Nena Ziqqi Oottiyogan Yihoowa Milata

1. Yihoowi bana ziqqi oottiyogee malaaliyaba giyoy aybissee?

HA WODIYAN kawotettaa sunttatubaa neeni qoppiyo wode, banttana ziqqi oottiya asadan eta xeellay? Xeellennaagee qoncce. Shin ubbaa danddayiya Xoossaa Yihoowi bana ziqqi oottees. (Maz. 113:5-8) Yihoowagaadan bana ziqqi oottiyay ooninne baawa. I mulekka otorettenna. Ha huuphe yohuwan, ufayssiya Yihoowa eeshshatuppe oyddata, qassi he eeshshati I bana ziqqi oottiyagaa gidiyogaa waati qonccissiyakko beꞌana. Yesuusikka ba Aawaagaadan waati bana ziqqi oottidaakkokka beꞌana. Hegeeta pilggiyogee nuuni Yihoowakko loytti shiiqanaadaaninne nuna ziqqi oottiyogan kaseegaappe aaruwan A milatanaadan maaddana.

YIHOOWI HAASAYISSANAWU METENNAAGAA

2. Mazamure 62:8y Yihoowabaa ay yootii? (Misiliyakka xeella.)

² Otoranchcha asaa haasayissiyogee darotoo metees. Otorettiya asati banttana haratuppe aadhdhiya asadan qoppiyo gishshawu darotoo eti harata naaqqoosona. Hegaappe denddidaagan, harati etakko shiiqanawu koyokkona. Shin Yihoowi etappe keehi dumma! Saluwan deꞌiya nu Aaway bana ziqqi oottiyagaa gidiyo gishshawu, nu A haasayissanaadaaninne nuna qofissiya ubbabaa awu yootanaadan nuna shoobbees. (Mazamure 62:8 nabbaba.) Siiqiya issi aaway ba naati banttana qofissidabaa yootiyo wode siyiyogaadan, Yihoowikka bawu goynniyageetu woosaa siyees. He woosatuppe daroti Geeshsha Maxaafan deꞌoosona. Hegee I haasayissanawu metennaagaa gidiyogaa bessees. (Yaa. 10:12-14; 1 Sam. 1:10-18) Shin issi issitoo nuuni daro balaa oottido gishshawu, Yihoowa haasayissana danddayennabadan qoppikko waatana koshshii?

3. Yihoowakko shiiqana bessennabadan neeyyo siyettiyo wodekka, woosan ubbatoo A haasayissanaadan I koyiyogaa ne ammanettana danddayiyoy aybissee?

³ Yihoowakko shiiqana bessennabadan nuuyyo siyettiyo wodekka, woosan A haasayissana danddayoos. Nuuni hegaadan giyoy aybissee? Yesuusi bayida naꞌaabaa yootido leemisuwan, darobaa moorido gishshawu bantta soo asaakko simmana bessennabadan qoppida naꞌay deꞌiyo siiqiya aawan Yihoowa leemissiis. Shin naꞌay soo simmido wode aaway waatidee? I naꞌay biron haahuwan deꞌishin beꞌidi sohuwara ‘woxxi biidi A qoommidi yeridoogaa’ Yesuusi yootiis. (Luq. 15:17-20) Yihoowi he aawaa mala. Balabaa oottidi azzanido woy unꞌꞌettido gishshawu nuuni woossiyo woosaa I loytti ezggees. (Zil. 3:55-57) Yihoowi nuussi keehi qarettees; qassi I ba naꞌaakko woxxiiddi biida aawaadan nuna siiqeesinne minttettees. (Isi. 57:15) Yihoowi ha wodiyan hegaadan waati oottii? I cimata, Yihoowa markka gidida nu soo asatanne nu mala Kiristtaaneta goꞌettidi darotoo hegaadan oottees. (Yaq. 5:14, 15) Yihoowi nuna maaddanawu hegaadan oottiyoy nuuni akko shiiqanaadan I koyiyo gishshataassa.

