YELAGATU OYSHAA
Kayyottiyogaa Waata Aggana Danddayiyanaa?
Ne soo asappe issoy woy ne laggee mati hayqqidee? Hegaadan gidikko, azzanuwa genccanaadan ha huuphe yohoy nena maaddana danddayees.
Ha huuphe yohuwan
Taani bessiyagaappe aaruwan kayyottaydda deꞌiyanaa?
Daro asawu kayyoy keehi deexxeesinne adussa wodiyawu takkees.
“Ta aawaa aawaabaa qoppennan issi gallassaanne peeꞌa erikke. I hayqqoosappe naaꞌꞌu layttay aadhdhidaba gidikkonne, haꞌꞌikka abaa haasayiyo wode yeekkays.”—Oliviyo.
“Ta aawaa aayyiya ta deꞌuwan dumma dummabaa halchchanaadan keehi minttettaasu, shin ta halchchidobaappe issoynne polettishin beꞌabeykku. Ta halchchidobay polettido wode ubban, A hegaa beꞌana danddayabeynna gishshawu keehi kayyottays.”—Alisono.
Kayyottiyo wode neeyyo dumma dummabay siyettana danddayees. Leemisuwawu:
“Ta aawaa michchee azinay hayqqido wode taani keehi dagammaas, qassi adussa wodiyawu woppu gaana danddayabeykke. Tawu mata dabboy hayqqishin hegee koyro. He wode ubbabay qoppennan haniis, qassi hegee tana keehi qohiis.”—Nadino.
“Ta aawaa aaway hayqqido wode taani yiillotaas. Ayssi giikko, I ba payyatettaa naaganaadan nuuni zoridaba gidikkokka I hegaadan oottibeenna.”—Karlosa.
“Ta aayee aaway hayqqiyo wode, he sohuwan baynna mata dabboti, tananne ta bayra michchee xalaala. I hayqqanaappe kase taani A beꞌabeenna gishshawu, hegaappe simmin tana mooranchchadan xeellaas.”—Adriyano.
“Nu soo asaara keehi siiqettiya aqo laggeti kaamiya daafan hayqqidosona. Hegaappe simmin nu sooppe ooninne awukko biyo wode, hayqqanaakkonne gaada yayyays.”—Jareda.
“Ta aayee aayyiya heezzu layttappe kase hayqqaasu. A deꞌuwan deꞌishin iira daro wodiya aattabeenna gishshawu zilꞌꞌettaas.”—Juliyano.
Issi uri kayyottiyo wode, dagammana, yiillotana, bana mooranchchadan xeellana, yayyananne zilꞌꞌettana danddayees. Neeyyo hegaadan siyettikko, hegee loddan loddan aggana danddayiyogaa hassaya. Hegee agganaashin, neeni kayyottiyogaa waata genccana danddayay?
Taani kayyottiyogaa waata genccana danddayiyanaa?
Neeyyo siyettiyabaa ne laggiyawu yoota. Geeshsha Maxaafay tumu laggee “metuwaa wode maaddanaassi yelettees” yaagees. (Leemiso 17:17) Neeyyo siyettiyabaa issi urawu yootiyogan koshshiya maaduwa demmana danddayaasa.
“Kayyottiyogee bala gidenna. Issi issitoo hegaa nerkka genccanawu koyana danddayaasa. Shin guyyeppe hidootaa qanxxana danddayiyo gishshawu, issi uraara haasayiyogee loꞌꞌo.”—Iveeto.
Neeni siiqiyo urabaa qoppa. Geeshsha Maxaafay hagaadan gees: “loꞌꞌo asi ba wozanan minjjido loꞌꞌobay deꞌees.” (Luqaasa 6:45, Iizi-Tu-Riid Verzhin, 1992) Hayqqida ne siiqiyo uraara aattido loꞌꞌo wodeta xaafana woy pootuwa albbeemiya giigissana danddayaasa.
“Ta laggee hayqqanaappe kase tana tamaarissido ubbabaa xaafanawu kuuyaas, hegaa gishshawu A leemisoy tana haꞌꞌikka maaddees. Hegaa xaafidoogee taani kayyuwa genccanaadan maaddiis.”—Jefra.
Ne payyatettaa naaga. Geeshsha Maxaafay bollaa minttiyabaa oottiyogee maaddiyogaa yootees. (1 Ximootiyosa 4:8) Neeni bollawu maaddiya qumaa maana, bollaa minttiyabaa oottananne gidiyagaa keenaa shemppana koshshees.
“Kayyotiyogee neeni suure qoppennaadan oottana danddayiyo gishshawu, ne payyatettaa ubbatoo naagiyogee koshshiyaba. Qumaa miyogaanne gidiyagaa keenaa xiskkiyogaa aggoppa.”—Mariyo.
Harata maadda. Geeshsha Maxaafay hagaadan gees: “Immiyogee ekkiyogaappe aaruwan ufayssees.”—Oosuwa 20:35.
“Harata maadda; ubba qassi eti siiqiyogeeti hayqqidoogeeta maaddiyabaa ootta. Hegee haratikka waayettiyogaa neeni hassayanaadan maaddan danddayees.”—Karlosa.
Neeyyo siyettiyabaa woosan yoota. Geeshsha Maxaafay, Xoossaa Yihoowa ‘woosaa siyiyagaa’ yaagees. (Mazamure 65:2) Gujjidikka Yihoowabaa hagaadan gees: “Wozanai meqqidoogeeta i pattees; eta mazunttaakka i qachchees.”—Mazamure 147:3.
“Neeyyo koshshiya maaduwanne minttettuwa immana mala Yihoowa oychcha. Issi issi gallassati harattuppe iitana danddayoosona, shin Yihoowi ubbatoo nunaara deꞌees.”—Janeto.
Neeppe darobaa naagoppa. Ubba asaykka kayyottiyo ogee dumma dumma gidiyogaa hassaya. Yaaqoobi ba naꞌay hayqqiis giyo oduwa siyido wode, “minnennan” ixxidoogaa Geeshsha Maxaafay yootees. (Doomettaabaa 37:35) Yaatiyo gishshawu, kayyottiyogaa aggiyogee nenakka metana danddayees.
“Ta aayyee aayyee michchiya hayqqoossappe 15 layttay aadhdhidaba gidikkonne, taani O hassayanaadan oottiya darobay deꞌees.”—Taalero.
Neeyyo meqettay meqqidabadan qoppa. Hegee keehi sakkana, qassi paxanawu amarida wodiya ekkana danddayees. He wodiyan, ne bollay paxanaadan maaddiya ne oottana koshshiyabaa dottoree odana danddayees.
Siiqiyo ura hayquwan “meqqida” wozanay paxiyo ogeekka hegaara issi mala. Wolqqaama kayyuwa agganawu wode koshshees. Hegaa gishshawu danddayanchcha gida. Ha huuphe yohuwan qonccida zoreta akeeka, qassi nena loytti maaddiyagee awugaakko shaakka.