XANNAꞌIYO HUUPHE YOHUWA 33
MAZAMURE 4 ‘Yihoowi Ta Henttanchchaa’
Yihoowi Nena Siiqiyogaa Ammana
“Ta aggenna siiquwan taani inttena taakko shiishshaas.”—ERM. 31:3.
TAMAARANABAA
Yihoowi nuna siiqiyogaa ammaniyogee keehi koshshiyoy aybissakko, qassi I nuna siiqiyogaa loytti ammanettanawu nu waatana danddayiyakko beꞌana.
1. Neeni nena Yihoowawu sheedhdhidoy aybissee? (Misiliyakka xeella.)
NEENI nena Yihoowawu sheedhdhido wodiya hassayay? Neeni A eridonne siiqido gishshawu hegaa kuuyadasa. Ne deꞌuwan I koyiyobaa kaseyanawu, qassi ne kumetta wozanan, shemppuwan, qofaaninne wolqqan ubbatoo A siiqanawu ayyo qaalaa geladasa. (Mar. 12:30) He wodeppe haa simmin neeni A siiqiyo siiqoy minni minni biis. Yaatin issi uri nena, “Neeni Yihoowa tumuppe siiqay?” giidi oychchiyakko woygada zaaruutee? Neeni aynne mammottennan, “Taani A ooppenne woy aybippenne aaruwan siiqays” gaana danddayaasa!
Neeni nena Yihoowawu sheedhdhidonne haattan muukettido wode A ay keena siiqiyakko hassayay? (Mentto 1 xeella)
2-3. Nuuni ammanettanaadan Yihoowi koyiyobay aybee, qassi ha huuphe yohuwan ay beꞌanee? (Ermmaasa 31:3)
2 Gidoppe attin, issi uri nena, “Yihoowi nena siiqiyogaa ammanettay?” giidi oychchiyakko woygada zaaruutee? Geella neeni, Yihoowi nena siiqiyogee bessennabadan qoppada zaaranawu mammotuutee? Naatettan iitabay gakkido issi michchiya hagaadan gaasu: “Taani wozanappe Yihoowa siiqays. Qassi hegaabaa sirikke. Shin Yihoowi tana siiqiyogaa darotoo sirays.” Yaatin, Yihoowi nena tumuppe siiqiyakkonne eranawu nena aybi maaddana danddayii?
3 Yihoowi nena siiqiyogaa neeni ammanettanaadan koyees. (Ermmaasa 31:3 nabbaba.) Yihoowi nena baakko shiishshidoogee tuma. Neeni nena ayyo sheedhdhada haattan muukettido wode, keehi alꞌꞌo gidida imotaa, hegeekka tasenna ba siiquwa neeyyo bessiis. Hegaa giyogee I nena keehi siiqeesinne nena mule yeggi bayenna giyogaa. Yihoowi nena gujjin, ammanettida ba ashkkarata baayyo ‘dummatida asadan’ xeellanaadan hegee denttettees. (Mil. 3:17) Kiitettida Phawuloosawu siyettidaagaadan neeyyokka siyettanaadan Yihoowi koyees. Phawuloosi Yihoowi A siiqidoogaa ammanettidi hagaadan giis: “Xoossay nuna siiqiyogaa taani ammanays. Hayqoy woy deꞌoy woy kiitanchchati woy kawotettati woy haꞌꞌi deꞌiyabati woy yaanabati woy wolqqati woy bollan deꞌiya aybinne woy garssan deꞌiya aybinne woy hara ay meretinne . . . Xoossaa siiquwappe nuna shaakkana danddayenna.” (Roo. 8:38, 39) Yihoowi nuna siiqiyogaa loytti ammanettana koshshiyoy aybissakko, qassi yaatanawu nuna aybi maaddana danddayiyakko ha huuphe yohuwan beꞌana.
YIHOOWI NUNA SIIQIYOGAA NUUNI AMMANIYOGEE KEEHI KOSHSHIYOY AYBISSEE?
