Tana Mooranchchadan Xeellays—Taani Woppu Gaanaadan Geeshsha Maxaafay Maaddana Danddayii?

Geeshsha Maxaafay yootiyobaa

Ee. Nuna mooranchchadan xeelliyo wode, nu ay oottana bessiyakko Geeshsha Maxaafay loꞌꞌo zoriya immees. (Mazamure 32:1-5) Nuuni moorobaa oottidi tumuppe hegan zilꞌꞌettikko, Xoossay nuuyyo atto gaananne nuna maaddana. (Mazamure 86:5.) Zilꞌꞌettiyogee issi issitoo maaddana danddayiyogaa Geeshsha Maxaafay yootees; nu mooruwa giigissanawunne zaarettidi hegaa malabaa oottennan agganawu minni baaxetanaadan maaddees. (Mazamure 51:17; Leemiso 14:9) Shin, nuuni bessiyagaappe aaruwan zilꞌꞌettidi, Xoossaa sinttan hidooti baynnabadan woy pattennabadan qoppenna mala Geeshsha Maxaafay zorees. Nuuni hegaadan qoppikko, ‘keehippe azzanidi hidootaa qanxxana’ danddayoos.—2 Qoronttoosa 2:7.

• Issi uri bana mooranchchadan xeellanaadan oottana danddayiyabay aybee?

• Tana mooranchchadan xeellikko waatana danddayiyanaa?

• Bana mooranchchadan xeelliyogaabaanne atto giyogaabaa yootiya Geeshsha Maxaafaa xiqiseta

Issi uri bana mooranchchadan xeellanaadan oottana danddayiyabay aybee?

Nuuni nuna mooranchchadan xeellanaadan oottiya daro gaasoti deꞌoosona. Nu siiqiyo ura naaqqidabadan woy nuuni oottana bessiyabaa oottibeennabadan nuuyyo siyettana danddayees. Issi issitoo, nuuni aynne moorennan nuna mooranchchadan xeellana danddayoos. Leemisuwawu, nu wolqqaappe dariya keehi xoqqa maarata nuuyyo kessikko, hegaa polana danddayenna wode ubban nuna coo mooranchchadan xeellana danddayoos. Nuuni nuuppe keehi darobaa naagennaadan Geeshsha Maxaafay minttettiyoy hegaassa.—Eranchchaa 7:16.

Tana mooranchchadan xeellikko waatana danddayiyanaa?

Nena mooranchchadan xeellada hidooti baynnabadan qoppiyogaappe, hanotaa giigissanawu ne danddayiyobaa ootta. Waatada?

• Ne mooruwa ammana. Xoossaa Yihoowia neeyyo atto gaanaadan woossa. (Mazamure 38:18; Luqaasa 11:4) Neeni zilꞌꞌettada laamettiyabanne hegaa mala mooruwa zaarettada oottennan agganawu mintta baaxetiyaba gidikko, Xoossay ne woosaa siyanaagaa ammanettana danddayaasa. (2 Hanidabaa Odiya 33:13; Mazamure 34:18) Asi beꞌana danddayenna ne wozanaa I beꞌees. Nuuni moorobaa oottennan agganawu baaxetiyogaa Xoossay beꞌiyo wode, ‘I ammanettiyagaanne xillo gidiyo gishshawu, nu nagaraa atto gaana.’—1 Yohaannisa 1:9; Leemiso 28:13.

  Neeni issi ura naaqqikko, ne mooruwa ammanananne he uri neeyyo atto gaanaadan wozanappe oychchana koshshiyogee qoncce. Hegee metiyaba gidana danddayees! Hegawu xalatettaynne nena ziqqi oottiyogee koshshana danddayees. Shin atto gaanaadan wozanappe oychchiyogawu naaꞌꞌu goꞌꞌay deꞌees: Hegee ne hashiyappe deexo toohoy wodhdhanaadaaninne zaarettidi sarotettay merettanaadan maaddees.—Maatiyosa 3:8; 5:23, 24.

• Xoossaa maarotaabaa qonccissiya xiqiseta wotta dentta qoppa. Leemisuwawu, 1 Yohaannisa 3:19, 20 akeeka. He xiqisiyan ‘nu wozanay nu bolli pirddiyogaa’ yootees. Hegaa giyogee, Xoossay nuna siiqees giidi qoppiyogee metana danddayees giyogaa. Shin, he xiqisee ‘Xoossay nu wozanaappe aadhdhiyogaakka’ yootees. Waanidi? I nubaa ubbabaa erees, nuuyyo siyettiyabaanne nu shugo miyiya akeekees. Nuuni nagaranchcha gididi yelettido gishshawu, moorobaa oottana danddayiyogaa I erees.b (Mazamure 51:5) Hegaa gishshawu, bantta mooruwan tumuppe zilꞌꞌettiyageeta I aggibayenna.—Mazamure 32:5.

• Ubbatoo Kase mooruwabaa qoppoppa. Iitabaa oottidanne guyyeppe hegaa aggida daro attumanne macca asatubay Geeshsha Maxaafan odettiis. Guyyeppe kiitettida Phawuloosa geetettida Xarsseese bitaniya Saaꞌooli hegeetuppe issuwa. I Parisaawee gidiyo gishshawu, Yesuusa kaalliyageeta keehi naaqqiis. (Oosuwa 8:3; 9:1, 2, 11) Shin, I eqettiyoy Xoossaanne Masiya woykko Kirsttoosa gidiyogaa erido wode, zilꞌꞌettidi laamettiisinne harati leemisodan xeelliyo Kiristtaane gidiis. Phawuloosi ba kase eeshshan wozanappe zilꞌꞌettidoogee qoncce; shin I ubbatoo kase mooruwabaa qoppibeenna. Xoossay ayyo bessido gita maarotaa akeekido gishshawu, Phawuloosi mishiraachchuwa mishettidi yootiisinne merinaa deꞌuwa hidootaa mintti oyqqiis.— Piliphphisiyusa 3:13, 14.

Bana mooranchchadan xeelliyogaabaanne atto giyogaabaa yootiya Geeshsha Maxaafaa xiqiseta

Ermmaasa 31:34: “Taani eta naaquwaa atto gaana; eta nagaraakka naa77antto hassayikke.”

Birshshettaa: Xoossay nuuyyo atto giikko, nu mooruwa zaarettidi hassayenna. I tumuppe maariyagaa.