Polotika Asati Armmageedoona Olay Matan Doommana Danddayees Goosona—Geeshsha Maxaafay Woygii?

Saynno maallado Xiqimita 10, 2022n, Raashee Yukireenen deꞌiya katamata misaꞌeeliyan qohiis, hegawu gaasoy Kirimiyaa giyoosaanne Raashiyaa gattiya waanna zarphphiyaa Yukireene biittay naaꞌꞌu gallassaappe kase xuussidi qohido gishshawu haluwaa kiyanaassa. Amarida polotika asati Armmageedoona olay matan doommana gi simmin takkennan hegee haniis.

• “[Amarkka Pirezidantte Jon F.] Keeneedi wodiyaaninne Kuuban Misaꞌeeliyaara gayttidaabay hanido wodiyaappe haa simmin Armmageedoona olay hagaa keena mati erenna. . . . Armmageedoona olaa doommana giikkoppe attin, niyukileere olaa miishshaa goꞌettana bessiyaabadan mule qoppikke.”—Amarkka Pirezidanttiyaa Jo Baydena, Xiqimita 6, 2022.

• “Armmageedoona olay matan doommana gaada qoppays; hegee kumetta saꞌaa qohana.”—Niyukileere olaa miishshaa goꞌettiyoogee kaalettiyoobaa xeelliyaagan Xiqimita 8, 2022n BBC Oduwaa dirijjitee Yukireene Pirezidanttiyaa Volodimir Zeleneska, oychchido wode yootidoba.

Niyukileere olaa miishshaa goꞌettiyoogee Armmageedoona olay doommanaadan oottanee? Geeshsha Maxaafay woygii?

Niyukileere olaa miishshay Armmageedoona olay doommanaadan oottanee?

CHii. Geeshsha Maxaafan “Armmageedoona” giya qaalay Ajjuutaa 16:16 xallan deꞌees. Hegee issi kawotettay hara kawotettaara olettiyo olaa gidennan, Xoossay ‘saꞌaa kawota ubbaara’ olettiyo olaa qonccissees. (Ajjuutaa 16:14) Xoossay asa kawotettaa xayssanawu Armmageedoona olaa goꞌettana.—Daaneela 2:44.

Armmageedoona olan saꞌan aybi hananaakko gujjada eranawu Armmageedoona Olay Aybee?giya huuphe yohuwaa nabbaba.

Saꞌaynne an deꞌiyaageeti niyukileere olan xayanee?

CHii. Asa kawotettati sinttappe Niyukileere olaa miishshaa goꞌettenna danddayoosona, shin saꞌay xayanaadan Xoossay eeno geenna. Geeshsha Maxaafay hagaadan gees:

• “Ha biittai merinaukka laamettennan de7ees.”—Eranchchaa 1:4.

• “Xilloti biittaa laattananne yan merinau de7ana.”—Mazamure 37:29.

SHin, Geeshsha Maxaafaa hiraagaynne ha wodiyan haniiddi deꞌiyaabay qonccissiyoogaadan, ha saꞌan mata wode gita laamee deꞌana. (Maatiyoosa 24:3-7; 2 Ximootiyoosa 3:1-5) Geeshsha Maxaafay sinttanaabaa xeelliyaagan yootiyoobaa eranawu, miishsha qanxxissennan Geeshsha Maxaafaa xannaꞌissiyo nu prograamiyaa goꞌetta.