4. Yesuusi haasayissanawu metennaagaa gidiyogaa waati bessidee?

⁴ Yesuusi ba Aawaa waani milatidee? Yesuusi ba Aawaagaadan bana ziqqi oottees. Hegaappe denddidaagan, I saꞌan deꞌiyo wode asay akko yiidi A haasayissanawu yayyibeenna. Eti oyshaa A oychchanawu aybanne yayyibookkona. (Mar. 4:10, 11) Yaaniyo gishshawu, issibaa xeelliyagan eti bantta qofaa yootanaadan I oychchiyo wode, eti banttawu siyettiyabaa aybanne qottennan awu yootoosona. (Mat. 16:13-16) Qassi eti moorido wode Yesuusi banttana hanqqettana giidi yayyibookkona; ayssi giikko, eti Yesuusi keha, maariyagaanne danddayanchcha gidiyogaa eroosona. (Mat. 17:24-27) Yesuusi ba Aawaa loytti milatiyo gishshawu, A kaalliyageeti Yihoowa loytti eridosona. (Yoh. 14:9) Eti Yihoowi haymaanootiya kaalettiya meqetti baynna otorettiya asatu mala gidennaagaa akeekidosona. Tumukka Yihoowi bana ziqqi oottiyagaanne haasayissanawu metennaagaa.

5. Nuuni nuna ziqqi oottiyogee harati nuna haasayissanawu metootennaadan waati maaddii?

⁵ Yihoowa waani milatana danddayiyoo? Nuuni nuna kaseegaappe aaruwan ziqqi oottiyo wode harati nuna haasayissanawu metootokkona. Nuuni nuna ziqqi oottennaba gidikko, harata qanaatananne etappe aadhdhiyabadan qoppana danddayoos, qassi harati nuna qohiyo wode etawu atto gookko. Nuuni hegaa mala asa gidikko, asi nuukko shiiqanawu koyenna. Shin nuna ziqqi oottiyogee nuuni keha, danddayanchcha, atto giyageetanne harati nuna haasayissanawu metennaageeta gidanaadan maaddees. (Qol. 3:12-14) Cimati harati eta haasayissanawu metennaageeta gidana koshshees. Hegaa mala cima gidanawu eti ishatuuranne michchotuura darotoo gayttana koshshees. Yaaniyo gishshawu, danddayettiyo wode ubban, cimati shiiqota interneettiyan shiiqanawu dooriyogaappe, Shiiquwa Addaraashaa biidi shiiqanawu baaxetana koshshees. Qassi eti danddayettiyo wode ubban, ishatuuranne michchotuura sooppe soo biidi haggaazana bessees. Yaatiyo wode, galchchan deꞌiyageeti cimata loytti erananne maadoy koshshiyo wode awudekka eta haasayissanawu yayyokkona.

YIHOOWI ZOZZU GEENNAAGAA

6-7. Yihoowi ba ashkkaratu woosaa siyidi ba qofaa laammanawu eeno giidoogaa bessiya leemisota yoota.

⁶ Otorettiyageeti loꞌꞌobay aybakko eriyabadan darotoo qoppoosonanne bantta qofaa laammanawu koyokkona. Shin Yihoowi ubbaban ooppenne aadhdhiyagaa gidikkonne, I bana ziqqi oottees, zozzu geenna, woy haratu qofaa siyees. Leemisuwawu, Miiriyama Aaroonaara ba ishaa Muuse bolli zuuzummaasu. Shin hegee keehi bala; ayssi giikko, Muusee Yihoowa gishshaa haasayiyagaa. Yaaniyo gishshawu, Miiriyama Yihoowa bonchchabeykku. Hegaappe denddidaagan, Yihoowi Miiriyami bolli keehi hanqqettidi, hanttaara gogaa harggee O oyqqanaadan oottiis. Shin Aarooni Muusee O maaddanaadan woossin, Muusee ba michchiyo Yihoowi pattanaadan woossiis. Yaatin Yihoowi waatidee? Yihoowi I bolli pirddidobaa otorettidi laammennan ixxibeenna. Yihoowi bana ziqqi oottiyo gishshawu, Muuse woosaa siyidi Miiriyamo pattiis.—Qoo. 12:1-15.

