Issoy Issuwawu Loꞌꞌobaa Oottanaadan Yesuusi Tamaarissidobay Aybee?

Geeshsha Maxaafay yootiyobaa

“Issoy issuwawu loꞌꞌobaa oottanaadan tamaarissidobaa” giya qofaa daroti Yesuusi Deriya Bolli Tamaarissido erettida timirttiyan yootido maaraa qonccissanawu goꞌettoosona. I Deriya Bolli Tamaarissido erettida timirttiyan hagaadan giis: “Asay intteyyo oottanaadan intte koyiyo ubbabaa inttekka etayyo oottana bessees.” (Maatiyosa 7:12; Luqaasa 6:31) Issoy issuwawu loꞌꞌobaa oottanaadan Yesuusi tamaarissidobay hagaadankka qoncciis: “Harati intteyyo oottanabaa inttekka etawu oottite.”—Insayklopiidiya of Pilosopii.

• Issoy issuwawu loꞌꞌobaa oottanaadan Yesuusi tamaarissidobaa birshshettay aybee?

• Issoy issuwawu loꞌꞌobaa oottanaadan Yesuusi tamaarissidobay goꞌꞌiyaba gidiyoy aybissee?

• Issoy issuwawu loꞌꞌobaa oottanaadan Yesuusi tamaarissidobay immidi ekkiyogaa xallaa qonccissiyabee?

• Issoy issuwawu loꞌꞌobaa oottanaadan Yesuusi tamaarissidobaa waata oosuwan peeshshana danddayay?

Issoy issuwawu loꞌꞌobaa oottanaadan Yesuusi tamaarissidobaa birshshettay aybee?

Issoy issuwawu loꞌꞌobaa oottanaadan Yesuusi tamaarissidobay, harati nuna oyqqanaadan koyiyo ogiyan nuunikka eta oyqqanaadan minttettees. Leemisuwawu, daro asay harati eta bochchiyo, kehiyonne siiqiyo wode ufayttoosona. Yaatiyo gishshawu, nuunikka haratussi yaatana koshshees.—Luqaasa 6:31.

Issoy issuwawu loꞌꞌobaa oottanaadan Yesuusi tamaarissidobay goꞌꞌiyaba gidiyoy aybissee?

Issoy issuwawu loꞌꞌobaa oottanaadan Yesuusi tamaarissidobay ubba hanotatunkka nuna maaddees. Leemisuwawu, hegee . . .

• Aqo deꞌoy minnanaadan maaddees.—Efisoona 5:28, 33.

• Yelidaageeti bantta naata loꞌꞌo ogiyan dichchanaadan maaddees.—Efisoona 6:4.

• Laggetu, shoorotunne issippe oottiyageetu giddon loꞌꞌo dabbotettay deꞌanaadan maaddees.—Leemiso 3:27, 28; Qolasiyasa 3:13.

Issoy issuwawu loꞌꞌobaa oottanaadan Yesuusi tamaarissidoban deꞌiya maaray Galꞌꞌa Maachchaa geetettiya shaahuwan deꞌiya darobaara issi mala. Yesuusi yootido ha maaray, “Higgeenne [Geeshsha Maxaafan koyro ichchashu maxaafatinne] Xoossay erissidobaa yootiyageeti [Xoossay erissidobaa yootiya maxaafati]” tamaarissiyoba. (Maatiyosa 7:12) Hegaa gishshawu, issoy issuwawu loꞌꞌobaa oottanaadan Yesuusi tamaarissidobay Galꞌꞌa Maachchan odettida keehi koshshiyabaa qonccissees, hegeekka shooruwa siiqiyogaa.—Roome 13:8-10.

Issoy issuwawu loꞌꞌobaa oottanaadan Yesuusi tamaarissidobay immidi ekkiyogaa xallaa qonccissiyabee?

Akkay. Issoy issuwawu loꞌꞌobaa oottanaadan Yesuusi tamaarissidobay waannatettan immiyogaara gayttidaba. Yesuusi issoy issuwawu loꞌꞌobaa oottanaadan tamaarissido wode yootanawu koyidobay asa ubbaa oyqqiyo ogiyaba xallaa gidenna; I haray atto morkketakka waati oyqqanaakko yootiiddi deꞌees. (Luqaasa 6:27-31, 35) Yaatiyo gishshawu, issoy issuwawu loꞌꞌobaa oottanaadan Yesuusi tamaarissidobay asa ubbawu loꞌꞌobaa oottanaadan minttettees.

Issoy issuwawu loꞌꞌobaa oottanaadan Yesuusi tamaarissidobaa waata oosuwan peeshshana danddayay?

1. 1. Akeekan xeella. Ne yuushuwan deꞌiya asaa hanotaa loytta xeella. Leemisuwawu, issi uri keehi deexxiyabaa tookkidoogaa beꞌana, ne shooroy hosppitaaliya gelidoogaa siyana, woy ne ooso miiree azzanidoogaa akeekana danddayaasa. Nena ‘haratubaykka qofissiyo’ wode, eta maaddiyabaa haasayiyo woy oottiyo injjiya demmana danddayaasa.—Piliphphisiyusa 2:4.

2. 2. Qarettiyagaa gida. Neeni eta sohuwan deꞌiyabadan qoppa. Eta sohuwan deꞌiyakko neeyyo aybi siyettanee? (Roome 12:15) Neeni haratuyyo siyettiyabaa akeekanawu baaxetiyo wode, eta maaddanawu mintta koyana danddayaasa.

3. 3. Hanotaadan hana. Ubba asay dumma dumma gidiyogaa hassaya. Asay banttayyo oottanaadan harati koyiyobay neeyyo asay oottanaadan ne koyiyobaappe dummatana danddayees. Yaatiyo gishshawu, neeni oottana danddayiyo darobaa giddoppe, ne oottanaadan harati keehi koyiyobaa doora.—1 Qoronttoosa 10:24.