Magddala Mayraama Oonee?
Geeshsha Maxaafay yootiyobaa
Magddala Mayraama ammanettada Yesuusa kaalliyaaro. Magddala giyo I sunttay Galiila Abbaa matan deꞌiya Magddala (geella Magaadan) giyo katamaa sunttaappe yeennan aggenna. Issi wode Mayraama yan deꞌennan aggukku.
Magddala Mayraama Yesuusaaranne A kaalliyageetuura manddaridanne koshshiyaban eta maaddida daro maccaasatuppe issinno. (Luqaasa 8:1-3) A Yesuusi hayqqiyo wode beꞌaasu; qassi A Yesuusi denddi simmin beꞌida koyro asatuppe issinno.—Marqqoosa 15:40; Yohaannisa 20:11-18.
Magddala Mayraama shaaramuxa maccaasee?
Geeshsha Maxaafay Magddala Mayraama shaaramuxa maccaasaa giyogaa yootenna. I deꞌuwabay koyro odettidoy Yesuusi laappun daydanttata ippe kessidoogaa yootiya taarikiyana.—Luqaasa 8:2.
A Yesuusa kaalliyaro gidanaappe kase shaaramuxa maccaasaa giidi daro asay qoppiyoy aybissee? Magddala Mayraama hayqqa simmin xeetan qoodettiya layttay aadhdhin, issi issi asay ba afuttan Yesuusa gediya meeccadanne ba huuphiyan quccada melissida I sunttay odettibeenna maccaasiya (geella shaaramuxa maccaasaa gidana danddayawusu) O giidi qoppees. (Luqaasa 7:36-38) Shin hegee Geeshsha Maxaafay yootiyo qofa gidenna.
Magddala Mayraama “kiitettiyageetussi kiitettiyarii”?
Gidukku. Yesuusi hayquwappe denddi simmin, I denddidoogaa mishiraachchuwa koyro yootida asatuppe issinna Mayraamo gidiyo gishshawu, Kaatolike woosa keettay O “Geeshsha Magddala Mayraamo” qassi “kiitettiyageetussi kiitettiyaro” giidi xeegoosona. (Yohaannisa 20:18) Shin hagee A kiitettidaaro gidiyogaa bessiyaba gideenna. Qassi A kiitettidaaro gidiyogaa Geeshsha Maxaafay yootenna.—Luqaasa 6:12-16.
Geeshsha Maxaafay xaafettidi wuridoy koyro xeetu layttaa wurssetta heeraana. Xeeta gidiya layttaappe simmin, woosa keettaa kaalettiyageeti Magddala Mayraamiyyo gita sohuwa immidi O bonchchiyogaa doommidosona. Xeetu layttaappe biidi heezzu xeetu laytta gakkanaashin xaafettida xuufetun Yesuusa kaalliyageetuppe amaridaageeti Magddala Mayraamo qanaatidoogaa qoncciis. Shin he xuufetu qofay Geeshsha Maxaafa qofaa gidenna. Medhdhi ekki haasayiyo hegaa mala taariketussi denddoy Geeshsha Maxaafaa gidenna.
Magddala Mayraama Yesuusassi machchoo?
Gidukku. Geeshsha Maxaafay Yesuusi machcho ekkibeennaagaa yootees.a
a “Yesuusi Machcho Ekkidee? Yesuusawu Ishanttinne Michchontti Deꞌiyonaa?” giya huuphe yohuwa xeella.