YELAGATU OYSHAA
Geeshsha Maxaafay Tana Waati Maaddanee?—Shaaho 3: Geeshsha Maxaafaa Nibaabiyappe Loytta Goꞌetta
Geeshsha Maxaafaa giddon keehi cora qofay deꞌiyogaa akeekennan aggakka. Hegan hidootaa qanxxoppa! Yaatiyogaappe, Geeshsha Maxaafaa keehi daro qumay giigido gibiradan xeellana danddayaasa. Hegan shiiqida ubbabaa maana danddayakka. Shin ne koyiyo qumaa doorada kallana gakkanaashin maana danddayaasa.
Geeshsha Maxaafan shiiqida “qumaappe” loytta goꞌettanawu, wudada nabbabana koshshees. Hegaadan oottanaadan ha huuphe yohoy nena maaddana.
Ha huuphe yohuwan
Geeshsha Maxaafaa wudada nabbabana koshshiyoy aybissee?
Neeni Geeshsha Maxaafaa loytta nabbabikko, appe loytta goꞌettana. Ha geeddarissuwa qoppa: Neeni shayyiya qimamiya misho haattan yeggada sohuwara kessikko guuttaa malꞌꞌees. Shin he qimamiya haattaa giddon takissikko daro malꞌꞌees.
Geeshsha Maxaafaa nibaabeekka hegaa mala. Geeshsha Maxaafaa eesuwan nabbabiyogaappe, ne nabbabiyobaa takki gaada qoppa. Mazamure 119 xaafidaagee oottidobaykka hegaa. Xoossaa higgiya xeelliyagan I hagaadan giis: “Gallassaa kumettaa taani qoppiyoogee a.”—Mazamure 119:97.
Hegaa giyogee, neeni kumetta gallassaa Geeshsha Maxaafaa nabbabayddanne qoppaydda peeꞌaaggaasa giyogaa gidennaagee qoncce. Qofay hagaa: mazamuraawee Xoossaa Qaalaa qoppanawu wodiya bazzees. Hegaadan oottidoogee I loꞌꞌobaa kuuyanaadan maaddiis.— Mazamure 119:98-100.
“Ta aayyiya tawu issitoo hagaadan gaasu, ‘Neeyyo saaminttaa giddon laappun gallassay deꞌees, qassi he saaminttan nebaa darobaa oottaasa. Yaatin amarida saatiya Yihoowassi ayssi immikkii? Ne hegaadan oottana bessees!’”—Meleeno.
Neeni Geeshsha Maxaafaa maarata qoppikko, loꞌꞌo kuushshaa kuuyaasa; leemisuwawu, neeni laggeta dooriyo wode woy moorobaa oottanaadan paacettiyo wode hegee maaddees.
Geeshsha Maxaafaa nibaabiyappe waata loytta goꞌettana danddayay?
Halchcha. Juuliyo giyo yelagiya hagaadan yaagasu, “Geeshsha Maxaafaa nabbabanawu prograamiya kessa.” Gujjadakka hagaadan gaasu, “Neeni ay, awude, qassi awan nabbabanaakko erana koshshees.”
Injjetiya hanotaa giigissa. Jaano giyo yelagiya hagaadan yaasu, “wocamay baynna sohuwa koya.” Qassikka hagaadan gaasu, “Nabbabiyo wode intte so asay kelttiya gelenna mala, neeni Geeshsha Maxaafaa nabbabiyo prograamiya eta erissa.”
Neeni elektronike miishshaa goꞌettada nabbabiyaba gidikko, xubbenna mala kiitay gelennaadan ootta. Nabbabanawu attamettida Geeshsha Maxaafaakka goꞌettana danddayaasa. Attamettida xuufiya goꞌettidi nabbabiyogee, sohuwara akeekanaadan maaddiyogaa eranchchati yootoosona. Hegaappe dumma hanotan, elektronike miishshaa goꞌettadi nabbabiyo wode, qofaa shiishshi ekkanawu keehi metees.
“Elektronike miishshaa goꞌettada nabbabiyo wode ta qofay shaahettees. Ta elektronike miishshan kiitay gelees woy baatiree wurees woy Intternneete xayees. Shin attamettida maxaafaa nabbabiyo wode, tana qofissiyabay koshshiyagaa keena pooꞌoy deꞌii giyogaa xalaala.”—Eleno.
Woossada doomma. Neeni nabbabanawu halchchido Geeshsha Maxaafaa qofaa akeekanawu, hassayanawunne appe goꞌettanawu maaddanaadan Yihoowa oychcha.—Yaaqooba 1:5.
Ne woossidobawu Yihoowi zaaruwa immana mala, neeni nabbabiyo qofaa loytta pilgga. Hegaadan waata oottana danddayay? Neeni JW Laybreeriya woy Intternneetiyan Geeshsha Maxaafaa nabbabiyaba gidikko, pilgganawu maaddiya gujjo qofaa woy xuufiya demmanawu xiqisiya bochchana danddayaasa.
Oyshata oychcha. Leemisuwawu: ‘Ha xiqisee Yihoowabaa tana ay tamaarissii? Taani Xoossaa milatana danddayiyo ay eeshshaa qonccissii?’ (Efisoona 5:1) ‘Ha xiqisiyappe ta deꞌuwan oosuwan peeshshana danddayiyo ay qofaa tamaariyaanaa?’ (Mazamure 119:105) ‘Ta nabbabidobaappe harata maaddanawu waata goꞌettana danddayiyaanaa?’— Roome 1:11.
Nena hagaadankka oychcha, ‘Taani nabbabiyobay Geeshsha Maxaafaa waanna qofaara waani gayttii?’ Hegee keehi koshshiya oysha. Aybissi? Doomettaa Maxaafaappe Ajjuutaa Maxaafaa gakkanaashin deꞌiya ubba qofay, Yihoowi saluwa Kawotettaa baggaara ba sunttaa waati geeshshanaakko, qassi ayyo haariyo maatay deꞌiyogaanne A haaroy ubbaappe aadhdhiyogaa qonccissiya Geeshsha Maxaafaa waanna qofaara gayttidaba gidiyo gishshataassa.