4. Seexaanay balettanawu oottiyobaa eqettanawu nuuni waatana danddayiyoo?
4 Yihoowi nuna siiqiyogaa ammaniyogan Seexaanay “balettanawu oottiyobaa” eqettana danddayoos. (Efi. 6:11) Nuuni Yihoowawu haggaaziyogaa aggana mala Seexaanay bawu danddayettida ubbabaa oottana. Seexaanay balettanawu oottiyobatuppe issoy Yihoowi nuna siiqennabadan nuuni qoppanaadan oottiyogaa. Seexaanay injje wodiya demmanawu koyiyogaa mule dogoppa. I nuna darotoo qohiyoy nuna kase gakkidabatun, haꞌꞌi gakkiiddi deꞌiya metotun woy sinttappe gakkanabaa erennaagaa gaasuwan nuuni keehi unꞌꞌettidi wolqqaa xayiyo wodiyana. (Lee. 24:10) Seexaanay banttana qohuwappe naagana danddayenna doꞌata oyqqanawu koyiya gaammo mala. Yaatiyo gishshawu, I nuna hidootaa qanxxissanawu nuuni azzaniyo wodiya goꞌettanawu baaxetees. Yihoowi nuna siiqiyogaa nuuni ubbatoo loytti ammanettikko, Seexaanaa, A cimuwanne A hiillaa ‘eqettana’ danddayoos.—1 Phe. 5:8, 9; Yaaq. 4:7.
5. Yihoowi nuna siiqiyogaanne xoqqu ootti xeelliyogaa nuuni akeekana koshshiyoy aybissee?
5 Yihoowi nuna siiqiyogaa ammaniyogan kaseegaappe aaruwan akko shiiqana danddayoos. Nuuni hegaadan giyoy aybissakko beꞌa. Yihoowi nuuni harata siiqanaadaaninne etikka nuna siiqanaadan oottidi medhdhiis. Nuna siiqiya ura nuunikka siiqiyogee wottin deꞌiyaba. Yaatiyo gishshawu Yihoowi nuna siiqiyogaanne xoqqu ootti xeelliyogaa loytti akeekiyo wode, nuuni A kaseegaappe aaruwan loytti siiqoos. (1 Yoh. 4:19) Nuuni A siiqiyo siiqoy minni minni biyo wode I nuna siiqiyo siiqoykka minnana. Geeshsha Maxaafay hegaa loytti qonccissiyabaa yootees: “Xoossaakko shiiqite; qassi I inttekko shiiqana.” (Yaaq. 4:8) Yaatin Yihoowi nuna siiqiyogaa nuuni loytti ammanettanawu waatana danddayiyoo?
YIHOOWI NUNA SIIQIYOGAA AMMANANAADAN NUNA AYBI MAADDANA DANDDAYII?
6. Yihoowi nena siiqiyogaa neeni siriyaba gidikko, waatana danddayay?
6 Yihoowi nena siiqiyo gaasuwa akeekanawu ubbatoo A woossa. (Luq. 18:1; Roo. 12:12) Yihoowi nena xeelliyogaadan neeni nena xeellanawu maaddanaadan ubba galla darotoo woossiyogee koshshana danddayees. Pirddiya wozanaa ammanttiyogee metiyaba gidana danddayiyogee tuma. Shin Yihoowi ne wozanaappe aadhdhiyogaa hassaya. (1 Yoh. 3:19, 20) Neeni nebaa eriyogaappekka aaruwan I nebaa loytti erees; neeyyo deꞌiyogaa neeni akeekabeennabaa I akeekana danddayees. (1 Sam. 16:7; 2 Odi. 6:30) Hegaa gishshawu, neeyyo siyettiya ubbabaa ayyo yoota, qassi I nena siiqiyogaa neeni ammanana mala maaddanaadan A woossa. (Maz. 62:8) Yaatada, kaallidi deꞌiyabata oosuwan peeshshiyogan ne woosaara maayettiyabaa ootta.
7-8. Yihoowi nuna siiqiyogaa nuuni ammanettanaadan Mazamure maxaafay nuna waati maaddii?
