Nuuni Genccanaadan Yihoowi Nuna Waati Maaddii?

1. Nuuni genccana koshshiyoy aybissee, qassi nuna ooni maaddanee? (1 Pheexiroosa 5:10)

WAAYISSIYA ha wurssetta gallassatun Yihoowa asay genccana koshshees. Issoti issoti caddi oyqqiya harggiyan waayettoosona. Harati qassi siiqiyo uri hayqqidoogan kayyottoosona. Qassi harata so asaappe woy kawotettaa sunttatuppe naaqoy gakkees. (Mat. 10:18, 36, 37) Nena gakkiiddi deꞌiya metoy ayba gidikkokka, genccanaadan Yihoowi nena maaddanaagaa ammanettana danddayaasa.—1 Pheexiroosa 5:10 nabbaba.

2. Nuuni genccana danddayiyoy aybissee?

² Gencciyogaa giyogee waayissiyabay, naaqoy, woy nagaraa oottanaadan paacciyabay nuna gakkishinkka, nuuni Yihoowawu ammanettidi deꞌiyogaanne ufayttiiddi awu haggaaziyogaa qonccissees. Qassi nuuni genccanawu hanotati giiganaagaa hidootana koshshees. Nuuni genccana danddayiyoy ‘asaagaappe aaro wolqqaa’ Yihoowi nuussi immiyo gishsha xallaassa. I nuna maaddana xayikko nuuni genccana danddayokko. (2 Qor. 4:7) Ha huuphe yohuwan, nuuni genccanaadan maaddanawu Yihoowi giigissido oyddubata beꞌana. Qassi nuuni he giigissotu ubban waani goꞌettana danddayiyakkokka pilggana.

WOOSAA

3. Woosay malaaliyaba nuuni giyoy aybissee?

³ Yihoowi nuuni genccanaadan maaddana danddayiya malaaliyabaa giigissiis. Nuuni nagaranchcha gidikkokka, aara haasayana danddayiyo ogee deꞌanaadan oottiis. (Ibr. 4:16) Hagaa qoppa: Nuuni awudenne, qassi aybaa xeelliyagankka woossana danddayoos. Nuuni ay doonan woy awan deꞌiiddi woossinkka, haray atto ishanttuppe haahuwan woy qasho keettan deꞌikkokka I nu woosaa siyees. (Yona. 2:1, 2; Oos. 16:25, 26) Nuussi siyettiyabaa qonccissanawu metootidi nuuni unꞌꞌettiyo wode Yihoowi nu gaanawu koyidobaa akeekees. (Roo. 8:26, 27) Woosay tumukka malaaliyaba!

4. Nuuni genccanawu Yihoowa woossiyogee I koyiyobaara maayettees giyoy aybissee?

⁴ Yihoowi ‘nuuni I koyiyogaadan aybanne oychchikko, siyanaagaa’ ba Qaalan yootiis. (1 Yoh. 5:14) Nuuni genccanawu Yihoowi maaddanaadan woossana danddayiyoo? Ee, danddayoos! Yaatiyogee Yihoowi koyiyobaara maayettees. Nu hegaadan giyoy aybissee? Nuuni metuwa gencciyo wode, Yihoowi bana boriya, Seexaanaa Dabloosa oyshaa zaarana. (Lee. 27:11) Hegaa bollikka, Yihoowi “ba kumetta wozanaappe [banan] ammanettiya asa minttettanau” keehi koyiyogaa Geeshsha Maxaafay yootees. (2 Odi. 16:9) Hegaa gishshawu, nuuni genccanaadan maaddanawu Yihoowassi wolqqaykka koshshaykka deꞌiyogaa ammanettana danddayoos.—Isi. 30:18; 41:10; Luq. 11:13.

5. Woosay nuuni sarotettaa demmanaadan waati maaddana danddayii? (Isiyaasa 26:3)

⁵ Nuuni nuna qofissiyabawu Yihoowa woossiyo wode, ‘asi akeekana danddayenna sarotettaa Xoossay nuuyyo immanaagaa, qassi hegee nu wozanaanne nu qofaa naaganaagaa’ Geeshsha Maxaafay yootees. (Pili. 4:7) Hegaa giyogee woygiyogaakko beꞌa. Yihoowawu haggaazenna asatakka metiyabay gakkees. Qassi etappe daroti dumma dummabaa oottiyogan woppu gaanawunne bantta metuwa doganawu maloosona. Leemisuwawu, issoti issoti woppu gaanawu aybanne qoppennan agganawu baaxetoosona. Aybanne qoppennan aggiyogee ayyaanaaban qohees. (Maatiyosa 12:43-45ra gatta xeella.) Qassi he asati hegaadan oottiyogan woppaa demmiyakkokka, Yihoowi immiyo hegaappe aadhdhiya tumu sarotettay etayyo baawa. Nuuni Yihoowa woossiyo wode an ammanettiyogaa bessoos; qassi I nuuyyo ‘polo sarotettaa’ immees. (Isiyaasa 26:3 nabbaba.) Yihoowi nuuyyo sarotettaa immiyo issi ogee nuna minttettiya xiqiseta hassayanaadan maaddiyogaa. He xiqiseti Yihoowi nuna siiqiyogaanne nuna maaddanawu koyiyogaa hassayissoosona; hegaappe denddidaagan nuuni woppu goos.—Maz. 62:1, 2.