⁷ Kawuwa Hizqqiyasaara gayttidaagankka Yihoowi bana ziqqi oottiyogaa bessiis. Yihoowi ba erissidobaa yootiya Isiyasa baggaara Hizqqiyasi hayqqanaagaa yootiis. Hizqqiyasi Yihoowi A pattanaadan afuxxiiddi woossiis. Yaatin Yihoowi Hizqqiyasa woosaa siyidi pattiisinne A layttaa bolli 15 layttaa gujjiis. (2 Kaw. 20:1, 5, 6) Yihoowi bana ziqqi oottiyogee haratuyyo qarettanaadaaninne eta qofaa siyanaadan A denttettees.

8. Yesuusi zozzu geennaagaa bessiya leemisoti awugeetee? (Marqqoosa 3:1-6)

⁸ Yesuusi ba Aawaa waani milatidee? Yesuusi saꞌan deꞌiyo wode danddayettido wode ubban haratussi loꞌꞌobaa oottiis. Leemisuwawu, haymaanootiya kaalettiyageeti keehi eqettishinkka, I Sambbatan asaa pattiis. (Marqqoosa 3:1-6 nabbaba.) Yesuusi ha wodiyan Kiristtaane galchchaa kaalettiyo ogiyankka zozza gidenna. Leemisuwawu, galchchan issi uri gita nagaraa oottiyo wode, I he ura danddayees; qassi he uri laamettanaadan awu injjiya immees.—Ajj. 2:2-5.

9. Nuuni zozzu geennaageeta gidiyogaa waati bessana danddayiyoo? (Misiliyakka xeella.)

⁹ Yihoowa waani milatana danddayiyoo? Zozzu geennaagaara gayttidaagan nuuni Yihoowagaadan qoppanawunne oottanawu baaxetana bessees. (Yaq. 3:17) Yihoowa leemisuwa kaalliya yelidaageeti, bantta naati oottana danddayiyobaappe aarobaa oottanaadan koyokkona. Doomettaabaa 33:12-14 gakkanawu deꞌiya taarikee bessiyogaadan, hegaara gayttidaagan Yaaqoobi keehi loꞌꞌo leemiso. Banttana ziqqi oottiyanne zozzu geenna yelidaageeti bantta naata issuwa haraara geeddarssennaadankka naagettana koshshees. Cimatikka zozzu geennaageeta gidana bessees. Eti yaatana danddayiyo issi ogee Geeshsha Maxaafay yootiyo maaraa kanttana xayikko, cimatuppe daroti kuuyido qofaa maayettiyogaa. (1 Xim. 3:2, 3) Issibaa xeelliyagan nu qofay dumma dumma gidikkokka, haratu qofaa akeekanawu nuuni ubbaykka baaxetana koshshees. (Rom. 14:1) Galchchan deꞌiyageeti ubbay ‘zozzu geennagan’ erettanawu baaxetana bessees.—Plp. 4:5.

YIHOOWI DANDDAYANCHCHA

10. Yihoowi danddayanchcha gidiyogaa ayba ogetun bessidee?

¹⁰ Otorettiya asay danddayan naaganawu koyennaagaa akeekennan aggakka. Otorettiyogee eti danddayanchcha gidennaadan oottees. Yihoowi etappe keehi dummatees. I ooppenne aaruwan danddayanchcha! Leemisuwawu, Nohe wode Yihoowi iitata xayssanaappe kase 120 layttaa naaganaagaa yootiis. (Doo. 6:3) Yaaniyo gishshawu, Nohee ba naata dichchanawunne A soo asay maaddin markkabiya keexxanawu wodiya demmiis. Guyyeppe, Sadoomanne Gamoora xayuwara gayttidaagan Abrahaami oychchido wode Yihoowi danddayan ezggiis. Otoranchcha asi, ‘Tana hegaadan waana oychchay’ gaana danddayees! Shin Yihoowi bana ziqqi oottiyo gishshawu, Abrahaama danddayiis.—Doo. 18:20-33.