7 Yihoowi giidobaa ammana. Geeshsha Maxaafaa xaafidaageeti A tumu oonatettaa qonccissanaadan I ba ayyaanan eta denttettiis. Mazamuretuppe issuwan Daawiti Yihoowi nuussi ay keena qoppiyakko ufayssiya ogiyan qonccissiis. Daawiti hagaadan giis “GODAI wozanai me77idoogeetussi mataana; qassi bantta ayyaanan liiqidaageeta ashshees.” (Maz. 34:18) Neeni hidootaa qanxxiyo wode nerkka attidabadan neeyyo siyettana danddayees. Shin hegaa mala wodetun, Yihoowi neeyyo awudeegaappenne aaruwan A maadoy koshshiyogaa eridi neekko shiiqanawu qaalaa geliis. Hara mazamuriyan Daawiti hagaadan giis: “Ta afuttaa ne ogoruwan dagaya.” (Maz. 56:8, NW) Neeni waayettiyo wode Yihoowi akeekees. Nebaynne nena gakkiiddi deꞌiyabay A keehi qofissees. Bazzuwan manddariya uri ogoruwan deꞌiya haattaa xoqqu ootti xeelliyogaadan, ne afuttaa Yihoowi xoqqu ootti xeellees, qassi neeni azzanidonne yeekkido wode ubbaa I hassayees. Daawiti Yihoowawu hagaadan giis: “Ta ogeta ubbaa neeni eraasa.” (Maz. 139:3) Yihoowi ne oge ubbaa beꞌyaba gidikkokka, ne oottiyo loꞌꞌoban xeelaa wottees. (Ibr. 6:10) Aybissi? Neeni A ufayssanawu oottiyo ubbabaa I keehi nashshiyo gishshataassa.a
8 Yihoowi ba Qaalan xaafissido ha minttettiya xiqisetu baggaara, “Taani nena keehi siiqiyogaanne neessi qoppiyogaa ne eranaadan koyays” giidoogaa mala. Shin qommoora beꞌidoogaadan Seexaanay Yihoowi nena siiqennabadan neeni qoppanaadan koyees. Hegaa gishshawu Yihoowi nena siiqiyogaa neeni issi issitoo siriyaba gidikko, takki gaada nena hagaadan oychcha, “Taani ‘wordduwa aawaa’ ammaniyanaayye, ‘tumaa Xoossaa’ ammaniyanaa?”—Yoh. 8:44; Maz. 31:5.
9. Yihoowi bana siiqiyageetuyyo yootido ammanttiyabay aybee? (Kessaabaa 20:5, 6)
9 Bana siiqiyageeta xeelliyagan Yihoowawu aybi siyettiyakko qoppa. Yihoowi Muuseyyonne Israaꞌeelatuyyo giidobaa beꞌa. (Kessaabaa 20:5, 6 nabbaba.) Yihoowi bana siiqiyageetussi tasenna siiquwa bessanawu qaalaa geliis. Yihoowi ammanettiyagaa gidiyo gishshawu bana siiqiyageeta siiqiyogaa ammanettana danddayoos. (Nah. 1:5) Yaatiyo gishshawu neeni Yihoowi nena siiqiyogaa ammanettanawu metootikko, takki gaada nena hagaadan oychcha, ‘Taani Yihoowa siiqiyanaa?’ Yaatada hagaa qoppa: Neeni A siiqiyabanne A ufayssanawu neeni danddayiyo ubbabaa oottiyaba gidikko, I nena keehi siiqiyogaa ammanettana danddayaasa. (Dane. 9:4; 1 Qor. 8:3) Hegaa giyogee neeni Yihoowa siiqiyogaa ammanettiyaba gidikko, Yihoowi nena siiqiyogaakka neeni sirana koshshenna giyogaa. I nena ubbatoo siiqanaagaanne mule yeggi bayennaagaa wozanappe ammanettana danddayaasa.
10-11. Neeni wozuwa waata xeellanaadan Yihoowi koyii? (Galaatiya 2:20)
10 Wozuwa xeelliyagan wotta dentta qoppa. Yesuus Kiristtoosa wozuwa yarshshoy Yihoowi asawu immido ay imotaappekka aadhdhiyagaa. (Yoh. 3:16) Shin hegee neeyyokka imettida imotee? Ee! Kiitettida Phawuloosabaa beꞌa. I Kiristtaane gidanaappe kase keehi iitabata oottidoogaanne Kiristtaane gidi simmidikka ba shugo miyyiya xoonanawu ubbatoo baaxetana koshshidoogaa hassaya. (Roo. 7:24, 25; 1 Xim. 1:12-14) Gidikkokka, I wozoy ayyo buzo imettidabadan qoppiis. (Galaatiya 2:20 nabbaba.) Phawuloosi hegaa Geeshsha Maxaafan xaafanaadan Yihoowi ba ayyaanan denttettidoogaa hassaya. Qassi Geeshsha Maxaafan deꞌiya ubbabay nuna tamaarissanawu xaafettiis. (Roo. 15:4) Yihoowi neeni wozuwa appe ekkido imotadan xeellanaadan koyiyogaa Phawuloosi yootidobay bessees. Neeni wozuwa hegaadan xeelliyo wode Yihoowi nena siiqiyogaa kaseegaappe aaruwan ammanettana.