6. Neeni woosan loytta goꞌettanawu waatana danddayay? (Misiliyakka xeella.)

⁶ Neeni ay oottana danddayay? Ammanuwa paaciya neeni gencciyo wode, “Ne toohuwaa Xoossan wotta;” qassi I immiyo sarotettaa demmanawu woossa. (Maz. 55:22) Neeni ay oottanaakko eranawu hayyuwa immanaadan A woossa. (Lee. 2:10, 11) Neeni wozanappe woossiyo wode Yihoowa galatanaagaakka dogoppa. (Pili. 4:6) Metiyabay nena gakkiyo wodiyan Yihoowi nena maaddiiddi deꞌiyogaa bessiya naqaashata koya; qassi A maaduwawu A galata. Nena gakkida metuwa gaasuwan neeni waayettikkokka, Yihoowi nena maaddiiddi deꞌiyo daro ogeta dogoppa.—Maz. 16:5, 6.

XOOSSAA QAALAA

7. Geeshsha Maxaafaa xannaꞌiyogee nuuni genccanaadan waati maaddana danddayii?

⁷ Nuuni genccanaadan maaddanawu Yihoowi ba Qaalaa nuuyyo immiis. Yihoowi nuna maaddanaagaa qonccissiya daro xiqiseti Geeshsha Maxaafan deꞌoosona. Hegeetuppe issuwa ane beꞌoos. Maatiyosa 6:8y hagaadan gees: “Intte oychchanaappe kasekka intte Aaway intteyyo koshshiyabaa erees.” Hegaa yootidaagee Yesuusa, qassi I ooppenne aaruwan Yihoowa loytti erees. Yaaniyo gishshawu nuuni waayettiyo wode Yihoowi nuussi koshshiyabaa eriyogaanne nuna maaddanaagaa wozanappe ammanettana danddayoos. Nuuni genccanawu murttido murttiya minttana danddayiya hegaa mala daro qofata Geeshsha Maxaafay yootees.—Maz. 94:19.

8. (a) Nuuni genccanaadan maaddana danddayiya Geeshsha Maxaafay nuna zoriyo issibay aybee? (b) Geeshsha Maxaafay yootiyo maarati nuussi koshshiyo wode nuuni eta hassayanaadan nuna aybi maaddana danddayii?

⁸ Geeshsha Maxaafay yootiyo maarati nuuni genccanaadan maaddana danddayoosona. Hegeeti nuuni loꞌꞌobaa kuuyanaadan maaddiya zoriyakka yootoosona. (Lee. 2:6, 7) Leemisuwawu, wontto aybi hananeeshsha giidi hirggiyogaa aggidi, ubba galla Yihoowan ammanettanaadan Geeshsha Maxaafay yootees. (Mat. 6:34) Geeshsha Maxaafaa nabbabiyonne nabbabidobaa wotti dentti qoppiyo meezee nuuyyo deꞌikko, nuussi koshshiya maarata koshshiya wodiyan hassayana danddayoos.

9. Geeshsha Maxaafaa taariketi Yihoowi nuna maaddanaagaa nuuni loytti ammanettanaadan waati oottiyonaa?

⁹ Geeshsha Maxaafay Yihoowan ammanettidanne A maaduwa demmida nu mala asatu taarikiyakka yootees. (Ibr. 11:32-34; Yaaq. 5:17) Yihoowi eta waati maaddidaakko nuuni qoppiyogee, I nunakka maaddanaagaa loytti ammanettanaadan oottees. I ‘nuuyyo naagetti attiyo sohonne wolqqa. Nuna metoy gakkiyo wode, maaddanawu I ubbaton matan deꞌees.’ (Maz. 46:1) Hegaa bollikka, Yihoowa ashkkarati an ammanettiyogaa waati bessidaakko, qassi waayissiya wodetun awu aggennan haggaazanawu waatidaakko nuuni qoppiyogee eta leemisuwa kaallanaadan nuna denttettees.—Yaaq. 5:10, 11.

