Carkkoy Laamettiyoogee Gattiyo Qohuwaa Kawotettati Hashetidi Teqqana Danddayiyoonaa?—Geeshsha Maxaafay Woygii?

Carkkoy Laamettiyoogaa Xeelliyaagan Kawotettatu Issippetettay SHiiqido SHiiqoy Woggaa, Hidaare 20, 2022n kuuyettiis. He shiiquwaa shiiqida kawotinne eranchchati carkkuwaa laamiyaa gaasuwan qohettiya diccibeenna biittata miishshan maaddanawu maayettidosona. SHin hegee carkkuwaa laamiyaa gaasuwan gakkiya qohuwaa teqqana danddayennaagaa daroti maayettoosona.

• Kawotettatu Issippetettaa Dirijjitiyawu waanna xaafe gidida Anttonii Gutereezi Hidaare 19, 2022n hagaadan giis: “Carkkuwaa laamiyaa gaasuwan qohettiya biittata miishshan maaddanawu kuuyidoogan taani keehi ufayttaas. SHin hegee gidennaagaa eroos . . . Saꞌay giigissanawu metiya hanotan keehi qohettiis.”

• “Saꞌan carkkuwaa hanotay keehi laamettiyoogee ubba asaa qohana danddayees.”—Meerii Robinsena, kase Ayerlandden pirezddanttenne Kawotettatu Issippetettaa Asaa Maatawu Waanna Koomishinere gididi oottidaagaa, Hidaare 20, 2022.

Yelagati sinttappe saꞌay waananeeshsha giidi keehi hirggoosona. SHin, kawotettati issippe oottanawunne carkkuwaa hanotay laamettiyoogaa giigissanawu gelido qaalaa polana danddayiyoonaa? Geeshsha Maxaafay woygii?

Kawotettati issippe hashetidi oottanee, qassi etawu ushachchanee?

Kawotettati carkkuwaa hanotay laamettiyoogee gattiyo qohuwaa giigissanawu keehi baaxetikkonne, eti hegaa muleera giigissana danddayennaagaa Geeshsha Maxaafay yootees. Naaꞌꞌu gaasota beꞌa:

• “Geellai sittanau danddayenna.”—Eranchchaa 1:15.

  Hegee Woygiyoogee? Asay bana barkka haarana danddayenna gishshawu, kawotettati bantta koyiyo ubbabaa oottana danddayokkona. (Ermmaasa 10:23) Kawotettati issippe hashetidi ay keena baaxetikkokka, ha alamiyaappe metuwaa xayssana danddayibookkona.

• “Aissi giikko, asati banttana siiqiyaageeta, miishshaa siiqiyaageeta, . . . sigettennaageeta.”—2 Ximootiyoosa 3:2, 3.

  Hegee Woygiyoogee? Geeshsha Maxaafay ha wodiyan deꞌiya daroti banttana siiqiyaageetanne harata goꞌꞌiyaabaa oottanawu koyennaageeta gidanaagaa kasetidi yootiis.

Hidootawu gaaso gidiyaabaa

SHin, ha saꞌaa sinttanaa hidootay asaa kawotettati yootiyoobaara gayttidaba gidenna. Xoossay alamiyaa Haarana danddayiya Yesuus Kiristtoosa sunttiis. Abaa Geeshsha Maxaafay hagaadan gees:

• “Kawotettai a hashiyan wodhdhana; a sunttai, ‘Maalaalissiyaabaa Zoriyaagaa, Wolqqaama Xoossaa, Merinaa Aawaa, Sarotettaa Halaqaa’ geetettana.”—Isiyaasa 9:6.

Yesuusi Xoossaa Kawotettaa woy saluwaa kawotettaa kawo. (Maatiyoosa 6:10) Saꞌaanne an deꞌiyaageeta naaganawu ayyo wolqqaynne eray deꞌees, qassi yaatanawu koyees. (Mazamure 72:12, 16) A haaruwan, saluwaa kawotettay ‘saꞌaa xayssiyaageeta’ xayssana, qassi saꞌaa deꞌanawu injjetiya soho oottana.—Ajjuutaa 11:18; Isiyaasa 35:1, 7.

Carkkuwa hanotay laamettiyoogee gattiyo qohuwa muleera xayssanabaa xeelliyaagan gujjada eranawu, “Carkkuwaa Hanotay Laamettiyoogee Nuna Xayssanee?—Geeshsha Maxaafay Woygii?” giya huuphe yohuwa nabbaba.