11 Yesuusi nuuyyo hayqqanaadan ha saꞌaa kiittido gishshawu Yihoowa nuuni galatoos. Shin Yesuusi ha saꞌaa yiido hara gaasoy Xoossaa xeelliyagan haratuyyo tumaa yootanaassa. (Yoh. 18:37) Yihoowi ba naata ay keena siiqiyakko qonccissiya tumaakka Yesuusi tamaarissiis.
YIHOOWI NUNA SIIQIYOGAA NU AMMANANAADAN YESUUSI NUNA WAATI MAADDII?
12. Yesuusi Yihoowa xeelliyagan yootidobaa nuuni ammanana danddayiyoy aybissee?
12 Yesuusi saꞌan deꞌiyo wode, Yihoowi ay mala Xoossakko yootiyogan ufayttiis. (Luq. 10:22) Yesuusi Yihoowa xeelliyagan yootidobaa nuuni ammanana danddayoos. Aybissi? Yesuusi ha saꞌaa yaanaappe kase daro biiloone layttawu saluwan Yihoowara deꞌido gishshataassa. (Qol. 1:15) Yesuusi A Aaway A ay keena siiqiyakko erees. Hegaa bollikka, I ba Aaway ammanettida kiitanchchatussinne saꞌan deꞌiya ammanettida ba attumanne macca naatussi ubbawu siiquwa waati qonccissidaakko beꞌiis. Xoossay siiqiyogaa harati ammananaadan Yesuusi waati maaddii?
13. Yesuusi nuuni Yihoowa waati xeellanaadan koyii?
13 Yesuusi nuunikka aagaadan Yihoowa xeellanaadan koyees. Wonggeletun, Yesuusi Yihoowa keehi daro sohotun “Aawaa” giidi qonccissiis. Qassi I bana kaalliyageetussi Yihoowa “intte Aawaa” woy ‘saluwan deꞌiya intte Aawaa’ yaagiis. (Mat. 5:16; 6:26) Yesuusi ha saꞌaa yaanaappe kase, ammanettida Yihoowa ashkkarati ‘Ubbaa Danddayiyagaa,’ “Ubbaappe Xoqqiya Xoossaa,” ‘Medhdhida Gitaa’ giyanne hara hegaa mala bonchcho sunttatun Yihoowa xeesidosona. Shin Yesuusi darotoo Yihoowa nu Aawaa giidi xeegiis. Ha qofay issi naꞌi siiqiya ba aawaakko shiiqiyogaadan, ba ashkkarati baakko shiiqanaadan Yihoowi koyiyogaa bessees. Yaatiyo gishshawu Yesuusi issi loꞌꞌo Aaway ba alꞌꞌo naata siiqiyogaadan Yihoowikka nuna siiqiyogaa tamaarissiis. Yesuusi Yihoowa qonccissanawu “Aawaa” giyo qaalaa goꞌettido naaꞌꞌu wodeta ane beꞌoos.
14. Saluwan deꞌiya nu Aawaa sinttan nu ubbay alꞌꞌo gidiyogaa Yesuusi woygi qonccissidee? (Maatiyosa 10:29-31) (Misiliyakka xeella.)
14 Koyruwan, Yesuusi Maatiyosa 10:29-31n giidobaa ane pilggoos. (Nabbaba.) Issi qeeri kafoy awan deꞌiyakko nu Aaway loytti eriyogaa Yesuusi odiis. Shin kafoy Yihoowawu goynnenna woy A siiqenna. Yihoowi issi qeeri kafuwa xoqqu ootti xeellikko, siiqoy denttettin awu goynniya ammanettidaageeta ubbaa I ay keena xoqqu ootti xeellanddeeshsha! Nu Aaway nu huuphiya binnaana ubbaa qoodaakka eriyogaa Yesuusi yootiis. Yihoowi nubaa keehi guuttabaakka eriyo gishshawu nuussi keehi qoppiyogaa wozanappe ammanettana danddayoos. Yesuusi saluwan deꞌiya nuuni Aawaa sinttan nu ubbay alꞌꞌo gidiyogaa ammananaadan koyiyogee qoncce.
