Saꞌay Moorettiiddi Deꞌees—Geeshsha Maxaafay Woygii?

“Carkkoy keehi moorettidi mata wodiyan daafaa gattanaadan oottiya darobata asay oottees. Daro katamati haattan muuhettoosona. Suuloy keehippe dariis. Keehi yashshiya gotee dariis. Haattay kaseppe qaxuwatiis. Miilooniyan qoodettiya saꞌan deꞌiya mokkiya doliyaabatunne mehiyaa doꞌaa qommoti xayiiddi deꞌoosona. Hegee hayse woy gujji odiyooba gidenna. Ha ubbabati kawotettati dumma dummabawu goꞌettiyo wolqqata laammennan aggidoogaa gaasuwaana gidiyoogaa saynisiyaa eranchchati yootoosona.”—Kawotettatu Issipetettaa waanna xaafee Antonii Gutareeshi, Carkkuwaa Hanotay Laamettidoogaa xeelliyaagan zorettanawu shiiqida kawotettatussi haasayidoogaa, Hosppune 4, 2022 kiyida irpporttee qonccissees.

“Mata wode Amarkkan deꞌiya 423 parkketi carkkuwaa hanotay laamettidoogaa gaasuwan qohettana; ubba qassi ha parkketi carkkoy keehi suulliyoogaa gaasuwan keehi qohettana giidi saynisiyaa eranchchati yootoosona. Hanana danddayiya iitabati Geeshsha Maxaafan nuuni nabbabiyo daafabatuura issi mala: hegeetikka, tamaanne diꞌuwaa, shachchay dariyo heeratun gakkiya daafabaanne abbaa beetay gujji gujji biyoogaa.”—“Fluding CHaꞌoos in Yelow Istone, e Sayn of Krayisis tu Kam,” Zi Niwu York Taymis, Tamme 15, 2022.

Saꞌan deꞌiya metoy giigana danddayii? Giiganabaa gidikko, hegaa oonee giigissanay? Geeshsha Maxaafay yootiyoobaa akeeka.

Saꞌay moorettanaagee kasetidi odettiis

Xoossay ‘saꞌaa xayssiyaageeta xayssanaagaa’ Geeshsha Maxaafay yootees. (Ajjuutaa 11:18) Ha xiqisee nuna heezzubata tamaarissees:

1. 1. Asay oottiyoobay saꞌaa keehi moorees.

2. 2. Saꞌay moorettiyoogee attana.

3. 3. Saꞌaa mooriya metota xayssanay, asaa gidennan Xoossaa.

Saꞌay sinttappe loꞌꞌo soho gidana

‘Saꞌay merinawu deꞌanaagaa’ Geeshsha Maxaafay yootees. (Eranchchaa 1:4) Saꞌay ubbatookka deꞌana.

• “Xilloti biittaa laattananne yan merinau de7ana.”—Mazamure 37:29.

Saꞌay kumetta hanotan zaarettidi ooraxxana.

• “Bazzoinne mela biittai ufaittana; bazzoi ufaissaa poocu giiddi, ciishshaa ciyyana.”—Isiyaasa 35:1.