11. Naaꞌꞌantto Pheexiroosa 3:9y yootiyogaadan, Yihoowi ha wodiyan danddayiyoy aybissee?

¹¹ Yihoowi ha wodiyankka danddayanchcha gidiyogaa bessees. I ha alamiya xayssanawu keerido wodiya naagiiddi deꞌees. I danddayiyoy aybissee? “I asay ubbay zilꞌꞌettidi laamettanaadan koyeesippe attin, ooninne xayanaadan koyenna [gishshataassa].” (2 Pheexiroosa 3:9 nabbaba.) Yaatin Yihoowa danddayay hada attidee? Chii! Suure xeelay deꞌiyo daro miiloone asay akko shiiqiis. Qassi daro miilooniyan qoodettiya haratikka akko shiiqana giidi hidootoos. Shin Yihoowi merinawu danddayenna. Yihoowi asaa siiqikkonne, asay ba koyido ubbabaa oottanaadan I ubbatoo paqqadenna. Iita asaa I xayssana.—Imb. 2:3.

12. Yesuusi danddayiyogan Yihoowa waani milatidee?

¹² Yesuusi ba Aawaa waani milatidee? Daro shaꞌu layttawu Yesuusi ba Aawaagaadan danddayiis. Seexaanay Yihoowakka ammanettida asaakka cayiyo wode Yesuusi beꞌiis. (Doo. 3:4, 5; Iyy. 1:11; Ajj. 12:10) Yesuusi daro asay keehi waayettiyogaakka beꞌiis. I “Dabloosa oosuwa gaacci xayssanawu” ay keenaa yeemottiyakko qoppa! (1 Yoh. 3:8) Dabloosa oosuwa muleera xayssanaadan Yihoowi paqqadana gakkanaashin Yesuusi danddayan naagiyoy aybissee? Issi gaasoy I bana ziqqi oottiyagaa gidiyo gishshataassa; ha alamiya xayssana wodiya kuuyiyay Yihoowa gidiyogaa I erees.—Oos. 1:7.

13. Yesuusi kiitettidaageeta waati danddayidee, qassi aybissi?

¹³ Yesuusi saꞌan deꞌiyo wode kiitettidaageeta danddayiis. Leemisuwawu, eti bantta giddon ubbaappe gitay oonakko zaari zaaridi palamettido wode Yesuusi ba kiittidoogeetun hidootaa qanxxibeenna. I eta ubbatoo danddayiis. (Luq. 9:46; 22:24-27) Eti guyyeppe koshshiyaban laamettanaagaa I ammanettiis. Neenikka issi mala balaa zaara zaarada oottadii? Yaatikko, bana ziqqi oottiyanne danddayanchcha Kawoy neeyyo deꞌiyogan neeni keehi galatanaagee qoncce!

14. Nuuni danddayanchcha waani gidana danddayiyoo?

¹⁴ Yihoowa waani milatana danddayiyoo? Nuuni ‘Kiristtoosaagaadan qoppiyo’ wode, Yihoowagaadan qoppananne oottana danddayoos. (1 Qor. 2:16) Kiristtoosa qofaa waati loytti akeekana danddayiyoo? Aybippenne aadhdhiya keehi loꞌꞌo ogee Wonggeleta nabbabiyogaa. Nabbabiyo wode Yesuusi oottidobatanne I hegaa aybissi oottidaakko wodiya bazzidi qoppana koshshees. Qassi Yesuusaagaadan nuna ziqqi oottanawunne danddayanchcha gidanawu Yihoowi nuna maaddana mala woossana bessees. Nuuni Kiristtoosaagaadan loytti qoppiyo wode, nunakka haratakka danddayiyogan Yihoowa milatana danddayoos.—Mat. 18:26-30, 35.

