan Asay Darotoo Oychchiyo Oyshata” giyagan kaalli kaalli kiyabata goꞌettana danddayaasa. (2 Xim. 2:24, 25) Qassi, Merinawu Ufayttada Deꞌa! giya maxaafan ubba timirttetu wurssettan deꞌiya, “Issi Issi Asay Hagaadan Gees” woy “Issi Uri Hagaadan Oychchana Danddayees” giya shaahuwa goꞌettanaagaa dogoppa. Ne xinaatee ba ammaniyobaa haratuyyo waati qonccissanaakko meezetanaadan minttetta. Koshshikko, I ba ammanuwabaa hara loꞌꞌo ogiyan qonccissanaadan maadda. Hegaadan meezetiyogee I ba ammanuwawu xalatettan exatanaadan maaddana.

18. Issi xinaatee haattan muukettibeenna aassiyagaa gidanaadan waata minttettana danddayay? (Maatiyosa 10:27)

¹⁸ Yesuusi bana kaalliyageeti asawu mishiraachchuwa awaajjanaadan azaziis. (Maatiyosa 10:27 nabbaba.) Issi xinaatee ba ammanuwabaa yootiyogaa sohuwara doommikko, Yihoowan ammanettiyogaa sohuwara meezetana. Issi xinaatee hegaa halchchanaadan waata maaddana danddayay? Sabbakiyo zamachchay deꞌiyogee galchchawu odettikko, ne xinaatee aassiyagaa gidanawu waatana danddayiyakko qoppanaadan minttetta. Daroti zamachchaa wodiyan sabbakiyogaa doommanawu metootibeennay aybissakko qonccissa. Ne xinaatee saaminttawu gidduwan shiiqiyo shiiqotun kifileta waati shiishshanaakko nuussi imettiya loohissuwankka goꞌettana danddayees. Ne xinaatee ha halchchuwa polanawu baaxetiyo wode, ba ammanuwabaa haratuyyo loytti qonccissiyogaa meezetana.

NE XINAATIYAN AMMANETTIYOGAA BESSA

19. Yesuusi bana kaalliyageetun ammanettiyogaa waati bessidee, qassi nuuni A leemisuwa waati kaallana danddayiyoo?

¹⁹ Yesuusi saluwa baanaappe kase, bana kaalliyageetuura zaarettidi gayttanaagaa yootiis. Yesuusi eti saluwa baanaagaabaa yootiyogaa eti akeekibookkona. Yesuusi bana kaalliyageeti ubbabaa akeekana xayikkokka, eti Yihoowa ufayssanawu koyidoogaa I ammanettiis. (Yoh. 14:1-5, 8) Saluwa hidootaa mala issi issibata eti akeekanawu etawu wodee koshshiyogaa I eriis. (Yoh. 16:12) Nuunikka nu xinaateti Yihoowa ufayssanawu koyiyogaa ammanettana danddayoos.

20. Maalaawen deꞌiya issi michchiya ba xinaaten ammanettiyogaa waata bessadee?

²⁰ Ne xinaatee likkebaa oottanawu koyiyogaa ammanetta. Leemisuwawu, Maalaawen deꞌiya Chufunddo giyo michcheebaa beꞌa. A Kaatolike haymaanootiya kaalliya Alinaafo giyo yelagiyo Merinawu Ufayttada Deꞌa! giya maxaafaa goꞌettada Geeshsha Maxaafaa xannaꞌissiyogaa doomissaasu. Eti timirtte 14 tobbidi wurssiyo wode, goynuwawu misileta goꞌettiyogaa xeelliyagan I qofay aybakko Chufundda ba xinaatiyo oychchaasu. Alinaafa keehi hanqqettada, “Hegee ta dooro!” yaagaasu. Gidikkonne, A ba xinaaten ammanettiyogaa bessaasu; qassi guyyeppe A he qofaa akeekanaagaa hidootaasu. Yaatiyo gishshawu, O xannaꞌissiyogaa aggabeykku; amarida aginatuppe simmin, Chufundda timirtte 34n deꞌiya, “Neeni tumu Xoossaa Yihoowabaanne Geeshsha Maxaafaabaa tamaaridobay hanno gakkanawu nena waati maaddidee?” giya oyshaa O oychchaasu. Alinaafa giidobaa Chufundda hagaadan gaada yootaasu, “Yihoowa Markkati Geeshsha Maxaafay diggiyobata oottennaagaa gujjin, ufayssiya keehi darobata A yootaasu.” Hegaappe simmin darin takkennan, Alinaafa misileta goꞌettiyogaa aggaasu; qassi haattan muukettaasu.

21. Issi xinaatee tumawu exatanawu loytti koyanaadan waati maaddana danddayiyoo?

²¹ ‘Dichchiyagee’ Yihoowa gidikkokka, issi xinaatee ayyaanaaban diccanaadan nuuni maaddana danddayoos. (1 Qor. 3:7) I oottanaadan Xoossay koyiyobaa A tamaarissiyogaappe aarobaa oottoos. I Yihoowa wozanappe siiqanaadan maaddoos. Qassi I ba deꞌuwan Yihoowa kaseyiyogan A siiqiyogaa bessanaadan minttettoos. Paacee gakkiyo wode I Yihoowan waani ammanettanaakkokka tamaarissoos. Nuuni an ammanettiyogaa qonccissiyogan, ikka Yihooway kessido maaraadan deꞌananne tumawu loytti exatana danddayiyogaa mintti ammanettanaadan maaddoos.