10. Xoossaa Qaalan loytta goꞌettanawu neeni waatana danddayay?

¹⁰ Neeni ay oottana danddayay? Ubba galla Geeshsha Maxaafaa nabbaba, qassi nena keehi maaddida xiqiseta xaafa oyqqa. Daroti gallassa xiqisiya maallado nabbaboosona; hegee eti kumetta gallassan minttettiyabaa qoppanaadan oottees. Meeroa giyo michchiya O yelidaageeti kansseriya harggiyan oyqettidoogaa erido wode hegee tuma gidiyogaa akeekaasu. Eti hayqqanawu matido aginatun koshshiyabaa etawu kunttaydda genccanaadan O maaddidabay aybee? A hagaadan gaasu: “Ubba galla maallado, Geeshsha Maxaafaa Galla Galla Pilggiyogaa giya bukleetiyappe gallassa xiqisiya nabbabada hegaa wotta dentta qoppays. Hegee taani ta metuwabaa xalaalaa qoppiyogaa aggada, Yihoowabaanne I ba Qaalaa baggaara nuna tamaarissido malaalissiyabata ubba galla qoppanaadan maaddiis.”—Maz. 61:2.

NU MALA KIRISTTAANETA

11. Nu ishanttinne michchontti banttana gakkida metuwa gencciyogaa nuuni qoppiyogee nuuyyo aybi siyettanaadan oottii?

¹¹ Yihoowi nuuni genccanaadan maaddanawu kumetta saꞌan deꞌiya ishanttanne michchontta immiis. ‘Kumetta saꞌan deꞌiya nu ishantti ubbay nuugaadan waayettiiddi gencciyogaa eriyogee’ nuna minttettees. (1 Phe. 5:9) Hegaa giyogee nuugaa mala metoy gakkishinkka Yihoowayyo ammanettidi deꞌida ishanttinne michchontti deꞌoosona giyogaa. Yaaniyo gishshawu nuunikka genccana danddayiyogaa ammanettana danddayoos!—Oos. 14:22.

12. Nu mala Kiristtaaneti nuna waati maaddana danddayiyonaa, qassi nuuni etawu ay oottana danddayiyoo? (2 Qoronttoosa 1:3, 4)

¹² Nu ishanttinne michchontti haasayiyobaaninne oottiyoban nuuni genccanaadan maaddana danddayoosona. Ishanttinne michchontti kiitettida Phawuloosawu hegaadan oottidosona. I xaafido dabddaabbetun issi keettan I qashettidi deꞌiyo wode bana maaddidaageetu sunttaa xeegidi eta galatiis. Eti Phawuloosa minttettidosonanne koshshiyaban maaddidosona. (Pili. 2:25, 29, 30; Qol. 4:10, 11) Ha wodiyan nuuni hegaara issi malabaa akeekana danddayoos. Genccanawu nuussi maadoy koshshiyo wode, nu ishanttinne michchontti nuna maaddoosona; qassi etawu maadoy koshshiyo wode nuuni eta maaddoos.—2 Qoronttoosa 1:3, 4 nabbaba.

13. Maayo giyo michchiya genccanaadan maaddidabay aybee?

¹³ Raashiyan deꞌiya Maayo giyo michchiyo ishanttinne michchontti ubbay loytti minttettidosona. Poliseti 2020n I keettaa patipannidosona, qassi guyyeppe shilootaa sinttan A ba ammanuwawu exatana koshshiis. Maaya hagaadan gaasu: “He wode taani xalalaas, unꞌꞌettaasinne azzanaas. Shin ta ishanttinne michchontti tawu silkkiya dawaliyogaaninne kiitaa xaafiyogan tana keehi siiqiyogaa qonccissidosona. Ishanttinne michchontti tana siiqiyogaanne taayyo so asa gidiyogaa kasekka erays. Shin 2020ppe haa simmin, hegaa loytta akeekaas.”

14. Nuuni metuwa gencciyo wode nu ishanttuppenne michchonttuppe maaduwa demmanawu waatana danddayiyoo? (Misiliyakka xeella.)

¹⁴ Neeni ay oottana danddayay? Neeni metuwa gencciyo wode, ne ishanttuuranne michchonttuura haasayiyogeenne etaara wodiya aattiyogee keehi koshshiyaba. Cimata maaduwa oychchanawu mammottoppa. Eti “carkkuwaappe geemmiyo soho, gotiyaappe baqatiyo soho gidana” danddayoosona. (Isi. 32:2) Ne mala Kiristtaanetikka metuwa gencciiddi deꞌiyogaa hassaya. Maadoy koshshiyo issi urawu neeni kehiyogee ne ufayttanaadaaninne metuwa genccanaadan nena maaddana danddayees.—Oos. 20:35.

