Xoossay Saluwa Saꞌaa Medhdhiyogaa Doommidoy Awudee?
Geeshsha Maxaafaa yootiyobaa
Xoossay saluwa saꞌaa medhdhiyogaa awude doommidaakko woy hegee ay keena wodiya ekkidaakko Geeshsha Maxaafay yootenna. Shin qanttan hagaadan gees: “Xoossai salotanne sa7aa koiro medhdhiis.” (Doomettaabaa 1:1) Geeshsha Maxaafay “koiro” geetettida wodee awudekko dummayidi yootenna. Gidoppe attin, Doomettaabaa Maxaafan odettida kaalli kaallidi hanidabati, hegee usuppun mereta wodetuppe woy “gallassatuppe” kase gidiyogaa qonccissees.
Usuppun mereta gallassati 24 saatee deꞌiyo gallassatee?
Chiikka. Geeshsha Maxaafan “gallassaa” giya qaalay hanotaadan dumma dumma wodiya qonccissana danddayees. Leemisuwawu, meretaabaa yootiya sohotuppe issoy kumetta meretaa wodiya, issi gallassaadan qonccissees.—Doomettaabaa 2:4.
Usuppun mereta gallassatun hanidabay aybee?
Xoossay “giigiichchibeennanne aibinne bainna mela” saꞌaa, deꞌanawu injje sohuwawu laamiis. (Doomettaabaa 1:2) Hegaappe simmin I saꞌan deꞌoy deꞌiyobata medhdhiis. Geeshsha Maxaafay he mereta gallassatun woykko wodetun hanidabaa usuppun citan shaakki shaakki qonccissees:
Gallassa 1: Xoossay pooꞌoy saꞌan pooꞌanaadan oottiis, qassi hegaa gaasuwan gallassaynne qammay shaahettiis.—Doomettaabaa 1:3-5.
Gallassa 2: Xoossay salo gufanttuwa giigissiis woykko salo gufanttuwappe bollaara deꞌiya haattaa saꞌaa bolli deꞌiya haattaappe shaakkiis.—Doomettaabaa 1:6-8.
Gallassa 3: Xoossay mela sohoy qonccanaadan oottiis. Qassi mittaa maataa mokissiis.—Doomettaabaa 1:9-13.
Gallassa 4: Xoossay saꞌan pooꞌissanaadan away, aginaynne xoolintteti beettanaadan oottiis.—Doomettaabaa 1:14-19.
Gallassa 5: Xoossay haatta giddon deꞌiyabatanne paalliya meretata medhdhiis.—Doomettaabaa 1:20-23.
Gallassa 6: Xoossay doꞌata, meheta, biittaara gooshettiya meretatanne asaa medhdhiis.—Doomettaabaa 1:24-31.
Usuppuntta gallassay wuri simmin, Xoossay ha oosuwappe shemppiis woy medhdhiyogaa essiis.—Doomettaabaa 2:1, 2.
Doomettaabaa Maxaafan odettidabay Saynisiyara maayettii?
Saꞌaa meretaabaa yootiya Geeshsha Maxaafa taarikee, saynisee yootiyo ogiyan ubbabaa paattidi qonccissenna. Hegaappe dumma hanotan, beni wode deꞌidaageetikka meretaabaa nabbabiyo wode, kaalli kaalli hanidabaa akeekanawu metenna ogiyan qonccissees. Meretaabaa yootiya taarikee ammanttiya naqaashay deꞌiyo saynisiyara phalqqettenna. Astropizikisiya eranchay Robert Jastiroy hagaadan yaagiis: “Paatettan qonccissido guuttabati dummatikkokka, astironomiyaninne Doomettaa Maxaafan odettida waanna waannabati issi mala; asay merettana gakkanaashin hanidabati bantta wodiya naagidi kaalli kaallidi polettidosona.”
Away, aginaynne xoolintteti merettidoy awudee?
Away, aginaynne xoolintteti “koiro” merettida ‘salotu’ shaaho. (Doomettaabaa 1:1) Shin, saꞌaa yuushuwan deꞌiya deexo carkkuwappe denddidaagan eta pooꞌoy saꞌaa gakkana danddayibenna. (Doomettaabaa 1:2) Koyro galla guutta pooꞌoy saꞌaa bolli beettiis, shin hegee awuppe yiyakko erettiichchibeenna. Oyddantto gallassi, saꞌaa yuushuwan deꞌiya deexo carkkoy geeyiis. Geeshsha Maxaafay away, aginaynne xoolintteti he wode ‘saꞌaa bollan pooꞌissiyogaa’ doommidoogaa yootees, hegee saꞌan eqqidi xeelliya urawu eti beettiyogaa qonccissiyaba.—Doomettaabaa 1:17, 18.
Geeshsha Maxaafay saꞌawu woqqu laytta gidiyogaa yootii?
Geeshsha Maxaafay saꞌaa layttay woqqakko yootenna. Doomettaabaa 1:1y nu deꞌiyo saꞌaa gujjin meretta ubbawu doomettay deꞌiyogaa xalla yootees. Ha qofay tumu saynisiyara woy saynttistteti saꞌaa layttaabaa yootiyobaara phalqqettenna.