Yihoowi issi qeeri kafoy awan deꞌiyakko loytti erees. Yihoowi qeeri kafuwa xoqqu ootti xeellikko, A siiqiyanne awu goynniya neeyyo hegaappe aaruwan qoppiyogaa ammanettana danddayaasa! (Mentto 14 xeella)
15. Yohaannisa 6:44n Yesuusi yootidobay saluwan deꞌiya ne Aawaabaa ay qonccissii?
15 Yesuusi “Aawaa” giyo qaalaa goꞌettido hara wodiya ane beꞌoos. (Yohaannisa 6:44 nabbaba.) Saluwan deꞌiya ne Aaway nena tumaakko shiishshiis, woy siiquwan ehiis. I hegaadan oottidoy aybissee? I neeyyo suure xeelay deꞌiyogaa beꞌido gishshataassa. (Oos. 13:48) Yesuusi Yohaannisa 6:44n deꞌiya qofaa yootiyo wode Yihoowi Ermmaasa 31:3n giidobaa yootiiddi deꞌennan aggenna. He sohuwan Yihoowi ba asawu hagaadan giis: “Ta aggenna siiquwan taani inttena taakko shiishshaas.” (Erm. 31:3; Hoose7a 11:4ra gatta xeella.) Hegee woygiyogaakko qoppa. Saluwan deꞌiya siiqiya nu Aaway neessi deꞌiyogaa ne akeekabeenna loꞌꞌobaa I ubbatoo akeekees.
16. (a) Yesuusi yootidobay ay qonccissii, qassi nuuni A ammanana koshshiyoy aybissee? (b) Yihoowi neeyyo keehi loꞌꞌo Aawa gidiyogaa ammanettanaadan nena aybi maaddana danddayii? (“Nu Ubbaassi Koshshiya Aawa” giya saaxiniya xeella.)
16 Yesuusi Yihoowa nu Aawadan qonccissido wode, hagaadan giidoogaa mala: “Yihoowi taayyo xalaala gidennan, intteyyokka Aawa. Qassi I intte ubbaa siiqiyogaanne intteyyo wozanappe qarettiyogaa intte ammanettanaadan koyays.” Yaatiyo gishshawu, Yihoowi nena siiqiyogaa neeni issi issitoo sirikko, takki gaada nena hagaadan oychcha, ‘Nu Aawaa loytti eriyanne ubbatoo tumaa haasayiya A Naꞌay yootidobaa taani ammanettana koshshennee?’—1 Phe. 2:22.
YIHOOWI NENA SIIQIYOGAA UBBATOO MINTTA AMMANETTA
17. Yihoowi nuna siiqiyogaa nuuni ubbatoo loytti ammanettana koshshiyoy aybissee?
17 Nuuni Yihoowi nuna siiqiyogaa ubbatoo ammanettanawu nuussi danddayettida ubbabaa oottana koshshees. Nuuni qommoora beꞌidoogaadan, balettiya nu morkkee Seexaanay nuuni Yihoowayyo haggaaziyogaa agganaadan oottanawu murttiis. I nuna shugissanawu koyees. Yaatiyo gishshawu Yihoowi nuna siiqenna giidi nuuni ammananaadan oottanawu I ubbatoo baaxetees. Nuuni Seexaanaa wordduwa ammanana koshshenna!—Iyy. 27:5.
18. Yihoowi nena siiqiyogaa loytta ammanettanawu waatana danddayay?
18 Yihoowi nena siiqiyogaa loytta ammanettanawu I nena xeelliyogaadan neeni nena xeellanawu maaddana mala ubbatoo A woossa. Ayyaanay denttettin Geeshsha Maxaafaa xaafidaageeti A gita siiquwabaa woygi qonccissidaakko wotta dentta qoppa. Yihoowi A siiqiya ura ubbatoo siiqanaagaa hassaya. Wozuwa neeyyo imettida imotadan neeni xeellana danddayiyoy aybissakko qoppa. Yesuusi qonccissidoogaadan, Yihoowi ne Aawaa gidiyogaa ammanetta. Yaatikko, ooninne nena, “Yihoowi nena siiqiyogaa ammanettay?” giidi oychchikko neeni aynne sirennan “Ee, I tana siiqiyogaa ammanettays! Qassi taanikka A siiqiyogaa bessanawu ubba galla tawu danddayettida ubbabaa oottays” yaagana!
MAZAMURE 154 Mino Siiquwa