NU HIDOOTAA

15. Sinttanaa hidootay Yesuusa waati maaddidee, qassi nu hidootay nuna waati maaddii? (Ibraawe 12:2)

¹⁵ Yihoowi nuuni genccanaadan maaddanawu ammanttiya hidootaa nuussi immiis. (Roo. 15:13) Yesuusi saꞌan deꞌiyo wode keehi waayissiyabay A gakkido gallassi hidootay A maaddidoogaa hassaya. (Ibraawe 12:2 nabbaba.) Yesuusi I ammanetti deꞌiyogee Yihoowa sunttay geeyanaadan maaddiyogaa eriis. Qassi Yesuusi ba Aawaakko saluwa simmanaagaanne Kawo gididi ba ishanttuura haarana wodiya yeemuwan naagiis. Hegaadankka, Xoossay ehiyo ooratta alamiyan merinawu deꞌiyo nu hidootay Seexaanaa alamiyan nuna gakkiya meto ubbaa genccanaadan maaddees.

16. Issi michchiya genccanaadan hidootay waati maaddidee, qassi A giidobaappe neeni ay tamaaray?

¹⁶ Raashiyan deꞌiya Alo giyo michchiyo Kawotettaa hidootay waati maaddidaakko beꞌa. I azinay qashettidi shilootaa sintti shiiqanawu naagees. Yaanido wode Ala hagaadan gaasu: “Nu sinttanaa hidootaabaa woossiyogeenne wotta dentta qoppiyogee darin azzanennaadan tana maaddiis. Ha metotuppe simmin loꞌꞌobay yaanaagaa taani erays. Yihoowi ba morkketa xoonananne nuna woytana.”

17. Yihoowi nuussi immido hidootaa nashshiyogaa nuuni waati bessana danddayiyoo? (Misiliyakka xeella.)

¹⁷ Neeni ay oottana danddayay? Yihoowi qaalaa gelido ufayssiya sinttanaa deꞌuwabaa qoppanawu wodiya bazza. Loꞌꞌiya ooratta alamiyan neeni ne laggetuuranne so asaara deꞌiyo deꞌoy ay malakko, qassi ubba asay ay keena ufayttanaakko qoppa. Nuuni haꞌꞌi waayettiyo waayee gannatiyan merinawu deꞌana deꞌuwara geeddarssiyo wode, “guutta wodiyassanne kawushsha.” (2 Qor. 4:17) Qassi sinttanaa xeelliyagan Xoossay qaalaa gelidobaa haratuyyo yootanawu neessi danddayettida ubbabaa ootta. Sinttanaa xeelliyagan Xoossay halchchidobaa erennan Seexaanaa alamiyan gakkiya metuwa gencciyogee etawu ay keena deexxiyakko qoppa. Eti nenaara haasayiyo qanttabaykka Kawotettaa hidootaabaa gujjidi eranawu koyanaadan eta denttettana danddayees.

18. Yihoowi qaalaa gelidobatun nuuni ammanettana danddayiyoy aybissee?

¹⁸ Iyyoobi daro metuwa ammanetti gencci simmidi Yihoowawu hagaadan giis: “Neeni ubbabaa oottanau danddayiyoogaanne ne halchchuwaakka halissanau danddayiyaabi bainnaagaa taani erais.” (Iyy. 42:2) Yihoowi qaalaa gelidobay polettennaadan aybinne diggana danddayennaagaa Iyyoobi akeekiis. Nuuni gencciyo wode hegee nuna minttettana danddayees. Leemisuwawu, daro wodiya harggaydda takkida issi maccaaseebaa qoppa. A daro dottoretukko biikkokka O ooninne pattana danddayibeenna gishshawu hidootaa qanxxaasu. Shin meezee deꞌiyonne ammanettida issi dottoree I metuwa eridi O waati akkamanaakko qonccissiyo wode, A ba harggiyappe paxanawu amarida wodee koshshikkokka woppu gawusu. A paxanaagaa eriyo gishshawu ba harggiya genccanawu metootukku. Hegaadankka, yaana Gannatiya hidootan ammanettiyogee genccanaadan nuna maaddees.

19. Nuuni genccanawu ay oottana koshshii?

¹⁹ Nuuni beꞌidoogaadan, Yihoowi woosaa baggaara, ba Qaalaa baggaara, nu mala Kiristtaanetu baggaaranne nu hidootaa baggaara nuuni genccanaadan maaddees. Yihoowi giigissidobatun goꞌettanawu nuussi danddayettida ubbabaa oottikko, ha wodiyan nuna waayissiyabay ayba gidinkka I nuna maaddees. Seexaanaa alameenne waaye ubbay xayiyo wodee gakkanaashin nuuni aggennan genccana danddayoos.—Pili. 4:13.