YIHOOWI HIYYEESATA XOQQU OOTTI XEELLEES

15. Yihoowi hiyyeesata xoqqu ootti xeelliyogaa bessiya amarida leemisota yoota. (Mazamure 138:6)

¹⁵ Mazamure 138:6 nabbaba. Hagaa qoppa: Ubbaa Haariya Yihoowi hiyyeesata xoqqu ootti xeellees! Yihoowi beni wode hiyyeesata xoqqu ootti xeellidoogaa bessiya amarida leemisota beꞌa. Etappe issota issota nuuni loytti erennan aggana danddayoos. Shin Yihoowi etabay Geeshsha Maxaafan xaafettanaadan oottiis. Leemisuwawu, Deboora Yisaaqanne Yaaqoobantta soo asawu 125 gidiya layttawu ammanettada oottaasu! Ha ammanettida maccaaseebaa nuuni darobaa erennaba gidikkonne, Yaaqoobinne A soo asay O keehi siiqiyogaa Muusee xaafanaadan Yihoowi oottiis. (Doo. 24:59; 35:8) Daro layttaappe guyyiyan, dorssaa heemmiya naꞌaa Daawita Yihoowi Israaꞌeela deriya bolli kawo oottiis. (2 Sam. 22:1, 36) Yesuusi yeletti simmin daro takkennan, Xoossay dorssaa henttanchchatukko issi kiitanchchaa kiittiyogan Masee Beetaliheemen yelettidoogaa koyro eti eranaadan oottiyogan eta bonchchiis. (Luq. 2:8-11) Qassi Yooseefinne Mayraama, Yesuusa Xoossaa garuwa efiido wode cimida Simooninne Haanna Yesuusa beꞌanaadan oottiyogan Yihoowi eta bonchchiis. (Luq. 2:25-30, 36-38) Ee, “GODAI bolla xoqqan de7ikkokka, hiyyeesata keha aifiyan xeellees”!

16. Yesuusi harata oyqqiyo ogiyan ba Aawaa waani milatidee?

¹⁶ Yesuusi ba Aawaa waani milatidee? Yesuusi ba Aawaagaadan hiyyeesata xoqqu oottidi xeelliis. I ‘tamaaribeennanne wogetibeenna’ asaa Xoossaa Kawotettaabaa tamaarissiis. (Oos. 4:13; Mat. 11:25) Qassi Yesuusi eta pattiyogaa xalaala gidennan, siiqiyogaanne bonchchiyogaa bessiya ogiyan hegaadan oottiis. (Luq. 5:13) Yesuusi hayqqanaappe kase qammi kiitettidaageetu tohuwa meecciyogan ashkkaratu xalaalay oottiyo oosuwa oottiis. (Yoh. 13:5) Qassi I saluwa baanaappe kase, merinaa deꞌuwa demmanaadan harata maaddiyo keehi koshshiya oosuwa bana kaalliyageetuyyo ubbawu immiyogan eta bonchchiyogaa bessiis.—Mat. 28:19, 20.

17. Harata waati bonchchana danddayiyoo? (Misiliyakka xeella.)

¹⁷ Yihoowa waani milatana danddayiyoo? Diccido hanotan, meran woy timirttiya xekkan asa asappe shaakkennan mishiraachchuwa siyanawu koyiya ubbawu yootiyogan nuuni asa ubbaa bonchchiyogaa bessoos. Qassi nuussi ayba eray woy aawatettay deꞌiyaba gidikkokka, nu ishatinne michchoti nuuppe aadhdhiyabadan qoppiyogan eta bonchchoos. (Plp. 2:3) Hageetuuninne hara ogetun nuuni issoy issuwa bonchchanawu sintta xeera gidiyo wode Yihoowi ufayttees.—Rom. 12:10; Sof. 3:12.

18. Neeni Yihoowagaadan nena ziqqi oottanawu koyiyoy aybissee?

¹⁸ Saluwan deꞌiya siiqiya Aawaadan, nuna ziqqi oottanawu baaxetiyo wode kaseegaappe aaruwan haasayissanawu metennageeta, zozzu geennageetanne danddayancha gidoos. Qassi Yihoowagaadan harata bonchchoos. Bana ziqqi oottiya nu Xoossaa milatanawu baaxetiyogee nuuni ubbaykka A sinttan alꞌꞌo gidanaadan oottiyogaa hassayiyageeta gidoos!—Isi. 43:4.